05 YACHACHIKUY
Bibliaqa Diospa qowasqanchis qelqan
Jehová Diosmi runakunaman juj sumaq regalota qowarqanchis, chay regaloqa Biblian, chaypin tarikun 66 librochakuna. Ichaqa tapukushankipaschá: “¿Imaynapin Bibliata ruwakurqan? ¿Diospunichu Bibliata ruwachirqan?”, nispa. Chaykunata yachananchispaq qhawarisunchis imaynatas Diospa willakuynin chayamuwarqanchis chayta.
1. Bibliata runakunaña qelqarqanku chaypas, ¿imaraykun ninchis “Diospa palabranmi” nispa?
Bibliataqa tawa chunka runakuna jinan qelqarqanku, chay runakunaqa sapankankupas jujniraymi karqanku, manataqmi kaq llank’anayoqchu karqankupas. Bibliataqa 1513 watapi manaraq Jesús jamushaqtinmi qelqayta qallarirqanku, tukurqankutaq 98 watapi Jesuspa jamusqan qhepata. Chhaynaqa Bibliataqa qelqarqanku 1600 watakunapi jinan. Chhaynaña kaqtinpas Bibliaq yachachikuyninkunaqa ch’ulla willakuyllan. Chayqa chhayna kashan Dios kikin chayta ruwachisqanraykun (leey 1 Tesalonicenses 2:13). Bibliata qelqaq runakunaqa manan paykunaq piensasqankuman jinachu imatapas churarqanku, aswanmi “santo espirituq kallpachasqan kaspa Diosmanta rimarqanku” (2 Pedro 1:21).a Diosqa santo espiritunwanmi, atiyninwanmi chay runakunata yuyaycharqan paypa imachus piensasqanta qelqanankupaq (2 Timoteo 3:16).
2. ¿Pikunapaqmi Biblia ruwasqa kashan?
Bibliaq sumaq willakuyninkunaqa “llapa nacionkunamanta, ayllukunamanta, rimaykunamanta, llaqtakunamantawan” runakunapaqmi kashan (leey Apocalipsis 14:6). Diospa munayninpin Bibliaqa askha simikunaman t’ijrasqa karqan. Yaqa llapa runakunapas atillankumanmi Bibliapi imachus willasqanta yachaytaqa.
3. ¿Imatan Jehová Dios ruwarqan Biblia mana chinkananpaq?
Bibliaqa qelqasqa karqan qara k’uyukunapi, papiro plantamanta ruwasqa k’uyukunapi iman. Chay k’uyukunaqa ratullataq mauk’ayapuq chayqa, askha runakunan chaykunata makillankuwan copiaqku. Chay runakunaqa anchatapunin Bibliata munakurqanku, chaymi wakinqa vidankuwanraq jark’akurqanku Bibliata ama chinkachinankupaq. Askha munayniyoq runakunaña Bibliata chinkachiyta munarqanku chaypas, Jehová Diosqa manan chay ruwanankuta munarqanchu. Bibliapipunin nishan: “Diosninchispa rimasqankunaqa wiñaypaqmi”, nispa (Isaías 40:8).
ASTAWAN YACHASUNCHIS
Kaypin yachasun imaynatas Jehová Dios Bibliata qelqachirqan chayta, imatas ruwarqan Biblia mana chinkananpaq chayta, imaynatas llapa runakunaman palabranta chayachirqan chaytapas.
4. Biblia kikinmi willakun pichus qelqachirqan chayta
VIDEOTA qhawaychis. Chaymantataq leeychis 2 Timoteo 3:16 textota, jinaspa jamuq tapuykunaman jina parlariychis:
Runakunallataq Bibliata qelqarqanku chayqa, ¿imanaqtinmi ninchis “Diospa palabranmi” nispa?
¿Dios atinmanchu karqan Bibliata qelqanankupaq runakunata yuyaychayta?
Juj jefen secretarionman dictashan cartapi imatachus qelqananta. Chhaynallataqmi Bibliawanpas karqan, runakunaña qelqarqanku chaypas, Diosmi paykunataqa yuyaycharqan imatachus chaypi qelqanankupaq.
5. Manapunin Bibliataqa chinkachiyta atirqankuchu
Tiempoq pasasqanman jinaqa, askha kamachikuqkunan Biblia chinkachiyta munarqanku, Diosmi ichaqa mana dejarqanchu. Wakin religionkunapi umallikunapas manan munarqankuchu runakuna Bibliata leenankuta. Ichaqa askha runakunan enemigonkutapas wañuytapas mana manchakusparaq Bibliata waqaycharqanku. Jujninmanta yachanapaq VIDEOTA qhawaychis, jinaspa jamuq tapuyman jina parlariychis:
Biblia mana chinkananpaq tukuy ima ruwakusqanmanta yachasqayki, ¿kallpachasunkichu Bibliata astawan leenaykipaq?
Leeychis Salmos 119:97 textota, jinaspa jamuq tapuyman jina parlariychis:
¿Imanaqtinmi askha runakuna wañuytapas mana manchakuspa Bibliata juj simikunaman t’ijrarqanku, juj runakunamanpas chayachirqanku?
6. Bibliaqa llapan runakunapaqmi
Bibliallan ima qelqamantapas ancha askha simikunaman t’ijrasqa kashan, yaqa llapa runaq makinpitaqmi kashanpas. Leeychis Hechos 10:34, 35 textota, jinaspa qatiqninpi tapuykunaman jina parlariychis:
¿Imanaqtinmi Dios munan palabran juj simikunaman t’ijrakunanta, lliu runamanpas chayananta?
¿Ima willakuymi Bibliamanta astawan admirachisunki?
Pachantinpi yaqa
LLAPAN
runakunapas
atillankumanmi entiendesqanku simipi Biblia leeytaqa
Bibliaqa
KINSA WARANQA
más simikunapin kashan,
wakin simikunapiqa Bibliamanta juj partellan kashan
PISQA WARANQA MILLÓN
Bibliakunatan kunankama ruwakurqan.
Manan ima qelqatapas chhaytukuytaqa ruwakurqanchu
WAKIN RUNAKUNAN NINKU: “Bibliaqa runaq ruwasqallanmi”, nispa.
¿Imaninkin chaymanta?
¿Imakunan rikuchin Bibliaqa Diosmantapuni jamusqanta?
IMATAN YACHAMURQANCHIS
Kaypin yacharqanchis Bibliaqa Diosmantapuni jamusqanta. Diosmi encargakurqan paypa palabran llapa runaman chayananpaq.
Yuyarisun
¿Imaynatan Dios runakunata yuyaycharqan Bibliata qelqanankupaq?
Askha willakuykunatan yacharunchis Bibliamanta, ¿mayqenmantan astawan admirakunki?
Diosqa tukuy imatan ruwarqan palabran qanman chayamunanpaq, ¿imaninkin chaymanta?
ASTAWAN YACHANAYKIPAQ
Bibliamanta astawan yachay: ¿Imaynatan ñaupa qelqakuna ruwakurqan? ¿Imaynatan juj simikunamanpas t’ijrakurqan?
“¿Imaynapin Biblia kay tiemponchiskama chayamurqan?” (¡Rijch’ariy!, 2007 watapi noviembre killa)
Bibliaqa kinsa enemigokunatan atiparqan, chaymantan kay qelqapi willakushan.
“Bibliataqa manan chinkachiyta atirqankuchu” (Qhawaq, 2016 watapi núm. 4)
Qhaway imakunapis wakin runakuna tarikurqanku Bibliata juj simikunaman t’ijrasqankurayku chayta.
Bibliataqa askha kutitataq copiarqanku, askha simikunamantaq t’ijrarqankupas chayqa, ¿cambiasqañachu kashanman Diospa willakuynin?
“¿Cambiarqankuchu Bibliaq willakuyninta?” (jw.org paginapi leey)
a Santo espirituqa Diospa kallpanmi, atiyninmi. Chay atiywanmi payqa tukuy imatapas ruwan, chaymantan astawan willakushan qanchis yachachikuypi.