Au Uianga a te Aronga Tatau

Te tuatua “oronga aroaia ma te vaerua,” tei kitea i roto ia 1 Korinetia 14:37 (“NW”), ko tona aite anga ainei e kua rauka i tetai tangata te vaerua tapu i te tu o te akatainu angaia, me kore ra ko te aite anga ainei e e mea aroa temeio tana no ko mai i te vaerua ra?

I roto i te New World Translation of the Holy Scriptures, te tatau ra teia irava e: “Me manako tetai ua atu e e peroveta aia me kore kua oronga aroaia ma te vaerua, e tuku iaia kia akatika i te au mea taku e tata atu nei kia kotou, no te mea e akauenga ratou na te Atu.”​—1 Korinetia 14:37.

Penei ka marama tetai tangata tatau i te tuatua “oronga aroaia ma te vaerua” ei tuatua anga ki te tika e kua toia te au Kerititiano i te anere mataiti mua e te vaerua e riro akera ei au tamariki vaerua na te Atua. Me kore ra penei ka maramaia te tuatua e te tau ra te reira no tetai tei rauka ra tetai mea aroa takake o te vaerua tapu. Ko te aiteanga openga te ka manakoia e ko te reira, mei ta te papaanga e tauturu ra i te akaari.

I konei kua taangaanga te apotetoro a Paulo i te tuatua Ereni pneu·ma·ti·kosʹ, koia oki ko tona aite anga tumu “no runga ia i te vaerua, te pae vaerua.” Kua taangaangaia te au tu o te reira i roto i te au akatutu anga “kopapa vaerua,” “meitaki ravarai o te vaerua,” “te kite i te vaerua,” e te “are vaerua.”​—1 Korinetia 15:44; Ephesia 1:3; Kolosa 1:9; 1 Petero 2:5.

I taua au turanga ra, na te Puka Tapu e tuku i te tumu tuatua (kopapa, meitaki, kite, are) ta te “vaerua” e akatutu ra. Inara i tetai atu au turanga, ko te tu e te tuatuaanga tau o te “vaerua” kia kiteia te reira mei te aerenga tuatua. Ei akaraanga, te akatuke ra a 1 Korinetia 2:14, 15 i te tu o tetai tangata pae kopapa ki te ho pneu·ma·ti·kosʹ, koia oki ma te tau, ko tona aite anga ko ‘te tangata vaerua.’

Te akara tikai ra a 1 Korinetia pene 12 ki te 14 ki runga i te au mea aroa temeio o te vaerua tapu. Kua oronga te Atua i teia ki etai o te au Kerititiano mua no te akaari e kare aia e taangaanga akaou ana ia Iseraela noa nei mari ra te akameitaki ra i te “Iseraela [Kerititiano] o te Atua” i teianei. (Galatia 6:16) No runga i teia au mea aroa, kua tata a Paulo e: “E manganui te tu o te au mea [aroa, NW] i orongaia mai, okotai ra Vaerua.” (1 Korinetia 12:4) Te pakari takake, te kite, e te akarongo ko tetai ia i rotopu i te au mea aroa o te vaerua, pera katoa te totouanga, te tuatuaanga i te au reo, e te akamarama anga i te au reo.​—1 Korinetia 12:8-11.

Te au Kerititiano ta Paulo i tata atura i Korinetia kua akatainuia ratou ki te vaerua tapu o te Atua. Kua karanga a Paulo e: “Kua oreiia ra kotou, kua akatapuia ra kotou, kua akatikaia ra kotou, i te ingoa o te Atu ra o Iesu, e te Vaerua o to tatou Atua.” (1 Korinetia 6:11; 12:13) Ae, kua rauka i te katoatoa “te akairo ra ko te Vaerua.” (2 Korinetia 5:5) Inara, kare ko te katoa anga ia ratou tei rauka ra tetai mea aroa takake na roto i te vaerua tapu. I te akara anga e kua umere te manganui i te tuatuaanga i te au reo, te akapirianga i te puapinga kare i tau ki teia mea aroa. Kua tata a Paulo no te akatikatika i to ratou manako e kua tuatua atu e kare e maata atu te au tangata ta te au reo ka akapuapinga i te ka rauka i te mea aroa o te totouanga. I te openga o te pene 12, kua ako a Paulo i te au Korinetia e: “E kimi tamou ma te maroiroi i te au mea aroa maata rava.”​—1 Korinetia 12:28-31, NW.

I reira, i te akamata anga o te pene 14, kua raurau aia e: “E aruaru i te aroa, inara e kimi tamou ma te maroiroi i te [ta pneu·ma·ti·kaʹ], inara ko te mea inangaroia ra koia kia totou kotou.” E kimi i teaa? Kare te reira au Kerititiano i anoanoia ana kia kimi i tetai vaerua akatainuanga, no te mea kua rauka takere te reira ia ratou. Ma te tau i reira ko ta Paulo tikai e tuatua ra o te “au mea aroa” o te vaerua, koia oki tana, i raurau ra ia ratou kia kimi, i te openga o te pene 12. No reira, te akakite ra te New World Translation of the Holy Scriptures ia 1 Korinetia 14:1 (NW) e: “E kimi tamou ma te maroiroi i te au mea aroa vaerua.” Te tuatua ra tetai atu au uri anga Puka Tapu i te ta pneu·ma·ti·kaʹ te “au mea aroa vaerua” me kore “au mea aroa o te Vaerua.”

Ma te reira papaanga, te kite ra tatou e vaitata ki te openga o te pene 14, kua akapiri a Paulo i te totouanga e te pneu·ma·ti·kosʹ. Mei te irava 1, te akakite ra te aerenga tuatua e ko tana tikai e tuatua ra ko te oronga aroa angaia ma te vaerua. Te akakite ra The New Testament in Modern Speech, na R. F. Weymouth i te tuatua e: “Me manako tetai ua atu iaia uaorai ei peroveta me kore ei tangata ma te au mea aroa vaerua ra, e tuku iaia kia kite i te akauenga a te Atu taku e tata atura i teianei.”

Ae, pouroa te au Kerititiano, noatu e kua rauka ia ratou te mea aroa o te totouanga me kore tetai ua atu mea aroa o te vaerua, kua anoanoia kia ariki e te aru i te ako anga ta Paulo i tata e akapeea te au mea e tau ei i te tupu i roto i te putuputuanga.