Salamo

51 E AROA mai koe iaku, e te Atua e, i toou ra takinga-meitaki; no te maata o toou ra aroa, e taparapara koe i taku nei au ara.

2 E orei takiri mai koe iaku i toku nei kino; e tamā mai iaku i taku nei ara.

3 Te aaki nei oki au i taku nei ara, e te vai ua nei rai toku kino i mua iaku.

4 I mua i to aroaro, toou anake ra, i ara ai au nei, e i mua i to mata i rave ei au i teianei kino; kia tika taau me tuatua koe, kia apa kore taau me akava koe.

5 I na, i anau mai au ma te ara! e i toia au e taku metua vaine ma te kino.

6 I na, ko te tuatua-mou no roto ra taau e inangaro! e akakite mai koe iaku i te pakari i te ngai ngaro ra.

7 E tamā mai koe iaku i te isopa, ei reira au e mā ai; e orei koe iaku, e maataʼi toku teatea i to te kiona.

8 E akakite mai koe kiaku i te navenave e te rekareka, kia mareka te au ivi i aatiia e koe ra.

9 E uuna ke atu koe i to mata i taku nei au ara, e taparapara i toku nei au kino ravarai.

10 E anga ana koe i te ngakau mā i roto iaku nei, e taku Atua, e akaou ana oki koe i te vaerua tika tikai i roto iaku nei.

11 Auraka koe e tuaru iaku i mua i to aroaro nei, auraka oki e rave ke atu i to Vaerua Tapu iaku nei.

12 E akaoki mai kiaku i te rekareka o te ora naau ra; e kia tauturuia mai au e te ngakau oronga ra.

13 Ei reira au e akakite ei ki te aronga tatipake i toou au arataa, e e akaariuia mai te rave ara ra kia koe.

14 Kia ora au ia koe i te ara toto ra, e te Atua e, te Atua e oraʼi au nei; e na toku vaa e imene nui i taau ra tuatua-tika.

15 E vevete ana koe, e te Atu, i toku vaa, e na toku vaa e akapaapaa ia koe.

16 Kare oki te atinga taau i anoano, naringa ko te reira, kua orongaia ïa e au; kare oki koe e taurekareka i te atinga karakaratio.

17 Ko ta te Atua atinga ra, ko te ngakau paruparu ïa; ko te ngakau paruparu, e te aue ra, kare ua te Atua e akavaavaa i te reira.

18 Ei takinga-meitaki toou ia Ziona, i te aroa noou ra; e patu oki koe i te au patu i Ierusalema nei.

19 Ei reira koe e marekaʼi i te atinga tuatua-tika, e te atinga karakaratio katoatoa ra: ei reira te au puakatoro e apaiiaʼi ki runga i taau ra atarau.