Octubre

Shujcunata cazunaca quiquinbaca ¿dificilchu cashca? Rey Davidtaca huaquinbica chaimi pasarca. Chaimandami paica Jehovataca canda cazuna munaita carahuai nishpa mañarca (Sal. 51:12). Rey David Jehovata ninanda juyashpapash huaquinbica paipaca Jehovata cazunaca dificilmi carca. Ñucanchipapashmi shinallata can. Primeroca, juchayu caimandami cazunaca difícil caita ushan. Segundo, Diabloca paishna na cazujcuna cachunmi imacunatapash rurajun (2 Cor. 11:3). Ultimopica, na cazungapaj munaj gentecunapa chaupipimi causanajupanchi. Chaimi Diabloca gentecunamanga “na cazuna yuyaicunata” yachachin. Chai yuyaicunaca huairashnami tucui ladocunapi can (Efes. 2:2). Ñucanchicunaca juchayucuna caimandami pecadocunapi ama urmangapaj ninanda esforzarina tucupanchi. Shinallata Diablopa trampacunapi ama urmangapaj y cai mundopa nali ruraicunapipash ama urmangapami ninanda esforzarina capanchi. Ashtahuanbash Jehovata tucuipi cazungapaj y Jehová cushca autoridadta charij gentecunata cazungapapashmi esforzarina capanchi. w23.10 pág. 6 párr. 1

Jesuspa milagromandaca ¿imatata yachajupanchi? Humilde cana cashcatami yachajupanchi. Jesusca yacumanda vinoman tigrachishcamandaca na jariyarcachu. Paica imata rurashpapash nunca na jariyanllu carca. Jesusca humilde caimandami imata rurashpapash Jehová Diospa ayudahuanmi rurai ushani nin carca (Juan 5:​19, 30; 8:28). Jesuspa ejemplota catishpaca ñucanchicunapash humildecuna cashpami, imatapash alita rurai ushashcamandaca na jariyashun. Jehová Diosta sirvina bendicionda charishcamandami cushijuna capanchi (Jer. 9:​23, 24). Jehová Dios na ayudajpica na imatapash aliguta rurai ushapanchimanllu. Shinaca imata rurashpapash Jehovapa ayudahuanlla alita rurai ushashcatami yarina capanchi (1 Cor. 1:​26-31). Pipash ciertopacha humilde cashpaca shujcunata ayudashcamandaca shujcunapa ñaupapi ali ricuringapaca na munanllu. Chaipa randica Jehová Dios pai imata rurashcata ricujta y ninanda valorajta yachashpaca cushillami sintirin (Mat. 6:​2-4​huan chimbapurashpa ricupangui; Heb. 13:16). Ñucanchicuna Jesús shina humilde cangapaj munashcata ricushpaca, Jehová Diosca ninandami cushijun (1 Ped. 5:6). w23.04 pág. 5 párrs. 9, 11-12

Jehová Diosca apóstol Pablotaca cashnami escribichirca: ‘Na quiquingunapa beneficiotallachu mascana canguichi. Shujcunapa beneficiotapashmi mascana canguichi’ nishpa. Reuniongunapi cashpaca ¿imashinata chai consejota pactachita ushapanchi? Chaipaca tucuicunallata comentangapaj munashcatami yarina capanchi. Caipi pensaripashun: Amigocunahuan parlashpaca na ñucanchillachu parlanchi. Paicunapash parlachunmi saquipanchi. Reuniongunapipash chashnallatami can. Ñucanchilla comentanapa randica, ashtaca huauquipanicuna comentachunmi munapanchi. Shinaca shuj huauquipanicunapash comentachun saquishpami paicunataca ashtahuan animai ushapanchi (1 Cor. 10:24). Ashalla shimicunapimi comentaita ushapanchi. Shinami shujcunapash comentachun ashtahuan tiempo tianga. Shinallata comentariocunapica ashtaca yuyaicunamanda parlanaca na minishtirinllu. Shuj parrafopi tucui yuyaicunata ñucanchilla comentajpica shujcunaca ñana imatapash comentai ushangachu. w23.04 págs. 22-23 párrs. 11-13

Cambiocuna ricurijpica shujcunata ayudashpa catinaca minishtirishcapachami can. Gentecunaman predicashpami ashtahuanbachaca ayudaita ushapanchi. Predicacionbica shujcunata intindina, na ñucanchi nishcahuanlla yalinaca minishtirishcapachami can. Predicajushpaca shuj shuj causaita, culturata, comportamientocunata charij gentecunahuanmi tuparipanchi. Apóstol Pablopa ejemplota catinaca ¿imamandata minishtirishca can? Pabloca gentecunaman predicangapaj cambiocunata rurana cashpaca rurarcallami. Chaimandami Jesusca na judío gentecunaman villachichun paitaca agllarca (Rom. 11:13). Pabloca Jesús mandashcata pactachingapami judiocunaman, griegocunaman, estudiashcacunaman, campopi causajcunaman, gobiernopi trabajajcunaman, autoridadcunamanbash villachirca. Shinaca chai tucui gentecunaman Taita Diosmanda yachachishpa ayudangapaca tucuitami rurarca (1 Cor. 9:​19-22). Taita Diosmanda villachijushpaca paicunapa crishcacunata, culturacunata intindishpami villachirca. Caimandaca ¿imatata yachajupanchi? Villachinajushpaca gentecunata intindishpa, imata minishtijushcata ricushpami villachita ushapanchi. Shinami paicunataca ashtahuan ayudaita ushapashun. w23.07 pág. 23 párrs. 11-12

Na ñapash culiraj personaca imapash jatun problemacuna ricurijpica na ñapash culirashpa controlarishpami shinlli cashcata ricuchin. Na ñapash culiranaca ‘Taita Diospa espíritu santomandami’ shamun (Gál. 5:​22, 23). Na ñapash culiranata griego shimimanda traducishpaca huaquinbica sacha millai caballocunata mansoyachingapami utilizan carca. Shinaca shuj sacha, millai caballo manso tucushpapash shinlli cashpallatami catin. Shinaca ¿imashinata ñucanchicunapash na ñapash culirangapaj controlarishpapash shinlli cashcata ricuchi ushapanchi? Chaipaca Jehová Diospa espíritu santotami mañana capanchi. Shina rurashpallami cai alipacha cualidadtaca charita ushapashun. Shinaca na ñapash culirashpa controlarinaca na yapa dificilchu can. Por ejemplo, shujcuna yangamanda culiraringapaj munajpica testigo de Jehovacunaca na ñapash culirashpa controlarina cualidadta ricuchimandami shuj gentecuna testigo de Jehovacunata alicachishpa ricuchun ayudashca (2 Tim. 2:​24, 25). w23.09 pág. 15 párr. 3

Apóstol Juanga 24 ancianocuna jahua cielopi Jehová Diosta adorajushcatami shuj muscuipishna ricurca. Paicunaca Jehová Diosta alabashpami “quiquinmi jatunyachi tucuna derechotapash y respetai tucuna derechotapash charipangui” ninajurca (Apoc. 4:​10, 11). Angelcunapash Jehová Dioshuan jahua cielopi cashcamandami paitaca ali ali rijsin. Chaimandami paicunaca Jehová Diosta alaban y respetan. Jehová Dios imata rurajta ricushpami angelcunaca paita ashtahuan ali rijsita ushan. Chaimandami paita ashtahuan alabana munaita charin (Job 38:​4-7). Jehová Diosta mañajushpaca ñucanchicunapashmi paitaca alabana capanchi. Paita alabangapaca paimanda imata gushtashcata y imamanda alicachishcatami nita ushapanchi. Shinallata Bibliata estudiajushpaca Jehová Diospa ali cualidadcunata ricungapaj y cai cualidadcunata imamanda gushtashcata ricungapaj esforzaripashunchi (Job 37:23; Rom. 11:33). Jipamanga Jehová Diospa cualidadcunata yachaimanda imashina sintirishcata paiman villashpa mañapashunchi. Shinallata Jehová Dios ñucanchita ayudashcamanda y shuj huauquipanicunatapash ayudashcamandami paitaca alabaita ushapanchi (1 Sam 2:​1, 2). w23.05 págs. 3-4 párrs. 6-7

1919 huatapica Jehová Diosta sirvijcunaca Babilonia Importante Llactapa o panda religiongunapa crishcacunata saquitapacha saquishpami caruyarca. Chai huatapimi ‘aliguta cazushpa, aliguta pensarishpa sirvij esclavoca’ tiai callarirca. Chaimandami ali shunguta charij gentecunaca ‘jucha illaj Ñanbi’ puri callari usharca (Mat. 24:​45-47; Is. 35:8). Shujcuna ‘jucha illaj Ñanda’ preparangapaj ayudashcamandami gentecunaca cai ñanbi purishpa Jehová Diosmanda y paipa voluntadmanda ashtahuan yachajuita usharca (Prov. 4:18). Shinallata Taita Diospa ñaupapi ali ricuringapami paicunapa causaipica cambiocunata ruraita usharca. Shinapash Jehová Diosca paicuna ñapash tucuipi cambiocunata rurachunga na shuyarcachu. Ashtahuanbachaca Jehová Diosca paita sirvijcuna paipa ñaupapi limpio causaiguta charichunmi asha asha ayudarca. Shuj punlla Jehová Diospa ñaupapi tucuita ali rurai ushashcamandaca ninandami cushijupashun. Shuj ñan ama huaglichunga cuidashpa y arreglashpami catina can. Shinallata 1919 huatamandami ashtahuan ashtahuan gentecuna Babilonia Importante Llactamanda llujshishpa catichun ‘jucha illaj Ñanda’ arreglashpa, cuidashpa catishca. w23.05 pág. 17 párr. 15; pág. 19 párr. 16

Cuerpo Gobernantemanda huauquicunata ayudashpa trabajaj huauquicunaca, ashtaca responsabilidadcunatami charin y cai responsabilidadcunataca paicunaca ali alimi pactachinajun. Chaimandami cai huauquicunaca Jehovata sirvijcunata ñaupaman pushangapaca preparadopacha can. Ninan manllanai llaqui punllacuna ña tucurinallapi tucuilla ungidocunata cieloman Jehová Dios apajpipash, Jehovata cai alpapi sirvijcunaca paita na saquishpami sirvishpa catinga. Jehovata sirvijcunata Jesús umashna ñaupaman pushajushcamandami paicunaca na manllashpa Jehovata sirvishpa catinga. Chai tiempocunapica Bibliapi nishcashnami Gog de Magog o tandanajushca llactacunaca Jehovata sirvijcunata atacai callaringa (Ezeq. 38:​18-20). Shinapash Gog de Magog, Jehovata sirvijcunata atacajpica asha tiempotallami paranga. Jehová Diosca paipa sirvijcunataca de seguromi ayudanga. Shinami paicunaca Jehová Diosta sirvishpa catinga. Apóstol Juanga shuj muscuipishnami ‘pipash na cuentai ushanalla ashtaca ashtaca gentecunaca’ “ninan manllanai” llaqui punllacunamanda salvarishpa llujshinajujta ricurca. Shinaca Jehová Diosca paipa sirvijcunata salvanatami seguro caita ushapanchi (Apoc. 7:​9, 14). w24.02 págs. 5-6 párrs. 13-14

Jehová Dios paipa espíritu santota ñucanchiman carachunga ¿imatata rurana capanchi? Chaipaca Jehovata mañana, Bibliata estudiana y paipa organizacionbimi tandanajushca cana capanchi. Shina rurashpaca ‘Taita Diospa espíritu santo’ ayudajpimi, Jehová Dios munashcashna ali cualidadcunata chari ushapashun (Gál. 5:​22, 23). Jehová Dios paipa espíritu santota carachunga ñucanchi ruraicuna y ñucanchi pensamientocunaca limpio, alimi cana can. Shinapash nali pensamientocuna ñucanchita mishachun saquishpaca Diospa espíritu santotaca ñana chari ushashunllu (1 Tes. 4:​7, 8). Shinaca ¿imatata ashtahuan yaipi cana capanchi? Pabloca: “Taita Diospa profeciacunata sin respetoca na tratanachu capanguichi” nircami (1 Tes. 5:20). Cai textopi profeciacuna nishpaca Jehová Dios paipa espíritu santota utilizashpa villashcacunatami nijun. Por ejemplo, Jehová Diospa punllamanda y chai punlla ñalla chayamuna cashcamanda parlaj profeciacunaca, chai textopi parlashca profeciacunapurapimi can. Ñucanchicunaca, Jehová Diospa punllapaca ashtaca tiempo faltajtaca na pensapanchichu. Shinallata Armagedón punllataca na ricushunllu nishpapash na pensapanchichu. Chaipa randica, Jehová Diospa punlla ñalla chayamuna cashcatami yaria capanchi. Chaimandami ali portaringapaj y ‘ñucanchi ruraicunahuan Taita Diosta tucui shunguhuan sirvishcata ricuchingapaj’ esforzaripanchi (2 Ped. 3:​11, 12). w23.06 pág. 12 párrs. 13-14

Computadorata, telefonota utilizajushpa cungashcapi pornografiata ricuchij shuj foto o video ricurijpica cristianocunaca ¿imatata rurana can? Shina pasajpica ñapashmi shuj ladoman ricushpa uchalla cambiana can. Chaita rurai ushachunga Jehová Dioshuan ali amigo cana ñucanchipa importantepacha cashcata yarinami ayudanga. Huaquin fotocuna, videocuna gentecunapa ñaupapi na pornografiapacha cashpapash nali munaicunatami mirachita ushan. Chashna cosascunatapash na ricungapaj munapanchichu. Shungu ucupillapash huainayana munaita na charingapaj munaimandami chaicunataca na ricungapaj munanchi (Mat. 5:​28, 29). Tailandia llactamanda David shuti anciano huauquiguca: “Ñucaca cashnami pensaripani: ‘Cai fotocuna, videocuna na pornografiashnalla ricurijpipash caicunata ricushpa quidajpica Jehová Diosca ¿imashinata sintiringa?’ nishpa. Chashna pensarinami ali decisiongunata agllachun ayudahuashca” ninmi. Jehová Diosta manllaimanda imapash nalicunata na rurangapaj munashpaca ali decisiongunataca ashtahuan facilmi agllaita ushashun. “Alipacha yachajushpa callaringapaca, Mandaj Diostami manllashpa causana” canchi. w23.06 pág. 23 párrs. 12-13

Cai textopi ‘ucucuna’ nishpaca talvez congregaciongunamandami parlajun. Chai tiempocunapi ñucanchi huauquipanicunahuan ali llevarishpa, unidos cajpica Jehová Dios prometishcashnami ñucanchitaca cuidanga. Ñucanchi huauquipanicunapa pandarishcacunata aguantanaca na suficientechu can. Paicunataca cunanmandallatami ciertopacha juyana capanchi. Ciertopacha juyaita ñucanchi huauquipanicunaman na ricuchishpaca ninan manllanai llaqui tiempopica talvez na salvarishunllu. Jehovapa punlla chayamushpaca gentecunapaca llaqui tiempomi canga (Sof. 1:​14, 15). Jehovata sirvijcunapashmi llaquicunataca charinga. Shinapash cunanmandallata listo, preparado cashpaca na yapata manllarishpami shujcunatapash ayudaita ushapashun. Ima llaquicuna shamujpipash mishai ushangapaca aguanteta charinami ayudanga. Shinallata shujcunata llaquinami huauquipanicuna imagupi minishtinajujpipash ayudangapaj dispuesto capashun. Y paicunata ña juyashcamandami ima pasajpipash shujllashna unido caita ushapashun. Y shina rurashcamandami Jehová Diosca para siempre causana bendicionda ñucanchimanga caranga. Chaipica tucui llaquicuna, problemacunaca ñana tiangachu (Is. 65:17). w23.07 pág. 7 párrs. 16-17

Bibliapi Jehová Diosta ashtaca sirvijcunamanda parlashpaca shinlli, na manllajcuna cashcatami nin. Shinapash paicunaca na siemprechu shina sintirirca. Por ejemplo, rey Davidca huaquinbica na manllaj, shinlli shinlli shuj ‘jatun urcushnami’ sintirirca. Cutin huaquinbica fuerza illa, ninan manllaihuanmi sintirirca (Sal. 30:7). Shinallata Sansón runaguca Jehová Dios paipa espíritu santota cujpillami ashtaca fuerzata charirca. Shinapash Jehová Dios chai poderta na cujpica ‘imata ruraitapash na ushashpa, caishuj runacunashnallata tucun cashcatami’ yacharca (Juec. 14:​5, 6; 16:17). Shinaca Jehová Dios paicunata ayudashcamandami paicunaca shinlli, na manllajcuna carca. Apóstol Pablopash Jehová Diospa ayudata minishtishcataca alimi yacharca (2 Cor. 12:​9, 10). Apóstol Pabloca huaquinbica irquiyanmi carca (Gál. 4:​13, 14). Ashtahuanbash alita rurangapapashmi ninanda esforzarina carca (Rom. 7:​18, 19). Shinallata huaquinbica llaquilla o paipa causaihuan ima pasanata na yachaimanda manllaihuanmi sintirin carca (2 Cor. 1:​8, 9). Shinapash paica: “Fuerza illashna cashpami ashtahuan shinlli cani” nirca. ¿Imamandata shina nirca? Jehová Diosmi paimanga minishtirishca fuerzata cararca. Chaimandami na manllaj, shinlli caita usharca. w23.10 pág. 12 párrs. 1-2

Ima horapash nimapa na sirvinshna sintirijushpaca, Jehová Dios ayudajpi paipa organizacionbi cashcata yaripangui (Juan 6:44). Jehová Diosca ñucanchicuna ima laya gentecuna cajtaca ali alimi rijsin. Shinallata ñucanchi charishca ali cualidadcunatami ricun (2 Crón. 6:30). Shinaca, Jehová Dios ñucanchicunata ninan valishcami canguichi nijpica tranquilomi confiaita ushapanchi (1 Juan 3:​19, 20). Talvez ashtacacunami Jehovata nara rijsishpa nali cosascunata rurashcamandami nali, llaquillapacha sintirinajupashun (1 Ped. 4:3). Cutin shujcunaca ashtaca tiempotami nali munaicunata mishangapaj esforzarinajun. Quiquinbash, ¿Jehová Diosca ñucataca na perdonahuangachu nishpa pensapanguichu? Shina cashpaca Jehovata punda sirvijcuna chashnallata sintirishcata yachanami ayudapanga. Por ejemplo, apóstol Pabloca paipa pandarishcacunata yarishpaca ninandami llaquirin carca (Rom. 7:24). Apóstol Pabloca nali ruraicunamanda arripintirishpa y bautizarishca cashpapash ‘gulpi apostolcunamandaca, ñucami menos importante cani’ nishpami pensan carca. Shinallata ‘ashtahuan yali juchayumi’ cani nishpapashmi pensan carca (1 Cor. 15:9; 1 Tim. 1:15). w24.03 pág. 27 párrs. 5-6

Rey Jehoaspa nali decisiongunamandaca ashtacatami yachajuita ushapanchi. Ñucanchita ayudaj ali amigocunata agllana cashcatami yachajupanchi. Cai amigocunaca Jehová Diosta sirvij y paita cushichingapaj munajcunami cana can. Paicunaca diferente edadcunatapashmi charita ushan. Yaripai: Jehoasca sumo sacerdote Jehoiadahuan ricujpica ashtahuan jovenmi carca. Quiquinba amigocunata yarishpa cashna pensaripai: “¿Paicunaca Jehová Diospi ashtahuan feta charichun ayudahuanllu? ¿Jehovapa mandashcacunata cazuchun animahuanllu? Jehová Diosmanda y Bibliata yachajunamanda ¿parlanata gushtanllu? ¿Jehovapa mandashcacunata respetanllu? Ñuca pandarijpica ¿corregihuanllu? O na cashpaca ¿ñuca uyangapaj munashcatallachu nihuan?” (Prov. 27:​5, 6, 17). Quiquinba amigocuna Jehová Diosta na sirvijcuna cajpica paicunataca quiquinga na minishtipanguichu. Pero quiquinba amigocuna Jehová Diosta tucui shunguhuan juyajcuna cajpica paicunahuan ashtahuan ali amigo cashpa catipangui. Cashna amigocunata charinaca alipachami can (Prov. 13:20). w23.09 págs. 9-10 párrs. 6-7

Alfa shimica griego abecedariopa primero letrami can. Cutin omega shimica griego abecedariopa último letrami can. Shinaca ‘Ñucami Alfa y Omega cani’ nishpaca Jehová Diosca imata callarichishpapash tucuringacaman imata rurajtami ricuchin. Jehová Diosca Adán y Evata cashna nirca: ‘Ashtaca huahuacunata charishpa, ninanda mirarishpa cai alpapi jundanguichi. Cai alpatapash cuidanguichi’ nircami (Gén. 1:28). “Alfa” shimica Jehová Diospa callaripi primera voluntadtami ricuchijurca. Cutin “Omega” shimica Jehovapa sirvijcuna cai alpapi shuj juyailla paraíso tucujpi Jehovapa voluntad pactarina cashcatami ricuchijun. Jehová Diosca ‘cielota, cai alpata y chaicunapi tucui ima tiashcacunatapash rurashca’ jipaca, paipa voluntadta pactachinapacha cashcatami ricuchirca. Cai shimicunata nishpaca Jehová Diosca cai alpapi causaj gentecunapa paraíso alpagu ña tucujpi paipa voluntadta pactachinatami ricuchijurca (Gén. 2:​1-3). w23.11 págs. 5-6 párrs. 13-14

Babilonia llactamanda Israel llactaman rinaca chuscu quillatami paragrijurca. Chaimandami shinlli ricurijurca. Shinapash Jehová Diosca Israel llactaman imapash llaquicunata ama charishpa ali chayachunmi ayudagrijurca. Israel llactaman tigrangapaj sacrificiocunata rurana cashpapash Jehová Diosta ali sirvij israelitacunaca ashtaca beneficiocunatami charigrinajurca. Por ejemplo, Jehová Diosta cutin ali adorana bendiciondami charigrinajurca. Babiloniapica Jehová Diosta adorangapaca ni shuj templo na tiarcachu. Shinallata Jehová Diosman sacrificiocunata rurangapaj shuj altar ni sacerdotecunapash na tiashcamandami israelitacunaca Moisesman Cushca Leypi nishcashnaca Jehová Diosmanga sacrificiocunata rurashpa na carai usharca. Chai llactapica yanga dioscunata adorajcunaca ashtaca ashtacacunami carca. Paicunahuan ricujpica Jehová Diosta adorajcunaca ashallami ricurirca. Chaimandami ashtaca Jehová Diosta ali adorangapaj munaj judiocunaca Israel llactaman tigrashpa chaipi Jehová Diosta ali adorangapaj munanajurca. w23.05 págs. 14-15 párrs. 3-4

‘Michapa huahuacunashna cashpa catingapaca’, Jehová Diospa espíritu santotami minishtipanchi. Pero ¿imamandata minishtipanchi? Cai mundopi nali, mapa ruraicuna tiashcamandami Jehová Dios munashcashna limpio causaiguta charinaca na fácil can (1 Tes. 4:​3-5, 7, 8). Jehová Diospa espíritu santomi cai mundopa panda yachachishcacunahuan, yanga crishcacunahuan ama chapurichun ayudan. Shinallata Jehová Diospa espíritu santoca ‘ali shungu cachun, alita rurachun y aliguta causachunbashmi’ ayudan (Efes. 5:9). Jesusca ‘jahua cielopi cangunapa Taita Diosta, paipa espíritu santota mañajpica carangallami’ nircami (Luc. 11:13). Shinaca Jehovapa espíritu santota charingapaca Jehová Diostami mañana capanchi. Shinallata ñucanchi huauquipanicunahuan tandanajuicunapi Jehová Diosta alabashpami paipa espíritu santota chasquita ushapanchi (Efes. 5:​19, 20). Jehová Diospa espíritu santoca Jehová Dios munashcashna ali causaiguta charichunmi ayudanga. w24.03 págs. 23-24 párrs. 13-15

¿Ashtahuan pacienciata charingapachu munapangui? Ashtahuan pacienciata charingapaca Jehová Diostami mañana canchi. Taita Diospa espíritu santo pushachun saquishpami pacienciata charishcata ricuchita ushapashun (Gál. 5:​22, 23). Chaimandami Jehová Diostaca paipa espíritu santota cushpa ashtahuan pacienciata charichun ayudahuai nishpa mañaita ushanchi. Imapash llaquipi cashpa pacienciata ñana chari ushajushpaca Jehovata paipa espíritu santota carahuai nishpami mañaita ushanchi (Luc. 11:13). Shinallata Jehová Dios pensashcashna ñucanchipash pensangapaj ayudahuai nishpami mañaita ushanchi. Y Jehová Diosta mañashca jipaca cada punlla pacienciata charishcata ricuchingapami esforzarina canchi. Pacienciata charingapaj Jehová Diosta ayudahuai nishpa y pacienciata charishcata ricuchingapaj esforzarishpaca asha ashami pacienciata charishpa catishun. Shinallata Bibliapi parlashca ejemplocunatami yachajuita ushanchi. Bibliapica pacienciata charishcacunamandami parlan. Paicunamanda yachajushpaca ñucanchicunapashmi pacienciata charinata yachajushun. w23.08 págs. 22-23 párrs. 10-11

Jesusca apóstol Pedrotaca Jehová Diosmi candaca tucuipi cuidanga nishpami animarca. Jesús huañushpa causarishca jipaca Pedro y chaishuj apostolcunapash pescadota japichunmi cutin shuj milagrota rurarca (Juan 21:​4-6). Cutin chashna milagrota ricushpami apóstol Pedroca, Jehová Dios paipa tucui minishtirishcagucunata chari ushachun ayudanata seguro cachun ayudarca. Chai ratopica apóstol Pedroca “Taita Diospa Gobiernotara, [...] pundapi churana canguichi” nishca Jesuspa shimicunatami yarishcanga. Taita Diospa Gobiernota pundapi churajcunataca Jehovami cuidanga nishca promesatapashmi yarishcanga (Mat. 6:33). Chaita yachashcamandami pescadocunata japishpa trabajana negociota paipa causaipi primero churanapa randica, Jehová Diosta sirvinata primero churarca. Shinami Pentecostés huata 33​pica Diospa Gobiernomanda apóstol Pedroca na manllashpa villachishcamanda ashtaca gentecuna Jesusta catijcuna tucuchun ayudarca (Hech. 2:​14, 37-41). Jipamangarin ashtaca samaritanocunata y na judío gentecunatapashmi Jesusta catijcuna tucuchun ayudarca (Hech. 8:​14-17; 10:​44-48). Shinaca Jehová Diosca paipa organizacionman tucui laya gentecunata apamungapami Pedrotaca ali utilizarca. w23.09 pág. 20 párr. 1; pág. 23 párr. 11

Jerusalenda tucuchishca ishcai huatacuna jipami Rey Nabucodonosorca shuj jatun jatun estatuata muscushpami preocupado carca. Chaimandami reyca ñuca ima muscushcata, chai muscui ima nisha nijta ñucaman villachun Babiloniapi tucui ali yachajushcacunata cayaichi nishpami mandarca. Y chaipica Danielpashmi rina tucurca. Reypa mandashcata na uyajpica tucui paicunatami huañuchigrijurca (Dan. 2:​3-5). Ashtaca gentecunapa causaimi peligropi carca. Chaimandami Danielca “Huaquin punllacunata shuyapaira. Can jatun mandaj muscushcacuna ima cajtaca, ñuca villashallami” nishpa mañarca (Dan. 2:16). Chai shimicunata reyman ningapaca Jehová Diospi tucui shunguhuan crina, na manllaita charinami minishtirirca. Danielca shuj persona imata muscushcata, chai muscui ima cashcata villana situacionbica nuncapash na cashcachu carca. Chaimandami Danielpaca Jehová Diospi tucui shunguhuan crina, na manllana minishtirijurca. Danielca paipa quimsa amigocunahuan parlashpaca “jahua pachapi causajuj Taita Dios llaquishpa, pipash na yachai ushashcata ricuchijuchun nishpa mañachunmi”, paipa amigocunamanga tucuita chashna villarca (Dan. 2:18). Jehová Diosca paicunapa tucui mañashcacunatami uyarca. Chaimandami rey Nabucodonosor imata muscushcata chai muscui ima nisha nijtapash Danielca villai usharca. Shina villashcamandami Danielpash y paipa amigocunapash huañunamanda salvarirca. w23.08 pág. 3 párr. 4

Pacienciata charishcamanda ima beneficiocunalla tiashcapi pensaripashunchi. Pacienciata charinaca cushilla, tranquilo cachunmi ayudan. Shinaca pacienciata charinaca físicamente y mentalmente ali cachunmi ayudan. Shinallata shujcunahuanbash ali cachun y congregacionbipash shujllashna cachunmi ayudanga. Shujcuna imatapash nishpa culirachijpipash na jaicata culiranata yachashpaca shujcunahuanbash na problemata charishunllu (Sal. 37:8; Prov. 14:29). Ashtahuangarin Jehovapa ejemplota catishcata ricuchinchi y paimanbash ashtahuan quimirinchi. Imashinami ricupashcanchi pacienciata charinaca alipacha can. Shinallata tucuipimi ayudaita ushan. Aunque pacienciata ricuchina na siempre fácil cajpipash Jehová Diosca pacienciata charishpa catichunmi ayudanga. Y paraíso alpagu chayamungacamanga pacienciahuan shuyashpa catijpica ‘Mandaj Diosca paipaj ñavihuanmi paita manllajcunatapash, pai llaquinata shuyajcunatapash ricujujtaca’ seguro caita ushapanchi (Sal. 33:18). Shinaca tucuicunallatami pacienciata charishpa catingapaj esforzarina capanchi. w23.08 pág. 22 párr. 7; pág. 25 párrs. 16-17

Santiagoca shuj rico genteta ali tratashpa cutin shuj pobre genteta nali tratashpaca Taita Diospi crini nishpapash paipa ruraicunahuanmi na crishcata ricuchijun nircami (Sant. 2:​1-5, 9). Santiagoca pipash paipa huauquita o panita ropagu minishtirijujta ricushpa, micunaguta minishtijujta ricushpapash ayudangapaj imatapash na rurashpaca: “Taita Diospi feta charini nishpapash na imatapash rurashpaca chai feca nimapapash na sirvinmanllu” nircami (Sant. 2:​14-16). Feta charishcata ruraicunahuan ricuchina minishtirishca cashcata ricuchingapaca Rahab huarmigupa ejemplomandami Santiagoca parlarca (Sant. 2:​25, 26). Cai huarmiguca Jehová Diosmanda parlajtami uyashca carca. Shinallata Jehová Dios israelitacunata ninanda ayudajujtami uyashca carca (Jos. 2:​9-11). Y cai huarmiguca Jehová Diospi feta charimandami ishcai israelita jaricuna paipa llactapi cajpi ama huañuchichun pacarca. Y chashna rurashcamandami Abrahán runagushnallata cai huarmiguca na israelita cashpapash sin culpa, justo ricurirca. Cai huarmigupa ejemploca ñucanchicuna feta charishcata o crishcataca ruraicunahuan ricuchina minishtirishcapacha cashcatami yachachishca. w23.12 págs. 5-6 párrs. 12-13

Jehovata sirvijcunaca Bibliamanda ashagutalla yachajushpaca na quidanachu capanchi. Ñucanchicunaca “Hasta Taita Dios pacalla charishca yachaicunatapashmi” yachajungapaj munana capanchi (1 Cor. 2:​9, 10). Chaitaca Jehovapa espíritu santopa ayudahuanmi ruraita ushapanchi. Ñucanchi estudio personalpi, Bibliata ashtahuan ali estudiashpa Jehovaman ashtahuan quimirina munaitami charina capanchi. Chaipaca ashtaca informaciondami charipanchi. Por ejemplo, Jehovata punda sirvijcunata pai ninanda juyashcatami yachajuita ushapanchi. Shinami ñucanchicunatapash ninanda juyashcata cuenta japichun ayudanga. Jehová Dios, israelitacuna paita imashina adorachun munashcata y cunanbi paita imashina adorachun munashcatami ali yachajuita ushapanchi. O na cashpaca Jesús cai alpapi cajpi huaquin profeciacuna paipi pactarishcatami ali yachajuita ushapanchi. Chai temacunataca Índice de las publicaciones Watch Tower nishcapi, Bibliamanda ashtahuan ali intindingapaj informacionguna nishca publicaciongunapipashmi tarita ushapangui. Cai temacunata yachajushpa ali investigashpami shinlli feta charita ushapangui. Shinallata Taita Diospa ali yachaitapashmi tarita ushapangui (Prov. 2:​4, 5). w23.10 págs. 19-20 párrs. 3-5

Apóstol Pedro griego shimipi “tucui” nishpaca “ninan juyaita ricuchina cashcatami” ningapaj munan. Chai versopa cati partepica ñucanchi huauquipanicuna pandarijpipash paicunata tucui shunguhuan juyana cashcatami ningapaj munan. Por ejemplo, caipi pensaripashunchi. Shuj meza rayashca, manchashca cashcanga. Chai mezapi rayacuna, manchacuna ama ricurichunga shuj jatun jatun telahuanmi tapapanguiman. Shina cuendallatami ñucanchi huauquipanicuna tauca viajeta pandarijpipash paicunata ninanda juyaimandami “perdonangapaj siempre listo” capashun. Ñucanchi huauquipanicunata ninanda juyashpaca tauca viajecunata pandarijpi paicunata perdonangapaj difícil cajpipash, perdonaita ushapanchimi (Col. 3:13). Ñucanchi huauquipanicunata perdonashpaca paicunata ninanda juyashcatami ricuchipanchi. Shinallata Jehová Diospa ñaupapipashmi ali ricurita ushapanchi. w23.11 págs. 11-12 párrs. 13-15

Rey Josías 26 añosta charishpami, Jehová Diospa templota arreglai callarirca. Jehová Diospa templo huasita arreglanajushpami “Mandaj Dios mandashcata escribichishpa Moisesman cushca librota tarirca”. Rey Josías chai libropi ima nishcacunata uyashpaca Jehovapa Leyta pactachingapami ñapash cambiocunata rurai callarirca (2 Crón. 34:​14, 18-21). ¿Bibliata liina costumbreta charingapaj munapanguichu? Chai costumbreta charingapaj esforzarijushpaca ¿ñachu alicachijupangui? Quiquinda ayudaj textocunata ama cungangapaca ¿imatapash rurajupanguichu? Rey Josiasca 39 huatacunatami charirca. Paica nali decidishcamandami huañuita tarirca. Paica Jehová Diospa ayudata mañanapa randica paipillatami confiarca (2 Crón. 35:​20-25). Caimandaca ¿imatata yachajui ushapanchi? Ima edadta charishpapash o Bibliata ashtaca tiempota yachajushca cashpapash, Jehová Diospa ayudataca siempremi mascashpa catina capanchi. Chaipaca Jehová Diospa ayudata siempre mascana, Bibliata estudiana y experienciata charij huauquipanicunapa consejotapashmi uyana capanchi. Shina rurashpaca imapash nalita ruranamanda jarcarishpami alita rurai ushashpa cushilla causai ushapashun (Sant. 1:25). w23.09 págs. 12-13 párrs. 15-16

Bibliapica Jehová Diosta tucui shunguhuan juyashpa sirvij huaquin huarmigucunamandami parlan. Chai huarmigucunaca ‘tucuipi controlarijcunami carca. Y tucui ruraicunapimi tucui shunguhuan crishcata ricuchin carca’ (1 Tim. 3:11). Quiquinba congregacionbica seguromi espiritualmente shinlli panigucuna tiapanga. Paicunapa ali ejemplomandaca ashtacatami yachajuita ushapangui. Joven panigucuna, espiritualmente shinlli caj panigucunapa ejemplota catingapaj ninanda esforzaripaichi. Chaipaca cai panigucuna ima cualidadcunatalla charishcata y chai cualidadcunata charingapaj imata rurai ushashcata pensaripai. Humilde caj panigucunaca Jehová Dioshuan ali amigami can. Shuj huauquipanicunahuanbash alipachami llevarin. Por ejemplo, humilde y Jehová Diosta tucui shunguhuan juyajcuna caimandami familiapi y congregacionbi Jehová churashca autoridadta respetashpa apoyanata decidin (1 Cor. 11:3). w23.12 pág. 19 párrs. 3-5

Jehová Diosca cusacuna paipa huarmiguta juyachun, tucui minishtirishca cosasgucunata cuchun, paicuna imashina sintirishcata intindingapaj esforzarichun y Jehová Diosta sirvishpa catinapi ayudachunmi munan. Imatapash ali pensarishpa rurangapaj, huarmicunata respetangapaj y confiable cangapaj esforzarishpaca shuj ali cusami caita ushapangui. Huahuacuna ricurijpica Jehová Diospa ejemplomi imashina shuj ali taita canamanda yachachita ushan (Efes. 6:4). Jehová Diosca Jesustaca na pinganayachishpami juyashcata, paipa ñaupapi alitami rurashcangui nirca (Mat. 3:17). Taita tucushpaca huahuacunata juyanimi nina, imapash alita rurashcamanda felicitana costumbreta charinaca alimi can. Jehová Diospa ejemplota catij cristianocunaca paipa huahuacunapash espiritualmente shinlli, experienciata charij huauquicuna tucuchunmi ayudaita ushan. Taita tucushpa quiquinba responsabilidadta ali pactachingapaca cunanmandami prepararita ushapangui. Chaipaca cunanmandami quiquinba familiata, congregacionmanda huauquipanicunata cuidana capangui. Shinallata paicunata juyashcata, valorashcatami ricuchina capangui (Juan 15:9). w23.12 págs. 28-29 párrs. 17-18

Testigo de Jehovacunaca tucui gentecunashnallatami llaquicunata, problemacunata, unguicunata charipanchi. Shinallata ñucanchicunata, ñucanchipa crishcacunamandami shuj gentecunaca catiriashpa llaquichin. Ciertomi can Jehová Diosca llaquicuna pasachun saquishpapash, cashna llaquicunata charijpica ayudasha nishpami prometishca (Is. 41:10). Jehová Dios ñucanchita ayudajpica llaquicunahuan cashpapash cushilla cashpa, ali decisiongunata japishpami paita sirvishpa catipashun. Jehová Diosca ¿imashinata ñucanchitaca ayudan? Bibliapica “tranquilo, ali canata” carasha nishpami prometishca (Filip. 4:​6, 7). Jehovapa amigo cashcamandallami “gentecuna na intindi ushanalla”‏ tranquilo ali canata charita ushapanchi. Y chaica shuj jatun bendicionmi can. Jehovata ninanda mañashca jipaca ¿nachu quiquinga tranquilo sintiripashcangui? Chashna sintirishca cashpaca ‘Taita Dios tranquilo, ali canata’ cushcamandami shina sintiripashcangui. w24.01 pág. 20 párr. 2; pág. 21 párr. 4

Diosta juyaj personacunaca paipa shutita tucui shunguhuan alabana munaitami charin. Rey Davidca Jehová Diospa shutita alabanaca, Jehovatallata alabajuj cuenda cashcatami intindirca. Jehovapa shutimanda parlashpaca, pai imashina Dios cashcata, paipa ali cualidadcunamanda y paipa tucui rurashcacunamandami parlapanchi. Davidca Taita Diospa shuti santo cashcata yachaimandami paita alabangapaj tucui shungu munarca. Levitacunapashmi Jehová Diospa shutitaca alabarca. Paicunaca Jehovapa shuti santo cashcamandami pai miricishcashna alabaitaca na ushanchi nishpa reconocirca (Neh. 9:5). Jehová Diosca levitacuna, paipa shutita tucui shungu alabajta uyashpaca ninandami cushijushcanga. w24.02 pág. 9 párr. 6

Quiquin charishca metata na pactachi ushajpica quiquindaca Jehová Diosca imapapash na sirvijtashnaca na ricungachu (2 Cor. 8:12). Jehová Diosta sirvingapaj ima metata pactachi ushashcata yaripangui. Bibliapica “Taita Diosca siempre alita ruraj Taita Diosmi can. Chaimandami quiquingunapa rurashcacunataca na cungan” ninmi (Heb. 6:10). Shinaca Jehová Diosta sirvingapaj ima metata pactachishcataca quiquinbash na cunganachu capangui. Por ejemplo, Jehová Diospa amigo canata, predicangapaj llujshinata y bautizarina metacunataca ñami pactachipashcangui. Chai metacunata pactachishcamandami Jehová Diosta ashtahuan sirvingapaj shuj metacunatapash pactachi ushashcata yarina capangui. Jehová Diospa ayudahuanga paita ashtahuan sirvina metata pactachishpaca cushillami sintiri ushapangui. Shinallata Jehová Diosta ashtahuan sirvingapaj munashpaca chai munaita pactachingacaman Jehová Dios imashina ayudajta, imashina bendiciajtami siempre yaipi charina capangui (2 Cor. 4:7). Quiquinba metata pactachingapaj tucui shungu esforzarijpica Jehová Diosca ninandami bendiciapanga (Gál. 6:9). w23.05 pág. 31 párrs. 16-18

Jehová Diosca paita sirvijcunata ninanda juyashcata y paicunahuan cushilla cashcata ricuchinataca ninandami gushtan. Jehová Diosca ishcai viajecunata Jesusta paimi ñuca juyashca churigu, paihuanmi cushilla cani nishcatami Bibliapica ricuchin (Mat. 3:17; 17:5). ¿Jehová Dios quiquindapash chashnallata nichun munapanguimanllu? Jehová Dios paipacha na ñucanchihuan parlashpapash Bibliatami utilizan. Jesús paipa discipulocunata juyaihuan, aliguman parlan cashcata Bibliapi liishpaca Jehová Dios ñucanchita shina juyaihuan parlajushcatashnami sintipanchi. Jesusca tucuipimi Jehová Diospa ejemplota catijushcata ricuchirca. Chaimandami Jesús paipa discipulocuna juchayucuna cajpipash paicunata ninanda juyan cashcata Bibliapi liishpaca, Jehová Dios ñucanchitapash shinallata juyashcata cuenta japita ushapanchi (Juan 15:​9, 15). Llaquicunata charishpaca Jehová Diospa ñaupapica ñana ali ricurijunichu nishpaca na pensanachu capanchi. Chaipa randica Jehová Diosta ninanda juyashcata y paipi confiashcata ricuchingapaj aprovechapashunchi (Sant. 1:12). w24.03 pág. 28 párrs. 10-11