Bibliamanta estudiota qosun
1. ¿Imaynapin runakuna salvakunqaku?
1 Diospa llaqtan 2014 watapi llank’asqanmanta willakuymi rikuchin tukuy sonqowan tukuy kallpawan Diospa gobiernonmanta predicasqanchista (Mat. 24:14). Kunanqa aswan askha runakunamanmi predicashanchis wasin-wasinta rispa, especial killakunapi invitacionkunata tratadokunatawan rakispa, callekunapi predicaspa ima. Ichaqa, ¿imatawanmi ruwananchis runakuna salvakunanpaq? Bibliamantan estudiota qonanchis Jesuspa qatikuqnin kanankupaq (1 Tim. 2:4).
2. ¿Ima tapukuykunan yanapawasun runakunaman estudiota munachinapaq?
2 Estudiota munachisun. ¿Kallpachakushanchischu direccionninta otaq celularninpa numeronta qowaqninchis runakunaman kutispa estudiota munachinapaq? ¿Munachishanchischu estudiota wasin-wasinta predicaspa? ¿Munachishanchischu estudiota revistakunata saqemusqanchis runakunaman? Chaymantapas kashanmi, ¿Imaynatan Bibliamanta yachachiyku?, ¿Imaraykun Bibliata estudianayki? nisqa videokuna, ¿qhawachishanchischu chaykunata vecinonchisman, llank’aqmasinchisman, mana iñiq familianchisman otaq escuelapi compañerokunaman? Carretapi predicaspa, ¿willashanchischu qelqakunata apakuq runakunaman estudiota gratislla qosqanchismanta?
3. ¿Imatan necesitanchis runakunaman estudiota qonapaq?
3 Jehová Diospas Jesuspas yanapawasunmi. Jesusmi runakunaman yachachimunapaq kamachishaspa nirqan ‘riychis’ nispa. ¿Imatan chaywan nisharqan? Runakuna yanapanapaq kallpachakunanchistan. Ichaqa nirqanmi: ‘Qankunawanmi sapa p’unchay kasaq’, nispa (Mat. 28:19, 20). Hinaspapas Jehová Diospunin santo espiritunta, qelqakunata ima qowanchis, preparawanchistaqmi imaynata yachachinapaq (Zac. 4:6; 2 Cor. 4:7). Chaymantapas mañakusunman estudiota qoy munayta, kallpatawan qowananchispaq (Filip. 2:13).
4. ¿Imaraykun estudiokunata qonanchis?
4 Diospa gobiernonmanta willaspaqa anchatan kusikunchis. Ichaqa, ¿imaynan sientekunchis estudiachisqanchis runakuna ñoqanchiswan kuska ‘ñañu ñanninta kawsayman riqtinku’? Aswan kusisqan kanchis (Mat. 7:14; 1 Tes. 2:19, 20). Ichaqa Jehová Diosmi astawanqa kusikunqa estudiokuna qosqanchismanta, payqa ‘manan pitapas chinkananta munanchu, [aswanmi] huchata saqespa payman llapa kutirikunankuta munan’ (2 Ped. 3:9).