Maseli

11 E MEA viivii na Iehova te aite pikikaa ra: kareka te toka tika ra, e mea tau ïa iaia.

2 Kua tupu te ngakau parau ra, tei muringao te akama: tei te aronga akaaka ra te pakari.

3 Na te tuatua-tika a te aronga tiratiratu ra ratou e arataki: e mate ra te aronga rave ara ra i te māro

4 Kare e puapinga to te apinga i te rā e riri ei ra: kareka te tuatua-tika ra, e akaora ïa no te mate maira.

5 Na te tuatua-tika a te tangata apa kore ra e akatikaoru ua i tona arataa: e inga ra te tangata kino i tona uaorai kino.

6 E ora te aronga tiratiratu i ta ratou tuatua-tika: e ii ra te aronga rave ara i to ratou uaorai kino.

7 Kia mate te tangata kino ra, ka kore tana i manako ra: e tei tapapaia ra e te aronga tuatua-tika kore ra, e kore ïa.

8 E akaoraia te tangata tuatua-tika i te tumatetenga: e kauonoia maira aia e te tangata kino ra.

9 Na te vaa o te tangata pikikaa e mate ïa te tangata tupu nona: te ora nei ra te aronga tuatua-tika ra i te kite.

10 Kia manuia te aronga tuatua-tika ra te rekareka ra te oire: kia mate ra te aronga kino ra, kua maeva anake ïa.

11 E teitei te oire i te akaora a te aronga tiratiratu: te tatipokiia nei ra i te vaa o te aronga kino.

12 Te tangata pakari kore ra, e akavaavaa aia i tona tangata tupu: kareka te tangata kite ra, e muteki ua ïa.

13 E akakite aere rai te tangata monomono korero i te tuatua muna: kareka te tangata ngakau pikikaa kore ra, e uuna ïa.

14 No te tumukorero kore, e ingaʼi te tangata: kia maata ra te aronga kimi tuatua ra, ko te ora ïa.

15 Ko tei riro ei tutaki i tetai ke ra, ka pekapeka ïa: ko tei kore ra e tau iaia te tutaki, kua ora ïa.

16 E tāpu ra te vaine akono meitaki i te ngateitei: e te aronga ririnui, e tāpu ïa i te apinga ra.

17 Te takinga-meitaki nei te tangata aroa i tona uaorai vaerua: kareka te ngakau kino ra, te takinga-kino ïa i tona uaorai kopapa.

18 Te angaanga nei te tangata kino i te angaanga pikikaa: ko tei ruru ra i te tuatua-tika ra, e tutaki tika ïa tana.

19 Mei te tuatua-tika e arataki i te tangata ki te ora: koia katoa te aruaru ki te kino ra, te rapurapu ra ïa ki te mate.

20 Ko tei māro te ngakau ra, e mea viivii ïa na Iehova; ko tei apa kore ra te aerenga ra, e mea mataora ïa nana.

21 Tuikau ua te rima tetai ki tetai, kare e kore te tangata kino i te akautungaia: ka ora ra te uanga o te aronga tuatua-tika.

22 Mei te poe auro ki roto i te putaiu o te puaka ra, koia te vaine mata meitaki e kare e akono ra.

23 E meitaki anake tei inangaroia e te aronga tuatua-tika ra: ko tei tapapaia ra e te aronga kino ra, ko te riri ïa.

24 E oronga rai tetai, e te maata ra tana i te tupu anga: e karapii kino rai tetai e riro atura ei putaua.

25 Te tangata oronga ra, e matu ïa: e tei tamauu ki te vai ra, ka tamauu katoaia mai aia.

26 Ko tei tāpu i te sitona ra, e taumaaia ïa e te tangata: e iri maira te akameitaki ki runga i te upoko o te tangata e oko atu.

27 Ko tei kimi marie i te meitaki kia rave ra, e kiteia mai ïa: ko tei kimi ra i te kino ra, ka rokoia mai ïa aia e te reira.

28 Ko tei irinaki ki tana apinga, ka inga ïa: kareka te tuatua-tika ra, ka ruperupe ïa mei te rara ra.

29 Ko tei tamanamanata i tona uaorai ngutuare, ko te matangi tana e rauka: e riro oki te neneva ei tavini no te ngakau pakari.

30 Te ua o te aronga tuatua-tika ra, e rakau ora ïa: e tei rauka iaia te vaerua ra, e pakari tona.

31 I na, e tutakiia mai te tangata tuatua-tika i te enua nei; ka tanga atu ei ki te tangata kino, e te rave ara.