Salamo

37 AURAKA koe e kinokino i te aronga tuatua kino; auraka e vareae i tei rave i te ara ra;

2 Kare oki e roa kua motu mei te ngangaere ra, e mae atura mai te rakau rikiriki ruperupe ra.

3 E irinaki kia Iehova, ka rave ei i te meitaki; e noo koe i te enua i reira, e kare koe e kore i te angaiia mai.

4 Kia mataora oki koe ia Iehova; e nana e oronga mai i ta to ngakau e anoano ra.

5 E uri atu i to aerenga ki runga ia Iehova; e irinaki iaia, e nana e akatupu i te reira;

6 Nana e apai mai i to tuatua-tika mei te mārama, e taau tuatua-tau mei te avatea ra.

7 E akatupua ua ia Iehova, ma te tiaki marie atu iaia; aua koe e kinokino i te tangata i manuiaʼi tona aerenga, i te tangata i akatupu i te akakoroanga kino ra.

8 Akapakia te makitakita, e akaruke i te riri otooto: auraka toou ra kinokino kia tae roa ki te rave i te mea kino.

9 Ka riro oki te aronga i rave i te kino ra i te tipu keia; ko te aronga ra i tapapa ia Iehova ra, ko ratou te ka noo i te enua.

10 E roa poto ake, e kare ua te tangata kino ra, koia tika rai, ka akara koe i tona ngai, e kare ua!

11 Kareka te aronga maru ra, ka noo ïa i te enua, e ka rekareka ratou i te maata o te au ra.

12 Te akakoro ra te tangata kino i te kino i te tangata tuatua-tika, e te pakati ra tona nio iaia:

13 Te kata ra te Atu iaia: te kite ra e, te vaitata maira tona rā.

14 Kua unui te aronga kino i te koke; kua akamingi i te ana, kia inga te maru e te aronga ao ki raro, kia mate tei tiratiratu te aerenga.

15 Ka puta to ratou uaorai ngakau ki ta ratou koke, e ka aati uaia ta ratou ana.

16 Iti uaorai ta te tangata tuatua-tika ra, e ngari ïa i ta te aronga kino apinga, e kia maata roa atu.

17 Ka aati uaia oki te rima o te aronga kino; e tauturuia ra te aronga tuatua-tika e Iehova.

18 Te kite mairā Iehova i te au rā o te aronga apa kore, e ta ratou tuanga e tika ïa i te vai marie anga:

19 I te tuatau tumatetenga, kare ratou e akama: e i te tuatau onge ra, ka merengo ïa ratou.

20 Kareka te aronga kino, ka mate ïa! te au enemi o Iehova ra, ka tau ïa ki te tongaua punua mamoe ra, ka peke ïa ratou; mei te auai ka peke ei ratou.

21 E pati te tangata kino ra, e kare e akaoki mai, e takinga-meitaki ra to te aronga tuatua-tika, e e oronga ua mai;

22 Ko tei akameitakiia oki e ia ra, ka riro ia ratou te enua; kareka ko tei akakinoia e ia ra, ka tipu keia ïa.

23 Kua akatinamouia e Iehova te rua-tapuae o te tangata meitaki, e te mareka ra aia i tona aerenga.

24 Inga uaorai aia, kare e topa takiri roa ki raro, no te mea te mou mairā Iehova i tona rima.

25 I vai ou ana au, e teianei kua ruaine; kare ra au i kite i te tangata tuatua-tika i te akaruke angaia, e tona uanga i te pati aere anga i te kai.

26 Kare aia e akapaki i te takinga-meitaki, e te oronga ua i ta te pati ra; e te akameitakiia ra tona uanga.

27 E akaruke i te kino, ka rave i te meitaki; kia noo ua rai koe e tuatau ua atu.

28 E mea inangaro oki na Iehova te tuatua-tau, kare oki aia e akaruke i tona aronga tapu ra. E vai rai ratou e tuatau ua atu; kareka te uanga o te aronga kino ra, ka tipu keia ïa.

29 Ka riro te enua no te aronga tuatua-tika, ka noo tamou rai ratou i reira.

30 E tuatua karape tei te vaa o te tangata tuatua-tika ra, e tuatua-tau tei tona arero kia tuatua mai.

31 Te ture a tona Atua tei roto ïa i tona ngakau: kare oki tona vaevae e paeke.

32 Te moetapapa ra te tangata kino i te tangata tuatua-tika, te kimi ra i te ravenga e mate ei iaia.

33 Kare rā Iehova e vaoo ua atu iaia i tona rima, kare oki e akaapa iaia kia akavaia ra.

34 E tiaki atu ia Iehova, e akono tikai i tona arataa, e nana koe e akateitei kia rauka ia koe te enua: e ka kite koe i te mate o te aronga kino ra.

35 Kua kite au i te tangata kino i te riro anga ei akareionga, e te akamaata anga iaia uaorai mei te rakau maori ruperupe ra:

36 Ngaro rava atura ra aia, e i na, kare ua! koia tika rai, kimi atu rai au iaia, e kare rava aia i kitea.

37 E akairo ana i te apa kore, ka akara oki i te tiratiratu; e au oki te openga o te reira tangata;

38 Kareka te aronga tatipake ra, ka pou anake ïa; ko te openga o te aronga kino ra ko te tipu keia.

39 Te ora o te aronga tuatua-tika ra, no ko ïa ia Iehova ra, koia to ratou maroiroi i te tuatau tumatetenga.

40 E tauturu mai a Iehova, e ka akaora aia ia ratou: e akaora aia ia ratou i te aronga kino ra: e akaora aia ia ratou, no te mea te irinaki ra ratou iaia.