¡Tempranotan chayananchis!

MAYMANPAS temprano chayayqa sasan. Mayninpiqa karutan viajananchis. Yaqapaschá callekuna hunt’a kaqtin mana usqhaytachu chayasunman otaq tiemponchis mana aypawasunmanchu. Chaywanpas kallpachakunanchismi temprano chayananchispaq. Llank’ananman tiemponpi chayaqtaqa allinpaqmi qhawarinku, confiankutaq paypi. Tardeta chayaqmi ichaqa hukkunatapas llank’ananpi atrasan, manataqmi imatapas allintachu ruwakun. Escuelaman tardeta chayaq wawakunapas manañan hunt’asqatachu yachanku. Doctorman otaq kiru hampiqman mana tiemponpichu chayasunman chaypas, hawan ukhuntan hampiwasunman.

Wakin runakunaqa manan importantepaqchu qhawarinku maymanpas temprano chayayta, yaqapaschá ñoqanchispas paykuna hina yuyaykushasunman. Chhayna kaqtinqa cambiananchismi yuyaykusqanchista. Ancha allinpaqmi qhawarinanchis maymanpas temprano chayaytaqa. ¿Imaraykun maymanpas temprano chayananchis? ¿Imaynatan chayta ruwasunman? ¿Imaynapin allinninchispaq kanman? Chaymantan yachasunchis.

Diosqa tiemponpin ruwan

Jehová Diosqa tiemponpipunin imatapas ruwan, chaymi ñoqanchispas kallpachakunanchis pay hina kananchispaq (Efe. 5:1). Payqa rimasqanman hinan tiemponpi imachus munasqanta hunt’an. Hatun parawan millay runakunata wañuchinanpaq yuyaykuspanmi Noeta nirqan: “Ciprés sach’a kurkumanta arcata ruway”, nispa. Tiempo chayamuqtintaq Noeta kamachirqan arcaman haykunanpaq, nirqantaq: “Qanchis p’unchayman[tan] ñoqa kay pachaman parachimusaq tawa chunka p’unchayta tawa chunka tutatawan, hinan hayk’an kawsaq ruwasqayta kay pachamanta ch’usaqyachisaq”, nispa. Rimasqanman hinan karqan, ‘qanchis p’unchaymantan millp’uq para unu kay pachata millp’urqan’ (Gén. 6:14; 7:4, 10). Noewan Familianwan arcaman mana haykunkumanchu karqan chayqa, ¡imaraqchá paykunata sucedenman karqan! Chaymi yupaychasqanku Dios hina tiemponpi ruwaq kananku karqan.

Chaymanta tawa pachak wata hina pasaqtinmi Jehová Diosqa Abrahamman prometerqan wawayoq kananpaq, chay wawamantataq prometesqan Mesías hamunanta (Gén. 17:15-17). ¿Hayk’aqmi chay wawa nacenan karqan? Diosmi nirqan: “Kunan hina tiempo q’aya watapi”, nispa. ¿Hunt’akurqanchu rimasqan? Arí, hunt’akurqanmi, “chaymi Saraqa wiksallikuspa qhari wawata Abrahampaq wachakurqan yuyaq kashaqtinña, payman Diospa nisqan tiempopi” (Gén. 17:21; 21:2).

Bibliaqa askha kutitan willan Jehová Diosqa tiemponpi ruwaq kasqanmanta (Jer. 25:11-13; Dan. 4:20-25; 9:25). Chaymi Diospa hatun p’unchaynintaqa rikch’asqalla suyakushananchis. Runakunaña ninkuman: “Mayraqchá chayqa chayamunqa”, nispa chaypas, Biblian niwanchis ‘tiemponpipuni chayamunanta’ (Hab. 2:3).

Diosta servispaqa tiemponpin imatapas ruwananchis

Israel llaqtamanta qharikunaqa Jehová Diospa ‘fiestankunata’ ruwanankupaqqa tiemponpin chayananku karqan (Lev. 23:2, 4). Chaymantapas Diosqa kamachirqanmi imay horasta sacrificiokunata haywanankupaq (Éxo. 29:38, 39; Lev. 23:37, 38). Chaykunan yachachiwanchis Jehová Diosta servispaqa tiemponpi imatapas ruwananchis kasqanta.

Ñawpaq tiempopin apóstol Pablo Corinto cristianokunata yuyaycharqan huñunakuyninkuta imaynata aparinankupaq. Nirqanmi: “Tukuy imatapas chaninninpi ruwaychis, maychus ruwanaman hinapuni”, nispa (1 Cor. 14:40). Chaywanmi nisharqan huñunakuyninkuta tiemponpi qallarinankupaq. Kunanpas Jehová Diosqa chay ruwananchistan munan (Mal. 3:6). Chhaynaqa, ¿imatan ruwasunman huñunakuyninchiskunaman temprano chayananchispaq?

¿Imakunan yanapawasunman temprano chayananchispaq?

Ñawpaqmantañan yuyaykunanchis imakunachus ruwananchista (Pro. 21:5). Maymanpas rinayki kaqtinqa tiempowanmi lloqsinayki allin horapi chayanaykipaq, chhaynapi qonqaylla ‘imaynapipas rikukuspayki’ ama tardeachikunaykipaq (Ecl. 9:11). José sutiyoq iñiqmasinchismi maymanpas tempranota chayan,a paymi nin: “Temprano chayanaypaqqa ñawpaqmantan yuyaykuni hayk’a tiempopichus chayayman chayta”, nispa.

Wakin iñiqmasinchiskunaqa yaqapaschá kallpachakunanku kanqa llank’anankumanta ñawpaqta lloqsinankupaq, chhaynapi huñunakuykunaman tempranota chayanankupaq. Chaytan ruwarqan Etiopía llaqtayoq iñiqmasinchis, llank’ananpi horario cambiakusqanwanmi tawa chunka phisqayoq minutota huñunakuyman tardeta chayanman karqan. Chaymi huñunakunan p’unchaykunata huk llank’aqmasinta valekurqan llank’anan horamanta aswan ñawpaqta hamuspa reemplazananpaq, paytaq comprometekurqan qanchis horata paymanta llank’ananpaq.

Wawakunayoqpaqqa aswan sasan huñunakuykunaman temprano chayay. Maman astawanqa encargakun wawakunata alistananpaqqa, ichaqa hukkunapas yanapakunankun. México llaqtayoq Esperanza sutiyoq iñiqmasinchismi sapallan uywan pusaq wawankunata, kurak kaqmi 23 watayoq, sullk’a kaqtaq 5 watachayoq. Paymi nin: “Kurak ususiykunan yanapawanku sullk’ankuna alistaypi, chhaynapin tiempoy aypawan wasiypi huk ruwaykunata tukuspay imay horaschus huñunakuyman lloqsinayku kasqanta hunt’anaykupaq”, nispa. Qhawarisqanchis hina, chay familiaqa yachanñan ima horapi wasinkumanta lloqsinankuta, llapankutaqmi yanapanakunku chayta hunt’anankupaq.

Temprano chayayqa allinninchispaqmi

Huñunakuykunaman temprano chayay allinninchispaq kasqanta reparaspaqa astawanmi kallpachakusun. Sandra iñiqmasinchismi nin: “Tempranota chayaspayqa iñiqmasiykunatan napaykuni, paykunawan parlarispataq aswanta reqsinakuni”, nispa. Chaymantapas yachasunmanmi ima sasachakuykunata wakin iñiqmasinchiskuna aguantasqankumanta, tukuy sonqowan Diosta servishasqankumantapas. Paykunapas rimapayasqanchiswanqa kallpachakunqakun, chhaynapin kallpachanakusun “aswanta munanakunanchispaq, allin ruwaykunatapas ruwananchispaq” (Heb. 10:24, 25).

Huñunakuy qallariqtin takispapas mañakuspapas Diostan yupaychanchis (Sal. 149:1). Takispaqa yuyarinchismi Diospaq hina kawsananchista, kallpachakunchistaq kusisqa predicananchispaq. Mañakusqanchispas importanten. Diosmi ñawpaq tiempopi pay yupaychana wasimanta nirqan: ‘Mañakuna wasin’, nispa (Isa. 56:7). Kunanpas huñukuyta qallarinapaqqa Diosmantan mañakunchis yanapayninta espirituntawan chaskinanchispaq, chhaynapin yuyayninchista sonqonchistawan kicharinchis yachachikuyninkunata allinta hap’inanchispaq. Chayraykun kallpachakunanchis huñukuyman temprano chayananchispaq.

23 watanpi kashaq Helen iñiqmasinchismi nin: “Tempranota chayaspayqa Jehová Dios munakusqaytan rikuchini, paymantan hamun chaypi yachachikuykunapas takikunapas, pay munaqtinmi mañakunchispas”, nispa. Ñoqanchispas pay hinan yuyaykunanchis. Chaymi kallpachakunanchis maymanpas temprano chayananchispaq, astawanqa Diosta yupaychananchis kaqtin.

[Uranpi willakuy]

[26 paginapi dibujo]

Ñawpaqmantaña alistakuy

[26 paginapi dibujo]

Qonqayllan imapas tardeachisunkiman, chaypaqwan tiempota t’aqay

[26 paginapi dibujokuna]

¡May allinmi huñunakuyman temprano chayayqa!