Salamo

40 Tiaki marie atura au ia Iehova, e kua anga maira aia kiaku, e kua akarongo i toku kapiki anga.

2 Kua totō aia iaku ki vao i taua vaarua rikarika ra, no roto i te vari piripiri ra; e kua tuku aia i toku vaevae ki runga i te papa, e kua akatinamou oki i toku au aerenga.

3 E kua tuku mai aia i te imene ou ki roto i toku nei vaa, e imene akameitaki i to tatou Atua: e manganui te ka akara, e ka mataku iaia, e irinaki oki ratou ia Iehova.

4 E ao to te tangata tei akariro ia Iehova ei irinaki anga nona, e kare i akono i te nengonengo, e tei tatipake ki te tuatua pikikaa.

5 E manganui, e taku Atua, e Iehova, te au angaanga taka ke i raveia e koe ra, e toou ra manako ia matou nei: kare e tika kia tatau ua atu ki mua ia koe na; e akakite au, e tuatua oki au i te reira; kare ra e tika kia tatau atu i te maata.

6 Kare koe i inangaro i te atinga e te atinga kai kua akaputata ra koe i toku taringa: te atinga karakaratio e te tarangaara kare koe i umuumu mai.

7 Kua karanga atura au i reira, I na, te aere nei au! kua tataia te tuatua noku i roto i te pokaikai tuatua ra;

8 E mea tau naku te rave i toou anoano, e taku Atua; te vai nei oki taau ture tei roto i toku nei ngakau.

9 I tuatua ana au i te tuatua-tika i roto i te uipa anga maata; i na! kare rava toku vaa i muteki i te reira, kua kite oki koe, e Iehova.

10 Kare au i uuna i te tuatua-tika naau i roto i toku ngakau; kua akakite rai au i to tuatua-mou e te ora naau, kare au i uuna i to takinga-meitaki e to tuatua-mou, i te uipa anga maata ra.

11 Auraka koe e apai ke i to aroa ua iaku, e Iehova e; na to takinga-meitaki e to tuatua-mou e tiaki ua mairai iaku.

12 Kua pini takakoia oki au e te kino kare e ope kia tatau; kua rokoia au e taku nei au ara, kare e tika kia nānā ua atu au ki runga ra: kua maata roa ïa i te rauru o toku nei mimiti; i taitaia roaʼi toku ngakau i roto iaku nei.

13 Kia tika ia koe, e Iehova, e akaora iaku: kia ngakoikoi mai, e Iehova, e tauturu mai iaku.

14 Kia akama ratou, e kia raungara ratou katoa ra, ko tei kimi mai iaku nei kia mate: kia akaokiia ratou e kia aringaringa, tei inangaro i toku kino.

15 Ko te pou te ka rauka ia ratou ei tutaki i ta ratou mea akama, ko tei tuatua kiaku nei e, Eitoa! Eitoa!

16 Ko te aronga katoa ra i kimi ia koe ra, ka mataora ïa ratou, e ka rekareka ïa ia koe: e te aronga i inangaro i te ora naau ra, ka tuatua tamou ïa ratou e, Kia akamaataiā Iehova.

17 Ko au nei ra, kua tumatetenga au e te putaua; te manako mai nei ra te Atu iaku: ko koe toku tauturu e toku ora; auraka e tavare, e taku Atua.