1 Korinetia

14 E ARUARU i te aroa, e noinoi atu i ta te vaerua ra, kia maata rava ra kia totou.

2 Ko tei tuatua oki i te tuatua ke ra, kare aia i tuatua ki te tangata, ki te Atua ra: kare oki e tangata i kite i tana tuatua; kua tuatua ra aia i te tuatua ngaro i te vaerua.

3 Kareka tei totou, kua tuatua ïa ki te tangata, kia tupu te meitaki, e ei akamatutuanga, e ei rekarekaanga.

4 Ko tei tuatua i te tuatua ke ra, kua akamaata ïa i tona uaorai meitaki; kareka tei totou ra, kua akamaata ïa i te meitaki o te ekalesia.

5 Te inangaro nei au kia tuatua katoa kotou i te tuatua ke ke, e maata atura kia totou kotou: e maata oki tei totou i tei tuatua i te tuatua ke ke, kia kore tetai e akakite, kia tupu te meitaki i te ekalesia.

6 Kia aere atu au ia kotou, e te au taeake, ma te tuatua ke ke i te tuatua anga atu, eaa ta kotou puapinga e rauka iaku i reira, kia kore au o tuatua atu i te tuatua i akakite uaia mai, e te tuatua no te kite ra, e te totou, e te tuatua apiiia ra?

7 Koia katoa te au mea ora kore e tangi nei, mei te koe e te kitara ra, kia koe ra e taka te tangi ra, eaa iora e kiteaʼi te tangi koê e te kitara ra, kia kore ra e taka te tangi ra, eaa iora e kiteaʼi te tangi koê e te kitara?

8 Kia kore oki e taka te tangi o te pu ra, naai e akateateamamao iaia uaorai e aere ki te tamaki?

9 Koia katoa kotou, kia kore to kotou vaa e tuatua i te tuatua kitea uaia ra, eaa iora e kiteaʼi te tuatua i karangaia ra? e riro kotou i te tuatua ua ki roto i te reva ua.

10 Manganui ua atu rai te tu o te reo i te ao nei, kare ua ra tetai reo taka kore.

11 Kia kore ra au e kite i taua reo ra, e riro au ei tangata ke i taua tangata i tuatua maira, e e riro oki taua tangata i tuatua maira ei tangata ke iaku.

12 Koia katoa oki kotou, te noinoi ua na kotou i ta te vaerua ra, e aruaru marie na kia ki rava kotou i te reira, kia tupu te meitaki i te ekalesia ra.

13 E teianei, ko tei tuatua i te tuatua ke ra, e pure aia kia tika katoa iaia kia akakite.

14 Kia pure oki au ma te tuatua ke ra, ko taku vaerua tei pure, kare ra e puapinga i tupu i toku kite.

15 E teianei e akapeea? E pure au ma te vaerua; e pure oki au ma te kiteia mai; e imene au ma te vaerua, e e imene oki au ma te kiteia mai.

16 Kare ra, kia akameitaki koe i te Atua ma te vaerua, eaa te tangata e noo ua mai ki te ngai o te kite kore e tikaʼi kia karanga e, Amene, i taau akameitaki anga, kare oki aia i kite i taau tuatua?

17 Te meitaki ua ra oki taau akameitaki anga, kare ra i tupu te meitaki ki tetai.

18 Te akameitaki nei au i taku Atua, e maata taku nei tuatua ke ke i ta kotou ravarai:

19 I roto ra i te ekalesia ra, kia rima ua rai aku tuatua kia tuatua ma te kiteia mai, e kia piki tetai aronga iaku, e mea meitaki ïa iaku, i te tuatua kitea kore e kia ngauru ua atu i te tausani.

20 E te au taeake, auraka kotou ei tamariki i te kite: kareka i te kino ra, ei tamariki ïa kotou, i te kite ra, ei tangata pakari ïa kotou.

21 Kua tataia ki roto i te ture: te tuatua mairā Iehova, “Ei vaa ke ke e te reo ke ke ka tuatuaʼi au ki teianei iti-tangata, e kare rai ratou e akarongo mai iaku.”

22 E teianei, e akairo te tuatua ke ke nei, kare ra no te aronga i akarongo ra, no te aronga akarongo kore ra: kareka te totou ra, kare ïa te akairo no te aronga akarongo kore, no te aronga akarongo ra.

23 Kia putuputu oki te ekalesia katoa i te ngai okotai ra, e te tuatua katoatoa ra i te tuatua ke ke, kia tomo maira te aronga kite kore, e te akarongo kore, kare aina ratou e karanga e, kua nenevaia kotou?

24 Kareka kia totou katoatoa, ka tomo mai ei tetai tangata akarongo kore, e te kite kore, kua akakite katoatoaia aia, kua akava katoatoaia aia e ratou:

25 Kitea iora te tuatua ngaro i roto i tona ngakau, tipapa iora aia ki raro, araara atura i te Atua, ma te tuatua e, tei rotopu tikai te Atua ia kotou.

26 Akapeea akera, e te au taeake? kia putuputu kotou ra, e salamo ta tetai, e tuatua apii ta tetai, e tuatua ke ta tetai, e tuatua eeuia mai ta tetai, e akaarite anga ta tetai. E rave i te au mea katoa kia tupu te meitaki.

27 Kia tuatua mai tetai tangata i te tuatua ke, kia toko rua, e kia toko toru ua, kia tuatua, e tataki tai marie ratou; e na tetai e akakite.

28 E kare e akakite ra, kia muteki ua aia i roto i te ekalesia; e tuatua ua ra aia kiaia uaorai e ki te Atua oki.

29 Kia toko rua peroveta, e kia toko toru oki, kia tuatua, e na te tangata ravarai e kimi matatio.

30 E e tuatua tei akakiteia mai ki tetai e noo i vaitatao ra, kia muteki tei muatangana ra ka tuatuaʼi.

31 E tika ia kotou katoa kia tataki tai i te totou; kia piki ravarai, e kia pumaana katoatoa.

32 Te vaerua oki o te au peroveta ra, tei te au peroveta uaorai ïa;

33 (Kare oki te Atua i te tumu o te kononinoni pu ua, no te au ra,) mei tei te au ekalesia katoa ra o te aronga tapu.

34 Kia muteki ua ta kotou au vaine i te au ekalesia: kare oki ratou e tika kia tuatua; kia kauraro marie ra, mei ta te ture katoa i tuatua maira.

35 E kia inangaro ratou i te apii ra, e ui ratou i ta ratou au tane i te ngutuare ra: e mea tau kore oki i te vaine kia tuatua i roto i te ekalesia ra.

36 Eaa? no ko na mai ia kotou na te tuatua a te Atua? e ko kotou anake aina tei taea atu e taua tuatua ra?

37 Te manako ra tetai tangata e e peroveta aia, e tei iaia te vaerua ra; e karanga aia i te au tuatua taku e tata atu ia kotou na e, e tuatua ïa na te Atu.

38 E te vai kite kore ua ra tetai tangata, kia vai kite kore atu rai aia.

39 E teianei, e te au taeake, kia maata to kotou inangaro i te totou, auraka ra e akakore kia tuatua i te tuatua ke ke.

40 E rave ra te au mea ravarai ma te tika e te manea.