Allinta rimaspa textokunata maskhachiy

HUÑUNAKUYKUNAPIQA Bibliaq nisqanman hinapunin imatapas yachachikun, hinallataq predicacionpipas Bibliawanpuni yachachinchis. Ichaqa leesqanchis textokuna allinta entiendekunanpaqqa yachananchismi imatapas ñawpaqta allinta willayta.

Mayqen textotapas leenaykipaqqa manan “maskhasunchis kay textota” nispallachu ninayki. Aswanmi yachayta munanankupaq hina imatapas willanayki, allintataq reparachinayki imarayku chay texto maskhachisqaykita. ¿Imaynatan chayta ruwawaq?

Imatapas tapuwaqmi. Uyariqniykikunaq mana yachasqankumanta imatapas tapuspa huk textota maskhachiyqa ancha allinmi. Chayrayku yuyaymananankupaq hina imatapas tapuy, imaynan Jesuspas ruwarqan hinata. Huk kutinmi fariseokuna Jesusta rimasqanpi pantachiyta munarqanku, paytaq tapurqan: “‘¿Ima ninkichistaq Cristomanta? ¿Piqpa Churintaq?’ nispa. Paykunataq nirqanku: ‘Davidpa Churinmi’ nispa. Chaymi Jesusqa paykunata nirqan: ‘¿Imaynataq Davidqa Santo Espirituq yuyaychasqan kaspa Cristota: ‘Señor’, nispa suticharqan?’” nispa. Hinaspanmi willarqan Salmo 110:1 nisqanta. Fariseokunataq ch’inlla karqanku, wakin runakunataq sumaqta uyarirqanku (Mat. 22:41-46).

Predicashaspaqa kay hinatan tapuwaq: “¿Hayk’aqllapas kay pachantinpi ch’ulla gobiernolla kamachinmanchu? Qhawariy Daniel 2:44 nisqanta”, nispa. Otaq tapuwaq: “¿Willarqanñachu Biblia kay tiempopi millay kawsay kananmanta? Qhawariy 2 Timoteo 3:1-5 nisqanta”, nispa. Tapullawaqtaqmi: “¿Hayk’aqllapas chinkanmanchu ñak’ariypas wañuypas? Chaymantan Biblia willashan Apocalipsis 21:4, 5 versiculokunapi”, nispa.

Discurso qosqaykipi manaraq huk textota maskhachishaspayki imatapas allinta yuyaykuspa tapunki chayqa, uyariqniykikunaqa usqhayllan chay textota maskhanqaku, allintaña reqsinku chaypas. Chayrayku imapas yachay munasqankumanta tapuy. Allinninkupaq kaqmantaña rimashanki chaypas, yachanaykin reqsisqanku textokunata maskhanankupaq ima nispa tapuyta, mana chayqa manapaschá tukuy yuyaywanchu leesqaykita qatipanqaku. Chayrayku yuyaykuy textokuna maskhayta munanankupaq hina discursoykita qonaykipaq.

Willay huk sasachakuymanta. Manaraq huk textota maskhachishaspaykiqa willawaqmi huk sasachakuymanta, hinaspa niwaq chay textopi chay sasachakuypaq allichay kasqanta. Ichaqa manapaschá chay textoqa llapantachu willashan huk sasachakuyta imayna allichanamanta, chayrayku ama niychu “kay textopin llapanta willashan”, nispaqa. Chaywanpas niwaqmi chay textowan imaynatachus yanapachikunkuman chayta reparanankupaq.

Chaymantapas willawaqmi Dios sonqo runakunaq huk ruwanankumanta, hinaspa Bibliapi huk willakuyta leespa rikuchiwaq chay ruway ancha allinpuni kasqanta. Leesqayki versiculokunapi huk otaq iskay allin yachachikuykuna kan chayqa, uyariqkunatan niwaq tarinankupaq. Sichus chaykunata tarinankupaq sinchi sasa kanman paykunapaq chayqa, tapuwaqmi: “¿Mayqenmi kanman: kaychu icha kaytaqchu?” nispa. Hinaspa niwaq textota leesqaykiman hina sut’inchasqaykiman hina chayta reparanankupaq.

Diospa Siminpuni kasqanta rikuchiy. Ñataqchus yachayta munanankupaq hina imatapas allinta willarqanki, chayman hinataq willarqanki iskay kinsa yachachikuykunata chayqa, khaynallatan textota maskhachiwaq: “Qhawasunchis Diospa Simin Qelqaq nisqanta”, nispa. Chhaynapin rikuchinki leenayki textoqa Diosmanta hamusqanta.

Jehová Diosmi Juanta, Lucasta, Pablota, Pedrota, huk runakunatawan yuyaycharqan Bibliata qelqanankupaq. Ichaqa paykunaqa qelqaqllan karqanku, manan munasqankutachu qelqarqanku, aswanpas Jehová Diospa yuyaychasqallantan. Chhaynaqa, “khaynatan Pedro qelqarqan” otaq “Pablon nirqan” nispa ninanchismantaqa, aswan allinmi kanman “Diospa Simin Qelqan nin”, nispa niy. Chhaynatan astawan nisunman Bibliata mana estudiaqkunaman. Diosmi Jeremiasta kamachirqan “[Jehová] Diospa siminta uyariychis”, nispa runakunaman willamunanpaq (Jer. 7:2; 17:20; 19:3; 22:2). Ñoqanchispas huk textota maskhachinapaqqa nisunmanmi: “Jehová Diosmi khaynata nin”, nispa, otaq huk-hinamantapas nisunman. Imaynaña kaqtinpas sut’itan rikuchinanchis Bibliapi leesqanchisqa Diospa Siminpuni kasqanta.

Qhawariy textoq ñawpaqninpi qatiqninpi nisqanta. Wakin textokunata leenaykipaqqa willawaqmi pichus otaq imaynapichus chaykuna qelqakusqanta, huk textokunata leenaykipaqmi ichaqa huk-niraytan willanayki. Dios manchakuq Jobpa rimasqanta leenaykipaqqa huk-hinatan qallariwaq, amigonman tukuq mana allin runakunaq rimasqanta leenaykipaqtaq huk-hinamanta. Hechos libromanta leenayki kaqtinqa yachanaykin piqpa rimasqantachus leeshanki chayta. Chaypin willakushan Santiagoq, Pedroq, Pabloq, Felipeq, Estebanpa rimasqankuna, hinallataq Gamalielpa, wakin judío runakunaq, wakin angelkunaq rimasqankunapas. Salmo takikunamanta huk textota leenki chayqa, yuyariy mana llapanchu Davidpa qelqasqan kasqanta, hinallataq yuyariy Proverbios libroqa mana llapanchu Salomonpa qelqasqan kasqanta. Chaymantapas yachanaykin huk textopi willakuy pipaqchus qelqasqa kasqanta, imamantachus rimasharqan chaytapas.

Willay hayk’aqchus imaynachus kasqanta. Chhaynapin allinta rikuchinki leesqayki textoqa kay tiempopaqpas allinpuni kasqanta. Wakin textokunata allinta entiendechinaykipaqqa sut’inchanayki imapas imayna karqan chayta. Huchamanta Jesús kacharichiwasqanchismanta discursota qoshanki chayqa, Hebreos 9:12, 24 textotataq leeshanki chayqa, ñawpaqtan willawaq yupaychana karpapi ch’uyay-ch’uya cheqasmanta. Chay versiculokunaq nisqanman hina, chay cheqasmanmi Jesusqa haykurqan hanaq pachaman wichapuspa. Chaykunataña sut’inchanayki chaypas, ama askhataqa willaychu, mana chayqa manan reparanqakuchu imapaqchus chay texto leeshasqaykita.

Discurso qoypi allin yachaqkunata makilla qhawariy, ima nispachus textokunata maskhachisqankuta. Reparaytaq imarayku chay ruwasqanku allin kasqanta, chayman hina ruwanaykipaq. Discursoykikunata preparashaspayki akllay chaypaq hina textokunata, yuyaymanaytaq imapaqchus chaykuna leenaykita. Allinta qhawariy ima nispachus imata tapuspachus chay textokunata maskhachinaykita, chhaynapin allinpuni kanqa. Kaqllatataq ruway huk textokunatawan leenayki kaqtinqa. Imatapas allinta rimaspa textokunata maskhachinki chayqa, sut’itan rikuchinki Bibliawanpuni yachachishasqaykita.