Makilla kashasun estudiokunata qallarinapaq
1. ¿Imata ruwaspan hunt’asun Mateo 28:19, 20 textoq nisqanta?
1 Jesusmi qatikuqninkunata kamachirqan: “Yachachisqaykuna kanankupaq [...] yachachimuychis”, nispa (Mat. 28:19, 20). Chaymi makilla kashananchis estudiokunata qallarinanchispaq, ichaqa manan estudiokunata munachina p’unchayllachu chaytaqa ruwananchis. Qatimuq parrafokunapin chaypaq yanapaykuna kashan.
2. ¿Pikunamanmi estudiota munachisunman?
2 Estudiota munachiy. Llapa runakunaman estudiota munachisun chayqa tarisunmanmi hukllatapas (Ecl. 11:6). ¿Estudiota munachispachu predicayta qallarishanki? Estados Unidospin huk iñiq t’aqapi iñiqmasikuna kallpachakurqanku killantin estudiota munachispa predicanankupaq, hinan 42 estudiokunata tarisqaku. Qanrí, ¿llapa visitasqayki runakunamanchu munachishanki? ¿Manachu kay p’unchaykuna visitaspa estudiota munachiwaq? Mana munaqtinkuqa kallpachariy Bibliamanta yachashanallankupaq. Hinamanpas munachiy wasimasiykikunaman, llank’aqmasiykikunaman, familiaykikunaman, otaq estudiaqmasiykikunamanpas. Estudiachisqayki runatapas tapuriwaqmi familianmanta otaq amigonkunamanta pillapas Bibliamanta yachay munaq kashanchu icha manachu chayta.
3. ¿Iman yanapawasun estudiokunata qallarinapaq? ¿Maykunapin chay tratadowan predicasunman?
3 ¿Iman yanapawasunman? ¿Hayk’aqllapas kaykunata tapukurankichu? nisqa tratadon yanapawasunman estudiokunata qallarinapaq. Chaytaqa llapa uyarikuqkunamanmi saqesunman. Chaywanmi predicasunman callekunapi, plazakunapi, cartata apachispa, munaqkunaman kutispa, otaq saqesunman wasinkupi mana tarispa. Apasunmanmi viajananchis kaqtin, rantikuq rispa, llank’aq rispapas. Chay tratadoq tukuyninpin willashan imaynata estudio aparisqanchista, munachishantaqmi Imatapunin librota.
4. ¿Imaynatan ¿Tapukurankichu? nisqa tratadowan estudiota qallarisunman?
4 ¿Imaynatan qallarisunman? Uyarikuqman chay tratadota qospa qallariypi tapuykunata qhawarichiy, tapuytaq: “¿Mayqenmantan yachayta munawaq?” nispa. Akllakusqanman hina chay tapuypa kutichiyninta tratadopi qhawariychis. Chaymantataq tukukuy paginapi estudio qonanchismanta willaq parrafota leey otaq pisillapi willay. Chay qhepaman qhawarichiy Imatapunin nisqa libropi chaymanta willaq capitulota, hinaspa munachiy librota, rimaychistaq ima p’unchaypi astawan chaymanta yachawaqchis chayta.
5. ¿Imaraykun makilla kashananchis estudiokunata qallarinapaq?
5 Predicasqanchis llaqtapiqa askharaqmi kashan Bibliamanta yachay munaqkuna. ¡Maytan kusikunchis llamp’u sonqo runakunata kawsay ñanta tarinankupaq yanapaspa! Sichus makilla kashasun estudiokunata qallarinapaq chayqa, astawanmi kusikuyta tarisun (Mat. 7:13, 14).