Kallpachakusun tiempollanpi imatapas ruwanapaq
1. ¿Imatan Jehová Diosmanta yachanchis?
1 Jehová Diosqa tiempollanpin serviqninkunata yanapan (Heb. 4:16). Espiritual mikhunatapas “tiempollanpin” qowanchis (Mat. 24:45). ‘Tiempollanpitaqmi’ k’arak phiñakuynin p’unchaypas chayamunqa (Hab. 2:3). Diosninchis chay hina kasqanqa allinninchispaqmi (Sal. 70:5). Ñoqanchispaqmi ichaqa sasa imatapas tiempollanpi ruway. ¿Imarayku? Pantaq kasqanchisrayku, imaymana ruwanayoq kasqanchisraykupiwan. Chhaynaña kaqtinpas, ¿imaraykun tiempollanpi imatapas ruwananchis?
2. ¿Imanaqtinmi Jehová Diosta hatunchan imatapas tiempollanpi ruwasqanchis?
2 Kay pachapi runakunaqa munayninkuman hinan ruwanku, chaymi mana tiemponpichu imatapas ruwanku (2 Tim. 3:1-3). Runakunaqa sut’itan reparanku cristianokuna llank’anaman, huñunakuyman, huk ruwaykunamanpas temprano chayasqanchista, chhayna kasqanchiswantaq Jehová Diosta hatunchanchis (1 Ped. 2:12). Yaqapaschá llank’ananchisman tempranota chayanchis, Diosta servinapaq ruwayninchismantaq ichaqa tardeta. Huñunakuyninchisman tempranota chayamuspaqa Jehová Dios hina kasqanchista rikuchinchis (1 Cor. 14:33, 40).
3. ¿Imanaqtinmi tiempollanpi imatapas ruwasqanchiswan hukkunata respetanchis?
3 Chaymantapas tempranota chayaspan rikuchinchis hukkunata respetasqanchista (Filip. 2:3, 4). Huñunakuyman predicacionmanpas tardeta chayaspan ichaqa hukkunata distraesunman. Hinaspapas sichus sapa kutilla tardeta chayasunman chayqa, kaytapas nishasunman hina kanman: “Ñoqaq ruwasqaymi aswan importante qankunaq ruwasqaykichismantaqa”, nispa. Ichaqa tiempollanpi imatapas ruwaspan rikuchinchis allin ruwaq, confianapaq hina kasqanchista.
4. ¿Iman yanapawasun tiempollanpi imatapas ruwanapaq?
4 Sichus maymanpas tardeta chayanki chayqa, qhawariy imarayku chay pasasqasuykita. Tiempollanpi imatapas ruwanaykipaq yanapasunki allin horariota ruwakuy (Ecl. 3:1; Filip. 1:10). Diosmanta mañakuypas yanapasunkin (1 Juan 5:14). Tiempollanpi imatapas ruwaspan rikuchinchis Jehová Diosta, runamasinchistapas munakusqanchista (Mat. 22:37-39).