Iobu

29 KUA tamou ua aturā Iobu i taua tuatua nana ra, na ko atura,

2 Naringa au i teianei mei tei nga marama i topa akenei e, mei tei te au rā i tiaki mai ei te Atua iaku nei e;

3 Ka kakā mai ei tana lamepa ki runga ake i toku upoko, e no tona mārama i aaere ei au na roto i te poiri;

4 Mei iaku i te au rā o toku ou anga ra, ka vai ei te muna a te Atua ki runga i toku puakapa;

5 Ka noo ei te Mana katoatoa iaku nei, e kua akapini mai taku au tamariki ra iaku;

6 Ka orei ei au i oku ruatapuae ki te u, e kua maringi a vai ua mai te mori noku no roto i te au mato ra.

7 Iaku i aere ki te ngutupa na roto i te oire, e kua akanoo i taku nooanga i te arataa ra;

8 Kua akara mai te au tangata ou iaku, e kua pipini: e kua tu ua maira te aronga ruaine ki runga:

9 Kua muteki te au tutara, kare i ki, e kua tapoki i to ratou vaa ki te rima:

10 Kua tāpu ua te aronga nunui i to ratou reo, e piri ua atura to ratou arero ki to ratou vaa.

11 Tei te akarongo anga mai te taringa ra, kua akameitaki maira iaku; tei te akara anga mai te mata ra, kua riro ïa ei kite noku:

12 No te mea kua akaora au i te ao kia kapiki mai, te matiroeroe oki, e tei kore rava ona e tauturu.

13 Te akaora a tei vaitata i te mate ra, tei iri mai ïa ki runga iaku: e kua imene ua te ngakau o te vaine takaua iaku i te rekareka.

14 Kua kakau au i te tuatua-tika, e pini akera au; e kua riro taku tuatua-tau mei te kakau pu e te korona.

15 Kua riro au ei mata no te matapo, e ei vaevae au no te pirikoki.

16 Ei metua au no te ao: e te tuatua kare i kiteia e au ra, kua kimiia ïa e au.

17 Kua aati au i te nio-ponga o te tangata kino, e kua aōia mai e au te apinga i riro i tona nio.

18 I tuatuaʼi au e, Ei roto i toku nei koanga e mate ei au, e ka akamaata au i oku puke rā mei te onetea.

19 Kua toro roa toku ra aka na te pae vai, e kua iri mai te au i runga i toku au rara e ao ua akera te po.

20 Te vai ou ra toku kakā i roto iaku nei, e te vai ketaketa ra taku ana i toku rima.

21 Kua akarongo mai ratou iaku, e kua tatari mai, e kua muteki kia akoia atu e au ra.

22 Kia oti taku tuatua, kare ratou i tuatua mai; e kua topata iora taku tuatua ki runga ia ratou.

23 Kua tapapa mai ratou iaku mei te tapapa ua ra; e kua amama ua to ratou vaa mei tei tapapa i te ua openga ra.

24 Kia katangia atu ratou e au ra, kare ïa ratou i manako e e tika; kare oki ratou i akaruke i te mārama o toku mata.

25 Naku i iki i to ratou arataa, e ko au tei maata, e kua noo au mei te ariki i roto i tona nuku, e mei tei akapumaana i te aronga aue.