Ariki Tikai Ra Ainei Koe i ta te Atua Apinga Aroa no te Akaipoipo?
‘Kia oronga mai a Iehova i te apinga aroa e te akaangaroianga no korua i te ngutuare o ta korua puke tane ra.’—RUTA 1:9.
KIMI I TE AU PAUANGA:
Eaa tatou ka karanga ai e kua ariki rekareka te au tavini o te Atua i tana apinga aroa no te akaipoipo?
Akapeea tatou i kite ei e e puapinga ki te Atua e koai ta tatou ka iki ei tokorua akaipoipo?
Eaa te akoanga Pipiria taau ka taangaanga i roto i toou oraanga akaipoipo?
1. Akataka mai i to Adamu manako te rauka mai anga tetai vaine nana.
“I TEIANEI e ivi teia no toku nei ivi, e kiko oki no toku nei kiko: ka tuatuaia aia e, E vaine, no te mea no roto aia i te tane i te rauka anga mai.” (Gene. 2:23) Kua mataora tikai te tangata mua, ko Adamu, e e vaine tana! No reira aia i tuatua mataora ai na roto i te tuatua pee! Muri ake te akamoe tinainai anga a Iehova ia Adamu, kua anga Aia i teia vaine manea mei roto mai i tetai kaokao o Adamu. Kua tapa iora a Adamu iaia ko Eva. Kua akaipoipo te Atua ia raua ei tane e te vaine. I te mea e kua rave mai a Iehova i to Adamu uaorai kaokao ei anga mai i te vaine, kua vaitata atu te pirianga o Adamu raua ko Eva i to tetai nga tokorua akaipoipo o teia tuatau.
2. Eaa ra te au tane e te au vaine i akapiri vaitata ai ki tetai e tetai?
2 Na roto i tona pakari aite koreia, kua tuku a Iehova i te tu akainangaro ki roto i te au tangata—e tu te ka akapiri vaitata atu i te au tane e te au vaine. Te karanga ra The World Book Encyclopedia e: “Ko tetai tane e te vaine tei akaipoipo, te inangaro ra i te pirianga ainga e ka vai tinamou to raua inangaro.” Maata te taime kua tupu ana te reira i roto i te iti tangata o Iehova.
ARIKI TIKAI RATOU I TE APINGA AROA NO TE AKAIPOIPO
3. Akapeea i rauka mai ei tetai vaine na Isaaka?
3 Kua akangateitei maata a Aberahama akarongo mou i te akaipoipo. No reira, kua tono aia i tana tavini ki Mesopotamia i te kimi i tetai vaine na Isaaka. Kua tupu mai tetai mea meitaki no te pure a taua tavini ra. Kua riro mai a Rebeka tei mataku i te Atua ei vaine akaperepere na Isaaka, e e tuanga maata tana te akatupuanga i ta Iehova taputou kia akamaata i ta Aberahama uanga. (Gene. 22:18; 24:12-14, 67) Auraka rava tatou e manako mei teia akaraanga e ka tau tetai tangata—noatu e manako meitaki tona—i te akapiri i tetai tane e te vaine. Maata te au tangata i teia tuatau na ratou uaorai e iki ana i to ratou tokorua. E Tika, e manamanata ana te akaipoipo, ka tauturu mai ra te Atua i te au Kerititiano i roto i te au turanga tukeke o te oraanga me pure ratou no tana aratakianga e kia aratakiia e tona vaerua.—Gala. 5:18, 25.
4, 5. Eaa i papu ei ia koe e te inangaro tikai ra te tamaine Sulami e te tiaki mamoe i tetai e tetai?
4 Kare te tamaine manea Sulami o Iseraela i taito i inangaro ana i tona au oa kia maro iaia kia riro mai e ko tetai o te au vaine a te Ariki ko Solomona. Kua tuatua aia e: “Te ako atu nei au ia kotou, e te au tamaine i Ierusalema nei, auraka kotou e akaitirere, auraka e akaara, i taku akaperepere nei, e kia inangaro ua aia uaorai.” (Peʼe na Solo. 8:4) Kua inangaro tikai te tamaine Sulami e tetai tangata tiaki mamoe ia raua. Kua tuatua atu te tamaine ma te tu akaaka e: “E tiare au no Sarona; e mea lili ua oki no te au o ra.” Inara, kua pau mai te tiaki mamoe e: “Mei te lili i rotopu i te au rakau taratara ra, koia katoa taku akaperepere i rotopu i te au vaine ra”! (Peʼe na Solo. 2:1, 2) E maata tikai to raua inangaro ia raua.
5 No te inangaro maata o te tamaine Sulami e te tiaki mamoe i te Atua, kua ketaketa roa atu to raua pirianga akaipoipo. Kua tuatua katoa te tamaine Sulami ki tana tiaki mamoe akaperepere e: “E akamou koe iaku ei akairo ki runga i to ngakau na, ei akairo ki rungao i o puke rima ra: e viviki maata to te inangaro mei to te mate ra; tangi kore to te vareae mei to te vaarua ra: tona mura e mura ai ïa, mei te uira o Iehova ra. Maata ua rai te vai, kare te inangaro e mate kia pi, kare katoa e mate i te vai puke: kia oronga te tangata i te au apinga katoa o tona ra are, ei oko i te inangaro, e akavaavaa ravaia mai aia.” (Peʼe na Solo. 8:6, 7) Me akamanako meitaki tatou i te akaipoipo, kare ainei e ka tapapa atu tetai tavini o Iehova i taua tu ra mei tona tokorua akaipoipo?
IKIANGA TE PUAPINGA RA KI TE ATUA
6, 7. Akapeea tatou i kite ei e e mea puapinga ki te Atua e koai ta tatou ka iki ei tokorua akaipoipo?
6 E puapinga tikai kia Iehova e koai taau ka iki kia akaipoipo. No runga i te iti tangata Kanaana, kua akaueia ki te ngati Iseraela e: “Auraka oki koe e akaipoipo ia ratou: auraka koe e oronga i taau tamaine na tana tamaiti; auraka oki koe e rave i tana tamaine na taau ra tamaiti. Ka riro oki ratou i te akaanga ke i taau tamaiti, kia kore e aru mai iaku, kia araara i te au atua ke ra; tupu iora te riri o Iehova ia koe, mate vave iora koe i reira.” (Deu. 7:3, 4) I te au anere mataiti i muri mai, kua akakite te taunga ko Ezera e: “Kua ara kotou, e kua rave i te au vaine ke, i maataʼi te ara i Iseraela.” (Ezera 10:10) E kua akakite atu te apotetoro ko Paulo ki te au taeake Kerititiano e: “Kua tāpuia te vaine e te ture i te ora anga o te tane ra; kia mate ra tana tane, kua matara aia kia akaipoipo ki tana i anoano ra kia tau ra i te Atu.”—1 Kori. 7:39.
7 Me akaipoipo tetai tavini o Iehova i tetai kare i roto i te tuatua mou, te akarongo kore ra aia ki te Atua. Kua ara te ngati Iseraela i to Ezera tuatau no tei ‘rave i te au vaine ke,’ e e tarevake i te akameangiti mai i te puapinga o te au akakiteanga taka meitaki a te au Tuatua Tapu. (Ezera 10:10; 2 Kori. 6:14, 15) Kare i te akaraanga meitaki no tetai Kerititiano tei akaipoipo i tetai kare i roto i te tuatua mou, e kare e ariki tikai ana i ta te Atua apinga aroa no te akaipoipo. Me akaipoipo aia i te reira tangata i muri ake i te papetitoanga, ka ngere aia i tetai au akameitakianga i roto i te putuputuanga. E kare aia e tau kia tapapa atu aia no te au akameitakianga e i taua taime rai ka pure e: ‘E Iehova e, kua iki au i te akarongo kore ia koe, inara e akameitaki mai ra koe iaku, ine.’
KUA KITE MEITAKI ATU TO TATOU METUA I TE RANGI
8. Akamarama mai i te tumu ka aru ei tatou i ta te Atua ikuikuanga no te akaipoipo.
8 Kua kite meitaki atu te tangata tei maani i tetai matini akapeea me angaanga te reira. Me ka anoanoia kia tamoumouia tetai au apinga o te matini, ka oronga mai aia i te au ikuikuanga. Akapeea me kare tatou e aru i te au ikuikuanga e kua tamou i te au apinga o te matini mei ta tatou uaorai e inangaro ra? Penei ka tupu mai te kino—e kare te matini e angaanga akaou. No reira, me ka inangaro tatou kia mataora te akaipoipo, e aru tatou i ta Iehova au ikuikuanga, Tei Akamata mai i te akaipoipo.
9. Eaa tatou ka karanga ai e kua marama a Iehova i te tu manako maromaroa e te mataora ka tupu mai i roto i te akaipoipo?
9 Kua kite a Iehova i te au mea ravarai no runga i te au tangata e te akaipoipo. Kua tuku aia i te inangaro no te pirianga ainga ki roto i te au tangata kia rauka ia ratou i te ‘anau mai i te tamariki e kia maata roa atu.’ (Gene. 1:28) Kua marama te Atua i te tu manako maromaroa, no te mea i mua ake ka anga ai aia i te vaine mua, kua tuatua aia e: “Kare ïa e meitaki kia noo ua te tangata koia anake ra; e anga au i tetai tauturu tau nona ra.” (Gene. 2:18) Kua marama meitaki katoa a Iehova i te mataora ka tupu mai i roto i te pirianga akaipoipo.—E tatau ia Maseli 5:15-18.
10. Akapeea te au tokorua me akamareka ia Iehova i roto i to ratou pirianga akaipoipo?
10 No te ara e te tu apa ta Adamu i tuku mai ki runga i te au tangata, kare e akaipoipo apa kore i teia tuatau. Inara, ka mataora te akaipoipo o te au tavini o Iehova, me aruia te Tuatua a te Atua. Ei akatauanga, akamanako ana i ta Paulo akoanga taka meitaki no te au pirianga ainga i roto i te akaipoipo. (E tatau ia 1 Korinetia 7:1-5.) Kare te Tuatua Tapu e akakite maira e ko te tumu i piri ei nga tokorua, no te anau ua anga i te tamariki. Te anoano katoaia ra kia akamerengoia to raua inangaro i te pae manako ngakau e pae kopapa. Inara kare te Atua e mareka ana i te au peu viivii. I roto i teia tuanga puapinga o to ratou oraanga, ka inangaro te au tane e te au vaine Kerititiano i te akono i tetai e tetai ma te tu maru e te aroa. E ka kopae katoa ratou i te au angaanga ka akamareka kore ia Iehova.
11. Akapeea a Ruta te akameitakiia anga no tona tu tiratiratu kia Iehova?
11 Kia maata ua rai te rekareka e te mataora i roto i te akaipoipo. Kia riro ua rai te kainga o te Kerititiano ei ngai akangaroi anga e te au. Akamanako ana i tei tupu i tetai 3,000 mataiti i topa, te aere ra a Naomi, e vaine ruaine takaua e tana nga unonga vaine takaua, ko Orapa raua ko Ruta, na runga i te mataara, mei ia Moabi ki Iuda. Kua akakite a Naomi ki te nga vaine mapu kia oki ki to raua iti tangata. Kua noo rai a Ruta, e ngati Moabi ki ko ia Naomi, e kua vai tiratiratu aia ki te Atua mou, e kua akapapuia mai kiaia e ka ‘tutaki maataia mai aia e Iehova, tana i akaruru atu i raro ake i tona peau.’ (Ruta 1:9; 2:12) Na te ariki maata anga i ta te Atua apinga aroa no te akaipoipo, kua riro mai a Ruta ei vaine na te tangata pakarikari ko Boaza, e tangata akamori mou no Iehova. Me akatuakaouia mai aia ki te enua nei i roto i te ao ou o te Atua, ka mataora aia i te kite e kua riro mai aia ei tupuna vaine no Iesu Karaiti. (Mata. 1:1, 5, 6; Luka 3:23, 32) Maata tikai te au akameitakianga i rauka mai iaia no tona tu tiratiratu kia Iehova!
AKOANGA TAU KIA PUAPINGAIA TE AKAIPOIPO
12. Ka kite tatou i te akoanga tau no runga i te akaipoipo kiea?
12 Te akakite maira Tei Akamata i te akaipoipo e eaa ta tatou ka anoanoia kia kite kia puapingaia te akaipoipo. Maata atu tana i kite i ta te au tangata. E tika ua ana ta te Pipiria, no reira me oronga tetai tangata i te akoanga no te akaipoipo, kia akatumuia te reira ki runga i te au turanga o te Pipiria. Ei akatauanga, kua tata te apotetoro ko Paulo e: “E aroa ra te tangata katoa i tana uaorai vaine mei te aroa iaia uaorai; e te vaine oki e kauraro, aia i tana tane.” (Ephe. 5:33) Te marama ua ra i te au Kerititiano pakari taua akoanga taka meitaki ra mei te Pipiria. Teia ra te uianga, Ka taangaanga ainei ratou i ta Iehova Tuatua? Ae, me ariki tikai ratou i tana apinga aroa no te akaipoipo.a
13. Eaa te ka tupu mai me kare te akoanga i roto ia 1 Petero 3:7 e aruia?
13 Ka akono aroa te tane Kerititiano i tana vaine. Kua tata te apotetoro ko Petero e: “Koia katoa oki kotou, e te au tane, e noo ia ratou ra ma te kite, i te akangateitei anga i te vaine, i te āriki paruparu ra, e ei atu katoa oki i te aroa ua ra i te ora; kia kore ta kotou pure e topa.” (1 Pete. 3:7) Kare te au pure a te tane e akarongoia mai me kare aia e taangaanga i ta Iehova akoanga. Ka takinoia te turanga pae vaerua o nga tokorua, penei ka taki atu ki te taitaia maata, te taumaro, e te akono anga i tetai na roto i te tu kino.
14. Eaa te mea meitaki ta tetai vaine aroa ka akatupu ki tona pamiri?
14 Te vaine tei aru i te akoanga Pipiria e kua aratakiia e te vaerua tapu o te Atua, maata atu tana ka rauka i te rave i te akariro anga i tona kainga ei ngai au e te mataora. E mea tau no tetai tane mataku i te Atua kia inangaro i tana vaine e kia paruru atu iaia i te pae kopapa e te pae vaerua. Te anoano maata ra te vaine i tana tane kia inangaro mai iaia, e kia akaari katoa aia ki tana tane i tona inangaro. Te karanga ra a Maseli 14:1 e: “Te patu ra te vaine pakari ra i tona ra are: kareka te neneva ra, te rave ra tona rima e vavaʼi ki raro.” E maata atu ta tetai vaine pakari e te aroa ka rauka i te rave kia puapingaia e kia mataora tona pamiri. Ka akaari katoa aia e te ariki tikai ra aia i ta te Atua apinga aroa no te akaipoipo.
15. Eaa te akoanga i roto ia Ephesia 5:22-25?
15 Te au tane e te au vaine tei akatumu i to ratou pirianga ki runga i to Iesu akaraanga no te akono anga i tana putuputuanga, te akangateitei ra ratou i ta te Atua apinga aroa no te akaipoipo. (E tatau ia Ephesia 5:22-25.) Maata atu te mataora o te aronga akaipoipo me inangaro tikai ratou i tetai e tetai, e kare ratou e tuku i te akaparau, te akamoupuku, me kore te au tu kino kia takino i to ratou akaipoipo!
AURAKA TETAI E AKATAKA KE IA RAUA
16. Eaa tetai au Kerititiano i noo ua ai ma te kore e akaipoipo?
16 Noatu kua parani te maataanga o te tangata kia akaipoipo a tetai ra, ka noo ua tetai au tavini o Iehova ma te kore e akaipoipo, no te mea kare e kiteaia ana tetai tokorua te tau ra kia ratou e kia Iehova. Te vai ra tetai aronga kare e inangaro i te akaipoipo, kia rauka ia ratou i te akapou i to ratou taime kia tavini ia Iehova ma te kore e tamanamanata anga no te akaipoipo. E tika, ka mataora te oraanga kare i akaipoipo me aruia i tei akanooia mai e Iehova.—Mata. 19:10-12; 1 Kori. 7:1, 6, 7, 17.
17. (a) Ko teea au tuatua a Iesu no runga i te akaipoipo ta tatou ka akamaara? (e) Me akamata tetai Kerititiano i te inangaro atu i te tokorua o tetai ke, eaa tana ka rave viviki?
17 Me kua akaipoipo e me kare, kia akamaara ra tatou pouroa i ta Iesu au tuatua e: “Kare rai kotou i tatau e, ko [te Atua] tei anga ia raua i muatangana, i anga ïa i te tane okotai e te vaine okotai; E kua na ko akera, ‘E akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai?’ E teianei, kare atura raua i te toko rua, kua kopapa okotai ra. E ta te Atua i topiri ra, auraka te tangata e akataka ke atu.” (Mata. 19:4-6) E ara i te inangaro atu i to tetai ke tokorua akaipoipo. (Deu. 5:21) Me akamata tetai Kerititiano i te akatupu i teia tu inangaro, kia takore viviki atu aia i taua tu inangaro viivii ra, noatu ka mamae ngakau aia no te akatika anga i teia inangaro kia tupu mai. (Mata. 5:27-30) E puapinga tikai kia akatikatikaia taua manako ra e kia akakore atu i taua inangaro kino ra e tupu maira i roto i te ngakau pikikaa.—Iere. 17:9.
18. Eaa to tatou manako no runga i ta te Atua apinga aroa no te akaipoipo?
18 Te ariki ra te maataanga o te tangata i te pirianga akaipoipo noatu e kare ratou i kite me kore e iti ua ta ratou i kite no runga i te Atua ko Iehova e tana apinga aroa umere no te akaipoipo. Ei au tavini akatapuia no “te Atua mataora,” ko Iehova, te mataora nei tatou i tana au mea i oronga mai e te akaari anga e te ariki tikai ra tatou i ta te Atua apinga aroa no te akaipoipo!—1 Timo. 1:11, NW.
[Tataanga Rikiriki i Raro]
a No tetai uriurianga taka meitaki no runga i te akaipoipo, akara i te pene 10 e te pene 11 o te puka “Keep Yourselves in God’s Love.”
[Tataanga i te kapi 6]
Akangateitei ra tetai akaipoipo meitaki ia Iehova e ka mataora tikai te katoatoa i roto i te pamiri
[Tutu i te kapi 5]
Kua ariki maata a Ruta i ta te Atua apinga aroa no te akaipoipo
[Tutu i te kapi 7]
Ariki tiaki ra ainei koe i ta Iehova apinga aroa no te akaipoipo?