1 Timoteo

5 EIAA e kauvae atu i te tangata pakari, e ako atura, mei te mea e metua; e te au tangata ou ra, ei taeake ïa;

2 E te au vaine pakari ra, mei te metua vaine, e te au vaine ou ra, ei tuaine ïa, ma te akono meitaki.

3 E kite meitaki atu i te au vaine takaua ra, i te takaua tikai ra.

4 Ko te vaine takaua ra, e tamariki tana e te mokopuna, e rave ana ratou i te paieti i te angai anga i to ratou uaorai ngutuare, ka tutaki atu ei i to ratou au metua ra: e mea meitaki te reira e te tau oki i te aroaro o te Atua. 5 E teianei, ko te vaine takaua tikai, e kare e uraura toe, te irinaki ra ïa i te Atua, ma te tamou oki i te pure, e te pati anga atu, i te po e te ao.

6 Kareka ko tei akatika ua i ta te kopapa nei, kua mate ïa ka ora uaʼi.

7 E tuku atu koe i teianei au tuatua ia ratou, kia kore ratou kia ē.

8 Ko te tangata oki kare i takinga-meitaki i tona uaorai, e maata ua atu rai i tona uaorai ngutuare, kua akaruke ïa aia i te akarongo, e e maata atu ïa tona kino i to te tangata akarongo kore ra.

9 Auraka ei vaine takaua tei kore i tae ki te ono i te ngauru o tona mataiti e ikiia ra, ei vaine na te tane okotai,

10 E te rongo meitaki i te angaanga meitaki ra, i apii ana i tana tamariki, i kite meitaki ana i te tangata ke ke, i orei ana i te vaevae o te aronga tapu, i tauturu ana i te aronga maki, i rave maroiroi ana i te au angaanga memeitaki katoa ra.

11 Eiaa ra te au vaine ou i takaua ra; kua iu anake ratou i ta te Mesia ra, kua akaipoipo ïa;

12 E akaapaanga tei ia ratou, no te mea kua kopae ratou i to ratou akarongo muatangana ra.

13 E no te akatau, kua akamātau ratou i te koka aere ua i tera are i tera are; kare ra i te akatau anake, e apai tuatua oki ratou, e te akara matariki i ta tetai ke ra akonoanga, i te tuatua anga oki i te au mea tika kore ra.

14 E teianei, teia taku tuatua i te au vaine ou ra, ka akaipoipo ratou, ka anau tama, e akono meitaki i te ngutuare, eiaa to te enemi ei akakinoanga.

15 Kua tatipake takere ana oki tetai aronga i te aru anga atu ia Satani.

16 E vaine takaua to te ngutuare o tetai tangata akarongo, e to tetai vaine akarongo ra, e tauturu aia i taua takaua ra, e eiaa te ekalesia e akateiaaia, kia tika i te reira kia tauturu i te au takaua tikai.

17 Ko te au aronga orometua i arataki meitaki ra, kia maata atu ïa i te akateitei atu, kia maata atura i tei angaanga i te ako e te apii ra.

18 Te na ko maira oki te tuatua i tataia ra, e “Auraka koe e topiri i te vaa o te puakatoro e takatakai i te sitona ra.” E “E tau te rave angaanga i tana tutaki.”

19 Eiaa e akono atu i te tapepe anga i tetai o te aronga orometua, mari ra kia toko rua, e kia toko toru ake kite.

20 Ko tei rave i te ara ra, e ako atu ki mua i te aroaro o te tangata katoa ra, kia mataku katoa tetai aronga.

21 Te ako ua atu nei au ia koe i mua i te aroaro o te Atua, e te Atu ra ko Iesu Mesia, e te au angela i ikiia ra e, e akono koe i teianei au tuatua, eiaa e akaapa mamao ua ana, eiaa oki te akatika pae tai ua.

22 Eiaa e rapurapu i te tuku i te rima ki runga i te tangata, auraka e kapiti katoa atu i ta etai ke ra ara: kia vai apa kore rai koe.

23 Oti ra ua i te inu ua i te vai, ei manga wina iti ra taau, no to kopu oki, e no te maki putuputu noou ra.

24 Te vai ua nei te ara a tetai papaki tangata, te na mua ra ïa, e taka ua atura; kareka ta tetai papaki, na muri ïa te kitea.

25 Koia katoa te tuatua meitaki a tetai papaki, te kitea uaia nei ïa na mua: e te kore i kitea ra, kare rai e ngaro me uuna.