Mataio

19 E KIA akaoti akerā Iesu i teianei tuatua anga, akaruke atura aia i Galilea, aere maira i te pae i Iudea ra, i na tera pae i Ioridana;

2 E motuanga tangata maata tei aru mai iaia ra ki reira, akaora iora aia i to ratou au maki.

3 Kua aere katoa maira te au Pharisea kiaia, kua na ko maira, i te timata anga mai iaia ra, E tau aina i te ture kia kopae atu te tane i tana vaine i te au apa katoa nei?

4 Kua karanga atura aia kia ratou, na ko atura, Kare rai kotou i tatau e, ko tei anga ia raua i muatangana, i anga ïa i te tane okotai e te vaine okotai;

5 E kua na ko akera, “E akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai?”

6 E teianei, kare atura raua i te toko rua, kua kopapa okotai ra. E ta te Atua i topiri ra, auraka te tangata e akataka ke atu.

7 Kua tuatua maira ratou kiaia, Eaa iorā Mose i akaue mai ei, e kave atu i tetai tuatua kopae, ka tuku atu ei iaia?

8 Kua na ko atura aia kia ratou, No te māroketaketa o to kotou ngakau i tuku ua mai ei a Mose i te kopae i ta kotou au vaine: kare ra i pera i muatangana.

9 E teianei, te karanga atu nei au kia kotou, Tei kopae i tana vaine, auraka ra no te akaturi, ka akaipoipo ei i tetai, kua akaturi ïa: e ko tei akaipoipo i taua vaine i kopaeia ra, kua akaturi ïa.

10 Kua tuatua maira tana au pipi kiaia, Ko ta te tane ïa akono anga i te vaine, kare e meitaki te akaipoipo.

11 Kua karanga atura aia kia ratou, Kare te tangata ravarai e tika kia āriki mai i te reira tuatua, ko te aronga ra i orongaia atu te tika ia ratou.

12 E eunuka tetai aronga mei to ratou anau anga mai: e i akaeunukaia tetai aronga e te tangata: i akaeunuka oki tetai aronga ia ratou uaorai no te basileia o te ao ra. Ko te tika iaia kia āriki i teianei tuatua, nona ïa.

13 I apaiia maira te tamariki mea riki kiaia i reira ra, kia tuku aia i tona rima ki rungao ia ratou, e kia pure: kua kauvae atura te au pipi ia ratou.

14 Kua karanga aturā Iesu, Ka tuku mai ana i te tamariki mea riki, kia aere ua mai kiaku nei, auraka e akakoreia atu; mei ia ratou nei oki to te basileia ra o te ao.

15 Kua tuku atura aia i tona rima ki rungao ia ratou, e aere atura.

16 E i na, kua aere maira tetai tangata iaia, kua tuatua maira, E te orometua meitaki e, eaa taku ravenga meitaki e raukaʼi iaku te ora mutu kore?

17 Kua karanga atura aia kiaia, Eaa koe i akameitaki mai ei iaku? ko te Atua anake ra te meitaki: kia inangaro ra koe kia rauka te ora, e akono koe i te au ture.

18 Kua tuatua maira aia kiaia, I teea? Kua karanga aturā Iesu, “Auraka koe e ta ua, Auraka koe e akaturi, Auraka koe e keia, Auraka koe kia riro ei kite pikikaa,

19 E akangateitei i to metua tane, e to metua vaine,” “E aroa atu i to tangata tupu mei te aroa ia koe uaorai.”

20 Kua na ko maira taua tangata ou ra, Kua ope te reira i te akonoia e au, mei toku ou anga mai: eaa ua te toe iaku?

21 Kua karanga aturā Iesu kiaia, Kia inangaro koe e kia apa kore, ka aere ka oko i taau apinga, ka apai atu ei na te putaua; e apinga taau i reira i te rangi; ka aere mai ei ka aru mai iaku.

22 Kia akarongo mai taua tangata ou ra i te reira tuatua, aere ke atura ma te aue: e apinga maata oki tona.

23 Kua karanga aturā Iesu ki tana au pipi, Koia mou taku e karanga atu kia kotou nei, E akao ngata te tangata apinga ki roto i te basileia ra i te ao.

24 E tuatua akaou rai oki au kia kotou, E akao ngoie ake te kamela na roto i te puta nira, i te tangata apinga nui kia akao ki roto i te basileia o te Atua ra.

25 Kite akera te au pipi i taua tuatua ra, va ua iora ratou, na ko akera, Koai oki te ka ora?

26 Kua akara aturā Iesu kia ratou, na ko atura, Kare ïa e tika i te tangata nei; e tika ra te au mea katoa i te Atua.

27 Kua tuatua mairā Petero kiaia, na ko maira, I na matou, kua akaruke matou i te au mea katoa, e kua aru mai ia koe; eaa te ka rauka ia matou?

28 Kua karanga aturā Iesu kia ratou, Koia mou taku e karanga atu kia kotou nei, Kia tae i te anga akaou anga ra, kia noo te Tamaiti a te tangata ki runga i tona terono kakā, e noo katoa kotou, ko tei aru mai iaku, ki runga i te terono raungauru e rua ara, i te akava anga i te au kopu o Iseraela raungauru e rua ara.

29 E te tangata katoatoa no toku nei ingoa i akaruke ei i te are, e te au taeake, e te au tuaine, e te metua tane, e te metua vaine, e te vaine, e te tamariki, e te enua, e anere ua atu tana e ka rauka, e e rauka oki iaia te ora mutu kore.

30 To mua e manganui ra e riro no muri; e to muri ra, e riro ïa no mua.