Diosqa tukuy tiempon yachachiwashallan

PAPAYPAS MAMITAYPAS ALLIN EJEMPLON KARQANKU

1950 watakuna tukuyta jinan papaywan mamitaypiwanqa Italia nacionmanta Canadá nacionpi Kindersley nisqa llaqtachaman jampusqaku, chay llaqtachaqa Saskatchewan provinciapin kashan. Chaypi kashaspan paykunaqa Diosmanta yacharqanku. Erqellaraq kashaspayqa askha horakunan familiawan kuska Diosmanta willaspa puriq kani. Chaymi mayninqa chansapi rimaspa nini: “Noqaqa pusaq wataymantapachan precursor auxiliar karqani”, nispa.

Papaykunaqqa manan nishuchu qolqenku karqan, chaywanpas imaymanatan ruwaqku Diosta servinankupaq. Willarisaykichis 1963 watapi imachus pasarqan chayta. Chay watapin Estados Unidos nacionpi California ladopi Pasadena llaqtapi juj jatun Asamblea aparikunan karqan. Papaywan mamitaywanqa munasharqankun chayman riyta, jinan imaymanankuta venderqanku qolqeta juñunankupaq. 1972 watapitaq Trail nisqa llaqtachaman astakurqayku, chayqa tiyasqayku llaqtamanta 1.000 kilómetro karupin kasharqan, chay llaqtaqa Canadá nacionpi Columbia Británica nisqapin kashan. Chaypin papaywan mamitaypiwan italiano simita rimaqkunaman Diosmanta willayta munasharqanku. Chaypiqa papayqa wasikunata allichaspa limpiaspa iman llank’aq. Munachirqankuña allin pagoyoq llank’anakunata chaypas manan payqa munarqanchu, aswanpas Diospa munayninta ruwaypin payqa yuyayninta churayta munasharqan.

Maytan papaytapas mamitaytapas gracias nini, paykunaqa allin ejemplon tawantiykupaq karqanku. Paykunamantan yacharqayku Diospa gobiernonta ñaupaqta maskhayta, chaytachus ruwasun chayqa Jehová Diosqa cuidawasunpunin (Mat. 6:33).

TUKUY TIEMPOYWAN DIOSTA SERVIYTA QALLARINI

1980 watapin casarakurqani Debbie sutiyoq munay hermanawan, paypa yuyayninqa Diosta munaynin ruwaypin kasharqan. Iskayniykun munasharqayku tukuy tiempoykuwan Diosta serviyta, jinan esposayqa casarakusqaykumanta kinsa killa qhepaman precursora kapurqan. Casarakusqaykumanta juj wata qhepamantaq juj juch’uy congregacionman astakurqayku, chaypin noqapas precursor kapurqani.

Tiempowanqa manañan nishuchu ganasniyku kapusharqan, chaymi juj ladoman astakuyta munasharqayku. Ichaqa watukuq umalliqwanmi ñaupaqta rimarqayku. Payqa munayllatan rimapayawarqanku, ichaqa sut’itan niwarqanku: “Qankunallataqmi chay problemataqa maskakushankichis. Mana allin kaqkunallapin umaykichis kashan, chayllapin nishuta piensashankichis. Allin kaqkunatachus maskhankichis chayqa tarinkichismi”, nispa. Chay niwasqankuqa allintapunin yanapawarqanku (Sal. 141:5). Paypa nisqanman jinan ruwarqayku, jinan imaymana allin kaqkunata tarirqayku. Hermanokunaqa askhan astawanraq Jehová Diosta serviyta munasharqanku, wawakunapas, mana qosallankuwan Diosta serviq hermanakunapas astawanmi Jehová Diospaq llank’ayta munasharqanku. Chaypin kayta allinta yacharqayku: Maypiña kaspapas astawanqa allin kaqkunatan maskhananchis, imaña mana allinchu kashan chaypas Jehová Diospin confiananchis, payñan imatapas tiempollanpi allichanqa (Miq. 7:7). Chhaynata piensayniykuta cambiaspan aswan kusisqa Jehová Diospaq llank’arqayku.

Precursorkunapaq escuelaman ñaupaq kutita rishaqtiykun tawa hermanokuna yachachiwarqanku, paykunamanta kinsaqa juj lado nacionkunapin Diosta servisqaku. Paykunan fotokunata qhawachispa niwarqanku imakunapis tarikurqanku, ima bendicionkunatas chaskirqanku chayta. Chayta rikuspa uyarispa iman nirqayku: “Noqanchispas misionero kasunman chayrí”, nispa. Jinan chay yuyaywan Diospaq llank’ayta qallarirqayku.

Chay yuyaywanmi 1984 watapipas Quebec llaqtaman astakapurqayku, chay llaqtaqa Columbia Británica nisqamantaqa 4.000 kilómetro karupin kasharqan. Quebec llaqtapiqa francés simitan rimaqku, chay simitan yachanayku karqan, jujniray costumbrekunaman iman yachakunayku karqan. Chaymantapas mayninqa manan qolqe aypawaqkuchu. Chhaynapi tarikushaspan juj kutinpas chajra llank’aq juj weraqochata valekurqayku chajranpi papata qhellapakunaykupaq. Chay tiempoqa papallan karqan mijunaykupaq. Esposayqa imaymana mijunakunatan papawan ruwaq, sumaqtan payqa wayk’uq. Chhayna sasachakuykunapiña tarikurqayku chaypas tukuy atisqaykutan ruwarqayku kusisqalla Diosta servinaykupaq. Chaymantapas chay tiempokunapin allinta repararqayku imaynas Jehová Diosqa cuidawasharqanku chayta (Sal. 64:10).

Juj kutinmi qonqaylla wajamuwarqanku, jinaspa Canadá Betelpi llank’aq rinaykupaq niwarqanku. Noqaykuqa ñan junt’arqaykuña Galaad Escuelapaq solicitudta, jinan “imatataq ruwasunri” nisharqayku, chaywanpas rillarqaykun Beteltaqa. Betelman chayaspan sucursalmanta encargakuq jujnin hermanota Kenneth Little sutiyoq hermanota tapukurqayku: “¿Imataq pasanqa Galaad Escuelapaq junt’asqayku solicitudwanri?”, nispa. Jinan payqa niwarqanku: “Chayman chayaspaña chay chakataqa chimpasun”, nispa.

Juj semana qhepallamanmi chay chakata chimpanayku p’unchayqa chayamurqan. Esposaytawan noqatawanmi Galaad Escuelaman rinaykupaq invitawarqanku. “¿Imatataq ruwasunri, Betelpichu qhepakusun icha Escuelamanchu risun?”, nispan nisharqayku. Chaypin hermano Kenneth niwarqanku: “Mayqentaña ajllakunkichis chaypas maynin p’unchayqa ninkichismi: “Qhepakullasunman karan o rillasunman karan”, nispa. Ichaqa manan jujninchu aswan allin juj kaqtaqchu pisi. Manan chayqa chhaynachu. Mayqentaña ajllakunkichis chaypas Jehová Diosqa bendecisunkichismi”, nispa. Jinan noqaykuqa Galaad Escuelaman rinaykupaq decisionta ruwarqayku. Watakunaq pasasqanman jinan allinta yacharqayku imaynas hermano Kennethpa nisqanqa cheqaqpuni karqan chayta. Noqaykupas chhaynapi tarikuq askha hermanokunatan yanaparqayku hermano Kenneqpaq niwasqanku simikunawan.

MISIONERO KASQAYKU TIEMPO

1987 watapin abril killapi Galaad Escuelaman rirqayku, chayqa Nueva York ladopi Brooklyn llaqtapin aparikurqan. Llapaykupiqa 22 estudiantekunan karqayku, chay escuelaqa 83 clase nisqan karqan. May kusisqan llapaykupas kasharqayku, chaypi yachachiqkunaqa karqanku hermano Ulysses Glass Jack Redford iman. Chay pisqantin killa Escuelapi kasqaykuqa manaraq imapin tukukapurqan. Jinan 1987 watapi 6 setiembre killapi graduakurqayku. Noqaykutaqa hermano John Goodeta esposan Marietawan kuskatan Haití nacionman kachawarqanku.

Ñaupaqqa Haití nacionpiqa kasqañan misionerokunaqa, ichaqa 1962 watapin autoridadkuna paykunata qarqopusqaku. Chaymantapachaqa noqaykun ñaupaq misionerokuna chayasharqayku. Escuelaq tukusqanman kinsa semana qhepamanqa juj congregacionpiñan llank’asharqayku. Chaypiqa pisillan hermanokuna kasqa, kinsa chunka pisqayoq jinallan kasqaku, chay congregacionqa orqo-orqo chaupipitaqmi kasharqanpas. Chaymantapas noqaykuqa waynakunallaraqtaq karqayku chayqa imaymanatan yachanayku kasharqan. Chaymantapas noqallaykun misionerokunaq wasinpiqa tiyarqayku. Haití nacionpi runakunaqa wajchan kasqaku, manan yaqa llapankupas leeyta yachasqakuchu. Chaypi kasqayku tiempopiqa imaymanan pasarqan, runakunan autoridadkuna contra jataripurqanku. Gobiernotan soldadokuna orqopurqanku, nishu fuertepunin karqan paro nisqakunapas, sinchi wayrakunapas jatarillaqmi, chaywanmi runakunaqa nishuta sufriqku.

Chaykunaña pasaq chaypas hermanokunaqa kusisqallan kaqku, paykunaqa allin ejemplon noqaykupaq karqanku. Wakinqa sinchi sasachakuypiña tarikusharqanku chaypas Jehová Diostan masta munakuqku, paymanta willaytan ñaupaqman churaqku. Juj kuraq hermanatan reqsirqayku, payqa manan leeyta yachasqachu, chaywanpas 150 textokunatan umanpi jap’isqa. Llapa imakunachus pasasqanta rikuspan astawanraq kallpachakuq kayku Diospa gobiernonmanta llapa runakunaman willanaykupaq, chay gobiernolla allin kausay apamunanmanta willanaykupaq. Bibliamanta yachachisqayku runakunamanta wakinqa tiempowanqa precursor regularmi kapurqanku, wakintaq precursor especial, umalliqkuna ima. Chaykunata rikuyqa may kusikunapaqpunin karqan.

Chay Haití nacionpin reqsirqani mormón religionmanta juj wayna misionerota, paypa sutinmi kasqa Trevor, paywanmi askha kutita Bibliamanta rimarqayku. Watakunaq pasasqanman jinan paymanta juj cartata chaskirqani, chaypin pay nimuwasqa: “¡Kay jamuq asambleapin bautizakusaq! Noqaqa maytan munashani chay Haití nacionman kutimuspa chaypi precursor especial kayta, may llaqtakunapichá mormón religionpi kashaspay purirqani chay llaqtakunamanmi kutiyta munashani”, nispa. Chhaynapunitaqmi karqanpas. Chay llaqtakunapin payqa esposanwan kuska unayta llank’arqanku.

EUROPA LADOMAN RIYKU CHAYMANTATAQ ÁFRICA LADOMAN

Tiempowanmi kachawarqanku Europa ladopi juj parteman, chay ladokunapiqa atikusharqanñan Diosmanta willayta. 1992 watapin Liubliana llaqtaman chayarqayku, chayqa Eslovenia nacionpin kashan, chayneqpin papaypas mamitaypas tiyasqaku, chaymantañan Italia nacionmanqa ripusqaku. Chay parteqa ñaupaqqa Yugoslavia nisqan kasqa. Chay tiempoqa guerran chay partepiqa kasharqan. Chaymantapas llapa chay partepi predicaciontaqa Austria nacionpi Viena llaqtapi sucursal, Croacia nacionpi Zagreb nisqa llaqtapi sucursal, Serbia nacionpi Belgrado nisqa sucursal iman qhawarishasqaku. Chaymantan ichaqa sapanka nacionpi juj Betel kapurqan.

Chay nacionpiqa juj simi rimaytan yachanayku karqan, jujniray costumbremanmi yachakunaykupas karqan. Chay Eslovenia nacionpi runakunaqa “Jezik je težek”, nispan niwaqku. Chayqa “kay simita yachayqa sasan” ninantan nin. ¡Cheqaqmi chayqa karqan! May sasawanmi chay simi rimaytaqa yacharqayku. Chaypipas hermanokunaqa allin sonqon kaqku, kasukuqkun Diospa llaqtapi ima kamachikuytapas, ima cambiotapas. Jehová Diosqa allintan bendecirqan chay ruwasqankumanta. Chaypin rikullarqaykutaq imaynas Jehová Diosqa tukuy imatapas tiempollanpi allichapun chayta. Chaymantapas Eslovenia nacionpiqa imaymanatan yacharqayku, imakunachus yachasqaykutapas astawanraqmi mat’irqayku.

Chaykuna qhepamanqa imaymana cambiokunan jamullarqantaq. 2000 watapin África ladopi kaq Costa de Marfil nacionman kachawarqanku. Ichaqa runakunan llaqtapura guerraman jaykurqanku. Jinan 2002 watapi noviembre killapi Sierra Leona nacionman kachawarqanku, chay nacionpipas chayraqmi chhayna guerra tukusqa, chay guerraqa 11 watamantan tukusqa. Noqaykupaqqa manan facilchu karqan chay Costa de Marfil nisqamanta ratulla lloqsiyqa. Ichaqa ñaupaqkunapi imakunachus yachasqaykun yanapawarqanku kusisqalla Jehová Diosta servinaykupaq.

Chay nacionpi runakuna imaynachus kasqankupin masta piensaq kayku, paykunaqa allin sonqo runakunan karqanku, hermanokunapas imaymana sasachakuypiña tarikurqanku chaypas may munakuqmi karqanku. Pisiña kaqninku karqan chaypas paykunaqa noqaykuman iman chaykunata qowaqku. Juj kutinmi juj hermana esposayman p’achata qoyta munarqan. Esposaymi ichaqa munayllata “ama” nisharqan, chay hermanan ichaqa nirqan: “Guerrapi kashaqtiykuqa juj lado nacionkunamanta hermanokunan apoyota apachimuwaqku. Noqapas qankunatan yanapayta munaykiku”, nispa. Chayta rikuspan nirqayku: “Paykuna jina sumaq sonqon noqanchispas kananchis”, nispa.

Tiempowanqa kutipullarqaykun Costa de Marfilman, ichaqa autoridadkuna mana acuerdopichu jaykusqankuraykun imaymana ch’aqwa jatarirqan. Jinan 2004 watapi noviembre killapi helicóptero juj ladoman apapuwarqanku, chaypiqa 10 kilollatan imaykutapas apanayku karqan. Chay tutaqa Franciamanta soldadokunaq kasqankupin illarirqayku, paqaristin p’uchaytaq avionpi Suiza nacionman apawarqanku. Yaqa kuska tutata jinan chaypi kaq sucursalman chayarqayku. Chaypin suyawashasqaku Sucursalmanta encargakuq hermanokuna, Escuela de Entrenamiento Ministerial nisqapi yachachiq hermanokuna ima. Sapankankun esposankuwan kuska suyawashasqaku, llapankun jatun abrazowan chaskiwarqanku, q’oñi mijunantin, askha chocolatintin iman suyawashasqaku, may munaypunin chayqa karqan.

Chaymantaqa Ghana nacionmanmi kachawarqanku. Tiempowanqa jujmantan kutirqayku Costa de Marfil ladoman. May sasaña chay tiempo karqan chaypas, astakachakuspaña kausasharqayku chaypas hermanokunaq yanapayninwanmi kallpachasqa karqayku. Noqawan esposaypiwanqa allintan yachayku imaynas Diospa llaqtanpiqa munanakuspa kausanchis chayta. Manan jayk’aqpas chaytaqa qonqananchischu. Chay sasa tiempokunapin allinta imaymanata yacharqayku, chaykunan yanapawarqanku allin cristiano kanaykupaq.

JUJ CAMBIOKUNA CHAYAMUWANKU

2006 watapin central mundial nisqamanta juj carta chayamuwarqanku, chaypin niwasqaku Asia ladoman rinaykupaq. Jujmantan juj simi rimayman juj costumbrekunaman ima yachakunayku karqan. Chay ladopiqa política nisqapas religionpas allin respetasqan, chaykunamanmi yachakunayku karqan. Juñukusqayku iñiq t’aqapipas askha simi rimaykunan kaq, chaywanpas hermanokunaqa juj sonqollan kaqku, tukuy sonqon kasukuqku Diospa llaqtanpi ima kamachikuytapas. Chaymantapas hermanokunaqa familiankuq jark’asqanña karqanku chaypas, escuelapi compañerokunaña, llank’anapi compañerokunaña, wasimasikunaña contrankupi churakurqanku chaypas Dios sonqollapunin kaqku. Chaykunaqa may admiranapaqmi kaq.

2012 watapin Israel nacionpi Tel Aviv nisqa llaqtapi juj jatun asamblea aparikurqan, chayman riyqa may munaypunin karqan. 33 watapi Pentecostés fiestapi juñunakuy aparikusqanmantapachan mana juj chhayna juñunakuy chaypi aparikurqanchu.

Chay watakunapin kachawarqanku Diosmanta willay prohibisqa kasqan juj nacionman. Chaypiqa qelqakunantinmi puriq kayku, predicaciontapas asambleakunatapas juch’uy grupollapin apariq kayku. Soldadokunaqa maytaña rinki chaypas allin armasqan chaypi kaqku, lliupin control nisqapas kaq. Ichaqa hermanokunaq yanapayninwanmi thajlla karqayku, paykunan yanapawarqanku imaynatas mana reparachikuq jinalla purina chayta.

ÁFRICA LADOMAN KUTIYKU

2013 watapin jujmanta juj willakuy chayamuwarqanku. Kinsa sucursalpi servinaykupaqmi invitawarqanku, chayqa República Democrática del Congo nisqa nacionpin kashan. Chay nacionqa jatunpunin, munaymi campokunapas, chaywanpas runakunaqa yaqa llapapas wajchan kaqku, guerrakunapas manan faltaqchu. Noqaykuqa “África ladotaqa ñamá reqsinchisña, ñataq chaypi tiyarqanchisña chayqa facilchá imapas kanqa nisharqaykun”, chaywanpas imaymanakunataraqmi chaypiqa yacharqayku. Mayninqa karutan viajanayku karqan, carreterakunapipas wakin partepiqa manan chaka kaqchu chimpanapaq. Chaywanpas allin kaqkunata qhawarinki chayqa munaymi imapas, hermanokunaqqa pisiña qolqenku kaq chaypas lloqsillaqkupunin Diosmanta willaqqa, manan faltakuqkuchu juñunakuykunamanpas ni asambleakunamanpas. Chaypipas allintan rikurqayku imaynas Diospa bendicionninwan llaqtanqa allinta ñauparisharqan chayta. Congo ladopipas imaymanatan yacharqayku, chaypipas allin amigokunatan tarirqayku, paykunaqa familiayku jinapunin kanku.

2017 watapin Sudáfrica ladopi Betelman rinaykupaq niwarqanku. Chay sucursalqa jatunmi kasqa, chaypiqa mana jayk’aq ruwanaykutaraqmi ruwaq kayku. Chaypipas imaymanakunatan yacharqayku, ichaqa ñaupaqkunapi imakunachus yachasqaykupas allintan yanapawarqanku. Chay sucursalpi wakin hermanokunaqa unayñan Jehová Diosta servishanku, paykunaqa may sumaq sonqon kanku. Maytan noqaykupas paykunataqa munakuyku. Chaymantapas may admiranapaqmi Betelpi kayqa, chaypiqa imaymana clase runakuna, imaymana costumbreyoq runakunan kashanku, chaywanpas juj sonqollan Diosta servinku. Paykunaqa llapallankun Diospa yuyaychayninman jina kausanku, chaychá Diospas paykunaman thaj kayta qon.

Kunankamaqa noqawan esposaypiwanqa imaymana llank’anakunatan chaskirqayku, imaymana costumbrekunamanmi yachakunayku karqan, juj simi rimaykunatan yachanaykupas karqan. Mayninpi manaña facilchu chaykuna karqan chaypas Jehová Diosqa tukuy tiempon munakuq kasqanta rikuchiwarqanku, llaqtanwan hermanokunawan iman chayta rikuchiwarqanku (Sal. 144:2). Kay tiempokunapiqa llapa ima yachasqaykun yanapawashanku Jehová Diosta tukuy sonqowan servinaykupaq.

Maytan mamitaytapas papaytapas gracias nini allin ejemplota qowasqankumanta, gracias ninin esposaytapas tukuy imapi yanapawasqanmanta. Gracias ninin llapa hermanokunatapas paykunapas allin ejemplon noqapaqqa karqanku. Noqaqa yachachikushallasaqmi Jehová Dioswanqa, paymi ancha jatun yachachiqninchisqa.