“Te Iero” e “te Ariki” i Teia Tuatau

“E ko te ariki i rotopu ia ratou ra, kia okotai rai tomo anga kia tomo ratou ra; e kia aere ratou ra, ka aere katoa ïa.”​—EZEKIELA 46:10.

1, 2. Eaa te taviri tuatua mou te tauturu ra ia tatou kia akatuera i te aiteanga o te orama a Ezekiela no te iero?

KARE tetai papaki o te au rapi taito ra i pumaana tikai i te puka a Ezekiela. Kia tau ki ta te Talmud, kua akamanako tetai papaki o ratou ra kia akaruke atu i taua puka ra ki vao i te akapapaanga o te au Tataanga Tuatua Tapu ra. Kua tupu kia ratou tetai tuatau ngata i te akatakaanga i te orama o te iero e kua tuatua kare ia e rauka i te tangata te akataka mai. Kua oripu ua te manako o etai atu aronga apiipii Pipiria na te orama a Ezekiela no te iero a Iehova ra. Ka peea oki tatou?

² Mei te akaora anga mairai i te akamori anga ma ra, kua akameitaki a Iehova i tona au tangata ma te ruruanga i te marama oonu i te pae vaerua, kapiti katoa te kite oonu e eaa te iero vaerua o te Atua ra​—koia oki te akanoonooanga a Iehova mei te iero rai no te akamori anga ma.a Ka tauturu teianei taviri tuatua mou ia tatou kia akatuera i te maata anga o te aiteanga no te orama iero a Ezekiela. E akamanako piri vaitata tatou i nga tuanga e a o teianei orama​—te iero, te kau taunga, te ariki, e te enua. Eaa te aiteanga o te reira i teia tuatau nei?

Te Iero e Koe Oki

3. Eaa ta tatou i kite mei te auvaro teitei e te au tarai anga o te paruru i te au ngai tomoanga ki te iero ra?

³ E tamanako ua e te tutaka aere ra tatou i teianei iero orama ra. Kua akavaitata atu tatou e kua kake atu e itu takainga ki tetai o nga ngutupa mamaata ra. I roto i teia tomo anga, ka akara tatou ki runga ma te ruketekete. E tere atu i te 30 mita tona auvaro ki runga ake ia tatou! Kua akamaaraaraia mai tatou e ko te au turanga no te tomoanga ki roto i ta Iehova ra au akanoonoo anga no te akamori anga e teitei ia. Te au marama mei te au maramarama maira te akakaka maira i te au taraianga o te au nu tamara tei taangaangaia ra i te au Tuatua Tapu ei akatutu i te tu tika. (Salamo 92:12; Ezekiela 40:14, 16, 22) Ko teianei ngai tapu no te aronga akono tau e tu tika oki i te pae vaerua. Kia rotai ma te reira tu, ka tau tatou kia vai tika ua kia arikiia mai ei ta tatou akamori anga e Iehova.​—Salamo 11:7.

4. Koai ma kare e akatikaia kia tomo ki te iero ra, e eaa ta teianei e apii maira ia tatou?

⁴ I te ngai aerenga mai ki roto i tetai pae e tetai pae, e toru nga pia rikiriki no te tiaki. Ka akatika ainei nga tiaki ia tatou kia tomo ki roto i te iero? Kua akakite a Iehova kia Ezekiela e kare te tangata ke “kare ra i peritomeia te ngakau” e tomo ki roto. (Ezekiela 40:10; 44:9) Eaa te aite anga o te reira? Te ariki ra te Atua i te aronga anake te inangaro ra i tana au ture e te akono ra i te reira ei aronga akamori iaia. (Ieremia 4:4; Roma 2:29) Te turou ra aia i taua aronga ra ki roto i tona puakapa vaerua, koia tona are akamori anga. (Salamo 15:1-5) Mei te akaora angaia mairai tona akamori anga ma i te 1919, kua mou ta Iehova ra akaaerenga i te enua nei e kua akataka meitaki oki i tana au ture akono tau. Ko te aronga te rave akakoro ra kia kore e akarongo kare e turouia ki roto i te taokotai anga ma tona au tangata. I teia tuatau, ko te ravenga akatumuia i te Pipiria kia akaatea atu i te aronga rave tarevake ma te kore e tataraara kua akono kia vai ma mai ta tatou akamori anga e kia viivii kore oki.​—1 Korinetia 5:13.

5. (a) Eaa te au tu aiteite i rotopu i ta Ezekiela orama e ta Ioane orama tataia ia Apokalupo 7:9-15? (e) I ta Ezekiela orama, koai ma te akatutuia maira e te 12 kopu te akamori ra i te paepae i vao ra?

⁵ Te akatueraia atura te aerenga ki runga i te paepae o vao te ngai akamori anga e te akapaapaa anga te au tangata ia Iehova ra. Te akamaara maira teia i ta te apotetoro ko Ioane ra orama no te “aronga maata rava” i te akamorianga ia Iehova “i te po e te ao i tona nao.” Te akatutuia maira te au nu tamara i roto i nga orama ra. I roto i ta Ezekiela ra orama te akamanea ra ratou i nga paruru i te tomo anga. I roto i ta Ioane orama e au kikau nu tamara ta ratou i to ratou au rima, te akatutu maira i to ratou rekareka i te akapaapaaanga ia Iehova e te turouanga ia Iesu ei to ratou Ariki. (Apokalupo 7:9-15) I te tataanga o te orama a Ezekiela ra, te akatutu maira nga kopu 12 o Iseraela i te “au mamoe ke atu” ra. (Ioane 10:16; akaaite ia Luka 22:28-30.) Ko koe katoa ainei tetai o te aronga te kite ra i te rekareka i te akapaapaaanga ia Iehova na te akakitekiteanga i tona Patireia?

6. Eaa te akakoro anga no nga pia kaikai anga i te paepae i vao ra, e eaa te angaanga penei ka akamaara atu teianei ki te aronga o te au mamoe ke atu ra?

⁶ Ia tatou e tutaka aere ra i te paepae o vao, ka kite tatou i te 30 au pia kaikaianga te ngai e kaikai ei te au tangata i ta ratou au mea oronga ua. (Ezekiela 40:17) I teia tuatau, kare te aronga o te au mamoe ke atu e oronga ana i te au atinga manu, inara kare katoa oki ratou e aere ki te iero vaerua ra ma te apinga kore ua i te rima. (Akaaite ia Exodo 23:15.) Kua tata te apotetoro ko Paulo: “E teianei e na ko tatou iaia ra i te apai i te atinga ra, i te akameitaki i te Atua, eiaa e tivata, koia oki ta te vaa nei, i te akapaatu anga i tona ingoa. Kareka te takinga-meitaki e te oronga, eiaa rava ïa e akatopaia: te pereperekavana ra oki te Atua i te reira atinga.” (Ebera 13:15, 16; Hosea 14:2) Ko tetai raveanga meitaki ia kia oronga kia Iehova i taua au atinga ra.​—Maseli 3:9, 27.

7. Eaa ta te vaitoanga i te iero te akapapu maira ia tatou?

⁷ Kua akara atura Ezekiela i tetai angera i te vaito anga i teia iero orama ra. (Ezekiela 40:3) Mei te reira katoa oki, kua akaueia te apotetoro ko Ioane e: “Ka tu, e arite i te nao o te Atua, e te atarau, e e tatau oki i te aronga e akamori i roto ra.” (Apokalupo 11:1) Eaa te aiteanga o teianei arite? I nga turanga e rua i te akara anga kua akapapu mai, ei akairo e kare e apinga te ka rauka kia arai ia Iehova i te akatupu anga i tana au akakoro anga no runga i te akamori ma. Mei te reira katoa oki i teia tuatau nei, ka tau tatou kia manako papu e kare e apinga​—noatu ko te patoi anga ketaketa mei ko mai i te au kavamani mana ririnui ra​—kare e rauka kia arai i te akaora anga i te akamori anga ma.

8. Koai ma te tomo atura i te au ngutupa ki te paepae i roto ra, e eaa ta te reira au ngutupa e akamaaraara maira ia tatou?

⁸ Ia tatou e aere atura na te paepae i vao akera, ka kite tatou e e toru nga ngutupa te taki atura ki roto i te paepae o roto ra; ko nga ngutupa o roto ra te aiteite atura ki nga ngutupa o vao ra e te aite katoa ra te mamaata. (Ezekiela 40:6, 20, 23, 24, 27) Ko te kau taunga anake ka akatikaia kia tomo ki te paepae o roto ra. Te akamaaraara maira nga ngutupa o roto kia tatou e i te mea ka tau tei akatainuia kia arite atu ki te au turanga e te au ture tu-Atua ra, inara te arataki ra taua au turanga rai e te au ture i te au Kerititiano mou katoatoa. Inara eaa te angaanga a te kau taunga, e eaa te aiteanga i teia tuatau nei?

E Kau Taunga Tiratiratu

9, 10. Akapeea ta te “kau taunga ariki,” tei akaataia maira e te pupu kau taunga i te orama a Ezekiela ra, oronga anga i te apiianga pae vaerua?

⁹ I te tuatau i mua ake i te akonoanga Kerititiano, kua rave angaanga pakari te kau taunga i te iero ra. Te taanga i te au manu atinga ra, te orongaanga ia ratou ki runga i te atarau, e te tavini atuanga i te au taeake taunga e te au tangata katoa oki ko tetai angaanga maroiroi ia i te pae kopapa ra. Inara te vaira etai atu au angaanga puapinga maata na ratou. Kua akaue katoa atura a Iehova i te kau taunga: “E na ratou e apii i toku ra au tangata i te tu ke anga i tei tapu e tei noa ra, e akakite oki kia kite ratou i tei viivii e tei mā.”​—Ezekiela 44:23; Malaki 2:7.

¹⁰ Te ariki ra ainei koe i te angaanga pakari e te tavini anga taakaaka ta te aronga akatainuia ra ei pupu, “e kau taunga ariki,” i rave ana no te akamori anga ma? (1 Petero 2:9) Mei te kau taunga ngati Levi taito ra, kua rave ratou i te arataki anga i te orongaanga i te apiianga pae vaerua, te tauturuanga i te au tangata kia kite i te mea ma e te arikiia i nga mata o te Atua ra e eaa te kare e arikiia. (Mataio 24:45) Ko taua apiianga, te aere maira na roto i te au puka akatumuia ki runga i te Pipiria e te au uipaanga Kerititiano e te au uruoaanga oki, kua tauturu i te au mirioni ua atu kia akaongiia ki te Atua ra.​—2 Korinetia 5:20.

11. (a) Akapeea ta te orama a Ezekiela ra akaketaketa anga i te puapinga maata no te tu ma o te tuanga a te kau taunga ra? (e) I te tuatau openga ra, akapeea te tama anga i tei akatainuia i te tu pae vaerua ra?

¹¹ Inara, ka tika te kau taunga kia rave kia maata atu i te apii anake i etai ke ra kia ma; ka tika kia ma ratou uaorai. No reira, kua kite atu a Ezekiela i tetai rave tamaanga no te kau taunga o Iseraela. (Ezekiela 44:10-16) Mei te reira oki, te akaari maira te tuatua enua e i te 1918, kua noo mai a Iehova “mei te tamā” i roto i tona iero vaerua ra, i te akara matatioanga i te pupu kau taunga akatainuia ra. (Malaki 3:1-5) Te aronga tei kiteia ra e ma i te pae vaerua me kare tei tataraara no te akamori itoro i mua akera kua akatikaia kia rave ua atu i te tavini anga i tona iero vaerua ra. Inara, mei etai ke katoa ra, ka rauka kia riro kia viivii te aronga takitai akatainuia ra​—i te pae vaerua e te tu akono oki. (Ezekiela 44:22, 25-27) Kua rave angaanga pakari ratou kia vai “auraka ei viivii i teianei ao.”​—Iakobo 1:27; akaaite ia Mareko 7:20-23.

12. Eaa tatou ka tau ei kia ariki i te angaanga a tei akatainuia ra?

¹² Penei ka ui tatou takitai, ‘Te ariki ra ainei au i te akatauanga akanooia mai e te aronga akatainuia i to ratou au mataiti tavini anga tiratiratu e manganui? Te aru ra ainei au i to ratou akarongo?’ E mea meitaki no te aronga o te urupu maata kia maara e kare te aronga akatainuia e vai tamou mai ma ratou ki runga i te enua nei. No te kau taunga i te orama a Ezekiela ra, kua tuatua a Iehova: “Auraka kotou e oronga atu i tetai ipukarea [enua] na ratou i Iseraela nei: ko au ta ratou ipukarea.” (Ezekiela 44:28) Mei te reira katoa oki, kare o tei akatainuia ra ngai mutu kore i te enua nei. E akatuanga ta ratou i te rangi ra, e ko te aronga o te urupu maata te manako ra i te reira ei meitaki kia turu e kia akamaroiroi ia ratou ia ratou e vai nei ki runga i te enua.​—Mataio 25:34-40; 1 Petero 1:3, 4.

Te Ariki​—Koai Aia?

13, 14. (a) Eaa ra i tikai e no te au mamoe ke atu te ariki ra? (e) Koai te akatutuia maira e te ariki ra?

¹³ I teianei kua tu mai tetai uianga pakari. Koai, i reira, ta te ariki e akatutu maira? I te mea te tuatuaia ra aia ei tangata okotai e ei pupu oki, penei ka manako tatou e te akatutu maira aia i tetai pupu tangata. (Ezekiela 44:3; 45:8, 9) Inara koai ia? E tika kare i tei akatainuia ra. I te orama ra, te rave angaanga piri vaitata ra aia ma te kau taunga, inara kare aia i tetai o ratou. Kare mei te pupu kau taunga ra, kua orongaia kiaia tetai tuanga i te enua ra e no reira e tuatau tona ki mua i runga i te enua nei, kare i te rangi. (Ezekiela 48:21) Pera katoa oki, te tuatua ra a Ezekiela 46:10: “E ko te ariki i rotopu ia ratou ra, kia okotai rai tomo anga [ki te paepae o vao o te iero ra] kia tomo ratou [te au kopu kare ra i te kau taunga] ra; e kia aere ratou ra, ka aere katoa ïa.” Kare aia e tomo atu ki te paepae i roto ra mari ra ka akamori i te paepae i vao ra, te tomoanga e te aereanga ki vao i te iero ra ma te au tangata ra. Na teianei au tika e tuku tikai i te ariki ra ki roto i te urupu maata o te au mamoe ke atu ra.

¹⁴ Te taka meitaki ra, e apainga ta te ariki ra i roto i te au tangata o te Atua. I te paepae i vao, ka noo aia i te pia tomo anga o te Ngutupa o te Itinga Ra. (Ezekiela 44:2, 3) Te akakite maira teia i tetai turanga no te akaaere, tei aite ki to te aronga pakari i Iseraela ra tei noo ki te ngutupa o te oire ra e tei rave oki i te akavaanga. (Ruta 4:1-12; Maseli 22:22) Koai ma to roto i te au mamoe ke atu te mou ra i te au taoonga no te akaaere i teia tuatau nei? Te aronga ma tetai manakonakoanga no te enua tei akataoongaia ra e te vaerua tapu. (Angaanga 20:28) No reira te akapapaia ra te pupu ariki i teianei ma te manako anga kia tavini i muri akera ki roto i tetai angaanga akaaerenga i roto i te ao ou ra.

15. (a) Akapeea te akamarama anga mai a te orama a Ezekiela i te pirianga i rotopu i te aronga pakari no te aronga maata rava e te pupu kau taunga tei akatainuia ra? (e) Eaa te arataki anga ta te aronga pakari akatainuia ra i rave i roto i ta te Atua ra akaaerenga i te enua nei?

¹⁵ Inara, eaa te pirianga i teia tuatau i rotopu i te pupu kau taunga akatainuia e taua aronga pakari e tuanga ra no te aronga maata rava, te tavini ra i te au turanga akaaere? Te akakite maira te orama a Ezekiela e ko te aronga pakari e au mema ra no te aronga maata rava e tuanga turu ta ratou tei raro ake oki, e ko tei akatainuia ra oki te rave ra i te arataki anga pae vaerua. Naea ra? Kia maara, e ko te kau taunga i te orama ra kua orongaia te apainga kia ratou kia apii i te au tangata i te au tumu pae vaerua. Kua akaue katoaia ratou kia rave ei au akava i te au tumu no te ture ra. Kapiti katoa, kua akataoongaia te au ngati Levi i “te tiaki anga” i te au ngutupa o te iero. (Ezekiela 44:11, 23, 24) Te taka meitaki ra, kia kauraro te ariki i te au angaanga pae vaerua e te arataki anga a te kau taunga ra. Te tau ra, i reira, e i teia tuatau nei kua riro na te aronga akatainuia e rave te arataki anga i te akamori anga ma. Ei akatauanga, ko te au mema o te Pupu Akaaere o te Au Kite o Iehova ra kua ikiia mei roto mai ia ratou. Kua rave taua aronga pakari akatainuia tiratiratu ra i te terenianga i te pupu ariki te tupu akera no etai raungauru mataiti, i te teateamamaoanga i te au mema manakoia ra no teia pupu no te tuatau e orongaiai kia ratou ta ratou tuanga mana taoonga katoa i te ao ou a te Atua te aere mai nei.

16. Kia tau ki ta Isaia 32:1, 2, akapeea te angaanga tika na te aronga pakari katoatoa?

¹⁶ Eaa te tu au akaaere a teianei au mema te manakoia nei, tei tau ra ratou no te au apainga akamaataia atu ei te pupu ariki ra? Te tuatua ra te totou kiteia ia Isaia 32:1, 2 e: “I na, e tutara mai tetai ariki ma te tuatua-tika ra, e e tutara oki te ui ariki ra ma te tuatua-tau. E riro oki tetai tangata mei te punanga i te uriia ra, mei te pipinianga i te matangi maata ra; mei te au vai taʼe i te ngai keremarō ra, mei te marumaru o tetai mato maata i te enua papamarō ra.” Te akatupuia ra teianei totou i teia tuatau i te rave anga te aronga pakari Kerititiano​—tei akatainuia e te au mamoe ke atu​—kia paruru i te anana mei taua “uriia ra” mei te takinga kinoanga e te au tu akaparuparu.

17. Akapeea te manako tau na te au tiaki mamoe no ratou uaorai, e akapeea te manako tau na te anana ia ratou ra?

¹⁷ Te nga tuatua “tamaiti ariki” e te “ariki,” tei aite ra te aiteanga i te reo Epera, kare e taikuia ei tetai taoonga akapapaia ei akateitei i te au tangata. Kareka ra te akataka maira i te apainga a eia nga tangata i te utuutuanga no te au mamoe a te Atua ra. Te akamatakite ketaketa maira Iehova: “Kua oti ana kotou, e te au ariki o Iseraela: ka akataka ke atu i te rave kino, e te āru, e ka rave ana i te tuatua-tau e te tuatua-tika.” (Ezekiela 45:9) E mea meitaki no te aronga pakari katoatoa i teia tuatau nei kia tuku i taua ako ra ki te ngakau. (1 Petero 5:2, 3) Ei reira, ka kite te anana, e na Iesu i oronga mai te au tiaki mamoe ei “meitaki i te tangata nei.” (Ephesia 4:8) Kua akanooia to ratou tu tau ki roto i te Tuatua akauruia a te Atua ra. (1 Timoteo 3:1-7; Tito 1:5-9) No reira ka aru te au Kerititiano i te arataki anga a te aronga pakari ra.​—Ebera 13:7.

18. Eaa etai au apainga a te pupu ariki tau i teianei, e eaa tana apainga a te tuatau ki mua?

¹⁸ I te au tuatau Pipiria ra e maata te mana taoonga o etai au ariki, to etai e meangiti mai. I teia tuatau nei, e atea ke te au apainga tuke tuke a te aronga pakari no te aronga maata rava. Te tavini ra etai ki roto i te putuputuanga okotai; ko etai te tavini ra i te au putuputuanga e manganui ei au akaaere tutaka; ko etai te tavini ra i te enua katoa ei au mema kumiti Manga; ko etai atu te tauturu tika atura i te au kumiti tuke tuke o te Pupu Akaaere ra. I roto i te ao ou ka akaariki a Iesu i ‘tana au [tamaiti ariki] i te pa enua katoa ra’ kia rave i te arataki anga i roto i te aronga akamori ia Iehova i runga i te enua. (Salamo 45:16 akaaite ia NW) Kare e ekoko anga e manganui tana ka iki no roto mai i te aronga pakari tiratiratu o teia tuatau nei. No te akapapa ra teianei au tangata ia ratou kia tau i teianei, ka iki aia kia oronga i te au angaanga maata atu ki te aronga e manganui i te tuatau ki mua me akakite aia i te tuanga a te pupu ariki i roto i te ao ou ra.

Te Enua o te Au Tangata o te Atua i Teia Tuatau

19. Eaa ta te enua o ta Ezekiela orama e akatutu maira?

¹⁹ Te akatutu katoa maira ta Ezekiela orama i te enua akaoraia o Iseraela. Eaa te akatutuia maira e teianei tu o te orama ra? I etai atu totou e ka akaoraia mai te enua, ko Iseraela ra ka riro ei parataito mei ia Edene rai. (Ezekiela 36:34, 35) I teia tuatau te rekareka ra tatou i tetai “enua” akaoraia mai, e ko te reira oki, i tetai tu, mei ia Edene rai. Na roto i tetai tu aiteite, e putuputu tatou i te tuatua no to tatou parataito vaerua. Kua akataka maira Te Punanga Tiaki i to tatou “enua” ei “te ngai o te angaanga” a te au tangata ikiia e te Atua.b I tetai ua atu ngai tei reira tetai tavini no Iehova, tei roto aia i taua enua akaoraia ra me te tauta ra aia kia akono i te akamori mou na te aaereanga i to Iesu Karaiti ra au takainga tapuae.​—1 Petero 2:21.

20. Eaa te kaveinga penei ka kite tatou mei “te tuanga tapu” i ta Ezekiela orama ra, e penei ka akapeea ta tatou akono anga i teianei kaveinga?

²⁰ Peea oki te tuanga enua tapaia ra ko “te tuanga tapu”? Ko te tauturu teia a te au tangata ra no te turu anga i te kau taunga e te oire. Mei te reira katoa oki, “na te tangata tini katoatoa” e apai i teianei atinga tuanga enua no te ariki ra. Eaa te aite anga o teianei i teia tuatau? Inara, kare e kia akateiaaia te au tangata o te Atua ra ma te tutaki anga i te pupu orometua ra. (2 Tesalonia 3:8) Kareka ra, ko te tauturu te orongaia ra ki te aronga pakari ko te pae vaerua te mea maata. Te kapiti ra i te tauturuanga i te rave i te angaanga te raveia ra e te akaarianga i tetai vaerua taokotai e te kauraro oki. Inara, mei te tuatau ia Ezekiela, te orongaia nei teianei atinga “na Iehova,” e kare ki tetai ua atu tangata.​—Ezekiela 45:1, 7, 16.

21. Eaa ta tatou ka kite mei te akatataka keanga o te enua i te orama a Ezekiela ra?

²¹ Kare ra ko te ariki anake e te kau taunga tei orongaia ra te ngai i teianei enua akaoraia ra. Te akaari maira te akatakaanga i te enua e ko te kopu takitai o te 12 kopu ra e tuanga akatinamouia to ratou. (Ezekiela 47:13, 22, 23) No reira e kare ko tetai ngai anake i te parataito vaerua i teia tuatau to te aronga maata rava mari ra ka rauka katoa ia ratou tetai kotinga enua me akatuangaia ratou i tetai ngai i te enua o te Patireia o te Atua ra.

22. (a) Eaa te akatutuia maira e te oire i te orama a Ezekiela ra? (e) Penei eaa ta tatou ka kite mei te au ngutupa o te oire ra i nga pae katoa ra?

²² Ei openga, eaa te akatutuia maira e te oire i te orama ra? Kare ia i tetai oire i te rangi, no te mea te vaira i roto i tetai “ngai noa” enua (tapu kore) ra. (Ezekiela 48:15-17) No reira ka tika ei tetai apinga no te enua nei. Inara, eaa tetai oire? Kare ainei te reira e akakite mai i te manako no te akaputu anga te au tangata ei pupu e te akapapaanga i tetai apinga tei patuia e tei akanoonooia? Ae. No reira, i te akara anga te akatutu ra te oire i te akaaerenga i te enua nei te ka akapuapinga i te aronga katoatoa te ka riro ei taiate tuatua tika i te enua nei. Ka angaanga te reira ma tona ki katoa i roto i te “enua ou” te aere mai nei. (2 Petero 3:13) Te au ngutupa o te oire i nga pae katoa, okotai no te kopu takitai, te akatutu maira i te tu tuera ua. I teia tuatau, kare te au tangata o te Atua i raro ake i tetai akaaereanga muna, ko ratou anake ua. Ka tau te au taeake e apainga ta ratou kia maoraora ua; te au kaveinga te arataki ra ia ratou te matauia ra e te katoatoa. Ko te tika e te au tangata no te au kopu katoa maira te tatanu ra i te enua te turu ra i te oire te akamaara maira kia tatou e te turu ra te au mamoe ke atu, na te oronga anga i te apinga, i te akanoonooanga akaaerenga tei akapapaia no te au tangata o te Atua i te ao katoa nei.​—Ezekiela 48:19, 30-34.

23. Eaa ta tatou ka akamanako i te atikara te ka aru mai?

²³ Inara, akapeea oki te kauvai te tae maira mei te ngai tapu o te iero? Ta te reira e akatutu maira i teia tuatau e aere atu ki te tuatau ki mua ra ko te tumu ia no te toru o te atikara openga i roto i teianei akapapaanga.

[Au Tataanga Rikiriki i Raro]

Au Tumu kia Akamanako Akaou

◻ Eaa ta te iero i te orama a Ezekiela i akatutu?

◻ Koai ma ta te kau taunga tei tavini ra i te iero i akatutu mai?

◻ Eaa te pupu ariki ra, e eaa etai o tana au apainga?

◻ Eaa te enua i te orama a Ezekiela ra, e i teea tu te akatuangaia ki te au kopu e 12 ra?

◻ Eaa te akatutuia maira e te oire ra?

[Tutu/​Mapu i te kapi 15]

(No runga i teia, akara i te puka)

Te potonga enua tei akakiteia maira i te orama a Ezekiela ra

TE AU KOPU TAI NGAURU MA RUA

Te Tai Maata

Tai o Galilea

Kauvai o Ioridana

Tai Miti

DANA

ASERA

NAPHATALI

MANASE

EPHERAIMA

REUBENA

IUDA

TE ARIKI

BENIAMINA

SIMEONA

ISAKARA

ZEBULUNA

GADA

[Tutu]

AKATOTOA ANGA O TE TUANGA TAPU

A. “Tei Reirā Iehova” (Iehova Sama); B. te enua tupu ruperupe o te oire

Tuanga Ngati Levi

Ngai Tapu o Iehova

Tuanga Kau Taunga

B A B