¿Allinpaqpunichu Jehová Dios qhawarishasunkiman?

1. ¿Imanispan Diosta wakin serviqkuna piensankuman?

“JEHOVÁ Diosqa may kusisqan llaqtanwan kashan” (Sal. 149:4). ¡May munaymi chayta yachayqa ¿riki?! Chaywanpas yaqapaschá wakinqa ninkuman: “Arí, Jehová Diosqa kusisqan llaqtanwan kashan, ¿noqawan pay kusikunmanchus?”, nispa. Ñaupa tiempopipas Diosta wakin serviqkunaqa chhaynatan piensaqku (1 Sam. 1:​6-10; Job 29:​2, 4; Sal. 51:11).

2. ¿Pikunatan Jehová Dios allinpaq qhawarin?

² Bibliaq willasqanman jinaqa juchasapa runakunaña kanchis chaypas, atisunmanmi Diospa amigon kaytaqa. Ichaqa, ¿imatan chaypaq ruwananchis? Jesuspi iñisqanchistan rikuchinanchis, bautizakunanchistaqmi (Juan 3:16). Chayta ruwaspan rikuchisunchis juchanchiskuna saqepusqanchista, Diospa munayninta ruwananchispaq payman entregakusqanchistapas (Hech. 2:38; 3:19). Chayta ruwaspan Jehová Diosta kusichisunchis, amigonta jinataqmi chaskiwasun. Astawanqa kusichisun munaynin ruwananchispaq promesa ruwasqanchista junt’ananchispaq kallpachakuspan (Sal. 25:14).

3. ¿Ima tapuykunamantan kaypi yachasunchis?

³ Ichaqa, ¿imaraykun wakin ninkuman “manan Diosqa allinpaqqa qhawariwanmanchu”, nispa? ¿Imaynatan Jehová Dios rikuchinman noqanchiswan kusisqa kasqanta? ¿Iman yanapawasunman Jehová Dios sumaqpaq qhawariwasqanchismanta ama iskayananchispaq? Chaykunamantan kaypi yachasun.

¿IMARAYKUN WAKIN NINKUMAN “MANAN DIOSQA ALLINPAQQA QHAWARIWANMANCHU” NISPA?

4, 5. Mana valeqpaq jinaña qhawarikusunman chaypas, ¿imamantan mana jayk’aqpas iskayananchischu?

⁴ Wakinqa juch’uymantapachan mana valeqpaq jina qhawarikuqku (Sal. 88:15). Adrián sutiyoq hermanon nin: “Noqaqa juch’uymantapachapas mana valeqpaq jinan qhawarikuq kani. Juj kutinmi juch’uyllaraq kashaspa Jehová Diosmanta mañakurqani llapa familiayta paraisopi kausachinanpaq, “noqataqa amapas chaypiqa kausachiwankichu” nispan nirqani”, nispa. Tony sutiyoq hermanopas yaqa chhaynatan willakullantaq. Paytaqa papanwan mamitanpiwansi mana valeqta jina qhawarichiqku. Paykunaqa manas Testigochu kasqaku, chay hermanon willakun: “Manan jayk’aypas “munakuykin” niwaqkuchu, nitaqmi ima ruwasqaywanpas contentakuqkuchu. Manan gustonkupaq jinachu ima ruwasqaypas kaq”, nispa.

⁵ Mayninpi pisipaq jina qhawarikunchis chayqa, kaytan allinta yuyarinanchis: Jehová Diosmi llaqtanmanqa pusamuwarqanchis (Juan 6:44). Mañana noqanchis reparakunchischu chaypas, payqa allintan rikushan imakunas sonqonchispi kashan chayta, ¡maytan paypaqqa valenchis! (1 Sam. 16:7; 2 Crón. 6:30). Chhaynatataq Dios noqanchismanta piensan chayqa, manan chaymantaqa iskayananchischu, creenanchismi paytaqa (1 Juan 3:​19, 20).

6. ¿Imaynatan apóstol Pablo qhawarikuq imakunachus ruwasqanpi piensaspa?

⁶ Wakinqa manaraq Diosta reqsishaspa imachus ruwasqanchismantapaschá llakisqa, sonqo nanasqa kashanchis (1 Ped. 4:3). Wakinqa unayñapaschá Diosta servishanchis, ichaqa ima mana allinpaschá noqanchispi kashan. Sapankan yachakunchis imamantas sonqonchis nanashan chayta. Ichaqa manan noqallanchischu chhayna kashanchis, ñaupa tiempopi Jehová Diosta serviqkunapas chhaynapin tarikurqanku. Apóstol Pablomanta yachasun, paypas imakunachus ruwasqanpi piensaspaqa mana valeqpaq jinan qhawarikuq (Rom. 7:24). Juchanmanta arrepientekuspa bautizakurqanña chaypas, juj “apostolkunamanta aswan juch’uypaqmi” qhawarikuq. Chaymantapas “juchasapakunamanta aswan juchasapapaqmi” qhawarikuq (1 Cor. 15:9; 1 Tim. 1:15).

7. Arrepientesqa kashanchis chayqa, ¿imamantan mana iskayananchischu?

⁷ Bibliaq willasqanman jinaqa sichus arrepientekusun chayqa, Jehová Diosqa perdonawasunmi (Sal. 86:5). Sonqomantapunichus arrepientekurqanki, manañataq mana allin kaqta ruwankichu chayqa, manapunin Diosmantaqa iskayanaykichu; payqa perdonapusunkiñan (Col. 2:13).

8, 9. ¿Iman yanapawasunman “Jehová Diosqa pisipaqchus jina qhawarin ima ruwasqaytapas” nispa ama ninanchispaq?

⁸ Lliupas maytapunin munasunman Jehová Diosman tukuy kallpanchis qoyta. Ichaqa paypaq llank’ashaspapas yaqapaschá wakinqa nisunman: “Pisitan ruwashani, manachus jina Diosqa allinpaqchu qhawariwashanman”, nispa. Amanda sutiyoq hermanan nin: “Noqaqa Jehová Diospaqtaq llank’ashani chayqa astawanraqmi paymanqa qonay, nispan niq kani. Chhaynata piensasqayraykun mayninqa mana atinaykunataraq ruwayta munaq kani. Mana atispataq “manan Jehová Diosqa allinpaqqa qhawariwanmanchu, imachá kani” nispa niq kani”, nispa.

⁹ Nimusqanchis jina, yaqapaschá wakinqa nisunman: “Pisitan ruwashani, manachus jina Jehová Diosqa allinpaqqa qhawariwanmanchu”, nispa. ¿Iman yanapawasunman ama chhaynata piensananchispaq? Kaypin allinta piensananchis: Jehová Diosqa manan runakuna jinachu mana contentakuq, aswanmi payqa atinallanchista imatapas mañawanchis; manan mana atinanchistachu. Sichus tukuy atisqanchista paypaq llank’ashanchis chayqa, pisitaña askhataña ruwashanchis chaypas valoranmi payqa chayta. Ñaupa tiempopi Diosta serviqkunapi piensallasuntaq. Jujmanta apóstol Pablopi piensasun. Payqa unaymi tukuy kallpanwan Jehová Diospaq llank’arqan, karu llaqtakunatan viajarqan, askha llaqtakunapin iñiq t’aqakunatapas qallarichirqan. Tiempowanmi ichaqa manaña ñaupaqpi jinañachu imatapas ruwarqan. ¿Saqepunman karqan Jehová Dios payta? Manan. Pabloqa atisqanman jinan ruwashallarqan imachus ruwananta, Jehová Diospas bendecillarqanpunin paytaqa (Hech. 28:​30, 31). Noqanchispas manapaschá tukuy munasqanchistachu Jehová Diosman qoyta atisunchis. Ichaqa, ¿imayna sonqowanmi paypaq llank’ashanchis? Chaytan payqa valoran. Ichaqa, ¿imaynatan Jehová Dios rikuchin valorawasqanchista? Chayta qatiqpi yachasunchis.

¿IMAYNATAN JEHOVÁ DIOS RIKUCHIN NOQANCHISWAN KUSISQA KASQANTA?

10. ¿Imaynatan Jehová Dios rikuchin munakuwasqanchista? (Juan 16:27).

¹⁰ Bibliawanmi. Jehová Diosqa munakunmi kamachinkunataqa kusisqan paykunawan kashan. Bibliapipas iskay partepin willashan imaynas Jesustaqa “munakuykin” nirqan chayta. Paywanqa kusisqan Diosqa kasharqan (Mat. 3:17; 17:5). ¿Munawaqchu Jehová Dios “munakuykin” ninasuykita? Llapanchispas munasunmanmi ¿riki? Ichaqa manapaschá payqa cielomantapachaqa chaytaqa nimuwasunmanchu, simin qelqapin ichaqa chhayna rimasqan kashan. Jesuspas chhayna sumaq simikunawanmi discipulonkunataqa rimapayaq. Yachasqanchis jinapas Jesusqa Papan jinan karqan (leey Juan 16:27). Jesusqa janaq pacha Taytan jinapunin imatapas ruwaq. Payqa juchasapaña discipulonkuna karqan chaypas munakuqmi paykunata, chaypichus piensasunman chayqa Jehová Diospas kaqtan ruwanman karqan (Juan 15:​9, 15).

11. ¿Imaraykun ima llakipipas tarikuspa mana ninanchischu “Diosqa manañachá munakuwanchu” nispa? (Santiago 1:12).

¹¹ Imakunachus ruwasqanwanmi. Jehová Diosqa yanapaytapunin munashawanchis, mayninqa imakunachus faltawashanchis chaykunata iman qowanchis. Mayninmi ichaqa Jobta jina jinallata qhawawanchis ima llakipipas tarikunanchista (Job 1:​8-11). Ichaqa chhaynapi tarikuspaqa manan ninanchischu: “Manañachá Diosqa munakuwanchu”, nispaqa. Aswanmi chhaynakunapi tarikuspa rikuchinanchis maytas payta munakunchis chayta (leey Santiago 1:12). Chaymantapas chhaynakunapi tarikuspan rikusunchis imaynas payqa yanapawashanchis chayta, imaynas aguantananchispaqpas kallpata qowashanchis chaytapas.

12. ¿Imatan yachasunman Dimitri hermanoq experiencianmanta?

¹² Asia ladopi Dimitri sutiyoq hermanomanta yachasun. Payqa mana llank’anayoqsi rikukapusqa. Maskhasharqanña llank’anata chaypas, askha killañas mana tarishasqachu, jinas payqa Diospi confiasqanta rikuchinanpaq astawan predicacionman lloqsiyta qallarisqa. Killakunaqa pasashasqas manapunitaqsi llank’anataqa tarisqachu. Chayllamansi onqoy paytaqa jap’ipusqa, manas jatariytapas atipusqachu. Jinas payqa sinchi nanasqa nisqa: “¿Ima taytataq noqari kani, ima qosataq kanipasri, allinpaqchus Jehová Diospas qhawariwanman?”, nispa. Juj ch’isinsi ususichan juj papelpi imprimisqa Isaías 30:15 textopi, “thajlla kaspan, noqapi confiaspallan kallpayoqqa kankichis” nispa nisqanta. Chaytas papanman apasqa, jinaspa nisqa: “Papáy, llakisqa kanki chayqa kay textota leenki”, nispa. Chaypis chay hermanoqa reparasqa imaynas Diospa yanapayninwan familianqa allillan kasharqan chayta. Paymi nin: “Sonqoytan tiyaykachinay karqan. Astawanmi Diosniypipas confianay karqan”, nispa. Chhayna llakipichus tarikushanki chayqa, ama kayta qonqaychu: Jehová Diosqa qanwanmi kashan, payqa qosunkin kallpata llapa imatapas aguantanaykipaq.

13. ¿Imaynatan Jehová Dios rikuchiwallasunmantaq munakuwasqanchista?

¹³ Hermanokunawan hermanakunawan iman. Jehová Diosqa atiyniyoqmi, payqa hermanokunawanpas kallpachachiwasunmanmi. Chaymi pasasqa Asia ladopi juj hermanata. Payqa mana llank’anayoqsi rikukapusqa, chaymantataqsi onqorapusqa. Chay qhepallamansi qosanpas juchaman urmasqa, jinaspa manaña umalliqchu kapusqa. Mana aguantay atiysi chay hermanapaqqa llapa chaykuna kasqa. Paymi nin: “¿Imaraykutaq kaykunari pasawashan, imatachu malta ruwarqanipas; manañachu Jehová Diosqa munakapuwanpas?, nispan nisharqani”, nispa. Payqa Jehová Diostas nisqa: “¿Munakuwashankiraqchu, icha manañachu? Willariway chayta”, nispa. Jehová Diosqa uyarimusqas chay mañakusqanta. Paymi nillantaq: “Umalliqkunan allinta kallpachawarqanku, sut’itan rikuchiwarqanku imaynas Jehová Diosqa munakuwashallarqan chaytapas”, nispa. Tiempowansi payqa Jehová Diosta nillasqataq paywanchus kashan icha manachus chayta rikuchinanpaq. ¿Imatan Jehová Dios ruwanman karqan? Paymi nillantaq: “Chay p’unchayllataqmi juj cartata chaskirqani, chaypin askha hermanokuna sumaqta rimapayamuwasqaku. Chayta leespan repararqani imaynas Jehová Diosqa llapa mañakusqaytapas uyarimusharqan chayta”, nispa. Rikusqanchis jina, Jehová Diosqa hermanokunawanmi rikuchiwallasunmantaq mayta munakuwasqanchista (Sal. 10:17).

14. ¿Imatan Jehová Dios hermanokunawan ruwachillantaq chhaynapi munakuwasqanchista rikuchiwananchispaq?

¹⁴ Jehová Diosqa hermanokunawan yuyaychachispan rikuchiwallanchistaq munakuwasqanchista. Apostolkunaq tiemponpipas apóstol Pablowanmi chunka tawayoq cartakunata qelqachirqan. Chaypiqa yuyaychaykunata consejokunata iman qochirqan. ¿Imaraykun Jehová Dios chayta ruwachinman karqan? Kamachin runakunata munakusqanraykun. Payqa “imaynan juj taytapas munakusqan churinta anyan” chhaynatan kamachinkunawanpas ruwan (Prov. 3:​11, 12). Chhaynaqa, sichus pipas Bibliawan yuyaychawanchis chayqa manan ninanchischu: “Manañachá Diosqa munakuwanchu”, nispaqa. Aswanmi chaywan Diosqa rikuchiwashanchis mayta munakuwasqanchista (Heb. 12:6). ¿Imaynatan Jehová Dios rikuchiwallasunmantaq munakuwasqanchista? Chayta qatiqpi qhawarisun.

¿IMATAWANMI RUWAN NOQANCHISWAN KUSISQA KASQANTA RIKUCHINANPAQ?

15. ¿Pikunamanmi Jehová Dios qon espiritunta, imapin rikukun Jehová Dios noqanchiswan kasqanta?

¹⁵ Jehová Diosqa espirituntan qon munakusqan runakunaman (Mat. 12:18). Tapukuy: “¿Rikukushanchu noqapi espirituq rurun?”, nispa. Chaypaq kaypi piensay, ¿ñaupaqmanta aswan pacienciakuqchu kunan kapunki? Chhayna kashanki chayqa Jehová Diosqa qanwanpunin kashan. ¿Rikukushanchu espirituq jujnin rurunkunapas qanpi? Chhayna kashan chayqa qanwanpunin Jehová Diosqa kashan, (qhaway “Espirituq rurun” nisqa willakuyta).

16. 1 Tesalonicenses 2:4 textoq nisqanman jina, ¿pikunawanmi Jehová Dios willachin gobiernonmanta allin willakuykunata? ¿Imaynatan qhawarikunki chayta yachaspa?

¹⁶ Jehová Diosqa allinpaq qhawarisqan runakunawanmi willachin gobiernonmanta allin willakuykunataqa (leey 1 Tesalonicenses 2:4). Chaypaq yachasun Jocelyn sutiyoq hermanamanta. Paysi reparasqa chayqa chhaynapuni kasqanta. Juj kutinsi rijch’arinanpaq mana ima ruwananpaqpas ganasnin kasqachu. Paymi nin: “¿Imatataq Diosmanpas qosaq? Manan imaypas kanchu, nisharqanin. Ichaqa chay tiempoqa precursoran kasharqani, Diosmanta willaqtaqmi chay p’unchayqa lloqsinay karqan. Jinan paypa kallpanta mañakuspa lloqsirqani”, nispa. Chay tutamantansi chay hermananchisqa Mary sutiyoq señorawan rimasqa. Payqa sumaqtas uyarikusqa, paywansi Biblia estudiayta qallarisqaku. Killakunaq pasasqanman jinas Maryqa willakusqa imaynas chay tupasqanku p’unchaykuna Diospa yanapayninta mañakusharqan chayta. ¿Imatan chaymanta yachanman karqan Jocelyn? Paymi nin: “Jehová Diospas “munakuykin” niwashanman karqan jinatan qhawarikurqani”, nispa. Manapaschá llapa runakunachu sumaqta uyariwasunchis. Ichaqa Jehová Diosqa kusisqan kashan payta servinanchispaq kallpachakusqanchista rikuspa.

17. ¿Imanisunmanmi Vicky sutiyoq hermanaq imachus nisqanmanta? (Salmos 5:12).

¹⁷ Jehová Diosqa paypa allinpaq qhawarisqan runakunapaqmi valechin Jesuspa sacrificio ruwasqanta (1 Tim. 2:​5, 6). Ichaqa yaqapaschá pipas iñinmanña Jesuspa sacrificio ruwasqanpi chaypas, bautizasqaña kashanman chaypas, “manachus jina Diosqa allinpaqqa qhawariwanmanchu” ninman. Chhaynata piensashanki chayqa manan sonqoykipiqa confianaykichu, Jehová Diospin ichaqa mana iskayaspa confiananchis. Paypaqqa pipas Jesuspa sacrificio ruwasqanpi iñin chayqa chanin runan chay runaqa, imaymana bendiciontataqmi paymanqa qonqapas (leey Salmos 5:12; Rom. 3:26). Vicky sutiyoq hermanamanta yachasunchis. Payqa allintas piensasqa Jesuspa sacrificio ruwasqanpi. Payqa “manachus jina Jehová Diosqa munakuwanmanchu” niqsi. Ichaqa Jesuspa sacrificio ruwasqanpi allinta piensaspan nirqan: “Diosqa unaymi pacienciakushawarqan. “Munakuyniykiqa manan aypamuwanmanchu, wawaykiq wañusqanpas manan juchaytaqa pampachachiyta atinmanchu” nispapas nishayman jinan noqaqa kasharqani”, nispa. Chay hermana jinachus Jesuspa sacrificio ruwasqanpi allinta piensasun chayqa noqanchispas allintan reparasun imaynas Diosqa munakuwanchis chayta.

18. Sichus janaq pacha Taytanchista munakushallasun chayqa, ¿imamantan mana iskayananchischu?

¹⁸ Kallpachakusunmanña kaypi yachasqanchisman jina imatapas ruwananchispaq chaypas, yaqapaschá mayninqa pisipaq qhawarikusun. “¿Allinpaqchu Jehová Dios qhawariwanman?” nispapaschá tapukusun. Chhayna piensaykuna jamusunki chayqa kaytan yuyarinayki: Payqa sumaqtan munaytan qhawarin “tukuy tiempo munakuqninkunataqa” (Sant. 1:12). Chhaynaqa kallpachakushallay Jehová Diosman astawan qayllaykunaykipaq, kallpachakuytaq imaynas payqa munakusunki chayta reparanaykipaqpas. Amapunin qonqankichu: “Payqa manan sapankanchismanta karupichu kashan” (Hech. 17:27).