Kia Rekareka i te Oraanga i Roto i te Mataku ia Iehova
“E mataku ia Iehova, ko kotou te aronga tapu nona ra! kare oki e ngere anga to te aronga i mataku iaia ra.”—SALAMO 34:9.
1, 2. (a) Na roto i teea au tu tukeke e akamanako ra a Kerititome i te mataku i te Atua? (e) Eaa te au uianga ka uriuri tatou i teianei?
TE AU orometua i roto ia Kerititome te apii putuputu ra i te mataku i te Atua, te akatumu ra i te reira ki runga i te apiianga kare e tau ana ki te Tuatua Tapu e te akautunga ra te Atua i te aronga ara i roto i te ai era e mutu kore ua atu. E tuke te reira apiianga mei ta te Pipiria e apii maira no runga ia Iehova ei Atua aroa e te tuatua tika. (Genese 3:19; Deuteronomi 32:4; Roma 6:23; 1 Ioane 4:8) E tuke rai te akonoanga a tetai au orometua o Kerititome. Kare roa ratou e taiku ana i te mataku i te Atua. Mari ra, te apii ra ratou e ka akatika ua te Atua e te ariki ra aia e vaitata rai i tetai ua atu tangata noatu te tu oraanga e akono ra aia. Kare katoa te Pipiria e apii mai ana i te reira.—Galatia 5:19-21.
2 Ko te tikaanga, te akamaroiroi maira te Pipiria ia tatou kia mataku i te Atua. (Apokalupo 14:7) Te akatupu ra te reira tuatua mou i te au uianga. Eaa ra tetai Atua takinga meitaki e inangaro maira ia tatou kia mataku iaia? Eaa te tu mataku ta te Atua e umuumu maira? Akapeea tatou e puapinga ai i te mataku i te Atua? Ka akamanako tatou i teia au uianga ia tatou e uriuri tamou ra ia Salamo 34.
Eaa ka Mataku ei i te Atua
3. (a) Eaa toou manako i te akaueanga kia mataku i te Atua? (e) Eaa te aronga e mataku ra ia Iehova i mataora ai?
3 Ei Tutara Ngateitei o te ao katoa e pini ua ake e Tei Anga mai, ka tau a Iehova kia matakuia. (1 Petero 2:17) Inara, kare te reira mataku i te mataku kino pakari no tetai atua kino tikai. E mataku tu ngateitei ia no te turanga o Iehova. E mataku katoa te reira i te akamareka kore iaia. E ngateitei tikai te mataku i te Atua e te papanui, kare i te mea taitaia me kore e mea matakuia. Te inangaro ra a Iehova, “te Atua mataora,” i tona au tangata i anga aia kia rekareka i te oraanga. (1 Timoteo 1:11, NW) Inara, kia rave i te reira, ka inangaroia tatou kia noo rotai ki te au umuumuanga a te Atua. No te manganui, te aiteanga o te reira koia oki kia taui i te tu oraanga. Pouroa te aronga e akono ra i te tauianga anoanoia te kite maira i te tikaanga o te au tuatua a te tata taramo ko Davida: “Ka tongi ana kia kite i te meitaki o Iehova! e ao to te tangata i irinaki iaia ra. E mataku ia Iehova, ko kotou te aronga tapu nona ra! kare oki e ngere anga to te aronga i mataku iaia ra.” (Salamo 34:8, 9) No te mea e pirianga meitaki to ratou ki te Atua, pouroa te aronga e mataku ra ia Iehova kare ratou e ngere ana i tetai apinga puapinga maata.
4. Eaa te akapapuanga tei orongaia mai e Davida raua ko Iesu?
4 E akara ana mei tei akonoia i tona tuatau ra, kua akangateitei a Davida i tona au tangata na te kapikianga ia ratou ei “aronga tapu.” E tuanga ratou no te pa enua tapu o te Atua. Kua tuku katoa ratou i to ratou oraanga ki roto i te kino kia aru ia Davida. Noatu e te oro ra ratou mei te Ariki ko Saula, kua irinaki a Davida e ka oronga ua mairai a Iehova i ta ratou au mea e anoano ra. Kua tata a Davida: “Kua ngere te au liona ou, e kua mate i te pongi; kareka tei kimi ia Iehova ra, kare rava e ngere i te meitaki.” (Salamo 34:10) Kua oronga a Iesu i tetai akapapuanga aiteite ki tana au pipi ra.—Mataio 6:33.
5. (a) Eaa te turanga o te maataanga o te aronga e aru ra ia Iesu? (e) Eaa te akoanga ta Iesu i oronga no runga i te manako no te mataku?
5 E manganui te aronga tei akarongo atu kia Iesu, no roto mai ratou i te au pupu ngati Iuda e turanga ngere e te akaaka. No reira, kua “aroa atura [a Iesu] ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36) Ka rauka ainei i te reira aronga akaaka te tu mataku kore i te aru ia Iesu? Kia rave i te reira, ka inangaroia ratou i te tatanu i te mataku ia Iehova, kare i te tangata. Kua karanga a Iesu e: “E akakite atura au kia kotou i ta kotou e mataku: Ko tei mate te kopapa iaia, e muri akera, e tika iaia kia uri atu ki te po ra, e mataku kotou iaia; koia ïa, ko taku ïa tuatua kia kotou, Koia ta kotou e mataku. Kare aina taki rima manu rikiriki i okoia i nga asario e rua nei? e kare rai tetai i ngaro i te Atua. E kua ope oki te rauru o to kotou mimiti na i te tatauia. Auraka mari kotou e mataku: e maata to kotou meitaki i to te au manu rikiriki e manganui.”—Luka 12:4-7.
6. (a) Eaa te au tuatua a Iesu tei akamaroiroi i te au Kerititiano? (e) Eaa a Iesu i riro ei ei akaraanga tau tikai no te akaarianga i te tu mataku i te Atua?
6 Me maroia ana te aronga mataku ia Iehova e to ratou au enemi kia tapu i te tavinianga i te Atua, penei ka akamaara ratou i te akoanga a Iesu: “Ko te aaki iaku ki mua i te aroaro o te tangata nei, e aaki katoa te Tamaiti a te tangata iaia i mua i te aroaro o te au angela no te Atua. Kareka te uuna iaku i mua i te aroaro o te tangata nei, ko te ka uuna katoaia i mua i te aroaro o te au angela o te Atua ra.” (Luka 12:8, 9) Kua akamaroiroi taua au tuatua ra i te au Kerititiano, i roto tikai i te au enua kua araiia te akamori mou. Te akapaapaa ra rai taua au aronga ra ia Iehova i te au uipaanga Kerititiano e i roto i ta ratou angaanga orometua. (Angaanga 5:29) Kua akanoo a Iesu i te akaraanga meitaki rava tikai i te akaarianga i te “tu akono mataku i te Atua ra.” (Ebera 5:7, NW) I te tuatuaanga kiaia, kua akakite ke ana te Tuatua totou e: “Ka noo ua mairai te Vaerua o Iehova ki runga iaia, te Vaerua . . . no te mataku ia Iehova. E maata oki tona kite i te mataku ia Iehova.” (Isaia 11:2, 3) No reira, kua tau meitaki a Iesu i te apii mai ia tatou i te au puapinga i te mataku i te Atua.
7. (a) I te akaraanga, akapeea te au Kerititiano, i te pau atu anga ki tetai patianga tei aite atu ki tei orongaia e Davida? (e) Akapeea te au metua i te aruanga i te akaraanga meitaki o Davida?
7 Pouroa te aronga e aru ra i to Iesu akaraanga e te akarongo ra ki tana au apiianga, te ariki ra i tetai patianga tei aite ki te patianga tei orongaia e Davida: “E aere mai ana, e te au tamariki ra, e akarongo mai iaku; ka apii au ia kotou kia mataku ia Iehova.” (Salamo 34:11) E mea natura ua ia Davida i te taiku atu i tona au tangata ei “au tamariki” no te mea kua akamanako ratou iaia ei arataki no ratou. No tana tuanga, kua oronga a Davida i te tauturu pae vaerua ki tona au tangata kia taokotaiia ratou e kia rekareka i ta te Atua akaperepereanga. E akaraanga meitaki tikai te reira no te au metua Kerititiano! Kua oronga a Iehova kia ratou i te mana no runga i ta ratou au tamariki tamaroa e te au tamariki tamaine kia ‘apii ia ratou kia pakari ma te ako a te Atu ra.’ (Ephesia 6:4) Na te uriurianga i te au apinga pae vaerua ki ta ratou au tamariki i te au ra ravarai e te akonoanga i tetai apii Pipiria tamou kia ratou, te tauturu ra te au metua i ta ratou au mapu kia rekareka i te oraanga i te mataku ia Iehova.—Deuteronomi 6:6, 7.
Akapeea te Akono Anga i te Tu Mataku i te Atua
8, 9. (a) Eaa te akariro ra i te tu oraanga mataku i te Atua ei mea inangaroia? (e) Eaa te o atura i te paruruanga i to tatou arero?
8 Mei tei kiteaia i mua atu, kare te matakuanga ia Iehova e akakore i to tatou rekareka. Kua ui a Davida e: “Koai ïa tangata tei inangaro i te ora, tei anoano kia kite i te meitaki i tona au rā?” (Salamo 34:12) Te taka meitaki ua ra e, ko te mataku ia Iehova ko te taviriia ki te rekarekaanga i tetai oraanga roa e te kite i te meitaki. Inara, e mea ngoie ua i te karanga e, “E mataku au i te Atua.” E apinga ke rai i te akapapu i te reira na roto i to tatou tu. No reira, a Davida i akamata ei i te akamarama e ka akapeea tatou i te akaari anga i te tu mataku i te Atua.
9 “E tāpu i to arero i te kino, e to vaa auraka e tuatua i te tuatua pikikaa.” (Salamo 34:13) Kua akauruia te apotetoro ko Petero kia taiku i teia tuanga o Salamo 34 i muri ake i tona akoanga i te au Kerititiano kia akono i tetai e tetai ma te aroa taeake. (1 Petero 3:8-12) Te tapuanga i to tatou arero mei te kino, te aiteanga, ka kopae tatou i te akatotoaanga i te tuatua urutoe. Mari ra, ka aruaru ua rai tatou i te akamaroiroi atu me tuatua tatou ki tetai ke. Pera katoa, ka aruaru tatou kia mataku kore e kia tuatua i te tuatua tika.—Ephesia 4:25, 29, 31; Iakobo 5:16.
10. (a) E akamarama mai i te aiteanga kia anga ke mei te kino. (e) Eaa te o atura ki te raveanga i te meitaki?
10 “E kopae i te kino, e rave i te meitaki; e kimi i te au, e aruaru atu.” (Salamo 34:14) Ka kopae tatou i te au apinga ta te Atua e akaapa ra, mei te ainga tau kore, te au ravenga ainga viivii, te keikeia, te purepure, te rave kino, te kona kava, e te kai tita. Ka patoi katoa tatou i te tamataoraanga te akatutu maira i taua au apinga viivii ra. (Ephesia 5:10-12) Mari ra, ka taangaanga tatou i to tatou taime kia rave i te meitaki. Te meitaki maata rava atu ka rauka ia tatou i te rave koia oki ko te piri putuputu atu anga ki roto i te angaanga tutu anga i te Patireia e te akariroanga i te au tangata ei pipi, te tauturuanga i tetai ke kia rauka te ora. (Mataio 24:14; 28:19, 20) Te raveanga i te meitaki te kapiti katoa maira i te akapapaanga e te aere atu anga ki te au uipaanga Kerititiano, te oronga anga i te moni tauturu ki te angaanga takapini i te ao katoa, te akonoanga i to tatou Are Uipaanga Patireia, e te akamanako atu anga i te au inangaro o te au Kerititiano e ngere ra.
11. (a) Akapeea a Davida i te raveanga i tana e akakitekite ra no runga i te au? (e) Eaa taau ka rave no te ‘aruaru anga i te au’ i roto i te putuputuanga?
11 Kua akanoo a Davida i tetai akaraanga meitaki i te aruaruanga i te au. E rua taime kua rauka iaia te atianga i te ta atu ia Saula. I nga taime roa ai, kua tapu aia mei te raveanga i te kino e kua tuatua akangateitei aia ki te ariki i muri akera, ma te anoano i te akatupu akaou i te au. (1 Samuela 24:8-11; 26:17-20) Eaa te ka raveia i teia tuatau nei me akamata tetai turanga i te tamanamanata i te au o te putuputuanga? Kia “kimi [tatou] i te au, e aruaru atu” i te reira. No reira, me kite mai ana tatou e e manga kinokino rai te au pirianga i rotopu ia tatou e tetai taeake irinaki, ka akarongo tatou ki te akoanga a Iesu: “E akamata i te aere e ongi i to taeake.” I reira tatou ka tamou ua atu rai ma tetai au tuanga ke mai o te akamori mou.—Mataio 5:23, 24; Ephesia 4:26.
E Au Tutaki Maata te Mataku i te Atua
12, 13. (a) Eaa te au akameitakianga ta te au tangata e mataku ra i te Atua e mataora ra i teia tuatau? (e) Eaa te akameitakianga maata ta te aronga akamori tiratiratu ka rekareka mai kare e roa atu ana?
12 “Tei te aronga tuatua-tika ra to Iehova mata, e tei ta ratou kapiki tona taringa.” (Salamo 34:15) Te tataanga no runga i to te Atua akonoanga ia Davida, te akapapu maira e e tika tikai te reira au tuatua. I teia tuatau nei, ka kite mai tatou i te mataora merengo tikai e te au tinamou no te mea kua kite oki tatou e te akarakara maira a Iehova ia tatou. Te irinaki nei tatou e ka oronga ua mairai aia i ta tatou e anoano ra, noatu mei tei raro tatou i te taitaia maata. Kua kite tatou e kare e roaia ka aro atu te aronga akamori mou katoatoa i te tamakianga tei totouia o Goga o Magoga e te ‘rā rikarika o Iehova ra.’ (Ioela 2:11, 31; Ezekiela 38:14-18, 21-23) Noatu eaa te au turanga ta tatou ka aro atu i te reira taime, ka tika katoa te au tuatua a Davida i to tatou turanga e: “Te kapiki nei te aronga tuatua-tika, e te akarongo mairā Iehova, e te akaora nei aia ia ratou i to ratou au tumatetenga katoa ra.”—Salamo 34:17.
13 Mei teaa rai te rekareka i te kiteanga i te reira taime ia Iehova e akangateitei ra i tona ingoa maata! Ka akakiia to tatou au ngakau e te ngateitei tei maata rava atu i to mua ana, e ka kite mai te aronga patoi katoatoa i tetai akapouanga akama tikai. “E mata ke ra to Iehova i te aronga i rave i te kino ra, kia kore roa e manakoia i te ao nei.” (Salamo 34:16) Mei teaa atura te akameitakianga maata kia kite mai i te reira akaoraanga maata i roto i to te Atua ao ou tuatua tika!
Te Au Taputou ka Tauturu ia Tatou i te Akakoromaki
14. Eaa te ka tauturu ia tatou kia akakoromaki noatu te au takinokinoanga?
14 I teia taime nei, kia akarongo ua atu rai ia Iehova i roto i tetai ao pikikaa e te kino pakari, te umuumuia ra te akakoromaki. E tauturu maata te mataku i te Atua ia tatou e tatanu ra i te akarongo. No te au tuatau kino e noo nei tatou, e kite mai ana tetai au tavini o Iehova i te au akaaoanga kino pakari te akamaromaroa ra ia ratou e te akaparuparu ra i to ratou manako, mei te reira rai te tu. Inara, ma te papu tikai me akara atu ratou kia Iehova, ka tauturu mai aia ia ratou i te akakoromaki. Te oronga maira te au tuatua a Davida i te akapumaana mou: “Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.” (Salamo 34:18) Ma te akamaroiroi, kua karanga katoa a Davida e e: “Manganui to te tangata tuatua-tika ra mate; e akaoraia ra aia e Iehova i taua au mea katoa ra.” (Salamo 34:19) Noatu e eia au takinokinoanga ka tupu kia tatou, e mana ririnui to Iehova i te akaora ia tatou.
15, 16. (a) Eaa te tupuanga kino ta Davida i kite mai i muri poto ua ake i tona atu anga ia Salamo 34? (e) Eaa te ka tauturu ia tatou i te akakoromaki i te au timataanga?
15 I muri poto ua mai i te atu anga ia Salamo 34, kua rongo a Davida i te tupuanga kino tei tupu ki te au tangata o Noba, i te tamateanga a Saula ia ratou e te maataanga o te au kau taunga. Mei teaa tikai tona taitaia i te akamanakoanga e ko tana atoroanga ia Noba tei akatupu i te riri o Saula! (1 Samuela 22:13, 18-21) Kare e ekoko e kua uri a Davida kia Iehova no te tauturu, e papu e kua akapumaanaia aia i te manakonakoanga no tetai akatuakaouanga o “te aronga tuatua-tika” i te tuatau ki mua.—Angaanga 24:15.
16 I teia tuatau nei, e akamaroiroi katoa ana te manakonakoanga no te akatuakaouanga ia tatou. Kua kite tatou e noatu eaa ta te au enemi ka rave, kare te reira e akatupu i te mamae mutu kore kia tatou. (Mataio 10:28) Kua akakite mai a Davida i te reira akapapuanga aiteite i roto i teia au tuatua: “Nana e tiaki i tona ra [te tangata tuatua tika] au ivi katoa, kare rava tetai e aatiia.” (Salamo 34:20) E akatupuanga tikai to te reira irava ki te turanga o Iesu. Noatu e kua tamate kinoia a Iesu, kare okotai ona ivi i “aatiia.” (Ioane 19:36) I te akono akaouanga i te reira irava, te akapapu maira a Salamo 34:20 ia tatou e noatu eaa te au timataanga ta te au Kerititiano akatainuia e to ratou au taeake “mamoe ke” ka aro atu, kare roa ratou e akakino tinamouia. Kare roa to ratou au ivi e aatiia, ei tuatua akatutu ua.—Ioane 10:16.
17. Eaa te tupuanga kino te tiaki maira i te aronga tataraara kore te rikarika ra i to Iehova iti tangata?
17 No te aronga kino, e tuke to ratou turanga. Kare e roaia, ka kokoti ratou i te kino ta ratou i tatanu. “Ka mate te aronga kino i te kino: e tei makitakita i te aronga tuatua-tika ra, ka akaapaia ïa.” (Salamo 34:21) Te aronga pouroa te ka patoi ua atu rai i te iti tangata o te Atua ka kite mai i te takinoanga kino maata rava. I te apokarupo o Iesu Karaiti ‘ka akautungaia ratou i te mate mutu kore.’—2 Tesalonia 1:9.
18. Na roto i teea tu i akaoraia ai te “urupu maata,” e eaa ta ratou ka kite mai no te tuatau ki mua?
18 Kua taopenga te Salamo a Davida ma teia au tuatua akapapuanga: “E akaorā Iehova i te vaerua o tona ra au tavini: kare oki tetai i irinaki iaia ra e akaapaia.” (Salamo 34:22) Vaitata atu ki te openga o tona tutaraanga 40 mataiti, kua karanga te Ariki ko Davida e: “Ko [te Atua] tei akaora i toku vaerua i te au tumatetenga katoa ra.” (1 Ariki 1:29) Mei ia Davida rai, kare e roaia ka oki te aronga e mataku ra ia Iehova i te akamanako e ka rekareka i te akaoraia mai anga mei tetai ua atu akaapaanga no te tu ara e kua akaoraia mai mei to ratou au timataanga katoatoa. Te maataanga o te au Kerititiano akatainuia, kua rauka ke ana ta ratou akameitakianga i te rangi. Te piri atu nei tetai “urupu maata” mei te au pa enua katoatoa ki te toenga o to Iesu au taeake i te tavinianga i te Atua e ei tupuanga te rekareka ra i tetai turanga ma i mua ia Iehova. Te tumu no teia koia oki kua akono ratou i te akarongo i roto i te mana akaoraanga o to Iesu toto tei akamaringiia. I te tuatau o te Tutara Anga Tauatini Mataiti o Karaiti e aere maira, ka akono puia te au akameitakianga no te atinga oko kia ratou, arataki atu anga ia ratou ki te turanga apa kore.—Apokalupo 7:9, 14, 17, NW; 21:3-5.
19. Eaa ta te au mema o te “urupu maata” e manono nei i te rave?
19 Eaa teia au akameitakianga ka tupu ei ki te “urupu maata” o te aronga akamori o te Atua? No te mea te inangaro ra ratou i te mataku ua atu rai ia Iehova, i te tavinianga iaia ma te tu ngateitei umere rava e te akarongo ngateitei. E tika, i te matakuanga ia Iehova ka akarekareka te reira i te oraanga i teianei e te tauturu ra ia tatou kia rave i te “oraanga tikai”—te oraanga mutu kore i roto i to te Atua ao ou.—1 Timoteo 6:12, 18, 19, NW; Apokalupo 15:3, 4.
Maara Ainei ia Koe?
• Eaa tatou ka mataku ei i te Atua, e eaa te aiteanga kia mataku iaia?
• Eaa ta te mataku i te Atua ka akatupu ki to tatou tu?
• Eaa te au akameitakianga ka rauka mai no te mataku i te Atua?
• Eaa te au taputou te ka tauturu ia tatou kia akakoromaki?
[Tutu i te kapi 26]
Te taangaanga ra te aronga e mataku ra ia Iehova i te kite pakari i raro ake i te arairaianga
[Tutu i te kapi 28]
Te mea meitaki rava atu ta tatou ka rave no to tatou tangata tupu koia oki kia oronga atu i te tuatua meitaki o te Patireia kia ratou