Septiembre

Jehová Diosca cai alpapi tucuilla llaquicunata tucuchichunmi Jesusmanga poderta cushca. Huaquin llaquicunataca ñucanchica nunca na tucuchi ushanchimanllu. Pero Jesusca paipa milagrocunata rurashpaca, tucui llaquicunata tucuchi ushashcatami ricuchirca. Por ejemplo, gentecunaca pecadorcuna caimandami unguicunahuan irquiyanchi, huañuitapash huañunchi y shuj shuj llaquicunatapash charinchi. Chai tucui llaquicunatami Jesusca tucuchinga (Mat. 9:​1-6; Rom. 5:​12, 18, 19). Jesuspa milagrocunaca tucui “unguicunata” tucuchi ushashcata, shinallata huañushcacunatapash causachi ushashcatami ricuchin (Mat. 4:23; Juan 11:​43, 44). Jesusca ushashcata huaira shamujujcunata controlaita, shinallata demoniocuna gentecunata ama llaquichichun jarcaitapashmi ushan (Mar. 4:​37-39; Luc. 8:2). Chai tucui cosascunata Jesús ruraita ushachun, Jehová Dios paipa poderta cushcata yachashpaca, tranquilomi sintirinchi. Jehová Diospa Gobiernopi ciertopacha bendicionguna tianataca seguromi caita ushapanchi. Jesús cai alpapi cashpa rurashca milagrocunaca Taita Diospa Gobiernopi ña mandajushpaca, mundo enteropi ali causaigu tiachun imata rurana cashcatami ricuchijurca. w23.04 pág. 3 párrs. 5-7

Shuj jatun congregacionbi cashpaca talvez huaquin reuniongunapica shuj viajetallapash na comentaita ushapanchichu. Shinapash comentashpa catingapaj esforzarinami capangui. Comentangapaj ashtahuan oportunidadcunata charingapaca cada reunionbi huaquin comentariocunata cungapami prepararina capangui. Shina rurashpami callari parrafocunapi na comentai ushashpapash, cati parrafocunapi comentai ushapangui. Villajun revistata prepararijushpaca cada párrafo chai temahuan imata ricunata charijta aliguta pensaripangui. Shinami imagutapash siempre comentaita ushangui. Shinallata ashtahuan shinllilla partecunapi comentangapapashmi prepararita ushapangui. Chai partecunata explicangapaj ashtahuan difícil caimandami comentariocunaca cazi na tian. Reuniongunapi na comentai ushashpaca ¿imatata rurai ushapangui? Chaipaca nara reunión callarijpillatami Villajun revistata yachachigrijuj huauquigutaca quiquin munashca parrafopi comentachichun mañaita ushapangui. w23.04 págs. 21-22 párrs. 9-10

José runaguca Jehová Diospa mandashcacunata cazungapaca siempremi esforzarirca. Chaimandami shuj ali cusa carca. Jehová Diosca paimanga quimsa viajetami paipa familiata imashina cuidana cashcataca nirca. José runaguca paipa na fácil cajpipashmi chai rato cazungapaj esforzarirca (Mat. 1:20; 2:​13-15, 19-21). Shina cazungapaj esforzarishcamandami paica María huarmigutaca ali cuidaita usharca. José runagu chaita rurashcamandami María huarmiguca paita ashtahuan juyashpa y ashtahuan respetashcanga. Cusacuna, quiquingunaca José runagushnallatami Bibliapa ali consejogucunata mascaita ushapanguichi. Shinami quiquinba familiataca ali cuidaita ushapanguichi. Cambiocunata rurana cajpipash Bibliapa consejocunata cazungapaj esforzarishpaca quiquingunapa huarmigucunata ninanda juyashcatami ricuchinajupanguichi. Shina rurashpaca cusahuarmi causaipica juyaica ashtahuan mirashpami catinga. 20 huatacunata cazada Vanuatu llactamanda shuj paniguca cashnami nin: “Ñuca cusagu Jehová Diospa mandashcacunata cazungapaj esforzarijta ricushpaca ashtahuanmi respetani. Shinallata ima decisionda japijpipash paipi confiashpa segurami sintirini”. w23.05 pág. 21 párr. 5

Israel llactaman tigrashca israelitacunaca “Mandaj Taita Diospajlla shicanyachishca gentecunami” cana carca (Deut. 7:6). Shinaca Babilonia llactamanda llujshishca israelitacunaca Jehová Dios mandashcashnaca na tucuita ali pactachinajurcachu. Paicunaca Jehová Diospa ñaupapi ali ricuringapaca cambiocunata ruranarami carca. Israelitacunamanda mayoriaca Babilonia llactapimi nacirishca carca. Paicunaca babilonio gentecunashna pensaimandami paicunapa costumbrecunata catishpa, nali mapa causaicunatapash charinajurca. Primer grupomi Babilonia llactamandaca Israel llactaman tigrashca carca. Nehemías runaguca chai israelitacunapa huahuacuna hebreo shimita na parlajta ricushpaca manllarishcami quidarca (Deut. 6:​6, 7; Neh. 13:​23, 24). Jehová Diosca paipa mandashcacunataca cazi tucuitami hebreo shimipi escribichishca carca. Chaimandami israelitacunapa huahuacuna hebreo shimita na yachashpaca Jehová Diosta juyaita, paita adoraitaca na ushana ricurijurca (Esd. 10:​3, 44). Shinaca judiocunaca cambiocunata ruranarami carca. Y paicunaca Israel llactapimi chai cambiocunataca ashtahuan fácil rurai ushana carca. Porque Israel llactapimi israelitacunaca Jehová Diosta asha asha cutin ali adorai callarinajurca (Neh. 8:​8, 9). w23.05 pág. 15 párrs. 6-7

Jehová Diosta cushilla sirvinajujpimi huaquinbica imapash shinlli jarcaicuna ricurita ushan. Na yashcapi imapash pasaimandami Jehová Diosta ashtahuan sirvingapaj metata pactachitaca na ucha ushapanchiman (Ecl. 9:11). Shinallata imapash problemacuna ricurijpimi desanimado o fuerzapash illashna quidapanchiman (Prov. 24:10). Shinallata juchayucuna caimanda, imapipash pandarimandami Jehová Diosta ñucanchi munashcashna ashtahuan sirvitaca na ucha ushapanchiman (Rom. 7:23). O na cashpaca shaijushca shina sintiripanchiman (Mat. 26:43). Shina problemacunata charishpapash Jehová Diosta sirvishpa ñaupaman catichunga ¿imata ayudanga? Problemacunamanda quiquinba metata na pactachi ushashpaca na chaipi quidanachu capangui. Bibliapi nishcashnami ashtaca llaquicunata charipashun. Shinapash Bibliapillatami problemacunata mishashpa, Jehová Diosta sirvishpa catita ushana cashcatapash nin. Problemacuna ricurijpipash ñaupaman catishpaca Jehová Diosta tucui shungu cushichingapaj munashcatami ricuchipanchi. Quiquin Jehová Diosta sirvingapaj ninanda esforzarijta ricushpaca ¿nachu paica ninanda cushijupanga? w23.05 págs. 30-31 párrs. 14-15

Precursor tucushpaca shuj personacunahuan ayudarishpa trabajanata yachajushpami culquigutapash ali gashtanata yachajupangui (Filip. 4:​11-13). Callaripica precursorado auxiliartami japita ushapangui. Ashtaca huauquicunataca caita ruranami jipacunaman precursor regular shina sirvichun ayudashca. Y precursor regular tucunaca siervo de construcción o betelita shina sirvichunmi ayudaita ushan. Tucui huauquicunallatami congregacionbi anciano shina sirvingapaj esforzarina can. Bibliapica huauquipanicunata ashtahuan ayudangapaj munajcunaca “alitami rurajun” ninmi (1 Tim. 3:1). Callaripica siervo ministerialrami tucuna can. Siervo ministerialcunaca anciano huauquicunataca shuj shuj cosascunapimi ayudan. Siervo ministerial o anciano cashpapash humilde caimadami huauquipanicunata ayudashpa, predicaitapash cushijushpa predican. w23.12 pág. 28 párrs. 14-16

Rey Josiasca joven cashpallatami Jehová Diospa ayudata mascanata yachajurca. Paica Jehová Diosta ashtahuan rijsingapaj y paipa voluntadta rurangapami ashtahuan munarca. Shinapash Josiaspaca rey canaca na facilchu carca. Porque chai tiempopica mayoría gentecunami yanga dioscunata adorashpa causan carca. Chaimandami Josiasca na manllashpa gentecuna Jehová Diosta ali adorachun ayudana tucurca. Paica nara 20 huatacunata charishpallatami Jerusalenbi yanga dioscunata adorangapaj tucuilla cosascunata tucuchi callarirca (2 Crón. 34:​1,2). Joven cashpapash ¿imashinata rey Josiashna caita ushapangui? Chaipaca Jehová Diospa ayudata mascana y paipa cualidadcunamandami yachajuna capangui. Y shina ruranami Jehová Diostalla sirvisha nishca promesata rurangapaj munachun ayudanga. Chai promesata ruranaca ¿imashinata quiquinba causaipica ayudanga? Luke huauquiguca 14 huatata charishpami bautizarirca. Paica: “Cunanmandaca ñuca causaipica Jehová Diosta primero churashpa y paita siempre cushichingapami esforzarisha” nircami (Mar. 12:30). Quiquinbash chai promesata ruranata decidishpaca ashtaca bendiciongunatami charipangui. w23.09 pág. 11 párrs. 12-13

Apóstol Pablo 1 Tesalonicenses cartata escribishca horasca, Tesalónica llactapi congregación tiai callarishcamandaca ni shuj huatallapash na yalishcarcachu. Shinaca, chai congregacionbi ancianocunaca ashalla experienciata charimandami huaquin cosascunapi pandarin carianga. Shinapash, huauquipanicunaca paicunata respetanami carca. Ninan manllanai llaqui tiempo ña chayamujushcamandami ancianocunapi ashtahuan confianata yachajuna capanchi. Chai tiempopica, Jatun Betelmanda y Sucursalcunamanda instrucciongunataca talvez na chasquita usharipangachu. Chaimandami ñucanchi congregacionmanda ancianocunata, cunanmandallata juyana, respetana capanchi. Shinaca ima pasajpipash ancianocunapa pandarishcacunatalla ricujunapa randica ñucanchi ruraicunahuan aliguta yuyashcata ricuchipashunchi. Shinallata cai huauquigucunata ñaupaman pushangapaj Jehová Dios Jesusta utilizashcata yaripashunchi. Cascoca shuj soldadopa umata imapash ama chugrichichunmi jarcan carca. Shinallatami Jehová Dios carasha nishca promesacunapi tucui shunguhuan crinaca ñucanchi yuyaicunata cuidashpa, ali pensamientocunata charichun ayudan. Cai mundopi cosascuna nimapa na sirvi cashcata cuenta japipanchi (Filip. 3:8). Shinallata Jehová Dios cushca esperanzapi crinaca tranquilo sintirichun, imatapash aliguta yuyashpa rurachunmi ayudan. w23.06 págs. 11-12 párrs. 11-12

‘Juizu illaj huarmi’ invitajpica tucuicunallatami cai invitacionda chasquinata o na chasquinata decidina can. Huainayana juchapi urmanamanda cuidarinaca importantepachami can. Bibliapica propio cusahuan, propio huarmihuan puñunataca ali sintichij, limpio yacucunahuanmi comparan (Prov. 5:​15-18). Shinallata cazado cusahuarmicunataca igual puñushpa cushilla, ali sintirichunmi Jehová Diosca saquishca. Shinapash Proverbios libropica ‘juizu illaj huarmi’: “Shuhuashca yacuca mishquimari” can nishcatami ricuchin (Prov. 9:17). ‘Shuhuashca yacu’ nishpaca ¿imatata ningapaj munan? Chai “shuhuashca yacuca” nara cazarashpallata o cazarashca jahua shuj jarihuan, shuj huarmihuan igual puñunatami talvez ricuchin. Shuacunaca imatapash pacallami shuan. Shinallatami huainayana juchata rurajcunaca nalicunataca pacalla ruran. Paicuna nalita ruranajushcata pipash na cuenta japijpica “‘shuhuashca yacuca’ mishquimi can” nij cuendallatami, “pacalla huainayashpa causanaca alimi cashca” nishpa pensarita ushan. Shinapash pandaitami pandanajun. Jehová Diospa ñaupapica na imatapash pacalla ruraita ushanllu. Paica tucuitami ricujun. Shinapash Jehová Diospa ñaupapi nali ricurinaca mishqui yacushna, imapash alica na canllu. Jatun llaquimi can (1 Cor. 6:​9, 10). w23.06 págs. 22-23 párrs. 7-9

Jehová Diosta mañana cashcamandalla mañajushcata cuenta japishpa ¿imatata ruraita ushapangui? Bautizarishca jipa shina sintirijushpaca, Jehová Diospa ayudataca ñana charinichu nishpaca na pensanachu capangui. Juchayucuna caimandami, huaquinbica desanimaritami ushapanchi. Shinaca desanimado sintirijushpaca, apóstol Pablopa ejemplota yaripangui. Apóstol Pabloca Jesuspa ejemplota catingapaj esforzarijushpapash, huaquinbica shaijushca o desanimado sintirinataca alimi yacharca. Apóstol Pablo, huaquinbi desanimado sintirina cashcata yachashpapash Jehová Dios paiman mingashcata pactachingapapacha decididomi carca. Shinaca desanimado caimandalla, imapash decisiongunataca na ñapash japinachu capangui. Ashtahuanbash huaquinbi desanimado sintirishpapash, Jehová Diosta sirvishpa catingapami esforzarina capangui. Jehová Dios gustashca cosascunata rurashpaca quiquinllatami ali sintiripangui (1 Cor. 9:16). w24.03 págs. 11-12 párrs. 12-13

Huauquipanicunata juyashcataca paicunata aliguman chasquishpa, paicunahuan amigo tucushpami ricuchita ushapanchi. Shina rurajpica paicunapashmi ñucanchitaca juyaihuan tratanga (2 Cor. 6:​11-13). Ashtaca congregaciongunapimi shuj shuj costumbrecunata, shuj shuj culturata charij huauquipanicunata charipanchi. Y paicunata ashtahuan juyangapaca paicunapa ali cualidadcunata ricunami ñucanchitaca ayudanga. Shinaca ¿imashinata ñucanchi huauquipanicunata juyashcata ricuchita ushapanchi? Chaipaca Jehová Dios ricushcashnami paicunataca ricuna capanchi. Ninan manllanai llaqui tiempopica ñucanchi huauquipanicunata juyanaca ninan minishtirishcapachami canga. Chai tiempopica Jehová Diosca ¿imashinata ñucanchicunataca cuidanga? Chaita yachangapaca Babilonia llactata atacajpi israelitacuna salvarichun Jehová Dios imata mandashcata ricupashunchi. Jehová Diosca paicunataca: “Ñuca llactapi causajcunalla, cangunaca ucucunaman yaicushpa, punguta vicharichi. Dios fiñarishcata yalichingacaman, shuj ashaguta pacajuichi” nircami (Is. 26:20). Ninan manllanai llaqui tiempopica talvez ñucanchipashmi cai mandashcatallata catina tucupashun. w23.07 págs. 6-7 párrs. 14-16

Na ñucanchi nishcahuanlla yalingapaj munanachu capanchi. Cashnami pensarita ushapanchi: “Shujcunaca ¿imashinata ricuhuan? ¿Ñucapa nishcahuanlla yalingapaj na munaj cashcatachu ricuhuan? Na cashpaca ¿ñuca nishcahuanlla yalingapaj munaj cashcatachu rijsihuan? ¿Shujcunapa yuyaicunata respetashpa, imapi cambiana cashpapash cambiangapaj dispuestochu capani? Na ñucanchipa nishcahuanlla yalingapaj munajcuna cashpaca Jehovapa y Jesuspa ejemplota catinajushcatami ricuchipashun. Imapash cambiocuna tiajpica na ñucanchi nishcacunahuanlla yalingapaj munajcunami cana capanchi. Na yashcapimi imapash millai ungui japita ushan. O na cashpaca culquimandami llaquicuna ricurita ushan. Cashna situacionguna ricurishpami na yashcapi ñucanchitaca llaquichita ushan (Ecl. 9:11). Ñucanchi asignacionbi imapash cambiocuna ricurishpami difícil caita ushan. Cai cati chuscu yuyaicunata yachajunami cambiocuna ricurijpipash chai cambiocunata chasquichun ayudanga: 1) Cambiocunata chasquina. 2) Ima pasashcata yarijunapa randica, cunanbi imata rurai ushashcapi pensarina. 3) Ali cosascunata charishcapi pensarina. 4) Shujcunata ayudangapaj imagutapash rurana. w23.07 pág. 22 párrs. 7-8

Daniel joven cajpica Babiloniamanda gentecunaca pai causajushca llactamanda caru carumanmi esclavotashna aparca. Y paitaca jovenmandami babilonio gentecunaca shuj importante rijsishca familiamanda shamujta, ali ñavi, imapipash na huagli, ali joven cajta ricurca (1 Sam 16:7). Chaimandami babiloniocunaca Babilonia llactapi shuj importante puestota charichun yachachinata decidirca (Dan. 1:​3, 4, 6). Jehová Diosca Danieltaca paita tucuipi cazunata decidishcamandami ninanda juyarca. ¿Imamandata shina nipanchi? Daniel más o menos 20 huatacunata charijpica Jehová Diosca paita tucui shunguhuan sirvij Noé y Job runagumanda parlashpaca Danielmandapashmi parlarca (Gén. 5:32; 6:​9, 10; Job 42:​16, 17; Ezeq. 14:14). Jehová Diosca Danielta juyanataca nunca na saquircachu. Danielca unaicamanmi ali causaiguta charirca (Dan. 10:​11, 19). w23.08 pág. 2 párrs. 1-2

Shuj huasita randingapaj munashpaca ¿nachu chai huasita quiquinllata rishpa ricungapaj munapanguiman? Chaita rurashpami chai huasimanda tucuita yachangapaj munashcata ricuchipanguiman. Shina cuendallatami Bibliata liishpa ali estudiana capanchi. Bibliata ñapash liishpaca ali intinditaca na ushapashunllu. Chaimandami ‘Taita Diosmanda cutin primeromandapacha pipash yachachichun minishtipanchiman’ (Heb. 5:12). Imashinami huasita randingapaca tucuita ali ali ricuna capanchi, shina cuendallatami Bibliatapash ali ali estudiana capanchi. Chaipaca Bibliapa huaquin textocuna imacunapilla igual cashcatami ali ali estudiana capanchi. Shinaca imata crishcata yachanallaca na suficientechu. Ashtahuanbash imamanda crishcatami yachana capanchi. Diospa Shimita ali intindi ushangapaca Bibliapa cabal yachachishcacunata ali ali estudiangapami esforzarina capanchi. Apóstol Pabloca tucui cristianocunatami Bibliata ali ali estudiashpa intindichunmi animarca. Shina rurashpallami Bibliapa cabal yachachishcacunamandaca ‘ima ancho cajta, ima largo cajta, ima alto cajta, ima jundu cajtapash’ aliguta intindi ushana carca. Shina rurashpallami paicunapa feca ‘cimientopi shinllita sapiyashcashna y shinllita shayachishcashna’ caita ushana carca (Efes. 3:​14-19). Ñucanchicunapashmi chaitaca rurana capanchi. w23.10 págs. 18-19 párrs. 1-3

Bibliapica pacienciata charishcacunapa huaquin ejemplocunamandami parlan. Cai ejemplocunamandami yachajuita ushapangui. Por ejemplo, Davidtaca Jehová Diosca Israel llactapi mandachunga huambragu cajpillatami agllarca. Pero shinapash Israel llactapi mandangapaca ashtaca huatacunatami shuyana carca. Simeón y Anaca Mesías shamungacamanga Jehová Diosta sirvishpami catinajurca (Luc. 2:​25, 36-38). Paicunamanda yachajujushpaca cashnami pensarita ushapangui: “Cai persona pacienciata charichunga ¿imata ayudarca? Pacienciata charishcamandaca ¿ima beneficiocunatata charirca? Paipa ejemplotaca ¿imashinata cati ushani?”. Shinallata pacienciata na charishcacunapa ejemplomandapashmi yachajuita ushapangui (1 Sam 13:​8-14). Paicunamanda yachajujushpapash cashnami pensarita ushapangui: “¿Imamandata pacienciataca na charirca? Pacienciata na charishcamandaca paicunahuanga ¿imata pasarca?”. w23.08 pág. 25 párr. 15

Apóstol Pedroca Jesustaca tucui shungumi catijurca. Chaimandami imapash pandarishcacuna Jesusta catinata jarcachunga na saquirca. Shuj viajeca Jesuspa nishcata chaishuj discipulocuna na intindijpipashmi Pedroca Jesusta tucui shunguhuan catijushcataca ricuchirca (Juan 6:68). Jesuspa huaquin discipulocunaca Jesuspa nishcacunata na intindishpaca, intindichichunbash na mañarcachu. Shinallata paicunata intindichichunbash na saquishpatami Jesusta saquishpa rirca. Shinapash Pedroca tucuicunapa ñaupapimi Jesustaca “quiquinba parlashca shimicunamari para siempre causaita caran” nircami. Jesusca apóstol Pedro y chaishuj apostolcunapash paita jichushpa saquinataca ali yacharca. Shinapash Jesusca Pedro pandarishpapash, cutin tigrashpa paita ali sirvinataca alimi yacharca (Luc. 22:​31, 32). Jesusca “gentecunaca alita rurangapami munan. Pero paicunapa cuerpoca alita ruraitaca na ushanllu” nircami (Mar. 14:38). Chaimandami Pedro Jesusta negashca cajpipash, Jesusca paitaca na saquirca. Jesús causarishca jipaca apóstol Pedromanmi ricurirca. Chaipica Pedrohuan Jesushuanga ishcandillami parlashcanga (Mar. 16:7; Luc. 24:34; 1 Cor. 15:5). Chaipi Jesushuan parlanami Pedrotaca ama desanimarishca catichun ayudashcanga. w23.09 págs. 22-23 párrs. 9-10

Jehová Diosca maijan personapash paipi tucui shunguhuan crijpica imapash pandarishcacunata o juchacunataca cungaitapachami cungan (Sal. 32:​1, 2). Shinaca shuj persona Jehová Diospi cri callarishcamandami sin culpa, justo ricurita ushan. Abrahán, David y shuj Diosta ali sirvijcunapash Taita Diospa ñaupapi sin culpa justocuna ricurishpapash Adán y Evapa culpamandaca juchayucunarami cashpa catirca. Shinapash paicuna tucui shungu Jehová Diospi crishcamandami shuj gentecunahuan ricujpica paicunaca Diospa ñaupapi sin culpa, justo runagucuna ricurirca (Efes. 2:12). Romanos cartata escribishpaca apóstol Pabloca Jehová Dioshuan ali amigo tucungapaca paipi tucui shunguhuan crina minishtirishcapacha cashcatami ricuchirca. Abrahán y Davidpash chaita rurashcamandami justocuna ricurirca. Shinaca ñucanchicunapash sin culpa, justo ricuringapaca feta charinaca minishtirishcapachami can. w23.12 pág. 3 párrs. 6-7

Tucuilla cristianocunami Jehová Diosman sacrificiocunata carana jatun bendicionda charipanchi. Pero ¿imashinata chaita ruraita ushapanchi? Chaipaca Diospa Gobiernota apoyangapami ñucanchi tiempota, fuerzata y charishca cosascunata utilizana capanchi. Shinaca tucui ñucanchi usharishcaguta rurashpami, Jehová Diosta adorana jatun bendicionda valichishcata ricuchipashun. Apóstol Pablo Jehová Diosta adorangapaj ima cosascunata nunca na descuidana cashcatami parlarca (Heb. 10:​22-25). Por ejemplo, Jehovata mañana, ñucanchi esperanzamanda shujcunaman parlana, ñucanchi huauquipanicunahuan tandanajuna y randimanda animarina importantepacha cashcatami nirca. Pabloca “Taita Diospa punlla chayamujujta ricushpacarin, ashtahuanmi chaicunataca rurana capanchi” nircami. Shinallata Apocalipsis libropa último capitulocunapica Jehová Diospa angelca: “Taita Diostami adorana cangui” ninmi. Chaitaca ishcai viajetami nin. Shina rurashpaca Jehová Diosta adorana importantepacha cashcatami ricuchin (Apoc. 19:10; 22:9). Shinaca Jehovapa jatun templo espiritualmanda cai temapi yachajushcacunata y Jehová Diosta adorana jatun bendicionda charishcataca ima horapash na cunganachu capanchi. w23.10 pág. 29 párrs. 17-18

‘Caishuj chaishuj juyarishpa catipanguichi’ nishpa mandashcataca tucuicunallatami cazungapaj munapanchi. Jesusca: ‘Ashtaca gentecunaca juyarishpa causanataca saquingami’ nircami. Chai advirtishcataca na cunganachu capanchi (Mat. 24:12). Shinapash Jesús cai shimicunata nishpaca paipa discipulocuna randimanda juyarinata saquinataca na nijurcachu. Chaipa randica cai mundopi na juyarij gentecunapa yuyaicunamanda cuidadota charina cashcatami ningapaj munarca. Shinaca ñucanchi huauquipanicunataca ¿imashinata tucui shunguhuan juyashcataca ricuchi ushapanchi? nishca tapuitami yachajupashun. Ñucanchi huauquipanicunahuan imapash problemacunata charishpaca ¿imashinata paicunata ciertopacha juyashcata ricuchita ushapanchi? (2 Cor. 8:8). Chaipaca apóstol Pedroca: “Ashtahuanbachaca, caishuj chaishujmi tucui shunguhuan juyarina capanguichi. Porque juyanata yachajcunami, shujcunata perdonangapaca siempre listo” canga nircami (1 Ped. 4:8). Shinaca ñucanchi huauquipanicuna ñucanchita yangamanda llaquichijpimi paicunata juyashcata ricuchinaca difícil caita ushan. w23.11 págs. 10-11 párrs. 12-13

Congregacionmanda huaquin huauquipanicunatalla juyashcata ricuchishpaca, tucuicunata juyana canguichi nishpa Jesús mandashcataca, na cazushcatami ricuchinajunchiman. Jesusca paipa huaquin discipulocunahuanga ashtahuan ali amigomi carca. Shina cuendallatami ñucanchicunapash huaquin huauquipanicunahuanga talvez ashtahuan ali amigocuna capanchi (Juan 13:23; 20:2). Apóstol Pedroca ñucanchi huauquipanicunata ‘familia propiotashna’ juyaihuan tratachunmi yarichin (1 Ped. 2:17). Shinapash apóstol Pedroca: “Caishuj chaishujmi tucui shunguhuan ninanda juyarina capanguichi” nircami (1 Ped. 1:22). Cai textopica “ninanda” juyana nishpaca shujcunata juyana na fácil o shinlli ricurijpipash tucui shunguhuan juyana cashcatami ricuchin. Por ejemplo, shuj huauqui o shuj pani ñucanchita nali tratashpa, nali sintichishcamandaca ¿imatata rurapanchiman? Shinapash juyaita ricuchinapa randica, talvez chashnallata llaquichishpami tigrachipanchiman. Shinapash chashnallata llaquichishpa tigrachinaca Jehová Diospa ñaupapica nalipachami can. Chaitami Jesusca Pedromanga yachachirca (Juan 18:​10, 11). Apóstol Pedroca: “Pipash cangunata nalita rurajpica, na chashnallata tigrachinachu capanguichi. Shinallata pipash quiquingunata shinllita rimajpica, na chashnallata tigrachinachu capanguichi. Chaipa randica considerashpami paitaca parlana capanguichi” nishpami escribirca (1 Ped. 3:9). Ciertopacha juyashcata ricuchishpaca considerashpa, aligumanmi tratapangui. w23.09 pág. 29 párrs. 9-11

Huahuagucunaca na cuenta japijtami ñapash viñashpa catin. Shinapash espiritualmenteca na yangata huahuacunashnaca jaicata viñai usharingachu (1 Cor. 13:11; Heb. 6:1). Espiritualmente shinlli cangapaca Jehová Dioshuan ali amigo cangapami esforzarina capanchi. Jehovapa espíritu santoca ali cualidadcunata charichun, imagutapash ruranata yachajuchun o imata responsabilidadcuna ricurijpi preparado cachunmi ayudan (Prov. 1:5). Callaripica Jehová Diosca shuj jarita, shuj huarmitami rurarca (Gén. 1:27). Shuj jarica shuj huarmihuan ricujpica cuerpopi cashpa y yuyaipi cashpapash diferentemi can. Por ejemplo, Jehová Diosca jariman y huarmimanga diferente responsabilidadcunata pactachichunmi cushca. Y chai responsabilidadta pactachingapaca cada unomi ali cualidadcunata charinata y diferente ruraicunata yachanata minishtin (Gén. 2:18). w23.12 pág. 18 párrs. 1-2

Jesusca Taita Diostaca Jehová nishpa parlachunmi munarca. Chai tiempopi religionda ñaupaman pushajcunaca Taita Diospa shutica ninan aligupacha caimandami paipa shutipi parlashpaca, na respetashcata ricuchinajunchichu nishpami crin carca. Pero Jesusca chai crishcacuna Diospa Shimipi na tiajushcataca alimi yacharca. Chaimandami Taita Diospa shutita alipi churanata jarcachunga na saquirca. Shuj viajeca Jesusca demonio catishca shuj jaritami jambirca. Chaita ricushpami gentecunaca ninanda manllarishpa Jesustaca caimanda uchalla ripai nishpa mañarca (Mar. 5:​16, 17). Shinapash Jesusca, Taita Diospa shuti Jehová cashcata tucui gentecuna yachachunmi munarca. Chaimandami Jesusca chai pushtumanda nara rishpallata jambishca runataca, Jehová paimanda imata rurashcata parlachun nirca (Mar. 5:19). Jesusca, ñucanchicunapash tucui gentecunaman Jehová Diospa shutimanda yachachichunmi munan (Mat. 24:14; 28: 20). Tucui gentecunaman Jehovapa shutimanda yachachijpica Jesusca ninandami cushijunga. w24.02 págs. 10-11 párr. 10

Jehová Diospa organizacionbi caita ushashcamandaca ninandami cushijupanchi. Último punllacunapi causanajushcamandami ashtaca llaquicuna mirashpa catishca. Shinapash Jehová Diospa organizacionbi cashcamandami huauquipanicunata shuj familiatashna charipanchi (Sal. 133:1). Jehová Dios ayudajushcamandami ñucanchi familiahuanbash cushilla causaita ushapanchi (Efes. 5:33–6:1). Shinallata nali yuyaicunata mishachun y cushilla causai ushachunmi Jehová Diosca paipa ali yachaita carashpa ayudan. Na desanimarishpa Jehová Diosta sirvishpa catingapaca huaquinbica ashtahuanmi esforzarina tucupashun. ¿Imamandata shina nipanchi? Talvez shujcuna imatapash nishpa o rurashpami ñucanchitaca nali sintichita ushan. Na cashpaca imapipash cutin cutin pandarimandami desanimado sintirita ushapanchiman. Aunque 1) shuj huauqui o shuj pani imatapash nishpa nali sintichijpi, 2) cusahuarmi causaipi problemacuna ricurijpi, 3) imapipash pandarimanda desanimado sintirijushpapash Jehová Diostaca sirvishpa catinami capanchi. w24.03 pág. 14 párrs. 1-2

Huaquinbica Jehová Diosta ashtahuan sirvingapaj esforzarishca huauquipanicunapa experienciatami uyapangui. Talvez cai huauquipanicunaca Escuela para Evangelizadores del Reinomanmi rishcanga. O na cashpaca ashtahuan predicachun minishtijuj pushtuman causangapami rishcanga. Quiquinbashmi Jehová Diosta ashtahuan sirvingapaj munapangui (Hech. 16:9). Pero quiquinba situación diferente cashcamanda na ashtahuan rurai ushashpaca na llaquirinachu capangui. Ashtahuanbachaca Jehová Diosta sirvishpa catinami importante can (Mat. 10:22). Tucui usharishcaguta rurashpa, tucui shunguhuan Jehovata sirvijpica paica ninandami cushijun y chaitaca na cunganachu capangui. Shina rurashpaca bautizarishca jipa Jesuspa ejemplota catishpami causaita ushapangui (Sal. 26:1). w24.03 pág. 10 párr. 11

Jehová Diosca ñucanchicuna ciertopacha arripintirijpica perdonasha nishpami prometishca (Sal. 86:5). Chaimandami imapash pandarishcacunamanda ciertopacha arripintirishpaca Jehová Dios paipa promesata pactachishpa perdonanataca seguro caita ushapanchi. Jehová Diosca ñucanchita intindishpa, ñucanchi usharishcagutalla mañan cashcatami yarina capanchi. Ñucanchicuna Jehová Diosta sirvingapaj ashtacata o ashagutalla rurajpipash, tucui shungu rurashcamandami Jehová Diosca ninanda valichin. Shinallata punda tiempopi Jehová Diosta tucui shunguhuan sirvishca gentecunatapash yaripashunchi. Por ejemplo, apóstol Pabloca na shaijushpami ashtaca huatacunata caru carucunata rishpa villachirca. Shinallata ashtaca congregaciongunatapashmi callarichirca. Pero tiempohuanga paipa causaipi cambiocuna ricurijpimi pundashna predicaitaca ñana usharca. Shina pasashcamandaca ¿Jehová Diosca paihuan culirarcachu? Na, apóstol Pabloca pai usharishcagutami rurashpa catirca. Chaimandami Jehová Diosca paita bendiciashpa catirca (Hech. 28:​30, 31). Apóstol Pabloshnallatami ñucanchipash pundashna Jehová Diosta sirvishpa catitaca na ushapashun. Pero Jehová Diosca paita tucui shunguhuan juyaimanda, usharishcaguta rurajpica ninandami valichin. w24.03 pág. 27 párrs. 7, 9

Jesusca paipa discipulocunamanga shuj ali ejemplotami curca. Jesús cai alpapi cashpaca cutin cutinmi Jehová Diostaca mañan carca. Paica ocupado ocupadomi yalin carca. Shinallata ashtaca gentecunami paitaca catin carca. Chaimandami Jehová Diosta mañangapaca tiempota llujchingapaj esforzarina carca (Mar. 6:​31, 45, 46). Jesusca tutamandata jatarishpami Jehová Dioshuan parlangapaj tiempota llujchin carca. Shuj viajeca Jesusca tuta enteromi shuj importante decisionda ali agllangapaca Jehová Diosta mañarca (Luc. 6:​12, 13). Jesusca pai huañungapaj shuj tuta faltajujpica Jehová Diosta cutin cutinmi mañarca. Chai viaje Jehová Diospa mandashcata pactachina ashtahuan difícil canata yachaimandami Jesusca shina mañarca (Mat. 26:​39, 42, 44). Jesuspa ejemplota catishpami ocupado ocupado cashpapash Jehová Diosta mañangapaj tiempota llujchina capanchi. Jesushnallatami ima horas Jehová Diosta mañanataca ñamanda agllashcalla charina capanchi. Chaita rurangapaca talvez tutamandata jatarishpa o tutacaman quidashpami Jehová Diostaca mañaita ushapanchi. Shina rurashpami Jehová Diosta mañana ñucanchipa ninan valishca cashcata ricuchipanchi. w23.05 pág. 3 párrs. 4-5

Dios escribichishca shimicunapi ungido huauquipanicunata Jehová Diosca ninanda juyashcatami intindichin. Chai ninan juyaitaca riomanda yacuhuanmi comparan. Caica Jehová Dios ungido huauquipanicunata ciertopacha ninanda juyashcatami ricuchin. Ungido huauquipanicunaca paicunata ‘Taita Dios juyashcataca’ alimi yachan (Judas 1). Apóstol Juanga pai imashina sintirishcataca 1 Juan 3:1​pimi ricuchin. Chaipica: “Taita Diosca ñucanchitaca ninandami juyan. Chaimi ñucanchitaca ñuca huahuacuna” nin nishpa escribirca. Shinapash Jehová Diosca ¿ungido huauquipanicunatallachu juyan? Na. Jehová Diosca tucui paita sirvijcunata ninandami juyan. Jehová Diosca paipa Churi Jesuspa causaita cushpami gentecunata ninanda juyashcata ricuchirca (Juan 3:16; Rom. 5:8). w24.01 pág. 28 párrs. 9-10

Cunan punllapa textopica David paipa causai peligropi cajpi manllaihuan sintirijushpa chai manllaicunata mishangapaj imata ashtahuan rurashcatami ricuchin. Davidca jipa punllacunapi Jehová Dios paimanda imata ruranapimi pensarirca. Shinallata minishtirishca horaspi Jehová Dios paita ayudanataca seguromi carca. Y Jehová Diosca Davidmanga, “Israel llactapica paimi rey tucunga” nishpami prometishca carca (1 Sam 16:​1, 13). Y Davidca Jehová Dios paiman imata prometishcata cumplina cashcataca seguromi carca. Jehová Diosca, “cunan punllacunapi llaquicunata, problemacunata tucuchisha” nishpaca na prometishcachu. Cai mundopi ima llaquicuna, ima problemacunata charijpipash Jehová Diosca, “jipa punllacunapimi cai tucui llaquicunata tucuchisha” nishpa prometishca (Is. 25:​7-9). Shinaca Jehová Dios huañushcacunata causachingapaj, tucui unguicunata tucuchingapaj, nali gentecunata tucuchingapaj poderta charishcataca alimi yachapanchi (1 Juan 4:4). w24.01 pág. 6 párrs. 12-13

Imamanda Jehovata candallami sirvisha nishcata, imamanda bautizarishcata yaripashunchi. Caicunataca Jehovata sirvingapaj decidido caimandami ruraparcanchi. Testigo de Jehovacuna cabalta yachachishcata imamanda seguro cashcata yarinami capangui. Jehovata asha asha rijsishpa shuj Taitatashna ricushpami, paitaca respetai y juyai callariparcangui. Jehovapi tucui shungu cri callarimandami quiquinba pecadocunamandapash arripintiriparcangui. Chaimandami Jehová millanayachishca cosascunata saquishpa pai munashcashna causai callariparcangui. Shinallata quiquinba pecadocunamanda Jehová perdonashcata yachaj chayashpaca tranquilo, alimi sintiriparcangui (Sal. 32:2). Ashtahuanbash reuniongunamanmi ri callariparcangui. Bibliapi yachachishcacunamandapashmi shujcunaman parlai callariparcangui. Cunanbicarin Jehovata candallami sirvisha nishcamanda y bautizarishcamandami causaiman apaj ñanbi purijupangui. Y Jehovata sirvinata ama saquingapaca decididomi capangui (Mat. 7:​13, 14). Jehovata juyangapaj y paipa mandashcacunata cazungapaj siempre decidido cashunchi. w23.07 pág. 17 párr. 14; pág. 19 párr. 19

Jehová Diosta candallami sirvisha nishca promesata yarinami ima tentacionguna ricurijpipash chai tentacionbi ama urmachun ayudanga. Por ejemplo, shuj casado jarihuan o huarmihuan na yapata asirishpa na coquetianajupashunllu. Jehovata candallami sirvisha nishpa prometishcamandami shina rurapashun. Shinaca, cunanmandallatami nali munaicunata ama charingapaj ninanda cuidarina capanchi. Shina rurashpallami jipacunaman imapash llaquicunataca na charipashun. Shinaca ‘Diosta na manllajcuna purina ñanmandaca’ caruyaitapachami caruyana capanchi (Prov. 4:​14, 15). Ñucanchicunapashmi Jesuspa ejemplota catishpa Jehová Diospa ñaupapi nali ricurij cosascunamanda caruyaitapacha caruyanata decidido cangapaj munapanchi (Mat. 4:10; Juan 8:29) Problemacuna o tentacionguna ricurijpimi Jesuspa ejemplota catingapaj decidido cashcata ricuchina oportunidadta charipanchi. Shinallata chai problemacunata y tentaciongunata mishai ushachun Jehová Dios ayudanatapash seguromi capanchi. w24.03 págs. 9-10 párrs. 8-10