Iakobo

3 E AKU au taeake e, auraka kia maata ua i te akaorometua ia kotou io, kua kitea oki e ko tatou te ka akaapa maataia.

2 Te apa anake nei tatou i te au mea katoa e manganui. E kia kore tetai tangata e apa i te tuatua ra, e tangata meitaki rava aia, e tika iaia kia tapeka i te kopapa katoa ra.

3 I na, te tavaa nei tatou i te oroenua, kia akarongo mai ratou ia tatou; e te tioi nei tatou i to ratou kopapa katoa.

4 I na oki te au pai, mamaata ua rai ratou, e puia ua rai i te matangi viviki ra, te tioi aereia nei i te oe mea ngiti poepoe, i te au ngai katoa ta te akatere e anoano ra.

5 Koia katoa te arero nei e melo mea ngiti, e akatietie maata ra tana. Ka akara na i te maata o te vaie e ka i te ai mea ngiti ra!

6 E ai katoa te arero nei, e putunga no te au kino ravarai nei: e viivii te kopapa katoa nei i te arero, ko te tu ïa o tona vai ranga i roto i te au melo nei; i tutungiia aia i te ai o te po, e tutungi aia i te au mea katoatoa.

7 E vi anake te au puaka taae, e te manu, e te ovi, e te au mea o te tai ra, e kua ope takere ana i te akaviia e te tangata nei:

8 Kareka te arero nei, kare ua e tangata e vi ei te reira; e kino mate kore ïa, kua ki ïa i te kavangia.

9 Te akameitaki nei tatou i te Atua ra i to tatou Metua i te reira, e te akakino nei tatou i te tangata, i tei angaia i to te Atua ra tu, i te reira.

10 Te puroro nei no roto i taua vaa okotai nei, te akameitaki e te akakino. Auraka rava e tika te reira, e aku au taeake.

11 Te pupui nei aina te vai mangaro e te vai taitai no roto i te vaarua okotai ra?

12 E tika aina, e aku au taeake, i te suke kia akaua mai i te olive? e te vine oki kia akaua mai i te suke? e kore katoa e rauka te vai mangaro i te vaarua vai taitai.

13 Koai te tangata pakari e te kite i roto ia kotou na? kia na te akono meitaki aia i te akakite mai i tana angaanga ma te maru e te pakari tikai.

14 Te vai na te vareae maata e te māro i roto i to kotou ngakau, auraka e akatietie, auraka e tapepe pikikaa ua i te tuatua-mou.

15 Kare oki te reira pakari i to runga mai, no teianei ao ïa, no te tangata nei, e no te au demoni.

16 Te vai ra oki te vareae, e te tauetono, tei reira katoa te oripu ua e te au tuatua kikino katoa ra.

17 Kareka te pakari no runga maira, e mea iro koreia ïa, e mea au ïa, e te maru, e te akarongo ngoie, kua ki ïa i te aroa, e te takinga-meitaki, kare oki e akatu ke i te tangata, kare oki e pikikaa.

18 E ruruia oki te tuatua-tika ma te au na te aronga e akatupu i te tuatua au ra.