Ieremia

27 I TE akamataanga o te au o Zedekia, te tamaiti a Iosia, ariki no Iuda, i tae mai ei teianei tuatua kia Ieremia, no ko ia Iehova ra, na ko maira.

2 Te na ko mairā Iehova kiaku, Ka anga koe i tetai ruru, e tetai au zugo, ka momono ei i te reira ki runga i to kaki na.

3 Ka akau atu ei i te reira ki te ariki no Edoma, e te ariki no Moabi, e te ariki o te au tamariki a Amona, e te ariki no Turia, e te ariki no Sidona, i te rima o te au karere i aere mai ki Ierusalema nei, ki te ariki o Iuda, kia Zedekia ra.

4 E poroaki atu koe ia ratou kia tuatua ki to ratou ra au pu, Te na ko mairā Iehova Sabaota ra, te Atua no Iseraela; E na ko atu kotou i to kotou ra au pu;

5 Naku i anga te enua nei, te tangata, e te puaka katoa ki runga i te enua ra, i te mana maata noku, e toku rima i akatikaia ra; e naku i oronga te reira ki tei tau i toku nei mata.

6 E teianei, kua orongaia e au teia katoa nei au enua ki te rima o toku tavini, ki te ariki o Babulonia, ia Nebukanesa, e te au puaka momoavao katoa o te enua, tei orongaia e au ei apinga nana.

7 E ka tavini te au enua katoa iaia, e tana tamaiti, e tana atu oki tamaiti, e tae ua atu ki te tuatau no tona uaorai enua, ei reira aia e taaoiaʼi e te au enua e manganui, e te au ariki nunui ra.

8 E riro ïa, ko te enua e te basileia e kore e akarongo i te ariki o Babulonia, ia Nebukanesa ra, e kare e pa to ratou kaki ki te zugo o te ariki o Babulonia, e tutaki atu au i te reira enua, i te koke, e te onge, e te maki-mate, te tuatua mairā Iehova, e pou roa akera ratou iaku i tona rima.

9 E tenana, auraka kotou e akarongo i ta kotou au peroveta, e ta kotou au tauraatua, e ta kotou aronga moe, e ta kotou au akara etu, e ta kotou au purepure, ko tei tuatua ia kotou, i te na ko anga e, Auraka kotou e tavini atu ki te ariki o Babulonia:

10 No te mea e pikikaa ta ratou i totou mai ia kotou na, kia taka ke roa kotou i to kotou enua, e kia tuaru keia kotou e au ra, e kia mate atu kotou.

11 Ko te enua ra e tuku mai i tona kaki ki raro ake i te zugo o te ariki o Babulonia, e kua tavini oki iaia, e vaoo uaia rai ïa e au ki to tona uaorai enua, te tuatua mairā Iehova, e nana e tanu, e nana e noo i reira.

12 Kua karanga atura oki au ki te ariki o Iuda ia Zedekia, i taua au tuatua katoa nei, na ko atura, Tuku mai na i to kotou kaki ki te zugo o te ariki o Babulonia, i te tavini anga atu iaia, e tona ra au tangata, kia ora.

13 Eaa kotou i anoano ei ki te mate, ko koe ma to au tangata katoa ra, i te koke, e te onge, e te maki-mate ra, mei ta Iehova oki i karanga i te enua e kore e tavini atu ki te ariki o Babulonia?

14 Auraka oki kotou e akarongo i te tuatua a te au peroveta i tuatua mai kia kotou e, tei na ko mai e, Auraka kotou e tavini atu ki te ariki no Babulonia; pikikaa ta ratou i totou mai kia kotou na.

15 Kare oki au i tono ia ratou, te tuatua mairā Iehova; te totou pikikaa ua ra ratou i toku nei ingoa, kia tuaru keia atu kotou e au, e kia mate atu kotou, ko kotou, e taua au peroveta i totou mai kia kotou na.

16 Kua karanga atura oki au ki te kau taunga, e ki taua au tangata katoa ra, na ko atura, Te na ko mairā Iehova, Auraka e akarongo atu i te tuatua a ta kotou au peroveta, tei totou atu kia kotou ra, i te na ko anga atu e, I na, te au āriki o te are o Iehova e akaoki vaveia mai ïa i tenana, mei Babulonia mai: pikikaa oki ta ratou i totou atu kia kotou.

17 Auraka e akarongo atu ia ratou: ka tavini atu ki te ariki o Babulonia, kia ora: eaa oki teianei oire e akataneaiaʼi?

18 E peroveta ratou ra, e tei ia ratou te tuatua a Iehova ra; e pure ratou i tenana kia Iehova Sabaota ra, kia kore e apaiia te au āriki i toe i roto i te are o Iehova, e i roto i te are o te ariki o Iuda, e i roto katoa i Ierusalema, ki Babulonia.

19 Te na ko maira oki a Iehova Sabaota ra, i te au pou ra, e te āriki vai maata ra, e te au turanga ra, e te toenga o te au āriki ra, i vaooia ki roto i te oire nei,

20 Tei kore i apai katoaia e te ariki o Babulonia e Nebukanesa ra, ka apai tuikaaʼi aia ia Iekonia, te tamaiti a Iehoiakima, ariki no Iuda, mei Ierusalema atu e Babulonia roa ra, e te aronga nunui katoa no Iuda, e no Ierusalema ra:

21 Te na ko maira oki a Iehova Sabaota ra, te Atua no Iseraela, i te au āriki i toe i roto i te are o Iehova, e i te are o te ariki o Iuda, e i Ierusalema;

22 E apaiia ïa ki Babulonia, e ei reira ratou vai ei, e tae ua atu ki te rā e atoro atu ei au ia ratou, te tuatua mairā Iehova; ei reira au e rave mai ei ia ratou, e akaoki mai ia ratou ki teianei ngai.