Galatia

3 KO kotou, e to Galatia i te manako kore e, naai kotou i pikikaa io na, i kore ei kotou i akono i te tuatua-mou, tei akakite uaiā Iesu Mesia, mei te mea i akasatauroia ki mua i to kotou mata, i rotopu ia kotou?

2 Ko teia taku e ui atu kia kotou na, I rauka aina te Vaerua ia kotou i te angaanga a te ture, ei te akono akarongo aina?

3 Ko te tu aina ïa o to kotou manako kore? ko tei akamata i te Vaerua, ei ta te kopapa aina e meitaki ravaʼi i tenana?

4 E mea puapinga kore ainei to kotou au mate e manganui? kare paa ei mea puapinga kore.

5 Ko tei tuku i ta te Vaerua ia kotou, ko tei rave i te au ravenga taka ke i rotopu ia kotou na, no te akono anga aina o te ture, e no te akono akarongo aina?

6 Mei ia Aberahama ra, i akarongo na aia i te Atua, e akonoia atura te reira ei tuatua-tika nana.

7 Ko te tangata ravarai e akarongo ra, e tamariki ïa na Aberahama, kia kite mai kotou.

8 Kua akakite atea mai ana te tuatua i tataia ra e, e e akatikaia te au etene e te Atua i te akarongo, i akakite ei i te evangelia kia Aberahama i muatangana, ka na ko ei ra e, “Ei ia koe na e meitaki ei te pa enua ravarai.”

9 Koia tikai ïa, ko te aronga e akarongo nei, kua meitaki ïa ratou e Aberahama katoa i akarongo ra.

10 Ko te tangata ravarai tei runga i te angaanga a te ture ra, kua taumaaia ïa: kua tataia oki e, “Kia taumaaia te aronga ravarai te kore e tamou i te rave i te au mea katoa i tataia i roto i te buka o te ture.”

11 I te tuatua ra e, kare rava e tangata tuatua-tika ki mua i te aroaro o te Atua i te ture, kua kitea tikaia ïa: no te mea, “Ko te tangata tuatua-tika i te akarongo ra, e ora ïa.”

12 Kare oki to te akarongo i ta te ture ra: “Ko te tangata ra e rave i taua au mea ra, ka ora ïa i te reira.”

13 Kua oti oki tatou i te oko ravaia e te Mesia, kia ora tatou i te taumaa a te ture, i te mea kua riro aia uaorai ei taumaa no tatou: (Kua tataia oki, “Ko tei riia ki runga i te rakau ra, kua taumaa anakeia ra:”

14 Kia riro te meitaki a Aberahama ki runga i te pa enua etene ia Iesu Mesia ra; kia rauka ia tatou te Vaerua i tuatuaia maira i te akarongo.

15 E te au taeake ra, te tuatua nei au i ta te tangata nei akonoanga; ko te koreromotu katoa a te tangata nei, kia tinamouia ra, kare ua e tangata e akakore, kare oki e paʼu atu i tetai ngai.

16 E teianei ko Aberahama e tona uanga tei tuatuaia mai i taua meitaki ra. Kare aia i na ko e, I te au uanga, mei te mea e e manganui; i na ko ra e, I toou uanga, mei te mea e okotai ua, koia oki te Mesia.

17 Teia oki taku tuatua, ko taua koreromotu i tinamouia e te Atua i te Mesia i muatangana ra, kare e tika i te ture, ka a akera anere e toru ngauru mataiti i tukuia mai ei, kia akakore, ka riro ei tei tuatuaia maira ei mea puapinga kore.

18 Naringa oki no te ture i raukaʼi te tuanga, kare atura ïa i to tei tuatuaia maira: kareka ta Aberahama tuanga, i oronga uaia mai ïa e te Atua no tei tuatuaia maira.

19 No te aa oki taua ture nei? No te maata ua o te ara i paʼuia mai ei, e kia tae mai te uanga nona taua tuatua i tuatuaia maira; i tukuia maira te ture na roto i te tupati angela i te rima o te arai ra.

20 E teianei, kare te arai i to te pae okotai, okotai ra te Atua.

21 Riro atura aina te ture ei mea tau kore i tei tuatuaia mai e te Atua ra? Auraka rava ïa: naringa ei ture e raukaʼi te ora tei tukuia maira, e riro rai no te ture te tuatua-tika i reira.

22 Kua mopani ravaia ra te tangata ravarai e te tuatua i tataia nei ki roto i te ara; kia orongaia mai i te aronga akarongo tei tuatuaia mai e, tei te akarongo ia Iesu Mesia.

23 Kareka i muatangana, ou te akarongo i tae mai ei i tapekaia ana tatou, i mopaniia ki roto i te ture, e kia tae ki te akarongo e akakiteia mai a muri atu.

24 I riro ei oki te ture ra ei arataki ia tatou ki te Mesia, kia akatikaia tatou i te akarongo.

25 Kia riro maira te akarongo nei, kare atura tatou i vaioia ki raro ake i te arataki.

26 E tamariki anake oki kotou na te Atua i te akarongo ia Iesu Mesia.

27 Ko kotou ravarai oki i bapetizoia i roto i te Mesia ra, kua tuku ïa i ta te Mesia i runga ia kotou.

28 Kare e ngati Iuda, kare e Eleni, kare e tuikaa, kare e rangatira, kare e tane, kare e vaine; okotai rai oki kotou katoa i roto i te Mesia ra ia Iesu.

29 E no te Mesia oki kotou ra, e uanga ïa kotou no Aberahama, e e tangata kainga ïa i tei tuatuaia maira.