Discipulokunaqa qatikachasqan kananku karan

Jesusqa manan imaynatachus predicananku karan chayllatachu apostolninkunamanqa yachachiran, willaranmi wakin runakunamanta cuidakunanku kasqantapas. Niranmi: “Qankunataqa atoqkuna chaupipi ovejakunata jinan kachashaykichis; chayrayku, [...] runakunamanta allinta cuidakuychis, paykunan apasunkichis juzgana wasikunaman, sinagogankupitaq soq’aykusunkichis. Noqaraykun kamachikuqkunaman reykunamanpas apasqa kankichis”, nispa (Mateo 10:16-18).

Chhaynapi tarikunankuta yachaspan Jesusqa niran: “Paykunaman apasuqtiykichisqa aman llakipakunkichischu imaynatachus imatataqchus rimanaykichismantaqa, chay ratopin yachankichis imatachus rimanaykichista. Manan qankunallachu rimankichisqa, aswanpas Yayaykichispa espiritunmi qankunamanta rimanqa. Chaymantapas, wayqellantaqmi wayqenta wañuchinapaq entreganqa, taytataq wawanta. Wawakunapas tayta-mamanku contran jatarinqaku, jinaspa wañuchinapaq entreganqaku. Sutiyraykun llapa runakunaq cheqnisqan kankichis, pipas tukukuykama aguantaqmi ichaqa salvasqa kanqa”, nispa (Mateo 10:19-22).

Chaymantapas predicay llank’ayqa ancha importantetaq karan chayqa, allin yuyaywanmi discipulonkunaqa chayta junt’ananku karan. Chaymi Jesusqa niran: “Juj llaqtapi qatikachasunkichis chayqa, waj llaqtaman ayqeychis, cheqaqtan niykichis: Israelpi ayllukunata llaqtakunatapas manaraq tukushaqtiykichismi runaq Churinqa chayamunqa”, nispa (Mateo 10:23).

Jesuspa chay willasqankunaqa manan apostolkunallapaqchu karan, chaykunaqa noqanchispaqwanmi karan. Chaytan yachasunman Jesuspa “llapa runakunaq cheqnisqan kankichis” nisqanpi. Apostolkunataqa manan llapan runachu cheqnikuran, manallataqmi chay kutipi predicasqankupiqa kamachikuqkunaman ni reykunamanpas apasqachu karanku, manan familiankunapas paykunataqa wañuchinankupaq entregarankuchu.

Chhaynaqa qhepa tiempomantan Jesusqa rimasharan. Chaytan yachallanchistaq ‘manaraq predicayta tukushaqtiykichismi runaq Churinqa chayamunqa’ nisqanpi. Chaywanmi Jesusqa rikuchisharan manaraq discipulonkuna predicay llank’ayta tukushaqtinku runakunata juzgananpaq kutimunanta.

Apostolkunaqa manan admirakunankuchu karan qatikachasqa kanankumantaqa, Jesuspas qatikachasqan karan, chaymi payqa paykunata niran: “Yachachisqaqa manan aswan allinchu yachachiqninmantaqa, manallataqmi kamachipas patronninmantaqa. Ama manchakuychischu cuerpo wañuchiqkunataqa, paykunaqa manan atinkumanchu kausay chinkachiytaqa; aswanpas manchakuychis cuerpotawan kausaytawan Gehenapi chinkachiy atiqta”, nispa (Mateo 10:24, 28).

Chayman jinan Jesuspas kausaran, chaymi payqa wañunankama Diospaq junt’aq karan. Payqa yacharanmi Jehová Dioslla kausayta chinkachinanpaqpas, wiñay kausayta qonanpaqpas atiyniyoq kasqanta. ¡Maytachá chayta yachayqa apostolkunata kallpacharan!

Chaymantapas Diosmi paykunataqa cuidanan karan. Chaymi Jesusqa niran: “¿Manachu iskay pichinkukunata pisi valorniyoq qolqellapaq vendekun? Chaywanpas manan jujllapas pampamanqa urmanmanchu Yayaykichis mana yachashaqtinqa. Chayrayku, ama manchakuychischu, qankunaqa askha pichinkukunamantapas astawanraqmi valenkichis”, nispa (Mateo 10:29, 31).

Jesuspa discipulonkunaq willasqanwanqa familia ukhupipas t’aqanakuymi kanan karan, chaymi Jesusqa niran: “Ama piensaychischu kay pachaman jamusqaywan thaj kay kanantaqa. Pipas taytantapas mamantapas noqamanta astawan munakuqqa manan noqapaq jinachu, pipas churintapas ususintapas noqamanta astawan munakuqqa manallataqmi noqapaq jinachu”, nispa (Mateo 10:34, 37).

Wakinmi ichaqa sumaqta uyarikunanku karan, chaymi Jesusqa niran: “Pipas kay juch’uypaq qhawarisqa kaqkunamanta mayqenmanpas discipuloy kasqanrayku juj vaso chiri unullatapas jaywarinqa chayqa, manapunin imaraykupas premiontaqa chinkachinqachu”, nispa (Mateo 10:42).

Chhayna allin preparasqa kaspañan apostolkunaqa “rispa ayllun-ayllunta puriranku jinantinpi allin willakuykunata willaspa, onqosqakunata qhaliyachispa ima” (Lucas 9:6).