Bibliawanpuni tapuykunata kutichiy

PIPAS iñisqanchis yachachikuykunamanta, imayna kawsasqanchismanta, suyakuyninchismanta otaq kay tukukuy p’unchaykunamanta tapuwanchis chayqa, Bibliawanpunin kutichinchis, Diospa Simin kasqanrayku, yachachikuyninchiskuna chaypi saphichasqa kasqanrayku, chayman hina kawsayninchis kasqanrayku ima. Bibliallan willawanchis ima tiempopi kawsasqanchismanta, hamuq tiempopaq suyakuyninchismanta, Diospa promesankunamantapas (2 Tim. 3:16, 17).

Hinaspapas, Jehová Diospa testigonkunan kanchis (Isa. 43:12). Chayraykun ima tapuytapas Diospa yuyaychasqan siminwanpuni kutichinchis, manan runakunaq yachachisqanman hinachu. Yuyaykusqanchisman hinaña imatapas allinpaq otaq mana allinpaq qhawarinchis chaypas, kallpachakunchismi Bibliaq nisqanman hina yuyaykunanchispaq, Biblialla imatapas mana pantaspa yachachisqanrayku. Bibliaqa manan sinchitaqa hark’awanchischu qhawarisqanchisman hina imatapas ruwananchispaqqa. Chhaynaqa manan pitapas yuyaykusqanchisman hina ruwanankupaqqa kamachinanchischu, aswanmi Bibliaq nisqallanta yachachinanchis, chhaynapi paykunapas qhawarisqankuman hina imatapas ruwanankupaq. Apóstol Pablo hinan paykunata kallpachananchis ‘Diospi iñispa kasukunankupaq’ (Rom. 16:26).

Apocalipsis 3:14 Jesusmanta nin: “Cheqaqkaqmi, cheqaq rimaq hunt’aq testigon”, nispa. ¿Imaynatan Jesús kutichirqan runakunaq tapukusqanta? Mayninpiqa rikch’anachiykunawan yuyaymanachispan kutichiq, mayninpitaq Bibliapi mayqen textotapas imayna entiendesqanta tapuspa, sapa kutillataq kutichiq “Diospa Simin Qelqan nin”, nispa otaq ima willakuytapas yuyarichiq (Mat. 4:3-10; 12:1-8; Luc. 10:25-28; 17:32). Jesuspa tiemponpiqa sinagogakunapin qelqa k’uyukunataqa waqaychaqku. ¿Jesuspa karqanchu chay qelqakuna? Manan yachanchischu. Ichaqa allintan chaykunamanta yacharqan, chaymi chaykunaman hinapuni yachachirqan (Luc. 24:27, 44-47). Chayraykun nirqan: ‘Ñoqaqa Taytaypa niwasqallantapunin willani’, nispa (Juan 8:26).

Ñoqanchisqa Jesús hinan ruwananchis. Manaña Jehová Diospa rimasqanta uyarirqanchischu chaypas, atinchismi Biblia leeyta, chayqa Diospa Siminmi. Bibliawan tapuykunata kutichispaqa manan imachus yuyaykusqanchistachu qhawarichishanchis, aswanpas Jehová Diospa nisqantan qhawarichishanchis, paymi imatapas cheqaqta niqqa (Juan 7:18; Rom. 3:4).

Ichaqa allintan yachananchis Bibliawan imayna kutichiyta, chhaynapin uyariwaqninchis mana iskayaspalla uyariwasun. Hinaspapas kutichisqanman hinan tapusunman: “¿Mayqenmi aswan allin kanman? ¿Runaq yuyaykusqanchu icha Diospa yuyaykusqanchu?” nispa; otaq “¿Willanmanchu Biblia chaykunamanta?” nispa. Sichus rimapayasqanchis runa mana Bibliapi iñinchu chayqa, khaynatapaschá nisunman: “Ñawpa tiempomanta profeciatan leeyta munayki” otaq “Askhanpi rakisqa libropin khaynata nin...”, nispa.

Mayninpiqa yaqapaschá umallanchismanta huk textokunata willasunman. Ichaqa aswan allinmi kanman Bibliamantapuni leey. Uyariqninchispa Biblian kaqtinqa chaymantan leesunman. Chhaynata ruwasun chayqa, Diospa Siminqa sonqonmanmi chayanqa (Heb. 4:12).

Umallikunan astawanqa Bibliapi nisqanman hina ima tapuykunatapas kutichinanku. Paykunaqa ‘cheqaq yachachikuytan hap’ikunanku’, chayman hinataq sumaqta yachachinanku (Tito 1:9). Iñiqmasinchiskunaqa umallikunaq yuyaychasqanman hinan kawsayninkupi imatapas decidinkuman, chayraykun umallikunaqa Bibliaq nisqanman hina yuyaychananku. Chayta rikuspan wakin iñiqmasinchiskunapas chhaynata ruwanankupaq kallpachakunqaku.