¿Imatan ruwawaq qan kikiykita respetakunaykipaq?

RESPETAKUNANCHISMI NOQANCHIS KIKINCHISPAS

Pay kikinta respetakuq runaqa ima sasachakuy kaqtinpas manan pisipanchu.

Doctorkunaq nisqanman jinaqa mana pay kikinta respetakuq runaqa faciltan llaki onqoywan otaq depresión onqoywan jap’ichikun, manan mijuy ganaspas qonchu. Chaymantapas nishutan jampikunata toman, machan, drogakun ima.
Pay kikinta respetakuq runaqa manan jujkunawanqa comparakunchu, chaymi jujkunawan allinta apanakun, allin amigokunayoqtaqmi kanpas. Pay kikinta mana respetakuq runan ichaqa jujkunamanta millayta riman. Chhaynapitaq jujkunawan mana allintachu apanakun.
Chaymantapas pay kikinta respetakuq runaqa ima sasachakuypipas tarikuspaqa mana pisipanchu, aswanpas kallpachakunmi ñaupaqllaman purinanpaq. Pay kikinta mana respetakuq runan ichaqa juch’uy problemakunata jatun problemaman tukuchin, imatapas mana atispataq mana valeqpaq jina qhawarikun.

¿IMATAN RUWAWAQ?

Allin amigokunata maskhay. Respetoyoq runakunawan, qanmanta preocupakuq runakunawan tiempota pasariy. Paykunan yanapasunkiku ñaupaqllaman purinaykipaq.

“Cheqaq amigoqa tukuy tiempon munakun, sinchi llakikuy tiempopipas wayqe jinan qhawarisunki” (Proverbios 17:17).

Jujkunata yanapay. Jujkunata sumaqta qhawarinki munakuywantaq yanaparinkipas chayqa kusisqan kanki. Mayninpi chay ruwasqaykimanta manaña agradecekunqakuchu chaypas sonqoykiqa kusisqan kanqa.

“Qoypin aswan kusikuyqa kan, manan chaskiypichu” (Hechos 20:35).

Wawaykikunata yanapay paykuna kikinkuta respetakunankupaq. Chaypaqqa yaqapaschá wawaykikunata dejallawaq pay kikinku ima problemankutapas allichanankupaq. Chaymi yanapanqa ima problemapipas tarikuspa ama pisipanankupaq. Chhaynapin yachanqaku paykuna respetakuyta, chayqa yanapanqan kuraqña kaqtinkupas.

“Wawata yachachiy may ñannintachus purinanta, machuña kaspapas manan chaytaqa qonqanqachu” (Proverbios 22:6).

Juj testigon juj warmita estudiota qoshan restaurantepi.

¿IMATAN JEHOVÁ DIOSPA TESTIGONKUNA RUWAYKU?

Jehová Diospa testigonkunaqa juñunakuyniykupi, runakunata visitaspa iman Bibliamanta yachachiyku allinta kausanankupaq. Chhaynapin runakunaqa yachanku paykuna kikinkuta respetakuyta.

SAPA SEMANA JUÑUNAKUYKUNA

Chay juñunakuykunapin yachanki Bibliamanta orqosqa yachachikuykunata. Chaypin chaskillankitaq sumaq yuyaychaykunata, chaykunan yanapasunki qan kikiykita astawan respetakunaykipaq. Chay juñunakuykunapiqa manan cobrankuchu, pipas chaymanqa rillanmanmi. Chay juñunakuykunapin yachanki. . .

. . . Jehová Dios anchata munakusqasuykita.
. . . imatas ruwawaq kusisqa kausanaykipaq chayta.
. . . imaynatas allin amigokunata tariwaq chaytawan.

Chay juñunakuykunapin allin amigokunata tarinki, paykunaqa sonqomantan yanapanakunku (1 Corintios 12:25, 26).

Astawan juñunakuykunamanta yachayta munanki chayqa, jaykuy jw.org nisqaman, chaypin tarinki ¿Imaynatan juñunakuyniyku aparikun? nisqa videota.

BIBLIAMANTA WASINKUPI YACHACHIYKU

Jehová Diospa testigonkunaqa gratisllan Bibliamanta yachachiyku, chaytaqa ruwayku Kusisqa kausay librowanmi. Chay librowanqa allintan Bibliata entiendenki, chay libropin kashallantaq fotokuna, videokuna Bibliata allinta entiendenapaq. Bibliata estudiasqankun runakunataqa allinta yanapashan kusisqa kausanankupaq.

Sichus astawan yachayta munanki imaynatas Jehová Diospa testigonkuna Bibliamanta yachachiyku chayta chayqa, jaykuy jw.org nisqaman chaypin tarinki ¿Imaraykun Bibliata estudianayki? nisqa videota.