Diosqa asuykunaykitan munan

¿IMARAYKUN ISKAYANKU? Askha runakunan Diospi iñinku, ichaqa sinchi karupipas kashanman hinatan rikunku. Irlanda nacionmanta Christinan sapa semana iglesianta riq, paymi nin: “Yacharqanin tukuyta Dios kamasqanta, ichaqa manan reqsirqanichu, sinchi karupipas kashanman hinatan qhawariq kani”, nispa.

¿IMANINMI BIBLIA? Karupipas kashanman hinataña Diosta rikusunman chaypas, payqa manan saqerpariwanchischu. Chaytan Jesús huk rikch’anachiywan nirqan: “Pachak ovejayoq runaq huk ovejan chinkaqtinqa, ¿manachu isqon chunka isqonniyoq ovejata orqoman saqeykuspa chay chinkaq oveja maskhaq purinman?”, nispa. ¿Imatan chaywan yachachisharqan? Paypunin nirqan: “Hanaq pachapi kaq Yayaykichispas manan munanchu kay huch’uykunamanta huknillanpas chinkanantaqa”, nispa (Mateo 18:12-14).

Diosqa ‘huch’uykunatapas’ ancha chaninpaqmi qhawarin. Ichaqa, ¿imaynatan ‘chinkasqa’ ovejankunata maskhan? Qallariypi nisqan hina, chay ovejakunata payman pusamuspan.

Diosqa askha runakunatan payman pusamurqan. Apostolkunaq tiemponpin Diosqa Felipeta Etíope llaqtamanta eunuco runaman kacharqan. Chaypin Felipeqa eunuco runaman sut’incharqan leesqan qelqakunata (Hechos 8:26-39). Huk kutipiqa Pedrotan soldadokunaq capitannin Cornelio runaman kacharqan. Payqa Diosmantan mañakuq kallpachakurqantaq Diosta servinanpaq (Hechos 10:1-48). Huk kutipiqa Pablota huk iñiqmasikunatawanmi Filipos llaqtaman kacharqan, chaypin Diosta yupaychaq Lidia sutiyoq warmiwan tuparqanku. “Paypa sonqontan Señorqa kicharirqan Pabloq nisqanta tukuy sonqo uyarinanpaq” (Hechos 16:9-15).

Chay runakunaqa Diostan maskhasharqanku, chaymi Diosqa payman pusamurqan. Kay tiempopiri, ¿pikunan wasin-wasinta, callekunapipas Diosmanta willamushanku? Jehová Diospa testigonkunan. Tapurikuy, “¿Dioschu paykunata kachamuwashanman?”, nispa. Diosmanta mañakuy paykunaq yanapayninwan Diosman asuykunaykipaq.a