Isaia

32 I NA, e tutara mai tetai ariki ma te tuatua-tika ra, e e tutara oki te ui ariki ra ma te tuatua-tau.

2 E riro oki tetai tangata mei te punanga i te uriia ra, mei te pipinianga i te matangi maata ra; mei te au vai taʼe i te ngai keremarō ra, mei te marumaru o tetai mato maata i te enua papamarō ra.

3 E kare e poiri te mata o te aronga i kite; e te taringa o te aronga e akarongo ra, e akarongo ïa.

4 E te ngakau rai oki o te aronga rapurapu ua ra, e rauka katoa te kite; e te arero o te murare ra, e tuatua meitaki ïa e te tika.

5 Kare oki te tangata kino e tuatua akaouia i te takinga-meitaki; e te manava kino e kore e tuatuaia i te oronga.

6 E tuatua ua rai oki te tangata kino i te tuatua kino, e kimi rai oki tona ngakau i te ara; i te rave anga i te pikikaa, e te tuatua akaapa anga atu ia Iehova; kia ngere ua rai te vaerua o tei pongi ra, e kia akatiki aia i tei kaki ra i te manga vai ra.

7 Kareka te manava kino ra, e ravenga kino tana; te akakoro ra i te tuatua takinga-kino ra; kia ii te ao i te tuatua pikikaa, e te tangata rikiriki, kia tuatua aia i te tuatua-tau.

8 Kareka te tangata oronga ra, e akakoro rai i te tuatua oronga; e akatinamouia oki aia i taua tuatua oronga ra.

9 E te au vaine, e noo ponuiaau ua ra, ka tu, ka akarongo mai i toku reo; e te au tamaine mataku kore ua ra, ka ariu te taringa ki taku tuatua.

10 Kia topa iti ua ake ei te mataiti e akamanamanataiaʼi kotou, e te au vaine mataku kore ra: kua kore oki to te vine ra, kare e tae te akaputuputu anga.

11 Kia ruketekete, e kotou, e tei noo rekareka ua e; kia tumatetenga, tei noo mataku kore ua e: ka taratara i te kakau; kia vai taaka ua; e tatua i to kotou taukupu.

12 Kua papaki ratou i te umauma, no te kainga manea ra, no te vine ua meitaki ra.

13 Ki runga i te enua o toku ra iti-tangata e tupu ei te rakau taratara e te tataramoa; koia tika, na runga rai i te au are rekareka ravarai ra, i te oire rekareka ra.

14 Ka akarukeia oki te are ariki; te apinga nui o te oire ra, ka akaruke uaia; te tuaivi e te are tiaki anga e riro ei au ana e tuatau ua atu; ei rekareka anga no te asini momoavao, ei kaingakai na te au anana;

15 E kia riringiia mai te Vaerua no runga mai ki runga ia tatou nei: ei reira te medebara e riro ei ei kainga ua meitaki, e ka manakoia te kainga ua meitaki ra, ei rarorakau.

16 E noo te tuatua-tau i te medebara i reira, e te tuatua-tika ra, e noo ïa ki roto i te kainga ua meitaki ra.

17 E ko ta te tuatua-tika angaanga, ko te au ïa; e te openga o te tuatua-tika ra, ko te pekapeka kore ïa, e te mataku kore, e tuatau ua atu.

18 E noo oki toku ra iti-tangata ki roto i te are au nuingangare, e te nooanga mataku kore e te ngai kanga koreia mai;

19 E topa mai oki te ua toka, i te inga anga o te rarorakau ki raro; e e tuku akaaka ravaia oki te oire ki raro.

20 E ao to kotou to tei ruru i te ua na te au ngai vai katoa ra; e kua akaunga atu i te vaevae o te puakatoro ma te asini ki reira.