Genesis
8 Chashna ashahuas, Diosca Noeta mana cungarirachu, paihuan chi arcaibi tiac sacha animalgunata, huiba animalgunatahuas mana cungarirachu. Chiraicumi, Dios allpaibi shuc huairata cachasha, yacuta chaquichic callarira. 2 Allpa ucumanda llucshic yacuguna, cielomanda urmac yacuguna tucurinaura. Chiraicu, tamiana saquirira. 3 Ansa ansami, yacuga allpaibi chaquirisha rira. 150 punzha huasha, yacu ashcata chaquirishca ara. 4 Canzhis quillaibi, chunga canzhis punzhai, Ararat nishca urcu ahuaibi arca shayarira. 5 Chunga quillagama, yacu chaquirisha pishiyara. Chunga quilla punda punzhaibi, urcu pundaguna ricuringahua callarinaura. 6 40 punzha huasha, Noega arcaibi pai rashca ventanata pascara. 7 Shuc cuervo pishcuta canzhama cachara, allpa chaquirinagama, risha tigramuc ara. 8 Chi huasha, Noega shuc palomata canzhama cachara, allpaibi yacu chaquirishcata ricungahua. 9 Pero chi palomaga maibi shayarinata mana tuparachu, allpaibi yacu chara ashca tiashcamanda. Chiraicu, arcama tigrara. Chashnami, Noega maquita surcusha palomata arcama yaicuchira. 10 Canzhis punzhata chapashca huasha, arcamanda cuti canzhama cachara. 11 Palomaga chishita tigramura. Noega llullu olivo pangata quiruibi apamushcata ricura. Chasnami, allpaibi yacu chaquiriushcata musiarira. 12 Canzhis punzhata chapashca huasha, arcamanda chi palomata canzhama cuti cachara. Cunanga, ña mana tigramurachu. 13 Noe 601 huatata causaushcai, punda quillamanda punda punzhaibi, allpamanda yacuguna huinda chaquirishca anaura. Noega arca ahuaibi tapashcata anchuchisha, yacu chaquiriuta ricura. 14 Ishcai quillamanda 27 punzhaibi, allpaga huinda chaquirishca saquirira. 15 Chasnami, Dios Noeta nira: 16 “Arcamanda llucshi, camba huarmihuan, camba churigunahuan, camba cachungunahuanbas. 17 Canhuan tucui causaita chariccunata llucshichi: pahuac animalgunata, animalgunata, llucac animalgunatahuas. Chasnami, mirasha allpaibi ashca tucuna ushangauna”. 18 Chasna asha, Noega pai huarmindi, paiba churigunandi, paiba cachungunandi arcamanda llucshira. 19 Tucui causaita chariccuna, tucui llucac animalguna, pahuac animalguna, allpaibi tucui cuyuric animalguna, arcamanda caran aillu muntun llucshinaura. 20 Chi huasha, Noe Jehovaraicu shuc altarta rara. Chi altar ahuaibi maican limpio animalgunata rupachisha Jehovama cura. Chasnallata, limpio pahuac animalgunatas rupachisha cura. 21 Jehovama gustu asna pactara. Chiraicu, Jehova paihua corazonbi nira: “Mana ima uraspas allpata runagunamanda cuti maldiciashachu, runagunahua corazon maltamandapacha mana ali ashcamanda. Tucui causaccunata mana ima uraspas casna tucuchishachu. 22 Cunanmanda ñaupagma, tucui uras allpaibi tarpuna, pallana tianga, chiri, calur, verano, tamia timpu, punzha, tuta tianga”.