Na Iehova e Paruru i te Aronga Tei Manakonako Iaia

‘Na toou aroa takinga meitaki e to tuatua-mou e paruru ua mairai iaku.’​—SALAMO 40:11, akaaite ia NW.

1. Eaa ta te Ariki ko Davida i pati kia Iehova, e akapeea e orongaia mai ei taua pati anga i teianei?

KUA ‘manakonako marie atura te Ariki ko Davida o Iseraela taito ia Iehova’ e kua akakeuia kia karanga e kua ‘anga maira a Iehova i tona taringa kiaia e te akarongo maira ki tana kapiki anga.’ (Salamo 40:1, akaaite ia NW.) Kua kite putuputu tikai aia e akapeea a Iehova i te paruru anga i te aronga te inangaro ra Iaia. No reira, i rauka ai ia Davida i te pati e kia paruru ua mairai a Iehova. (Salamo 40:11) Tei manakoia i rotopu i te au tane e te au vaine tiratiratu kua taputouia te ‘tuakaouanga meitaki rava,’ tei roto tikai a Davida i to Iehova manako i teianei e koia tetai ka rauka mai taua tutaki anga. (Ebera 11:32-35) Kua akapapuia mai i reira tona tuatau ki mua na roto i tetai mataara meitaki roa atu. Kua tataia tona ingoa ki roto i te “buka manakoanga” a Iehova.​—Malaki 3:16.

2. Akapeea te au Tuatua Tapu i te tauturu anga ia tatou kia marama e eaa te aite anga kia paruruia e Iehova?

² Noatu e te ora ra te aronga tiratiratu tei taikuia mai i roto ia Ebera pene 11 i mua ake ka aere mai ei a Iesu Karaiti ki te enua nei, kua akono rotai rai ratou ki ta Iesu i apii ana te karanga anga aia e: “Ko tei anoano ua ki tona ora, ka ngere ïa i te ora: ko te kore e anoano i tona ora i teianei ao, ei ora mutu kore tona ra.” (Ioane 12:25) No reira, te paruruia anga e Iehova kare te aite anga tikai e te paruruia ra mei te mamae me kore mei te takinga kinoanga. Te aite anga o te reira te paruruia ra tetai i roto i tetai mataara pae vaerua kia rauka oki i te akono i tetai turanga memeitaki i mua i te Atua.

3. Eaa te akapapu anga tei rauka mai ia tatou e kua paruru a Iehova ia Iesu Karaiti, e eaa tei tupu mai?

³ Kua riro mai a Iesu uaorai ko te tumu no te takinga kino anga kino e te akakino anga, e i te openga iora kua autu tona au enemi i te tuku anga iaia na roto i tetai mate kino tikai e te mamae. Inara, kare te aite anga o teia e kua aati te Atua i tana taputou i te paruru i te Mesia. (Isaia 42:1-6) To Iesu akatuakaouia anga i te toru o te ra i muri ake i tona matenga kino tikai te akapapu maira e kua akarongo mai a Iehova i tana kapiki anga​—mei to Iehova akarongo anga ia Davida. Na roto i te pau anga, kua oronga atu a Iehova i te maroiroi kia Iesu kia akono tamou i te tiratiratu. (Mataio 26:39) Kua paruruia i reira, kua rauka ia Iesu te oraanga mate kore i te au rangi ra, e ko te au tangata e mirioni ua atu tei akono i te akarongo i roto i te oko kua rauka mai te manakonako anga no te ora mutu kore.

4. Eaa te akapapu anga tei orongaia ki te au Kerititiano akatainuia e ki te “mamoe ke atu”?

⁴ Te papu nei ia tatou e te puareinga ua ra e te rauka ra ia Iehova i te paruru i tona au tavini i teianei mei tana rai i rave i te au tuatau o Davida e o Iesu. (Iakobo 1:17) Ka rauka i te toenga ua o te au taeake akatainuia a Iesu te vai nei rai i runga i te enua i te irinaki i te au taputou a Iehova: “Kia rauka te tuanga kino kore, e te viivii kore, e te mae kore . . . tei vaioia ki runga i te rangi na kotou, Ko tei tiakiia ïa e te mana o te Atua i te akarongo kia rauka te ora, i vave i te akakiteia mai kia tae ki te tuatau openga ra.” (1 Petero 1:4, 5) Ka rauka katoa i te “mamoe ke atu,” e manakonakoanga i te enua nei kia tuku i to ratou irinaki anga ki roto i te Atua e tana taputou na roto i te tata taramo: “Ko Iehova ta kotou e inangaro, e te aronga tapu katoa nona e: te [“paruru,” NW] nei a Iehova i te aronga pikikaa kore.”​—Ioane 10:16; Salamo 31:23.

Kua Paruruia i te Pae Vaerua

5, 6. (a) Akapeea te au tangata o te Atua i te paruruia anga i teia tuatau nei? (e) Eaa te pirianga te rauka ra i tei akatainuia ma Iehova, e akapeea ra te aronga e manakonakoanga tetai i te enua nei?

⁵ I teia au tuatau, kua rave a Iehova i te au akanoonooanga no te paruru anga i tona au tangata i roto i tetai mataara i te pae vaerua. Noatu e kare e paruru ana ia ratou mei te takinga kino me kore mei te au tu ngata e te au tumatetenga te matauia nei ki te oraanga, kua oronga tiratiratu aia i te tauturu kia ratou e te akamaroiroi anga te anoanoia ra kia paruru i to ratou pirianga vaitata kiaia. Te tango tei patu ratou i teia pirianga nei koia oki to ratou akarongo i roto i ta te Atua akanoo anga aroa o te oko. Kua akatainuia etai o teia au Kerititiano tiratiratu e te vaerua o te Atua kia riro mai ei aronga tutara ikiia ma Karaiti i te rangi. Kua tuatua tikaia mai ratou ei au tamariki vaerua na te Atua, e kua taangaangaia teia au tuatua kia ratou: “Ko tei akaora ia tatou i te mana o te poiri, e kua akaumu ia tatou ei roto i te basileia o tana Tamaiti akaperepere; Nona i raukaʼi to tatou ora, ko te ara i akakoreia, i tona toto.”​—Kolosa 1:13, 14.

⁶ Kua akapapuia ki te au mirioni ua atu o tetai au Kerititiano tiratiratu e ka puapinga katoaia ratou mei ta te Atua akanoonoo anga no te oko. Ka tatau tatou: “Kare oki te Tamaiti a te tangata i aere mai kia taviniia tona, ei tavini ra, e kia oronga atu aia i tona ora ei oko no te tangata e manganui.” (Mareko 10:45) Te akara ra taua au Kerititiano ki te tuatau ki mua i te rekareka anga i te tuatau tau kia rauka “te rangatira meitaki o te tamariki a te Atua ra.” (Roma 8:21) I taua taime ra, te akaperepere ra ratou i to ratou pirianga oa ki te Atua e te tauta tikai ra i te akaketaketa atu i taua pirianga.

7. Na roto i teea tu e paruru nei a Iehova i te oraanga pae vaerua o tona au tangata i teia tuatau?

⁷ Okotai mataara te paruru nei a Iehova i te oraanga pae vaerua o tona au tangata koia oki na te oronga anga mai i tetai porokaramu no te tereni anga tere ki mua. Te akatika ra teia ia ratou kia rauka mai oki te kite tika tikai o te tuatua mou. Kua oronga katoa mai a Iehova i te arataki anga tere ki mua na roto i tana Tuatua, tana akaaerenga, e tona vaerua tapu. I raro ake i te aratakianga a “te tavini akono meitaki e te pakari,” mei tetai pamiri i te pa enua takapini i te ao katoa te au tangata o te Atua. Te akono nei te pupu tavini i te au anoano pae vaerua e me te tau ra te au anoano i te pae kopapa katoa o te pamiri o te au tavini a Iehova​—noatu eaa to ratou enua me kore te turanga taoonga.​—Mataio 24:45.

8. Eaa te irinaki anga ta Iehova i tuku ki runga i tona aronga tapu ra, i te akapapu anga kia ratou i teaa?

⁸ Kare a Iehova i paruru ana ia Iesu i te pae kopapa mei te au takinga kino anga a tona au enemi, kare Aia e paruru i te au Kerititiano na te reira tu i teia tuatau. Inara kare teia e akakite nei i to te Atua mareka kore. Kare rava! Mari ra, te akakite maira te reira i tona irinaki anga e ka turu ratou i tona tua no te maroanga maata i te ao katoa e pini ua ake. (Iobu 1:8-12; Maseli 27:11) Kare roa a Iehova e akaruke i te aronga te tiratiratu ra kiaia, “mea inangaro oki na Iehova te tuatua-tau, kare oki aia e akaruke i tona aronga tapu ra. E vai rai ratou e tuatau ua atu.”​—Salamo 37:28.

Kua Paruruia e te Aroa Takinga Meitaki e te Tuatua Mou

9, 10. (a) Akapeea ta Iehova tuatua mou i te paruru anga i tona au tangata? (e) Akapeea te Pipiria i te akaari anga e te paruru ra a Iehova i tona aronga tapu na roto i tona aroa takinga meitaki?

⁹ I roto i tana pure tei tataia i roto ia Salamo 40, kua pati a Davida kia paruruia mai e te aroa takinga meitaki e te tuatua mou o Iehova. Te umuumu maira ta Iehova tuatua mou e tona aroa no te tuatau tika e kia akakite taka meitaki mai aia e eaa oki tana au turanga. Te aronga te akono ra i teia au turanga i roto i te turanga maata te paruruia ra mei te au taitaia, te au mataku anga, e te au manamanata te kiteaia ra e te aronga tei kopae i te reira. Ei akaraanga, ka rauka ia tatou i te paruru ia tatou uaorai e to tatou aronga akaperepere mei te au manamanata o te mamae ngakau me kopae tatou i te apinga akakona e te inu anga tau kore i te kava, te tu ainga tau kore, e te tu kino o te oraanga. E te aronga tei aere ke atu mei te arataa no te tuatua mou a Iehova​—mei ia Davida i tetai au taime ra​—e akapapu anga tetai e te vai nei rai te Atua ei “pipinianga” no te aronga rave kino tei tataraara. Ka rauka i taua aronga i te kapiki maata e: “Ka akaora koe iaku i te tumatetenga.” (Salamo 32:7) E akakiteanga puapinga teia i to te Atua aroa takinga meitaki!

¹⁰ Tetai akaraanga ke no te takinga meitaki tu-Atua koia oki te akamatakite maira te Atua ki tona au tavini kia takake mai mei teia ao kino, kare e roa atu ana ka takoreia e ia. Ka tatau tatou: “Auraka e anoano i teianei ao, e te au mea ravarai o teianei ao. Ko te tangata i anoano i teianei ao ra, kare te anoano o te Metua i roto iaia ra. Ko te au mea ravarai oki o teianei ao, ko te anoano tika kore o te kopapa nei, e te anoano tika kore o te mata nei, e te akatietie o te ora anga nei, kare ïa i to ko mai i te Metua ra, no teianei ao anake ïa.” Na te akarongo anga ki teia akamatakite anga e kia rave ma te tau, ka rauka ia tatou i te paruru tika tikai i to tatou oraanga e tuatau ua atu, no te mea te akakite maira te irava e: “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”​—1 Ioane 2:15-17.

Kua Paruruia e te Akono Meitaki, te Kite, e te Pakari

11, 12. E akataka mai e akapeea te akono meitaki, te kite, e te pakari i te paruru anga ia tatou.

¹¹ Ki te aronga te manako ra kia rauka to te Atua mareka anga, kua akauruia te tamaiti a Davida ko Solomona kia tata e: “Na te akono meitaki e tapapa ia koe i reira; e na te kite e tiaki ia koe.” Kua raurau katoa aia e: “E aruaru i te pakari . . . Auraka e akaruke iaia, e nana e tapapa ia koe: kia inangaro marie koe iaia, e nana koe e tiaki.”​—Maseli 2:11; 4:5, 6.

¹² Te taangaanga nei tatou i te akono meitaki me akamanako oonu tatou e eaa ta tatou e kite maira mei te Tuatua a te Atua. Te rave anga i te reira te tauturu maira ia tatou kia akatupu i te kite maata roa atu kia rauka oki ia tatou i te akanoo ma te tau i te au mea puapinga roa atu. E puapinga maata teia, no te mea kua kite te maata anga ia tatou​—penei e na roto i to tatou uaorai tupuanga​—e ka tupu mai te au manamanata me akanoo akakoroia me kore kare i akakoroia ana te au mea puapinga roa atu kare e tau ana. Te tuku maira to Satani ao ki mua ia tatou ei au akakoroanga ra i te au apinganui i te pae kopapa, te rongonui, e te mana, kareka ra te akamaroiroi maira a Iehova i te au mea puapinga maata roa atu i te pae vaerua. Te kore anga e tuku i to muri ake ei mea puapinga roa atu i rungao ake i to mua ake ra te akatupu ra i te mavete anga i te au ngutuare tangata, te akakore anga i te au pirianga oa, e te ngaro ke anga atu te au akakoroanga i te pae vaerua. Tei tupu mai, ka kokoti ua tetai tangata i te tika anga tangi tikai tei akakiteia mai na roto i te au tuatua a Iesu: “E eaa ta te tangata nei puapinga, kia rauka iaia to teianei ao katoatoa, e riro atura tona vaerua?” (Mareko 8:36) Te akakite maira te pakari e kia akarongo tatou ki ta Iesu ako anga: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.”​—Mataio 6:33.

Te Kino no te Manako ia Koe Uaorai

13, 14. Eaa te aiteanga e kia manako iaia uaorai, e eaa ra kare i te mea tau kia riro mei tera rai?

¹³ Te tu o te au tangata nei te manako ra ia ratou uaorai. Inara, me riro mai te au anoano e te au manako ia uaorai ko te mea maata atu i roto i te oraanga, e manamanata te ka tupu. No reira, kia paruru i to tatou pirianga oa kiaia ra, te apii maira a Iehova ia tatou kia kopae i te manako ia tatou uaorai. Te aite anga o teia tuatua “te manako anake ra i to tetai uaorai au inangaro, au anoano, me kore i te au manako.” Kare ainei e te akataka meitaki maira te reira i te au tangata e manganui i teia tuatau nei? Ma te puapinga maata, te akakite maira te Pipiria e i te “tuatau openga” o te akatere anga i te au mea kino o Satani ra, ka “riro mai te tangata nei ei akaperepere ia ratou uaorai,” me kore kua riro mai ei manako ia ratou uaorai.​—2 Timoteo 3:1, 2.

¹⁴ Te ariki ra te au Kerititiano i te pakari na te akono anga i te akauenga a te Pipiria kia manako atu i tetai ke, na te aroa anga ia ratou mei tetai e aroa ra iaia uaorai. (Luka 10:27; Philipi 2:4) Penei te manako ra te au tangata e kare teia e tau ana, inara e mea puapinga te reira me ka rekareka tatou i te au akaipoipoanga meitaki, te au pirianga ngutuare tangata mataora, e te au pirianga oa merengo anga. No reira, auraka rava tetai tavini mou o Iehova e akatika i te manako natura i roto iaia uaorai ko te mea maata roa atu i roto i tona oraanga i te akakore anga i te au manako puapinga maata rava. Te mea mua e te mea maata roa atu, te aite anga o teia te au manako anga o Iehova, te Atua tana e akamori ra.

15, 16. (a) Eaa ta te tu manako iaia uaorai ka taki atu, tei akatutuia mai e ai? (e) Te tika anga, eaa ta tetai tangata ka rave me viviki aia i te akaapa atu i tetai ke?

¹⁵ Ko tetai tu manako iaia uaorai ka taki atu i tetai ei tangata tu tuatua tika uaorai, tei rauka maira, i reira, i te akariro anga i tetai tangata kia manako papakitai e te akaparau. Te karanga ra te Pipiria ma te tau e: “Kare aau e kotoeanga, e tera ra tangata, e te tangata katoa e akaapa atu: i taua mea oki taau e akaapa i tetai ke ra, te akaapa katoa ra ia koe uaorai; ko koe oki e akaapa na, te rave katoa na koe i taua au mea ra.” (Roma 2:1; 14:4, 10) Kua irinaki tikai te au arataki akonoanga i to Iesu tuatau i roto i to ratou uaorai tu tuatua tika e kua manako ratou e kua tau i te akaapa atu ia Iesu e tana au pipi. Na te rave anga i te reira, kua akanoo ratou ia ratou uaorai ei au akava. Kare oki i kite i to ratou uaorai au tu apa, kua apai mai tikai ratou i te akaapa anga ki rungao ia ratou uaorai.

¹⁶ Kua tuku a Iuda iaia uaorai, te pipi a Iesu tei pikikaa iaia ra, kia riro mai ei tangata akaapa i tetai ke. I tetai atianga i Betania i te akatainu anga a Maria, te tuaine o Lazaro, ia Iesu ki te manongi kakara, kua patoi pakari a Iuda. Kua akakite aia i tona riri na te taumaro anga: “Eaa teianei manongi i kore ei i okoiaʼi i te denari kia toru ake te anere, apai atu ei na te putaua ra?” Inara kua akakite mai te papaanga i te akataka anga mai e: “I akapera atura aia, kare ra to te mea, e aroa aia i te putaua ra; no te mea ra, e keia aia, e nana i mou i te pute, e nana rai i apai i nga mea i tukuia ki roto ra.” (Ioane 12:1-6) Auraka roa tatou e riro mai mei ia Iuda me kore mei te au arataki akonoanga, te viviki ua ra i te akaapa i tetai ke, tei tupu mai kua akaapa ia ratou uaorai.

17. E akatutu mai i te kino maata i te akatietie uaorai me kore i te irinaki maata ia koe uaorai.

¹⁷ Ma te mii, ko etai au Kerititiano mua, noatu e kare ratou i te au keikeia mei ia Iuda rai, kua riro mai ei aronga akaparau, te riro anga mai ei akatietie uaorai. No ratou, kua tata a Iakobo: “Te rekareka na kotou i ta kotou tuatua akatietie.” E i reira kua tuatua mai aia: “E mea kino anake ïa taua rekareka na.” (Iakobo 4:16) E kaimoumou taime ua te akatietie no runga i ta tatou i rave ana me kore i ta tatou au akameitakianga i roto i te angaanga a Iehova. (Maseli 14:16) Te maara ra ia tatou eaa tei tupu ki te apotetoro ko Petero, i tetai atianga ra kua akatietie maata ma te irinaki uaorai e: “Kia maitu te tangata katoa ia koe, kare takiri au nei e maitu. . . . Mate ua atu au ia koe na, kare au e uuna ia koe.” Te tika anga, kare a tatou apinga e akaparau atu i roto ia tatou uaorai. Te au mea pouroa ta tatou e rekareka ua nei no to Iehova aroa takinga meitaki ua nei. Te akamaara anga i teia ka tapu ia tatou kia kore e akatietie.​—Mataio 26:33-35, 69-75.

18. Eaa to Iehova manako no runga i te ngakau parau?

¹⁸ “Ko te parau to te mate ra na mua, e te ngakau nengonengo ra, to te inga ïa na mua,” tei akakiteia mai kia tatou. No teaa ra? Kua pau mai a Iehova: “Te ngakau parau, e te akamaata . . . ko taku ïa e rikarika nei.” (Maseli 8:13; 16:18) No reira rai a Iehova i riri ei “i te ngakau parau o te ariki no Asura, e te akara anga nengonengo o tona mata”! (Isaia 10:12) Kua akautunga iora a Iehova iaia. Kare e roa atu ana ka akautunga katoa pouroaia rai to Satani ao, kapiti mai tona aronga arataki akaparau e te manako maata ia ratou uaorai, tei kiteaia e tei kitea koreia. Auraka rava tatou e akaata i te tu anoano uaorai o te au enemi o Iehova!

19. Na roto i teea tu i akaparau ei te au tangata o te Atua e inara kia akaaka ra?

¹⁹ E tumu anga katoa ta te au Kerititiano mou kia akaparau te riro anga mai ei au tavini no Iehova. (Ieremia 9:24) I taua taime rai, e tumu anga katoa to ratou kia vai akaaka ua. No teaa ra? No te mea “kua rave katoatoa oki i te ara, e kua ngere i te akameitaki a te Atua.” (Roma 3:23) No reira kia paruru i to tatou turanga ei au tavini no Iehova, kia aru tatou i te tu o te apotetoro ko Paulo, tei karanga e “i aere mai te Mesia ra ko Iesu i te ao nei, e akaora i te aronga ara,” e i reira kua tuatua aia e: “Ko au oki to ratou i maata.”​—1 Timoteo 1:15.

20. Akapeea a Iehova i te paruru anga i tona au tangata i teianei, e akapeea aia i te paruru anga ia ratou i te tuatau ki mua?

²⁰ No te mea e te tuku rekareka ra te au tangata o Iehova i to ratou au anoano ki muri ake kia rauka oki i te tuku i te au manako tu-Atua na mua ake, te akapapuia maira kia tatou e ka paruru ua rai a Iehova ia ratou i te pae vaerua. Te akapapu katoaia maira kia tatou e me tupu mai te mate maata, ka paruru a Iehova i tona au tangata kare i te pae vaerua ua mari katoa ra i te pae kopapa. Te tomo anga atu ki roto i te ao ou a te Atua, ka rauka ia ratou i te kapiki maata atu e: “I na, ko to tatou Atua teia; kua tapapa tatou kiaia, e ka akaora aia ia tatou: ko Iehova teia; ta tatou i tapapa na; e rekareka tatou, e kia pereperekavana oki i te ora nana.”​—Isaia 25:9.

Maara Ainei ia Koe?

• Akapeea te Ariki ko Davida raua ko Iesu Karaiti i te paruruia anga?

• Akapeea te au tangata o Iehova i te paruruia anga i teia tuatau?

• Eaa ra tatou ka kopae ei i te manako maata anga ia tatou uaorai?

• No teaa ra ka akaparau ei tatou e inara kia akaaka ra?

[Au Tutu i te kapi 9]

Akapeea a Iehova i te paruru anga ia Davida raua ko Iesu?

[Au Tutu i te kapi 10, 11]

Na roto i teea au mataara i paruruia ai te au tangata o te Atua i te pae vaerua i teia tuatau?

[Au Tutu i te kapi 12]

Noatu e te akaparau ra tatou i te tavini anga ia Iehova, kia vai akaaka ua rai tatou