LECCIÓN 6

Huañushca jipaca ¿imata tucunchi?

1. ¿Huañushcacunaca causaringacha?

Lázaro causarijpimi paipaj panicuna Marta, Mariapash cushijushpa chasquinajun

Jerusalén ladolla Betania llactaman Jesús chayajpica, Lazaromi chuscu punllacunata huañushca carca. Jesusca Martahuan, Mariahuanmi Lazarota pambashca pushtuman rirca. Chaipica ashtaca gentecunapashmi tandanajurca. Yuyapai. Lazarota causachijpica ¿imashinashi Martapash Mariapash sintirishcanga? Juan 11:21-24, 38-44, liipangui.

Huañushcacuna causarinatami Bibliapica yachachin. Martaca ñami yacharca Alpapi causachun huañushcacunata Jehová causachinata. Isaías 26:19, liipangui.

2. Huañushpaca ¿imata tucunchi?

Adanda rurashca punlla, Adán huañushca punlla — Diosca Adanda nircami: “Ñutu alpami cangui, ñutu alpallatami tigrangui” nishpa (GÉNESIS 3:19)

Gentecunaca “ñutu alpamanda” rurashcami canchi (Génesis 2:7; 3:19). Na huañuj almata, na huañuj espiritutaca na charinchichu. Gentecuna huañujpica na imapash causashpa catinllu. Yuyaicunapash tucurinmi. Chaimandami Lazaroca maipipash causashpa catijushcataca na parlarca. Eclesiastés 9:5, 6, 10, liipangui.

Huaquingunaca ninmi, nali gentecuna huañujpica Diosmi infiernopi llaquichin nishpa. Cutin Bibliapica huañushcacunaca imatapash na sintinllu ninmi. Shinaca infiernomanda pandata yachachishpaca Diostami yangamanda juchachin. Paica gentecunata ninapi rupachinataca yaitallapash na yanllu. Jeremías 7:31, liipangui.

¿Huañushca jipaca imata tucunchi? nishca videota ricupangui.

3. ¿Huañushcacunahuan parlaita ushanchichu?

Huañushcacunaca na parlanllu, na uyanllu (Salmo 115:17). Huañushcacunahuan parlanajunchi yachunmi, nali angelcunaca paicuna parlashpa gentecunata umachin (Judas 6). Huañushcacunahuan parlangapaj munajcunataca Diosca na ricunayachinllu. Deuteronomio 18:10, 11, liipangui.

4. ¿Picunata causaringa?

Paraíso Alpapi causarishpami shuj jariman Taita Diosmanda yachachijun. Jipaca shucunapash causarijpimi Taita Diosmanda yachachijun.

Ashtaca ashtaca huañushcacunami Alpapi causangapaj causaringa. Jehovata na rijsishcamanda nali cosascunata rurashcacunapashmi causaringa. Hechos 24:15, liipangui.

Causarishcacunaca Diosmandami yachajunga. Jesuspi feta charinata, tucuipi cazunatapashmi yachajunga (Apocalipsis 20:11-13). Shinami Alpapi cushijushpa causanajunga. Juan 5:28, 29, liipangui.

5. Huañushcacuna causarinata intindishpaca ¿imatata Diosmanda yachajunchi?

Juyaj Dios cashpami huañushcacunataca causachinga. Jesús paipa causaita cushcamandami Diosca gentecunata causachinga. Quiquinga ¿pita causachichunda munapanguiman? Juan 3:16; Romanos 6:23, liipangui.

Ashtahuan yachajungapaj munashpaca, ¿Imatata Bibliaca yachachin? libropi 6, 7, 10 capitulocunata ricupangui.