Kallpachanapaq hina rimay

CRISTIANOKUNAQ chaskisqanchis llank’anaqa allin willakuykunata willaymi. Chaymantan Jesús nirqan: “Ñawpaqtaqa allin willakuykunan llapa suyukunaman willasqapuni kanqa”, nispa (Mar. 13:10). Chay ‘allin willakuykunamantan’ pay kikin astawan rimarqan (Luc. 4:43). Apostolkunapas astawanqa willarqanku “Diospa allin willakuyninkunata[n]”, “Cristomanta allin willakuykunata” ima (1 Tes. 2:2; 2 Cor. 2:12). Chay willakuykunaqa sonqota llanllarichiqmi.

Apóstol Juanmi rikurqan “hanaq pachanta [huk] ángel phalashaqta. Chay angelmi wiñay qespikuypaq allin willakuykunata [...] willanan karqan”, chayman hinan ñoqanchisqa runakunaman ninchis: “Diosta manchakuychis, payta yupaychaychis”, nispa (Apo. 14:6, 7). Maypiña kashaspapas rimashallanchismi cheqaq Diosmanta, sutinmanta, ancha sumaq sonqo kasqanmanta, imaymana ruwasqanmanta, qhepa tiempopaq imakuna yuyaykusqanmanta, kamachikuyninkunamanta, imayna kawsananchista munasqanmantapas. Willashallanchistaqmi Diosqa payta mana manchakuqkunata, runamasinta ñak’arichiqkunatapas chinkachinanmanta. Ichaqa manan ñoqanchismanchu tupawanchis predicasqanchis runakunata juzgayqa. Ñoqanchisqa munanchismi lliw runapas Bibliamanta allin willakuykuna chaskikunankuta, chhaynapi paykunaq allinninpaq kananpaq (Pro. 2:20-22; Juan 5:22).

Mana allin kaqkunamantaqa ama nishuta rimaychu. Cristianokunaqa allintan yachanchis kay kawsaypiqa imaymana mana allinkuna kasqanta. Pitapas predicayta qallarinapaqqa huk chhikantan rimasunman chay llaqtapi huk sasachakuymanta. Runakunaqa amisqañan kashanku mana allin noticiakunawanqa, chayraykun mana nishuta chaykunamanta rimananchischu, mana chayqa manapaschá uyariyta munanqakuchu. Chhaynaqa atikuqtin hinan Diospa Simin Qelqapi sumaq yachachikuykunamanta rimayta qallarinanchis (Apo. 22:17). Wasiyoq manaña munanmanchu astawan rimayta chaypas, allin kaqtan umanpi saqerqanchis yuyaymanananpaq, chhaynapi hukpi kutiqtinchisqa munanman rimayta.

Discursota qoshaspaykipas ama nishuta rimaychu mana allin kaqmantaqa. Nishuta rimawaq kamachikuqkunaq mana allinkuna ruwasqanmanta, runa wañuchinakuymanta, qhelli hucha q’oñirisqanmanta, maqanakuykunamantapas chayqa, discursoykiqa manan sumaqtachu uyariqniykikunaman chayanqa, llakichinman imaraqmi. Chhayna willakuykunamantaqa rimanaykipuni kaqtillanmi rimawaq. Mayninpiqa chaykunamanta iskay kinsata rimaspan discursoykipi allinta rikuchiwaq chaykuna imayna tukukunanmanta, chhaynapitaq rikuchiwaq Bibliaq promesankunaqa ancha allinpuni kasqanta. Ichaqa ama nishutaqa sasachakuykunallamanta rimaychu.

Chaywanpas discursopiqa manapaschá atikunmanchu allin kaqkunallamanta rimayqa. Wakin mana allin kaqkunamantaña rimanayki kaqtinpas kallpachakuy allin kaqkunamanta astawan rimanaykipaq. Orqo Patapi yachachishaspan Jesusqa rimarqan fariseokunaq, kamachikuy simi yachachiqkunaq wakin mana allinkuna ruwasqankumanta (Mat. 6:1, 2, 5, 16). Ichaqa manan chaykunallamantachu rimarqan, astawanqa rimarqan Diospa ñanninkunapi imayna puriymantan (Mat. 6:3, 4, 6-15, 17-34). Chayraykun chay kutipi rimasqanqa runakunaq sonqonman chayarqan.

Uyariqniykikunata allinpaq qhawarispa rimay. Sichus huk discursopi predicaymanta rimanki chayqa, kallpachaq hinan rimanayki, amataq huchachaq hinachu. Kallpachakunaykin imatachus yachachisqaykiman hina kawsanaykipaq (Rom. 2:21, 22; Heb. 13:7). Manan phiñasqachu rimanayki, aswanpas tukuy munakuywanmi imatapas ninayki (2 Cor. 2:4). Manan iskayananchischu iñiqmasinchiskunaq Jehová Diospa munaynin ruway munasqankumanta, chhaynapin paykunata sumaqta qhawarisunchis, rimasqanchistaq allinninkupaq kanqa. Apóstol Pablon chhayna rimaq karqan, chaytan reparasunman kay textokunapi: 1 Tesalonicenses 4:1-12; 2 Tesalonicenses 3:4, 5; Filemón 4, 8-14, 21.

Mayninpin umallikunaqa sut’ita discursonkupi rimananku ima huchamantapas cuidakunapaq. Chaywanpas k’umuykukuq kanqaku chayqa, llamp’u sonqo-kaywanmi imatapas rimanqaku (Gál. 6:1). Ancha respetowantaqmi rimanankupas (1 Ped. 5:2, 3). Bibliapiqa allintan wayna-sipas cristianokunata kallpachakushan kurakkunata respetanankupaq (1 Tim. 4:12; 5:1, 2; 1 Ped. 5:5). Chaymantapas pitapas yuyaychana otaq anyana kaqtinqa Bibliawanmi chayta ruwana (2 Tim. 3:16). Discurso qoqqa manan hayk’aqpas Diospa Simin Qelqaq nisqanta q’ewinanchu yuyaykusqanman hina rimananraykuqa. Imaraykupas anyanan kaqtinqa astawanmi rimanan huchata imayna atipanamanta, sasachakuykuna imayna allichanamanta, ima ruwaypipas imayna allinyanamanta, Jehová Diospa kamachikuyninkuna allinninchispaq kasqanmantapas, chhaynapin discursoqa uyariqkunata kallpachanqa (Sal. 119:1, 9-16).

Huk discursota preparashaspaqa allinta yuyaykuy imaynatachus sapanka yachachikuyta tukunki chayta, hinallataq discursoykita imayna tukunaykitapas. Imatachus tukunaykipaq rimanki chaytan astawanqa yuyarikunqa, chayrayku tapukuy: “¿Kallpachanapaq hinachu chaypi rimasaq?” nispa.

Kallpachanapaq hina iñiqmasikunawan rimay. Jehová Diospa serviqninkunaqa ancha allinpaqmi huñunakuyninchiskunata qhawarinchis, chaypin sumaqta kallpachanakunchis. Biblian allinta yuyarichiwanchis huñunakuypi kashaspanchis ‘kallpachanakunanchispaq’ (Heb. 10:25). Kallpachanakunchisqa manan discursota qospallachu, nitaq rimamuqpa tapusqanta kutichispallachu, aswanpas iñiqmasinchiskunawan rimaspa iman. Chaytan ruwasunman manaraq huñunakuy qallarishaqtin, hinallataq huñunakuy tukuqtinpas.

Iñiqmasinchiskunawanqa imaymanamantan rimasunman, ichaqa aswan allinmi kanman Dios serviyninchismanta rimay, chaymi rimasunman Diospaq llank’ayninchispi imapas allin pasawasqanchismanta. Chaymantapas hukkunaq allinnintaraq ñawpaqta maskhaspan kallpachanakusunman.

Cuidakunanchismi Diosta mana serviq runakuna hina llullakuywan rimananchismanta. Apóstol Pablon nirqan: “Chayrayku, amaña llullakuychisñachu, aswanpas sapankaykichis runa-masiykichiswan cheqaqkaqta rimaychis”, nispa (Efe. 4:25). Chayman hina ruwananchispaqqa Diosta hina runakunaq qhawarisqankutan mana hatunchananchischu. Jesusqa allintan yachachirqan ‘qhapaqyayta munapakuykunamanta’ cuidakunanchispaq (Mat. 13:22). Chhaynaqa piwanpas parlashaspaqa manapunin rimananchischu chay munapakuykunamantaqa (1 Tim. 6:9, 10).

Apóstol Pabloqa allintan rikuchirqan kallpachaq hinapuni rimananchispaq, hinallataq “pisi iñiyniyoq” kaspanku imatapas mana ruwaq cristianokunata ama huchachananchispaqpas, paykunaqa manaraqmi allintachu entiendenku maykamachus cristianokuna imatapas ruway atisqankuta. Chhaynaqa piwanpas parlashaspaqa yuyarinanchismi imayna kasqankuta, may poqosqachus iñiyninku kashan chaytapas. Ancha llakikunapaqmi kanman ‘iñiqmasita imapipas misk’achiyqa, otaq urmachiypas’ (Rom. 14:1-4, 13, 19).

Pipas onqosqa kaqqa maytan munan sumaqta rimapayanata. Payqa may sasawanchá huñunakuykunaman hamun. Onqosqa kasqanta yachaqkunaqa tapunqakupunichá imaynachus kashasqanta, chay tapuy allinña kanman chaypas, manan kallpachakunqachu onqoynillanmanta rimaqtinchisqa. Chayraykun aswan allin kanman imapas allin ruwasqanmanta “allinmi, kusa” nispa niy. Chaytan niwaq Jehová Diosta tukuy sonqowan munakusqanmanta, sasachakuykunapi mana pisipasqanmanta, huñunakuypi sumaqta tapuykuna kutichisqanmantapas. Chhaynapin reparachinki imaymana allinkuna ruway atisqanta, iñiqkunata kallpachasqantapas (1 Tes. 5:11).

Rimasqanchis kallpachaqpuni kananpaqqa yachananchismi Jehová Diospa yuyaykusqanman hina rimayta. Ñawpa Israel runakunan maná nisqallata mikhusqankurayku millayta rimapakurqanku Jehová Diospa churasqan umallikunamanta, chay hawan Diosqa paykunapaq sinchita phiñakurqan (Núm. 12:1-16; 21:5, 6). Ñoqanchismi ichaqa manapuni chay rimapakuq runakuna hinachu kayta munanchis, chaymi kallpachakunanchis umallikunata respetananchispaq, agradecekunanchistaq allin yuyayniyoq hunt’aq kamachi mikhunata hina Diospa yachachikuyninkunata apachimuwasqanchismantapas (1 Tim. 5:17, MR).

Iñiqmasinchiskunawan kashaspanchisqa imaymana allin kaqkunamantan rimasunman. Ichaqa, ¿imatan ruwasunman imamantapas rimapakuyta qallariqtinku? Kallpachakunanchismi allin kaqmanta rimayta qallarinanchispaq.

Chhaynaqa, predicashaspapas, discursota qoshaspapas, iñiqmasinchiskunawan parlashaspapas allin yuyaywanmi rimananchis, sonqonchismantataq horqonanchis “allin kaqkunallatapuni [...] uyariqkunaq wiñanankupaq necesitasqanman hina” (Efe. 4:29).