Deuteronomi

28 KIA tika ia koe i te akarongo i te reo o to Atua ra o Iehova, i te rave, e te akono i te au akauenga ravarai nana, taku e akaue atu kia koe i teianei rā, e akateitei maata to Atua ra ko Iehova ia koe i reira i te pa enua ravarai o te ao nei:

2 E ka iri teia katoa nei au meitaki ki runga ia koe, e ka vai tika rai ia koe, kia akarongo koe i te reo o to Atua ra o Iehova.

3 E meitaki koe i roto i te oire, e meitaki koe i runga i te kainga.

4 E meitaki te uanga o to kopu, e tei tupu i toou ra enua, e ta to au puaka e anau ra; te maata anga o to au puakatoro, e te anana o to au mamoe.

5 E meitaki taau kete kai, e taau oinga faraoa.

6 E meitaki koe kia aere ki roto, e meitaki koe kia aere ki vao.

7 E to au enemi kia tu mai e rave ia koe, ka mate ratou ia Iehova ki mua i to mata ra: okotai o ratou ara kia aere mai e rave ia koe ra, e taki itu ra o ratou ara kia ati na mua ia koe ra.

8 Na Iehova e akaue i te meitaki naau ki roto i to au are apinga ra, e te au mea katoa taau e rave ra; e ka akameitaki aia ia koe ki runga i te enua ta to Atua ta Iehova e oronga mai noou ra.

9 Ka akatinamou a Iehova ia koe ei iti-tangata tapu nona uaorai, i tana oki i taputou mai kia koe ra, kia akono koe i te au akauenga a to Atua ra ko Iehova, e kia aere na tona ra au arataa.

10 E ka kite te te ao katoa nei e, kua tapaia koe i te ingoa o Iehova; e ka mataku ratou ia koe.

11 E na Iehova e akamaata rava i te au mea memeitaki ra ia koe, i te uanga o to kopu ra, e ta to au puaka e anau, e te tupu ki runga i ro kainga, i te enua ta Iehova i taputou ki to ai metua ra e, e oronga mai aia noou ra.

12 E ka eeu mai a Iehova i tona uipaanga apinga meitaki kia koe ra, koia te rangi, kia oronga mai aia i te ua i to enua i te tuatau tikai ra, e kia meitaki te angaanga tini a to rima ra: e ka oronga koe i te apinga ki te pa enua e manganui, kare ra koe e pati ua atu.

13 Ka akariro mai oki a Iehova ia koe ei upoko, kare i te iku: ka riro uaorai koe ki rungao, kare koe e riro ki raro; kia akarongo koe i te au akauenga a to Atua ra a Iehova, taku e akaue atu kia koe i teianei rā, kia akono e kia rave:

14 Auraka koe e tatipake ki te rima katau e ki te rima kaui, i te au tuatua katoa taku e akaue atu kia koe i teianei rā, i te aru anga, e te araara anga i te au atua ke ra.

15 Kia kore ra koe e akarongo i te reo o to Atua ra o Iehova: e kia kore e rave, e kia kore e akono i tana au akauenga ravarai, e tana au akonoanga, taku e akaue atu kia koe i teianei rā; ka iri mai teia katoa nei au kino ki runga ia koe, e ka vai rai ki runga ia koe na.

16 E kino koe i roto i te oire, e kino koe i runga i te kainga.

17 E kino te kete kai naau, e te oinga faraoa naau ra.

18 E kino te uanga o to kopu ra, e tei tupu i toou enua, te anaunga a to au puakatoro, e te anana a to au mamoe ra.

19 E kino koe kia aere mai ki roto, e kino koe kia aere ki vao.

20 Na Iehova e tono mai i te kino ki runga ia koe, te tumatetenga, e te mate, i te au mea ravarai ta to rima e opu atu e rave, kia pou koe, e mate vave iora koe. no te kino o taau ra au ravenga ko koe i akaruke iaku ra.

21 Ka tuku ma ia Iehova i ta maki-mate kia piri mai ki runga ia koe, kia pou takiri rava koe iaia i runga i te enua taau e aere e noo i reira.

22 Ka ta mai a Iehova ia koe ki te ane kai roto, e te tui, e te uruparupa, e te vera maata; e te marōkaua, e te veravera, e te pueka; e ka aru aere rai taua au mate ra ia koe e kia mate rave atu koe.

23 Ka riro te rangi i runga i to mimiti ra ei veo; e te enua i raro ake ia koe ra ei auri.

24 E ei one-pueu e te repo ta Iehova e tuku mai ki runga i to enua ei ua; ka topa mai te reira no roto i te reva ki runga ia koe, e kia mate rava atu koe.

25 Ka taia koe ki mua i to au enemi ia Iehova ra: e na te ara okotai koe kia aere e tamaki ia ratou, e taki itu ra oou ara i te ati anga na mua ia ratou; e ka akapueurikiriki keia koe ki te au basileia katoa o te ao nei.

26 Ka riro to kopapa ei kai na te au manu ravarai o te reva, e na te au puaka o te enua nei; e kare rava e tangata e îa atu.

27 Ka ta mai oki a Iehova ia koe ki te tona Aiphiti ra, e te toê tupu e te paka, e te une, kare oki koe e ora kia rapakau ra.

28 Ka ta mai a Iehova ia koe ki te neneva, e te matapo, e te ngakau poitirere ua:

29 Ka aa aere ua koe i te avatea, mei te matapo e aa aere ua i te poiri ra; e kare e manuia toou au aerenga: e ka akaaoia ra koe, e ka auinaia uaorai, i te au rā katoa nei, e kare rava e tangata e akaora ia koe.

30 Ka momoko koe i te vaine, e na tetai tangata ke e moe kiaia: ka akatu koe i te are, kare ra koe e noo ki roto: ka tanu koe i te kainga vine, kare ra koe e aaki i to reira vine ra.

31 Ka taia taau puakatoro ki mua i to mata, kare ra koe e kai i te reira: ka āruia taau asini i mua i to mata, e kare e akaokiia mai naau: ka apai uaia taau ra au mamoe na to au enemi, e kare rava e tangata e tiki e rave mai.

32 Ka kavea taau ra au tamaroa, e taau ra au tamaine, ki te tangata ke ke, akara ua atu ei to mata ma te aue i ratou e po ua atu te rā: kare ra toou rima e maroiroi kia akaora.

33 Te kai a to enua na, e te au angaanga ravarai aau ra, na tetai iti-tangata ïa kare i kiteia e koe na e kai; ko te tinai-mate anake te ka rauka ia koe, e te paîî, i te au rā katoa ra:

34 E ka nenevaia koe i ta to mata e akara ra, taau ka kite ra.

35 Ka ta mai a Iehova ia koe ki te tonarepa i to turi, e to vaevae, kare e ora kia rapakau ra, mei to tapuae mai, e tae ua atu ki to take mimiti ra.

36 Ka kave a Iehova ia koe, e to ariki katoa taau i akaariki ki rungao ia koe ra, ki te enua kare i kitea e koe e to ai metua katoa ra; ei reira koe ka araaraʼi i te au atu ke, i te rakau e te toka.

37 Ka riro oki koe ei vavaranga, ei amuamuanga, e ei tuatuaanga, i te pa enua ravarai ta Iehova e arataki ia koe na.

38 E ua maata taau e apai ki vao i te kainga, e ka iti ra taau e apai mai ki roto ra; ka pou ïa i te tāpaki.

39 Ka tanu koe i te kainga vine, e ka tope oki, kare ra koe e inu i te wina, kare oki e akiaki; na te anue ïa e kai.

40 E olive taau e pini ua ake te au tapere katoa oou ra, kare ra koe e pani ki te manongi; ka makaioreia oki to au olive ra.

41 E tamaroa taau e anau, e te tamaine, kare ra koe e meitaki ia ratou; ka riro oki ratou ei tuikaa.

42 Te au rakau katoa naau ra, e te au kai katoa a toou enua ra, ka pou ïa i te tāpaki.

43 Ko te tangata ke e noo i o ou ra ei runga ïa ia koe, ei runga ravao ra; e ei raro koe iaia, ei raro roa ra.

44 Ka pati koe iaia, kare ra aia e pati mai ia koe ra; koia te upoko, ko koe te iku.

45 Ka rokoia mai koe e teia katoa nei au kino, ka aru tikai ia koe, e ka piri rava kia koe, e kia mate rava atu koe ra: no te mea kare koe i akarongo i te reo o to Atua ra o Iehova, ma te akono i tana au akauenga, e tana au akonoanga, tana i akaue mai kia koe ra:

46 E ka vai tamou rai taua au kino nei ki runga ia koe, e ki runga katoa i toou uanga, ei akairo, e ei vavaranga.

47 No te mea kare koe i akamori i to Atua ra ia Iehova, ma te pereperekavana, e ma te rekareka o te ngakau ra, i te maata oki o te au mea katoa ra;

48 E teianei, ei tavini koe no toou ra au enemi, ta Iehova e tono mai e rave ia koe ra, ma te pongi, e te kaki vai, e te putaua, e te ngere i te au mea katoa ra: ka tuku oki aia i te zugo auri ki runga i to kaki, e kia mate rava atu koe iaia.

49 Ka arataki mai a Iehova i tetai enua mamao mei te openga mai o te enua ra, mei te rere aeto ra te viviki anga, ei rave ia koe: e enua kare koe e kite i tona reo;

50 E enua mata taae ra, kare e akono mai i te tangata ruaine, kare oki e akaperepere i te tamariki ou:

51 E ka kai aia i ta to au puaka i anau, e te kai a to enua na, e kia pou rava atu koe: kare aia e akatoe i te sitona, te wina, e te inu, naau ra; e ta to au puakatoro i anau, e ta to au anana mamoe ra, e kia pou rava atu koe iaia.

52 E akapini aia ia koe ki roto i toou au oire ravarai, e kia ngaoro to au patu teitei e te ketaketa, taau i irinaki ra, ki raro, e pini ua ake to enua: ka akapini oki aia ia koe i to au oire ravarai, e pini ua ake to enua katoa ta to Atua ta Iehova i oronga mai noou ra.

53 Ka kai oki koe i ta toou uaorai kopapa i anau, i to au tamariki tamaroa, e to au tamaine, ta to Atua ta Iehova i oronga mai noou ra, i taua tamaki ra, e te mate, i ta to au enemi e akatumatetenga mai ia koe ra:

54 E te tangata akamārū ua, e te apikepike i o ou ra, ka oronga kino aia ki tona uaorai taeake, e ki te vaine e moe i tona keke, e ki tana au tamariki tei toe iaia, i te kai ra.

55 Kare aia e oronga i ta ratou vaʼi i taua au tamariki nana, tana e kai ra: no te mea kare ana kai i toe i taua tamaki ra, e taua tumatetenga noou ra, e te mate i to au enemi i to au oire katoa ra.

56 E te vaine akamārū ua e te apikepike i o ou ra, kare i takai tona vaevae ki raro i te one, i te apikepike e te akamārū ua, ka oronga kino ïa ki tana uaorai tane e moe iaia ra, e tana uaorai tamaiti, e tana uaorai tamaine,

57 E ki tana tamaiti ou no roto iaia uaorai, e ki tana uaorai tamariki tana tikai i anau ra; tana e kai poiri ua i taua tamaki ra, no te mea kare rava e mea toe i taua tumatetenga ra e te mate, i to au enemi, i to au oire ra.

58 Kia kore koe e akono, e kia kore e rave i te au tuatua katoa i teianei ture i tataia i roto i teianei buka, kia mataku koe i taua ingoa mataku e te kakā ra, KO TO ATUA RA KO IEHOVA;

59 E akariro a Iehova i toou ra au mate, e te au mate o toou uanga, ei mea vavaria i reira; e mate maata, e te vairanga roa; e maki maata e te vairanga roa.

60 Ka apai oki aia i te au maki katoa o Aiphiti, i taau i mataku ra, ki runga ia koe; e ka piri rava te reira ki runga ia koe.

61 E te au maki katoa, e te au mate katoa kare rai i tataia i roto i teianei buka ture, ka apai rai a Iehova i te reira ki runga ia koe, e kia mate rava atu koe ra.

62 E tokoia ua ake kotou e akatoeia kia tatau ra, ko kotou mei te etu o te rangi ra i te maata i muatangana ra; no te mea kare koe i akarongo i te reo o to Atua ra o Iehova.

63 E mei ia Iehova i rekareka ia kotou i te takinga-meitaki anga ia kotou, e te akamaata ra ia kotou ra, ka riro katoa a Iehova i te rekareka ia kotou i te tainga ia kotou, e te akapou anga ia kotou; ka kika takiriia koe i te enua taau e aere e noo i reira.

64 Ka akapueurikiriki ke a Iehova ia koe i o te au etene katoa ra, mei tetai openga mai o te enua ra e tae ua atu ki tetai ra; e ei reira koe ka araaraʼi i te au atua ke, i te rakau e te toka, ko tei kore i kiteia e koe e to ai metua ra.

65 Kare oki oou akaeaanga e rauka i taua pa enua ra, kare oki toou takainga vaevae e rauka; ka tuku mairā Iehova i te ngakau ngarepurepu kia koe ra i reira, e te mata poiri, e te ngakau iriea:

66 E kare e kitea toou ora; ka mataku ua koe i te po e te ao, kare oki koe e kite i toou ora:

67 Kia popongi ra, ei reira koe ka tuatuaʼi e, Naringa e aiai e! e kia aiai ra oki ka karangaʼi koe e, Naringa e popongi e! no te ngarangara o toou ngakau taau e ngarangara ra, e no te au mea ta to mata e akara ra.

68 Ka akaoki akaou a Iehova ia koe ki Aiphiti ki runga i te pai, (kareka te arataa taku i karanga atu kia koe ra, kare koe e kite akaou i te reira,) e ei reira kotou e okoiaʼi ki to kotou au enemi, ei tavini tane e ei tavini vaine, kare ua atura te tangata ei oko mai.