¿Imaynatan Jehová Diospa testigonkuna Bibliamanta yachachinku?
Jehová Diospa testigonkunaqa sonqoman chayaqta jinan Bibliamanta jujkunaman yachachinku. Noqaykuwan Bibliata estudiaspaqa imaymanamantan yachanki, chay yachasqaykin yanapasunki:
Kusisqa kausanaykipaq.
Dioswan amigontin kanaykipaq.
Jamuq tiempopi imachus pasananmanta yachanaykipaq.
Kaypin kay tapuykunamanta yachanki:
¿Imaynatan Bibliamanta yachachisqayku aparikun?
Juj Testigon Bibliamanta yachachisunki, chaytaqa ¿Munawaqchu wiñaypaq kusisqa kausayta?, nisqa libroq yanapayninwanmi sapanka yachachikuymanta yachankichis. Pisi-pisimantan yachanki imatas Biblia yachachin chayta, imaynas chaykuna yanapasunki chaytapas. Astawan yachanaykipaq kay videota qhaway.
¿Qolqepaqchu?
Manan. Jehová Diospa testigonkunaqa Jesuspa nisqantan kasukuyku, paymi nirqan: “Gratisllan chaskirqankichis, gratisllataqmi qonkichispas”, nispa (Mateo 10:8). Estudianaykipaq ¿Munawaqchu wiñaypaq kusisqa kausayta? nisqa libropas Bibliapas manan qolqepaqchu.
¿Jayk’a tiempopin aparikun?
Llapanta estudianapaqqa soqta chunka yachachikuykunan kashan. Chaytaqa tiempoyki kasqanman jinan estudiawaq. Wakin runakunaqa juj yachachikuytan sapa semana estudianku, wakin runakunataq masta estudianku.
¿Imatan ruwanay Bibliata estudianaypaq?
1. Bibliamanta yachayta munaspaqa Internetninta jw.org nisqanta willamuwayku. Chaypi sutiykimanta maypi tiyasqaykimanta willasqaykitaqa pichus Bibliamanta yachachisunki payllamanmi apachisaqku.
2. Pichus Bibliamanta yachachisunki paymi qanwan rimanqa. Paymi willasunki imayna estudianaykichista, tapukuyniykikunatapas kutichinqa.
3. Paywanña rimarinki imayna estudianaykichismanta. Chayqa aparikunman wasiykipi, telefononta otaq videollamada nisqantapas. Estudiankichisqa tiempoykiq kasqanman jinan, chayqa yaqapaschá kanman juj horata jina, munanki chayqa maspas kanmanmi.
¿Imaynachus aparikusqanta yachanallaypaq mañakuymanchu?
Arí. Chaypaqqa Internetninta jw.org nisqanta willamuwayku. Juj Testigo wajamuqtin willay Biblia estudiay imayna kasqanta yachanallaykipaq yachay munasqaykita. Chaypaqqa ¿Munawaqchu wiñaypaq kusisqa kausayta?, nisqa folletowanmi estudiankichis, chaypiqa kinsa yachachikuykunallan kashan.
Bibliata estudiaspari, ¿Testigomanpunichu tukupunay?
Manan. Jehová Diospa testigonkunaqa may kusisqan Bibliamanta runakunaman yachachiyku, chaywanpas manan mat’ipayaykuchu Testigoman tukupunankupaqqa. Respetowanmi Bibliamanta yachachiyku, ichaqa sapanka runan ajllakun imapi iñinantaqa (1 Pedro 3:15).
¿Bibliaywan estudiaymanchu?
Arí, atiwaqmi Bibliaykiwan estudiaytaqa. Jehová Diospa testigonkunaqa Mosoq Pacha Biblia nisqatan jap’iyku, chay Bibliaqa k’apaqmi, fácil entiendeymi. Chaywanpas wakin runakunaqa jap’isqanku Bibliawanpunin estudiayta munanku, chayqa manan imananpaschu.
¿Pipas compañawanmanchu Biblia estudiasqaypi?
Arí. Munaspaqa llapa familiaykitan otaq amigoykikunatan invitawaq.
Ñaupaqpi Jehová Diospa testigonkunawan Bibliata estudiarqaniña chayri, ¿atiymanchu jujmanta estudiayta?
Arí. Kunanqa yaqapaschá ñaupaqpi estudiasqaykimanta astawanraq gustasunki. Kunan yachachisqaykuqa runakunaq necesitasqanman jinan kashan. Yachachisqayku libropas dibujokunayoq videokunayoq iman kashan, sonqoman chayanapaq jinan kashan.
¿Sapallay Bibliata estudianaypaq ima yanapaypas kapusunkichischu?
Arí kashanmi. Wakinqa jujpa yanapayninwanmi Bibliata astawan entiendenku, wakinmi ichaqa sapallanku estudiayta munanku. Chhayna kaqtinqa “Bibliata estudianapaq yanapaykuna” nisqapin tarinki qanllamanta estudianaykipaq imaymana yanapaykunata, chaykunaqa gratisllan. Wakin yanapaykunaqa kaykunan:
Biblia estudianapaq videokuna. Chay videokunaqa pisillapin yachachishan Bibliamanta wakin yachachikuykunata.
Bibliamanta tapuykuna. Chaypin Bibliamanta askha tapuykunaq kutichiynin kashan.
Textos bíblicos explicados. Chaypin Bibliamanta wakin reqsisqa textokunamanta astawan sut’inchakushan.