Maseli

14 TE patu ra te vaine pakari ra i tona ra are: kareka te neneva ra, te rave ra tona rima e vavaʼi ki raro.

2 Ko tei aere ma te tiratiratu ra, te mataku ra ïa ia Iehova: ko tei akamingi ra i tona aerenga, kua akavaavaa ïa iaia.

3 E rakau nengonengo tei te vaa o te neneva ra: te ora ra te aronga pakari i to ratou vaa.

4 Kare e puakatoro ra, kare ïa i repo te vairanga: tei te ririnui ra o te puakatoro ra te apinga maata.

5 Kare te kite tuatua-mou ra e pikikaa: kareka te kite pikikaa ra, ko te pikikaa anake ra ïa tana e tuatua.

6 Te kimi ra te akavaavaa i te pakari, e kare e kitea: e rauka ngoie ra te kite i te tangata akono.

7 Kitea atea atu koe i te aroaro o te tangata neneva ra, kare ra te vaa kite i te kitea angaia e koe ra.

8 Kia kite aia i tona aerenga, ko te pakari ïa o te tangata akono ra: ko te tuatua neneva ra a te aronga neneva ra, e pikikaa ïa.

9 Te kata ra te aronga neneva ra i te ara: tei i o ra te aronga tiratiratu ra te kiteia mai.

10 Te kite ra te ngakau i tona uaorai tumatetenga: kare oki e tika i tetai ke kia rave katoa mai i tona rekareka.

11 E vavaʼiia te are o te aronga kino: e ruperupe ra te puakapa o te aronga tiratiratu.

12 E ana rai te tangata i te arataa e, e mea tika i tona ra manako; ko te openga ra o taua arataa ra, ko te mate ïa.

13 Kata ua rai te tangata te taitaia ra te ngakau; e te openga o taua kata ra, ko te aue ïa.

14 E iu te ngakau akatitima ra i tana uaorai ravenga: e te tangata meitaki ra i tei tupu iaia uaorai.

15 Te akarongo ra te kite kore i te au tuatua katoa ra: te akara meitaki ra te tangata akono ra i tona takainga.

16 Te mataku ra te tangata pakari, e te akaruke ra i te kino: te rave nengonengo ua ra te neneva ra ma te mataku kore.

17 Te tangata rotoriri ra, e ravenga neneva tana: e te tangata i kimi i te ravenga kino ra, te ririia ra ïa.

18 Te rave nei te kite kore i te mea neneva ei tuanga: kareka te tangata akono ra, kua akakoronaia ïa ki te kite.

19 Te tupou nei te tangata kino ki mua i te aroaro o te tangata meitaki: e te aronga kino ra i te ngutupa o te aronga tuatua-tika.

20 Te ririia ra te ao e tona uaorai tangata tupu: e manganui ra te oa o te aronga apinga.

21 Ko tei akaviivii i tona ra tangata tupu, kua ara ïa: ko tei takinga-meitaki ra i te ao ra, e meitaki tona.

22 Kare ainei e tatipake tei kimi i te kino ra? Ko tei kimi ra i te mea meitaki ra, no ratou te aroa e te tuatua-mou.

23 E puapinga anake rai tei te au angaanga katoa ra: tei te tuatua vaa ua ra te putaua.

24 Te apinga te korona ïa o te aronga pakari: ko ta te neneva ra apinga, ko te neneva ïa.

25 E ora te vaerua i te kite tuatua-mou ra: kareka te kite pikikaa ra, e pikikaa tana e tuatua.

26 Tei te mataku i te Atua te manako matutu: e riro oki aia ei akapuanga no tana ra au tamariki.

27 Te mataku ia Iehova ra, e tumu ïa no te ora, e akaariu ke atu ei i te ereere o te mate.

28 Tei te maata o te tangata te ngateitei o te ariki: e tei te tangata kore to te ariki ïa mate.

29 Ko tei kore e riri vave ra, e kite maata tona: ko tei rapurapu ra te ngakau ra, kua akateitei ïa i te tuatua neneva.

30 Tei te maki kore o te ngakau, ko to te kopapa ïa ora: kareka te vareae, ko to te ivi ïa pe.

31 Ko tei takinga-kino i te ao ra, kua akakino ïa i Tei anga iaia: ko tei takinga-meitaki ra i te ao ra, kua akangateitei ïa iaia.

32 Te tuaru keia nei te tangata kino ma tona katoa ra kino: e irinaki anga ra to te tangata tuatua-tika i te mate anga ra.

33 Te vai ra te pakari ki roto i te ngakau o te tangata kite ra: e i rotopu i te aronga neneva ra, e mea kitea ua ïa.

34 E teitei te enua i te tuatua tika: tei te kino ra i akakinoiaʼi te tangata nei.

35 Te tavini pakari ra, te akaperepereia ra ïa e te ariki: ko tona riri ra, tei iaia ra tei akatupu i te akama ra.