Angaanga

27 TIKA marie akera e, e ano matou ki Itale, kua tuku atura ratou ia Paulo, e ko e tokotai puke tangata ke i tapekaia ra, ki tetai rangatira anere no te pupu o Auguso, ko Iulio te ingoa.

2 Aere atura matou ki runga i tetai pai Aderamitio, kua tuku atura, i maara matou e na te pae enua i Asia ra te akatere; ko matou katoa ko Arisetareko i Tesalonia i Makedonia ra.

3 E ao akera, tae atura matou ki Sidona. Kua takinga-meitaki mairā Iulio ia Paulo, kua tuku ua atura iaia kia aere ua ana i tona au oa, kia akapumaana mai ratou iaia.

4 E mei reira oki, tuku atura matou, ano atura na te pae i Kupero, no te mea e matangi ke.

5 Kua tere atura matou na te tua i Kilikia e Pamephulia, e tae atura matou ki Mura i Lukia ra.

6 Kite atura te rangatira anere i tetai pai no Alekanederea, i reira, te ano atura ki Itale; kua tuku akera aia ia matou ki rungao i taua pai ra.

7 Tere rikiriki marie ua atura matou e manganui te rā, kare ra matou i aite ki Kenido i te matangi kino, tere atura matou na te pae i Kereta i vaitata ki Salimone;

8 Me kore rava e topa ia matou taua ārō ra, tae atura matou ki tetai ngai, ko te Tutauanga Meitaki te ingoa; tei vaitata te oire ra ko Lasea.

9 No te mea kua roa akera matou, matakutaku akera matou kia akatere, kua oti akera oki te akakoreanga kai, kua ako aturā Paulo,

10 Na ko atura kia ratou, E tāma, ka kino teianei tere, e te pou maata o te apinga ma te pai, kare ra te reira anake ra, ka vaitata katoa ra tatou i te mate, kua kite au.

11 Maata atura ta te rangatira anere akono i ta te atu o te pai e ta te pailati, i ta Paulo i tuatua maira.

12 E no te mea kare e meitaki te reira tutauanga ki noo i te paroro, kua karanga iora te maata e ano, peneiake ko te tae ua atu ki Phenika, ki tetai tutauanga i Kereta, i ariu tika ki apatonga e ki apatokerau, ei reira noo ei i taua paroro ra.

13 E kia angiangi maira te matangi ra e marangai, karanga akera ratou e, kua rauka to ratou inangaro, kua tuku atura, tere atura na te pae i Kereta ra.

14 Kare akera i roa rava, kua tupu maira tetai matangi uriia, Eurokalido te ingoa.

15 E mānu ke atura te pai i te viviki o taua matangi ra, kare atura e tika kia akatika ra ki runga i te tumu matangi, tuku ua atura matou kia mānu ua ana.

16 E tere atura matou i vaitata i tetai enua, ko Kalauda te ingoa, e me kore i rauka te boti ia matou:

17 E oti akera te reira i te utiia e ratou ki runga, kimi atura ratou i te ravenga, apai atura i te taura na raro ake i te takere o te pai; tuku iora i te rā, i mataku ratou ko te tiria aea ki runga i te one, mānu ua iora.

18 E ao akera, uri atura ratou i te apinga ki raro i te tai, no te mea kua maata to matou takauriuri anga i taua uriia ra:

19 E tae akera ki te po toru, na to matou uaorai rima i uri ki raro i te tai i te apinga tikai o te pai.

20 E manganui akera te rā, kare i kitea te rā e te etu, te maata ua maira oki te uriia, kare rava atura o matou manako ora toe.

21 E roa akera, kare matou i kai i te kai, kua tu akerā Paulo i rotopu ia ratou, kua karanga atura, E akarongo tika mai kotou iaku, e tāma, eiaa tika e tuku mai, kua oti i Kereta ra, i raukaʼi teianei kino e teianei pou.

22 Teia ra taku tuatua kia kotou, e akamaroiroi i teianei: kare rava tetai o kotou nei e mate, mari ra ko te pai.

23 Inapo oki i tu mai ei i vaitata kiaku tetai angela a te Atua, nona au nei, e taku e akamori nei,

24 I te na ko anga mai e, Eiaa e mataku, e Paulo; e tu koe i mua i te aroaro o Kaisara: e i na oki, kua oronga mai te Atua i te aronga e ano katoa i te tere nei noou.

25 E teianei, e tāma, e akamaroiroi: e akarongo oki au i te Atua e, koia tika rai tana i tuatua mai kiaku nei.

26 Kia tiria ra tatou ki runga i tetai enua e tikaʼi.

27 E tae akera ki te ngauru ma a o te po, te takanimonimo aere uaia ra matou i Aderia, kua maara akera te aonga pai te vaitata maira tetai enua ia ratou i te turuaipo;

28 Kua akatongā iora, kite atura e, e rua ngauru anga te roa: tere atura e vaitata iti atu, kua akatongā akaou iora, raungauru ïa roa e rima ara.

29 E mataku akera ratou ko te kake aea ki runga i te kaoa, kua tuku atura ratou i te tutau e a katoa ki te kotoe, te inangaro ra ratou kia ao.

30 Te araara mamao ra te aonga pai e aere e akaruke mai i taua pai ra, tukuia iora te boti ki raro i te tai, mei te mea e, e apai ratou i te tutau ki mua;

31 Kua karanga aturā Paulo ki te rangatira anere e te au vaeau, Kia kore teianei aronga e noo i runga i te pai nei, kare kotou e ora.

32 Kua kokoti ua akera te au vaeau i te taura o te boti, kua tuku atura kia mānu ua ana.

33 E te tapapa ua ra ratou i te akirata, kua ako aturā Paulo ia ratou ravarai e kai i te kai, na ko atura, Ko te ngauru ma a teia o to kotou rā i te noo ua anga kare ua i kaikai.

34 E teianei, teia taku tuatua kia kotou, e kai i te manga: e oraʼi oki kotou: kare rava oki tetai io rauru o to kotou na mimiti e topa.

35 E kia pera atura aia i te tuatua anga atu, kua rave akera aia i te manga, kua akameitaki atura i te Atua i mua ia ratou ravarai: kua vaʼi iora, e kai iora.

36 Mareka rava akera ratou katoa, e kai katoa iora i te manga.

37 E rua anere e itu ngauru anga e ono ara matou ki runga i taua pai ra.

38 E kai iora ratou, e merengo akera, kua uri atura ratou i te sitona ki raro i te tai kia māmā te pai.

39 E ao akera, kare ratou i kite i taua enua ra, akara atura ra ratou i tetai ava ma te one, manako iora ratou e, e o te pai kia na reira i te akauru atu.

40 E uti akera ratou i nga tutau e maranga akera ki runga, kua tatara iora i te taura tapeka oe, kua tuku ua atura; uti akera te kie maata kia ki i te matangi, tere tika atura ki uta.

41 E tae atura ki te ngai ripainga, akaneke atura ratou i te pai ki runga i te papaku; mou piriakita atura te putaiu, kare rava i ngaueue, kareka te kotoe, ngaa atura ïa i te rutunga i te ngaru.

42 Kua tuatua iora te au vaeau e ta i te au tangata i tapekaia ra; ko te kau aea atu tetai aronga, ka ora aea.

43 Kua tāpu atura ra te rangatira anere ia ratou, i inangaro aia i te akaora ia Paulo; kua akaue atura i te aronga e kite i te kau ra, e rere ana ratou ki raro i te tai ka kau atu ei ki uta:

44 E te aronga i toe ra, i na runga tetai pae i te tapaanga rakau, e tetai pae na runga i te vavaanga pai. E ora anake atura ratou ki uta kare i toe.