Angaanga

14 AERE katoa atura raua ki roto i te sunago o te ngati Iuda i Ikonio, e no ta raua tuatua i akarongo ei to te ngati Iuda e te Eleni katoa e manganui.

2 To te ngati Iuda ra, kare i akarongo ra, taoriori atura ratou i te au etene, e akaki atura oki i to ratou ngakau ki te riri i te au taeake ra.

3 E noo anga roa to raua i reira i te tuatua anga i te tuatua a te Atu ma te mataku kore, e kua akatika maira aia i te tuatua aroa ua nana ra, e kua tuku maira i te au akairo e te au mea umere na to raua rima e rave ra.

4 Kua vee iora taua aronga maata o te oire ra; no te ngati Iuda tetai pae, no nga aposetolo tetai pae.

5 Kia timata ra te au etene, e te ngati Iuda katoa, e to ratou au tutara, i te takinga-kino mai, e te peî mai ia raua ki te toka,

6 Kite akera raua, rere atura ki Lusetera e ki Derebe, i nga oire i Lukaonia ra, e ki te pa enua katoa i reirao:

7 E kua akakite atura raua i te evangelia i reira.

8 Te noo maira tetai tangata i Lusetera ra, e vaevae parukaua tona, e pirikoki mei te kopu mai o tona metua vaine, kare rai aia i aere ana:

9 Te akarongo maira taua tangata ra ia Paulo i te tuatua anga mai: kua tiroi matariki aturā Paulo iaia, kite akera aia e, e akarongo tona ka tika kia akaora atu,

10 Kua na ko atura ma te reo maata, Ka tu ua mai to vaevae ki runga. Kua rere ua maira aia ki runga, aaere iora.

11 Kite akera taua urupu maata ra i ta Paulo i rave ra, kua akateitei akera to ratou reo i te tuatua Lukaonia, na ko akera, Kua eke mai te au atua ki raro i o tatou nei mei te tangata ra te tu.

12 E tapa akera ratou kia Banaba ia Dia; e ko Paulo ra ko Ereme ïa, no te mea koia te tangata e tuatua.

13 E kua putotō maira te taunga a Dia, tei muao i to ratou oire tona marae, i te puakatoro ma te ei katoa i te ngutupa oire, inangaro akera e e apai atinga, koia e te tangata katoa.

14 Kite akera nga aposetolo ra ko Banaba e Paulo, aae atura raua i to raua kakau, ooro atura ki roto i taua aronga tangata ra, kapiki atura,

15 Na ko atura, E tāma e, eaa kotou i pera mai ei? e tangata katoa oki maua, mei ia kotou katoa na te tu, e te ako atu nei oki i te evangelia ia kotou, kia ariu ke atu kotou i taua au mea puapinga kore nei ki te Atua ora ra, ko tei anga i te rangi, e te enua, e te tai, e te apinga tini i roto ra:

16 Ko tei vaoo ua i te pa enua ravarai i muatangana, kia akono ua ana ratou i ta ratou uaorai tuatua.

17 Kare ra aia i ngere i te akakite iaia uaorai, koia i takinga-meitaki mai, i te oronga anga mai i te ua no runga i te rangi, e te tuatau mou, e te akaki anga mai i to tatou ngakau ki te kai ma te rekareka.

18 E kare rai i tuku vave mai ia raua taua aronga maata ra i taua tuatua ra, i te apai mai i te atinga kia raua ra.

19 Kua aere maira te ngati Iuda mei Anetioka mai e Ikonio, akanauru atura i taua aronga ra, peîia iorā Paulo ki te toka, e kika atura ratou iaia ki vao i taua oire ra, tuatua akera, kua mate takiri rava.

20 Kia takako maira te au pipi iaia ra, kua tu ua maira aia ki runga, e kua aere maira ki roto i te oire: e ao akera, ririro atura raua ko Banaba ki Derebe.

21 E kia tuatua raua i te evangelia i te reira oire, e manganui oki tei apiiia, ooki akaou maira raua ki Lusetera, e Ikonio, e ki Anetioka,

22 I te akamaroiroi anga i te ngakau o te au pipi, e te ako anga atu ia ratou, kia mou piri tikai ratou i te akarongo, e kia na roto tatou i te mate maata e tikaʼi ka o atu ei ki te basileia o te Atua ra.

23 E kia akonoia e raua te aronga orometua no ratou i te au ekalesia katoa ma te pure e te akakoreanga i te kai, kua tuku atura raua ia ratou ki te Atu, i ta ratou i akarongo ra.

24 E topa maira Pisidia ia raua, tae atura raua ki Pamephulia.

25 E kia tuatua raua i te tuatua i Perege, aere atura raua ki Atalia:

26 E mei reira oki, ano maira raua ki Anetioka, i te ngai i tukuiaʼi raua ki te aroa ua o te Atua, i te angaanga i oti ia raua ra.

27 E tae maira raua, kua akaputu maira raua i te ekalesia, e kua akakite atura i ta te Atua i rave ia raua ra, e kua kiriti aia i te ngutupa akarongo anga no te etene.

28 E roa kitu to raua noo anga i reira e te au pipi katoa ra.