Salamo

34 KA akameitaki rai au ia Iehova, kare e tivata; kia vai tamou rai te akameitaki iaia i roto i toku nei vaa.

2 E akapaapaa toku vaerua ia Iehova; ka kite te aronga akaaka i te reira, e ka rekareka.

3 E akamaata tatou ia Iehova; tatou katoa e akateitei i tona ingoa.

4 Kua kimi au ia Iehova, e kua tuatua maira aia kiaku, e kua akaora iaku i te au mea katoa taku i mataku ra.

5 Kua akara ratou iaia, e kua akamāramaia mai kare oki to ratou au mata i akama.

6 Kua kapiki atura taua tangata i mate nei, e kua akarongo mairā Iehova, e kua akaora atura iaia i tona katoa ra au tumatetenga.

7 Te patia nei te Angela a Iehova i te puakapa, e pini ua ake te aronga i mataku iaia, e kua akaora ia ratou.

8 Ka tongi ana kia kite i te meitaki o Iehova! e ao to te tangata i irinaki iaia ra.

9 E mataku ia Iehova, ko kotou te aronga tapu nona ra! kare oki e ngere anga to te aronga i mataku iaia ra.

10 Kua ngere te au liona ou, e kua mate i te pongi; kareka tei kimi ia Iehova ra, kare rava e ngere i te meitaki.

11 E aere mai ana, e te au tamariki ra, e akarongo mai iaku; ka apii au ia kotou kia mataku ia Iehova.

12 Koai ïa tangata tei inangaro i te ora, tei anoano kia kite i te meitaki i tona au rā?

13 E tāpu i to arero i te kino, e to vaa auraka e tuatua i te tuatua pikikaa.

14 E kopae i te kino, e rave i te meitaki; e kimi i te au, e aruaru atu.

15 Tei te aronga tuatua-tika ra to Iehova mata, e tei ta ratou kapiki tona taringa.

16 E mata ke ra to Iehova i te aronga i rave i te kino ra, kia kore roa e manakoia i te ao nei.

17 Te kapiki nei te aronga tuatua-tika, e te akarongo mairā Iehova, e te akaora nei aia ia ratou i to ratou au tumatetenga katoa ra.

18 Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.

19 Manganui to te tangata tuatua-tika ra mate; e akaoraia ra aia e Iehova i taua au mea katoa ra.

20 Nana e tiaki i tona ra au ivi katoa, kare rava tetai e aatiia.

21 Ka mate te aronga kino i te kino: e tei makitakita i te aronga tuatua-tika ra, ka akapaaia ïa.

22 E akaorā Iehova i te vaerua o tona ra au tavini: kare oki tetai i irinaki iaia ra e akaapaia.