¿Kanmanchu ima libropas Biblia jina?

• Bibliataqa autoridadniyoq runakunan chinkachiyta munaranku. Ejemplopaq, 1500 wata ñaupaqkunapiqa cristianokunaq kasqan wakin nacionkunapin “rimasqanku simipi Biblia leeqkunata cristiano religionpa contranpi kanankupaq piensaqku” (El mundo de la renovación católica, 1540-1770). Askha runakunan wañuchisqa karanku Bibliata juj simikunaman traducisqankurayku otaq Bibliata leenankupaq jujkunata animasqankuraykupas.

• Chaywanpas manan mayqen libropas Biblia jinaqa askhanpi ruwakunchu. Bibliataqa wakillanta otaq llapantan traduciranku 2.800 más simikunaman, ruwakurantaqmi 5.000 millones más Bibliakunata. Filosofiamanta, cienciamanta rimaq librokunatan ichaqa pisillata ruwanku, watakunaq pasasqanman jinataqmi manaña servipunñachu.

• Bibliata juj simikunaman traducikusqanqa wakin chay simikunatan yanaparan mana chinkananpaq, aswan allinta rimakunanpaqpas. Alemán simiman Bibliata Martín Luteroq traducisqanqa chay simiq allinninpaqmi karan. King James Version nisqa ñaupaq kaq Bibliapas inglés simitan yanaparan, “chhaynataqa manan mayqen libropas yanaparanchu”. Español simitapas allintan yanaparan, jinallataq Latinoamericapi pisi runaq rimasqan simikunatapas.

• “Bibliapi yachachikuykunaqa occidente ladopi runakunaq imayna kausasqantapas cambiaranmi. Dibujokunapas, librokuna qelqasqankupas, imayna rimasqankupas, jujkunapipas, Bibliamanta orqosqan kashan” (Gran Enciclopedia Universal).

Biblia jinaqa manan ima libropas kanchu. ¿Imaraykun jujniray? ¿Imaraykun Bibliarayku wañuytaraq tariranku? Imaymana razonkunan kan, ichaqa kinsamanta yachasun. Ñaupaqta, yachachiwanchismi imayna kausayta, Diosta imayna serviytapas, chaypin rikukun ancha yachaywan qelqasqa kasqanta. Iskaypi, willawanchismi imarayku guerrakuna sufrimientopas kasqanta. Kinsapi, willanmi problemakuna chinkapunanmanta imaynata chinkapunantapas, chayta yachaymi suyakuyta qowanchis.

Biblian yanapawanchis kausayninchispi Dios serviyninchispipas

Educacionniyoq kayqa allinmi. Ichaqa manan asegurawanchischu allin kausayniyoq kayta, chaytan nin Canadá nacionmanta Ottawa Citizen periódico. Ejemplopaq, runakunaqa profesionniyoqña kanku, empresakunapi allin cargoyoqña kanku chaypas suwakunkun, engañanku iman. Chaykuna kasqanraykun “runakunaqa manaña jujkunapi confiayta munankuñachu”, chaytan nin agencia Edelman.

Bibliaqa yachachiwanchismi imayna kausayta, Diosta imayna serviytapas. Jinaspapas yanapawanchismi ‘allinta kausananchispaq’, ‘imachus chaninkaqta’ allin kaqkunata ruwaytapas (Proverbios 2:9). Chaytan yacharan Stephen, payqa 23 watanpin kashan. Polonia nacionpi preso kashaspan Bibliata estudiaran, chayman jina kausay allinninpaq kasqantataq repararan. Chaymi niran: “Chayraqmi entiendeni ‘taytaykitapas mamaykitapas respetankin’ nispa Bibliaq nisqanta. Chaymatapas manañan k’araq sonqochu kani, kunanqa yachanin genioy controlayta”, nispa (Efesios 4:31; 6:2).

Proverbios 19:11 texton nin: “Runaq allin yuyayniyoq-kayninqa phiñakuytan jark’an”, nispa, chay textoq nisqanmi Stephenpa sonqonman chayaran. Kunanqa pipas phiñachiqtinqa kallpachakunmi chay textoq nisqanta kasukunanpaq. Ninmi: “Biblian yachachiwan imayna kausayta”, nispa.

Mariaqa Jehová Diospa testigonmi, juj kutinmi paytaqa Testigokunata cheqnikuq warmi insultaran, ch’aqwatan jatarichiran. Marian ichaqa mana ima nispalla ripuran. Chay warmiqa chhayna ruwasqanmantan p’enqakuran, jinan Jehová Diospa testigonkunata maskharan. Juj killa qhepamanmi Mariawan tuparan, jinan disculpakuran. Payqa cuentatan qokuran Mariaqa religionninpi yachasqanrayku chhayna sumaq sonqo kasqanta. Chay qhepamanqa Mariapas familianpas Bibliatan estudiaranku, llapankuqa soqtan karanku.

Jesusmi niran yachayqa ruwaypi rikukusqanta (Mateo 11:19). Bibliapi consejokunaqa manan yanqa consejokunachu, chaytaqa runakunata imayna yanapasqanpin sut’ita reparakun. Allin runa kasqanchistan sut’iman orqon. “Mana yachaqtan yachayniyoqman tukuchin”, “sonqotan kusichin”, “ñawitan kicharin” imaynata kausanapaqpas imaynata Diosta servinapaqpas (Salmo 19:7, 8).

Biblian willawanchis imarayku guerrakunapas sufrimientopas kasqanta

Ima onqoymantapas yachanankupaqqa investigaqkunaqa averiguankun imaynata qallarisqanta. Chay jinatan Bibliapas willawanchis imarayku guerrakunapas sufrimientopas kasqanmanta. Willawanchismi runakuna imaynapi qallarisqanta, problemakuna imaynapi qallarisqantapas.

Sufrimientoqa qallariran Adanwan Evawan Dios contra Edén huertapi jatarisqankumantapachan, chaytan Génesis libro willawanchis. Runakunaqa paykuna kikinkumantan decidiyta munaranku imachus allin imataqchus mana allin kasqanta, ichaqa chayta yachayqa Diospa derechollanmi (Génesis 3:1-7). Chaymantapachan askha runakuna chay jinallatataq ruwanku. Chayraykun kan guerrakuna, runamasinkuta sufrichiykuna, mana allin kausaykuna, religionkunapas mana allinkunatan ruwanku, manataqmi kanchu kusikuy (Eclesiastés 8:9). Chayraykuchá Bibliaqa nin: “Manan runaq munayninchu imayna kananpaqpas”, nispa (Jeremías 10:23). Ichaqa tukuy chay mana allinkunaqa chinkapunqañan, chayqa ancha sumaq willakuymi.

Bibliapin kashan suyakuy

Diosqa autoridadninta respetaqkunata munakusqanraykun manapuni jinallatachu qhawanqa millay kausayta sufrimientotapas. Millay runakunaqa ‘mana allin ruwasqankuq ruruntan cosechanqaku’ (Proverbios 1:30, 31). “Llamp’u sonqokunan ichaqa kay allpata chaskinqaku, sumaq thaj-nisqataq tiyakunqaku” (Salmo 37:11).

Diosmi gobiernonwan mundontinta tukuchinqa sumaq thaj-pachaman (Lucas 4:43). Chay gobiernollan pachantinta kamachinqa. Jesús Diospa gobiernonmanta rimaspaqa kay pachapi kamachikunanmantan rimasharan chaymi niran: “Qhapaqsuyuyki [gobiernoyki] jamuchun, munayniyki kay pachapi ruwakuchun”, nispa (Mateo 6:10).

Diospa gobiernonpi kaqkunaqa Diospa kamachikuyninkunatan kasukunqaku, rikuchinqakutaqmi paylla atiyniyoq kamachikunanpaq kasqanta manataq runakunachu. Manañan kanqachu guerrakuna, suwakuykuna, munapayaykuna, cheqnikuykuna, jujkunapas. Juj gobiernollan llapa runakunata kamachinqa, imayna kausanamanta Diosta imaynata servinamantapas kaq kamachikuyllan kanqa (Apocalipsis 11:15).

Diospa gobiernasqan pachapi kausanapaqqa Bibliamantan yachananchis. Biblian nin: “[Diosqa] munanmi llapan runakuna qespichisqa kanankuta, cheqaq-kayta reqsinankutapas”, nispa (1 Timoteo 2:3, 4). Chay cheqaq kaymi chay gobiernoq kamachikuyninkunapas. Wakin kamachikuykunan tarikun Mateo 5-7 capitulokunapi. Chay kinsantin capitulokunata leespa imaginakuy, ¿imaynan paraisopi kausay kanqa chay kamachikuykunata llapallanku kasukuqtinku?

Chhaynaqa, ¿juj allin librollachu Biblia? Manan. Sut’itan reparakun Bibliaqa Diospa qelqachisqan kasqanta. Diosqa munanmi tukuy clase runakuna paymanta yachanankuta, gobiernonpi kusisqa kausanankutapas, chaychá Bibliaqa juj librokunamantapas aswan askhanpi rakikun (Hechos 10:34, 35).