Estudiayqa allinninchispaqmi

¿HAYK’AQLLAPAS rikurqankichu runakunata fruta akllashaqta? Poqosqachus icha manachus chayta yachanankupaqmi yaqa llapallanku colorninta qhawanku, may hatunchus kasqantawan, wakintaq frutata muskhiykunku, llamiykunku, q’apiykunku ima. Wakintaq sapanka makinkuwan hoqarispanku tanteanku mayqenchus aswan jugosapa kashan chayta. ¿Imaraykun chaykunata ruwanku? Sumaqninta akllanankuraykun.

Diospa Simin Qelqata estudiayqa aswan allinraqmi sumaq fruta akllaymantaqa. Sichus Biblia estudiaytaraq kawsayninchispi ñawpaqman churasun chayqa, munakuyninchis iñiyninchispas astawanmi wiñanqa, aswan allintan predicasunchis, imatapas allin yuyaywan Diospa munasqanman hinan ruwasun. Chaymantan Proverbios 3:15 nin: “Manan ima munasqaykipas yachaymanqa aypanmanchu”, nispa. Estudiasqayki allinniykipaq kananta munanki chayqa, yachanaykin imayna estudiayta (Col. 1:9, 10).

¿Imataq estudiayri? Estudiayqa manan hawan-ukhun leeyllachu, aswanpas tiempota hap’ispa tukuy yuyaywan allin-allinta t’aqwiymi. Chaypaqmi leesqata allinta qhawarina hawanmanta ukhunmanta, hinaspa ñawpaqpi yachasqanchiswan tupachina, reparanataq imarayku imapas nikusqanta. Estudiashaspa imatapas mosoq kaqta tarispaykiqa chaypi yuyaymanay, yuyaykuytaq chayman hina ruwanaykipaq. Jehová Diospa testigonña kanki chayqa, yuyaykuy chay yachasqaykiwan runamasiykikunata yanapanaykipaq.

¿Imayna sonqowanmi estudiana?

Estudianapaqqa necesitanchismi Bibliata, qelqakunata, lapicerota, huk cuadernotawanpaschá alistakunchis. Ichaqa, ¿yachananchispaq hinachu sonqonchis kashan? Biblian chaymanta nin: “Esdrasqa allintapunin sonqonta wakichikurqan [otaq preparakurqan] Señor Diospa kamachikuy siminta allinta yachananpaq, hunt’ananpaq. Chay kamachikuykunatan unanchaykunatan llapallanta Israel runakunaman yachachirqan”, nispa (Esd. 7:10). ¿Imaynatan sonqonchista preparasunman yachananchispaq hina?

Diosmantan mañakunanchis, chhaynapin respetowan Bibliata allinta estudiasunchis. Anchatan munanchis sonqonchisman Diospa yachachikuyninkuna chayananta. Chaymi sapa estudiananchispaq Diosmanta mañakunanchis santo espiritunta (Luc. 11:13). Rogakunanchismi estudiasqanchista entiendenapaq, Diospa munayninwan imayna tupasqanta yachanapaq, hinallataq chayman hina allin kaqta mana allin kaqta reparanapaq, kamachikuyninkunata hunt’anapaq, paywan allinpi kayta yachanapaqpas (Pro. 9:10). Estudiaspaqa ‘askhatapuni qoq Diosmantan’ yachayta mañakushanallanchis (Sant. 1:5). Yachasqanchiswantaq qhawarikunanchis imayna kasqanchista hinaspa Kamaqninchista mañakunanchis yanapayninta chhaynapi mana allin yuyaykuykunata chinkachinanchispaq. Amapunitaq qonqasunchu imaymana yachachiwasqanchismanta ‘gracias qoyta’ (Sal. 147:7). Chhaynata mañakuspa estudiasunchis chayqa, Jehová Dioswanmi astawan hukllachakusun, sonqomantataq Bibliaq nisqanta kasukuyta munasun (Sal. 145:18).

Jehová Diospa serviqninkunallan Paypa yachachikuyninkunata chhaynata estudianchis. Diosta mana kasukuq runakunaqa yanqapaq hinan qhawarinku wakin leesqankuta, ñoqanchismi ichaqa mana chhaynachu kanchis Diospi confiasqanchisrayku (Pro. 3:5-7). Mayqen yachachikuytapas mana entiendespaqa, manan chayraykuchu “pantarqonkuchá” ninchis, aswanpas Diospin suyakunchis sut’inchakunanpaq, chaykamataq astawan t’aqwirinchis (Miq. 7:7). Esdras hinan ñoqanchispas kasukunanchispaq hukkunaman yachachinanchispaqpas Bibliata estudianchis, chay yuyaywan estudiasqanchisraykun ima yachasqanchispas allinninchispaq kanqa.

¿Imaynatan estudiana?

Manaraq parrafokunawan qallarishaspan titulota leena, chhaynapin yachasun imamantas yachasunchis chayta. Chaymantataq qhawarinanchis subtitulokunata tituloq nisqanwan tupachispa. Hinallataq qhawarina dibujokunata, fotokunata, recuadro nisqakunata, yuyarinapaq listakunatapas. Hinaspan tapukunanchis: “¿Imatan yachasaq, imaynatan chay yanapawanqa?” nispa. Chhaynapin listo kasun estudiayta qallarinapaq.

Chaymantan reparana mayqenkuna importante yachachikuykuna kasqanta. Huñunakuypi estudianapaq Qhawaq revistapi, wakin librokunapipas kanmi paginankunaq uranpi tapuykuna. Allinmi kanman leesqanchisman hina kutichiykunata marcayqa. Tapuykuna mana kaqtinpas marcasunmanmi importante yachachikuykunata. Imatapas chayraq yachashanchis chayqa, astawanmi t’aqwirina allinta entiendenanchispaq. Reparay ima rikch’anachiykunawansi yanapachikuwaq predicacionpi otaq discursota qospa. Yuyaykunanchismi chay yachachikuykunawan pikunata kallpachananchispaq. Chaymantapas marcananchismi ruwananchispaq hina allin yachachikuykunata, hinaspa estudiayta tukuspa kutipananchis.

Estudiasqanchisman hinan textokunata maskhananchis, hinaspa qhawarinanchis parrafoq yachachisqanmantachu rimashan chayta.

Mayninpin estudiashaspa tarinchis sasa entiendenakunata otaq imamantapas astawan yachayta munanchis. Wakin parrafokunapi mana sut’inchakuqtinqa, huk ratopi estudiananchispaqmi anotasunman. Wakin textokunaq nisqanqa sasa entiendenan otaq mana reparanchischu imaynatachus parrafoq nisqanwan tupasqanta; otaq hawan ukhullanta yachanchis huk yachachikuymanta, munanchistaq hukkunaman yachachinapaq hina entiendeyta. Chaykunataqa estudiasqanchista tukuspañan t’aqwisunman.

Hebreo cristianokunaman apóstol Pablo cartata qelqashaspanmi, kuskanpi kashaspa nirqan: “Aswan allinqa kaymi”, nispa (Heb. 8:1). Ñawpa capitulokunapin rikuchisqaña Jesucristo Uma Sacerdote kaspa hanaq pachapi Diospa qayllanman haykusqanmanta (Heb. 4:14–5:10; 6:20). Ichaqa 8 capitulopin rimayta qallarirqan ñawpaqpi willasqan paykunaq allinninpaq kasqanmanta, chaymi allinta chaykunapi yuyaymananankupaq “aswan allinqa kaymi” nirqan. Rikuchillarqantaqmi Cristoq paykunarayku Diospa qayllanpi rikhurisqanta, “Ch’uyay-ch’uya Cheqasman” mana manchakuspa haykunankupaq ñanta kicharisqantawan (Heb. 9:24; 10:19-22). Chay suyakuyninkupi allinta takyaspaqa allintan uyarikunkuman karqan Pabloq iñiymanta, aguantaymanta, cristiano hina puriymantawan qelqasqanta kasukunankupaq. Ñoqanchispas imatapas estudiashaspa aswan allin yachachikuykunapi yuyayninchista churasun chayqa, allintan yachasun imamantas rimashasqanta, umanchispitaq allinta hap’isun imanaqtinmi chaykunata kasukunanchista.

Kallpachakunanchismi estudiasqanchisman hina kawsananchispaq. Chaymi imatapas yachaspaqa tapukunanchis: “¿Imaynatan yanapawan allin runa kanaypaq? ¿Chayman hinachu kashan ima yuyaykusqaypas? ¿Imaynatan yanapawanqa sasachakuyniykunata atipanaypaq, ima ruwanaypaqpas? ¿Imaynatan familiaypi, predicacionpi otaq iñiq t’aqapipas yanapawanman?” nispa. Mañakuywanmi yuyaymanananchis chay tapuykunapi, chayman hina tukuy imatapas ruwananchispaq.

Huk capitulota tukuspataq kutipananchis estudiasqanchista, hinaspa yuyarinanchis importante yachachikuykunata, chaykunamanta imakuna nikusqantapas, chhaynapin qhepamanpas yuyarishallasun chaykunata.

¿Imakunatan estudiasunman?

Diospa serviqninkunapaqqa askha qelqakunan kan estudiananchispaq. Sapa p’unchaymi t’aqwisunman Diospa Siminta sapa p’unchay t’aqwisun nisqa folletopi textokunata, chaykunamanta ima willakusqantawan. Huñunakuyninchispaq preparakuypas allinninchispaqmi kanqa. Wakinqa tiempotan hap’inku manaraq Diosmanta yachashaqtinku lloqsimuq qelqanchiskunata estudianankupaq, hukkunataq semanapi Bibliata estudiasqankumanta mana entiendesqanku textokunata t’aqanku astawan t’aqwinankupaq.

Sichus pisillaña tiemponchis kashanman huñunakuypaq allinta preparakunanchispaq chayqa, manan hawan-ukhuntachu preparakuna, nitaqmi manaña imatapas preparakunachu. Aswanmi qhawarina maykamalla estudiay atisqanchista, hinaspan chayta allinta estudiananchis. Sapa semanan chayta ruwananchis, pisi-pisimantataq wakin qelqakunatawan preparakunanchis.

“Wasiykitan sayarichinayki”

Biblian nin: “Hawapi ruwanaykikunataraq ruwamuy, chakra llank’anaykikunataraq llank’amuy”, nispa (Pro. 24:27). Chaywanmi yachanchis Jehová Diosqa familianrayku allinta llank’aq qosataqa allinpaq qhawarisqanta. Ichaqa qosakunaqa manan qonqanankuchu Diosman asuykunankupaq familianku yanapaytaqa. Chaymi kaq textollapitaq Biblia nin: “Chaymantañan wasiykita sayarichinki”, nispa. ¿Imatan chaypaq necesitakun? ‘Allin yuyaytan’ otaq allin reparaq kayta (Pro. 24:3).

Allin reparaqqa allin yuyaywanmi imatapas qhawan. Chaymi familianchiswan estudiasqanchis allin kananpaqqa allintan reparananchis familianchispa iñiynin imayna kasqanta. ¿Wiñarishankuchu Diosmanta yachayninkupi? Chayta yachanapaqmi allinta uyarinanchis imamanta rimasqankuta. ¿Phiñasqa hinachu imamantapas rimapakunku? ¿Qolqeyoq kaymantachu astawan rimanku? Chaykunatan makilla reparananchis. Wawanchiskunawan kuska predicashaqtinchis, ¿mana p’enqakuspachu Jehová Diospa testigon kasqankuta willanku compañeronkunawan tupaspanku? ¿Kusisqachu familiapi Bibliata leenku estudiankupas? ¿Diospa munasqanman hinachu kawsanku? Chaykunatan familiapi umallikunaqa allinta reparananchis, chhaynapin yanapayta atisun allin cristiano kanankupaq.

Qhawaq, ¡Rikch’ariy! revistakunapin maskhasunman familianchispaq hina yachachikuykunata, willasunmantaq chaykunata estudiananchista, chhaynapi yuyaymanashanankupaq. Munakuywanmi estudiota aparinanchis mana pitapas phiñakuspa nitaq p’enqachispapas, allintan rikuchinanchis chay yachachikuykuna paykunaq allinninpaqpuni kasqanta. Llapankutan kallpachananchis leenankupaq kutichinankupaq ima, reparachinanchistaq Diospa Simin ‘chaninpuni’ kasqanta, tukuy necesitasqanchista chaypi tarisqanchistapas (Sal. 19:7).

Allinkunatan chaskinki

Diosta mana reqsiqkunapas reparankun tukuy ima kaqkunata, pachantinpi imakuna sucedesqanta, kikinkuq imayna kasqankutapas; ichaqa manan yachankuchu imarayku chaykuna kasqanta. Diospa Simin Qelqata tukuy sonqo estudiaqkunan ichaqa santo espirituq yanapayninwan reparanku tukuy imatapas Diospa kamasqanta, Bibliaq profeciankuna hunt’akushasqanta, kasukuq runakunapaq Diospa promesankuna hunt’akunanpaqña kashasqantapas (Mar. 13:4-29; Rom. 1:20; Apo. 12:12).

Chaykunataña reparayta atinchis chaypas, manan umanchista hoqarinanchischu. Aswanmi sapa p’unchay Bibliata leespa kallpachakunanchis huch’uyyaykukuq kananchispaq (Deu. 17:18-20). Biblia estudiayqa kallpachawanchismi ama ‘huchawan q’otuchikunanchispaq’, sonqomanta Diospa siminta munakusun chayqa manan faciltachu huchaman urmasun (Heb. 2:1; 3:13; Col. 3:5-10). Chhaynapin ‘Jehová Diospa kaqkuna hinapuni purisunchis, tukuy imapipas payta kusichinanchispaq, llapa allin ruwaykunapi aswan-aswanta rurunanchispaq’ (Col. 1:10). Chayta taripananchispaqmi Diospa Simin Qelqata estudianchis, chaymi ancha allin premionchisqa.