Allinta preparay tukupay simikunata

DISCURSOTA qonaykipaqqa allintachá t’aqwirqanki tupachirqankipas chaypaq hina yachachikuykunata, allintachá prepararqanki qallariy simikunatapas. Discursoykita imayna tukunaykipaqpas allintan preparakunallaykitaq. Uyariqniykikunaqa astawan yuyarinqaku discursota tukushaspayki imatachus nisqaykitan. Chayta hawan ukhunta ruwawaq chayqa, manan allintachu uyariqkunata discursoykiwan yanapawaq.

Yachasunchis ñawpa tiempopi Josuepa ima ruwasqanmanta. Wañupunanpaqña kashaspanmi allintapuni rimaykurqan Israel llaqta umallikunaman. Chaypin yuyarichirqan imaynata Jehová Dios Israel runakunata Abrahampa tiemponmantapacha qhawarisqanta. Tukunanpaqqa pisillapin chaykunamanta wakmanta rimarirqan, chaymantataq tukuy sonqomanta khaynata nirqan: “Kunanqa Señor Diosta manchakuychis hinaspa yupaychaychis, cheqaq hunt’aq sonqowan payta servispa”, nispa. Chaytan leewaq Josué 24:14, 15 textopi.

Apóstol Pedropas 33 watapi Pentecostés fiesta p’unchaypin sumaqta rimaykurqan Jerusalén llaqtapi huñusqa kashaq runakunaman (Hech. 2:14-36). Ñawpaqtan willarqan chay p’unchaypi santo espirituta chaskisqankuqa profeta Joelpa qelqasqanman hina kasqanta, chaymantataq qhawarichirqan Jesuspa kawsarimpunanmanta, Diospa paña ladonpi tiyaykunanmantapas Salmo libropi willasqaña kasqanta. Tukunanpaqtaq nirqan: “Llapallan Israel miray runakuna, allintapuni yachaychis, qankunaq [k’aspipi wañuchisqaykichis] Jesustan Diosqa churarqan Señor kananpaq, Cristo kananpaqwan”, nispa. Hinan uyariqkunaqa nirqanku: “Wawqeykuna, ¿imatan ruwasaqku?” nispa. Pedrotaq kutichirqan: “Huchaykichista saqepuspa Diosman kutirikuychis, hinaspa Jesucristoq sutinpi sapankaykichis bautizachikuychis”, nispa (Hech. 2:37, 38). Pedroq rimasqanqa chay runakunaq sonqonman chayaqmi karqan, chaymi chay p’unchaypi kinsa waranqa hina runakuna bautizakurqanku.

¿Imaynatan preparawaq tukupay simikunata? Tukukuypi imakunatachus nisqaykiqa discursoykiq temanman hinan kanan. Discursopi allin yachachikuykunamanta rimasqaykiwanmi tukupay simikunataqa tupachinayki. Qhawarinaykitaq discursoykiq temanta wakmanta willanaykipaq otaq manapas. Temamanta wakin simikunallatapaschá wakmanta willawaq.

Tukushaspaykiqa allintan uyariqkunata kallpachanayki discursoykipi yachachisqaykiman hina ruwanankupaq. Chaymi tukupay simikunapiqa qhawarichinayki imatachus ruwanankuta. Discursoykipaq allin yachachikuykunata akllashaspaykiqa allintachá yuyaykurqanki imaraykus chaykuna uyariqkunaq allinninpaq kanman chayta, hinallataq imata chaywan yachachinaykitapas. Chhaynaqa yachankiñan ima ruwanankupaqchus kallpachanaykita. Chaymi tukushaspaykiqa sut’ita ninayki ima ruwanankuta, imayna ruwanankutapas.

Imatapas imayna ruwanankuta nisqaykimantapas, sonqonkumanmi chayanayki chayman hina ruwanankupaq. Chaypaqqa qhawarichiwaqmi imaynapichus chay ruwasqanku allinninkupaq kanman chayta. Allinta yuyaykuspa discursoykipi tukupay simikunata rimanki chayqa, sonqonkuman chayaqmi llapa discursoyki kanqa.

Imaynatachus rimasqaykiwanmi rikuchinayki discursoykita tukunaykipaqña kashasqaykita. Ama usqhayllaqa rimaychu, mana chayqa manan sumaqchu uyarikunman tukusqayki. Amataq mana uyarichikuq hinaqa wañu-wañu kunkawan rimaychu. Allin kunkawan rimay, ichaqa ama nishu kallpawanqa. Imayna kunkawanchus rimasqaykiwanmi sut’ita reparananku tukushasqaykita, tukuy sonqowan mana iskayaspa rimasqaykitapas. Chayrayku preparakushaspaykiqa allinta ensayay tukupay simikunata.

¿Hayk’a tiempopin tukunayki? Chayqa qanmantañan kanqa. Ichaqa manan uyariqniykikunata sayk’uchinaykikamaqa nishu unaytaqa rimanaykichu. Hayk’a tiempo rimanaykipaqqa allintan qhawarinayki uyariqniykikunapaq hina kananta. Pisi tiempollapi fácil entiendenankupaq hina tukusqaykiqa allinmi kanqa. Ichaqa allinllataqmi kanman aswan askha tiempopi allin rikch’anachiywan tukusqaykipas. Eclesiastés 12:13, 14 textoq nisqanpi qhawariy Eclesiastés libropi tukupay simikunata, qhawarillaytaq Mateo 7:24-27 textoq nisqantapas, chaypin willakushan Orqo Patapi Jesuspa tukupay siminkunata.

¿Imaynatan tukuwaq predicacionpi rimaspayki? Predicacionpiqa allintan yuyaykunayki imayna tukunaykita. Chayta allinta ruwanaykipaqqa ñawpaqmantan preparakunayki, runakunapipas tukuy sonqon interesakunayki. Chaypaqqa kaypi yachasqanchisman hinan ruwawaq.

Visitasqayki runa ocupasqa kashan chayqa, huk minutota hinallapaschá rimanayki kanqa. Khaynatapaschá niwaq: “Ocupasqataq kashanki chayqa, manaraq ripushaspay pisillapi willarisqayki Kamaqninchispa prometewasqanchismanta. Bibliaq nisqan hina, payqa kay pachatan sumaq paraisoman tukuchipunqa chaypi runakuna wiñaypaq kawsanankupaq. Chaypi kananchispaqqa Diospa kamachikuyninkunamanta yachaspan chayman hina kawsananchis”, nispa. Otaq niwaq hukpiña kutinaykipaq.

Runakunaña mana allinta kutichisuqtiykikupas millayta k’amisuqtiykikupas allinpin visitasqaykiqa tukunman. Yuyariy Mateo 10:12, 13; Romanos 12:17, 18 textokunaq nisqanta. Llamp’u simiwan kutichiqtiykiqa allintapaschá Jehová Diospa testigonkunata qhawarinkuman.

Pimanpas sumaqta predicarqanki chayqa, wakmantan niwaq imatachus yuyarinanta munanki chayta, kallpachawaqtaq chayman hina ruwananpaq.

Wasiyoqman ninki kutinaykipaq chayqa, willay imamantachus rimanaykita, chhaynapi makilla suyanasuykipaq. Chaypaqqa imatapas tapuwaqmi, kutispataq chayta kutichiwaq Razonamiento a partir de las Escrituras nisqa librowan otaq Bibliamanta estudiachinapaq mayqen qelqawanpas. Manataqmi qonqanaykichu Jesuspa kamachisqanman hina imapaqchus kutishanki chayta (Mat. 28:19, 20).

¿Imaynatan tukuwaq Bibliamanta yachachishaspayki? Estudiante imamantachus yachasqanta yuyarinanpaqqa tematan wakmanta rimariwaq. Allin yachachikuykunata umanpi hap’inanpaqqa yuyarinapaq tapuykunatan allinta qhawarichiwaq. Chaymantapas tapuwaqmi imaynapi chay yachasqan allinninpaq kanman chayta, otaq imaynata chaymanta huk runakunaman willanman chaytapas, chhaynapin yuyaykunman yachasqanman hina kawsananpaq (Pro. 4:7).

Chhaynaqa tukupay simikunata allinta preparanki chayqa, allintan uyariqkuna discursoykita yuyarinqaku.