DIOSPAQ JINA KAUSASUN
Runakunawan rimanapaq yanapaykuna: Telefononta Diosmanta willaspa
¿IMARAYKUN CHAYTA RUWAY ALLINPUNI? Telefononta runakunaman Diosmanta willaspan allinta junt’ashanchis chaskisqanchis llank’aywan (Hech. 20:24).a Chaymantapas uya-uyapura runakunaman Diosmanta mana willayta atiqtinchismi telefonopi wajasunman.
¿IMAYNATAN CHAYTA RUWASUNMAN?
Allinta preparakuy. Imamantas runakuna rimayta munanku chaytan allinta reparanayki. Chaymantataq pisillapi qelqay imakunatachus niyta munasqaykita. Jinaspapas pisi rimaykunallapin willawaq imarayku wajasqaykita, chayqa allinpunin kanman kikin teléfono mensajeta saqenaykipaq nisuqtiyki. Chaymantapas mesa patapin jap’inayki qelqasqayki papelta, celularpi otaq computadorapipas JW Library® aplicacionta otaq jw.org® nisqatapas kichasqatan jap’iwaq.
Sumaqllata rimay. Kusisqan rimanayki, uya-uyapurapas rimashawaq jinata. Ama sapa ratoqa upallakuychu. Allinmi kanman juj iñiqmasiwan kuska wajawaq chayqa. Uyariqniyki tapusunki chayqa, alto kunkawanmi jujmanta chay tapuyta niwaq iñiqmasinchis chay tapuyman kutichiyta maskhananpaq.
Jujpi rimanaykichispaq niy. Sichus uyariqniyki astawan yachayta munan chayqa, juj tapuytan saqewaq jujpi chaymanta parlarinaykichispaq. Juj qelqanchistan munachiwaq, jinaspa niwaq correonman apachinaykipaq otaq qanpuni apanaykipaq. Chaymantapas apachiwaqmi juj videota mensajepi otaq correonman. Atikuqtinqa niwaqmi jw.org paginanchispi juj yachachikuyta qhawananpaq.
a Sichus llaqtaykipi telefononta Diosmanta willayta atikun chayqa, kasukunaykin uyariqniykipa sutinta direccionninta mañakuymanta leykunata.