Experienciayoq iñiqmasikunawan yanapachikusun

Predicaypi experienciayoq iñiqmasikunaqa ancha valorniyoqmi kanku. Wakinqa unayñan Diosta servishanku, wakintaq ratolla yachashanku allin predicaq kayta. Paykunaqa reparashankun kay tukukuy p’unchaykunapi predicay aparikusqanta Jesucristo umallishasqanta, astawan mast’arikunanpaq yanapawasqanchistapas (Mat. 28:19, 20). Watan-watan predicasqankupin Diospa ‘hatun atiyninta’ rikurqanku, chaymi kallpachan ima pruebakunatapas atipanankupaq (2 Cor. 4:7). Kusikunkun ima yachasqankutapas hukkunaman yachachispa, chaymi ñoqanchispas paykunawan yanapachikuna (Sal. 71:18). ¿Imatan ruwasunman paykuna yanapawananchispaq?

Predicasqanchispi. Chayllaraq predicacionman lloqsiqkunaqa hukkunaq yanapaynintan necesitanku allin predicaq kanankupaq. Chaypaqqa makillan qhawana experienciayoq iñiqmasikunaq predicasqankuta (qhaway “Chayllaraq predicaqkunatan yanapanayki”, w15 15/2 pág. 30 § 1). ¿Imakunatan yacharqanki experienciayoq iñiqmasikunawan predicaspa?

Hinaspapas invitawaqmi predicaq lloqsinaykichispaq. Onqosqa kashanman chaypas, mayninpin estudianteykita wasinman apawaq paywan estudiachinaykichispaq. Estudiota tukusqaykichis qhepatan tapuriwaq: “¿Imaynatan yachachirqani? ¿Imakunapin allinyanay kashan?”, nispa.

Astawan reqsinakuychis. Paykunata astawan reqsinaykipaq invitariy familiaykiwan Bibliata estudiasqaykichis p’unchayman. Chaypin tapuriwaq Diosta imaynapi reqsisqanmanta, ima bendicionkuna chaskisqanmanta, iñiq t’aqa imayna wiñarisqanmanta, huk experienciakunata ima. Onqosqa tarikushan chayqa, wasintan visitawaqchis chaypi estudiota aparinaykichispaq.

Paykunaqa unayña Diosta servisqankupin imaymanata yacharqanku. Chaywanpas manan tukuytachu yachanku nitaq tukuytachu ruwayta atinku (Rom. 12:6-8). Wakinqa nishu kurakña kasqankuraykun pisitaña yanapawasun. Chaywanpas Diosta tukuy sonqowan servisqankumanta, allin experienciayoq kasqankumantawanmi imaymanata yachasunman.