Hagai

2 I TE itu o te marama, e te rā e rua ngauru ma tai i taua marama ra, i tae mai ei te tuatua a Iehova i te peroveta ra ia Hagai, na ko maira,

2 Kua tuatua ana kia Zerubabela, te tamaiti a Salatiela, e tutara no Iuda, e kia Iosua te tamaiti a Iosedeka, i te taunga maata ra, e te toenga o te au tangata ra, e na ko atu,

3 Koai tei toe i rotopu ia kotou na ko tei kite i teianei are i tona kakā i muatangana ra? e eaa ta kotou e akara ana i tenana? Kare ainei teia mei te mea puapinga kore i tera, i to kotou na mata?

4 I tenana ra, e akamaroiroi, e Zerubabela, te tuatua mairā Iehova; e akamaroiroi oki, e Iosua, te tamaiti a Iosedeka, te taunga maata ra; e akamaroiroi katoa kotou, e te au tangata ravarai o te enua nei, te tuatua mairā Iehova, e ka rave i te angaanga: tei ia kotou katoa ana oki au, te tuatua mairā Iehova Sabaota ra.

5 Te koreromotu taku i papau ia kotou, ka aere mai ei kotou mei Aiphiti ra, e taku Vaerua tei ia kotou rai i te vaoo angaia, auraka e mataku.

6 Te na ko maira oki a Iehova Sabaota ra, Okotai toe, kare e mamia, e akangaueue ei au i te au rangi, e te enua, e te moana, e te one marō:

7 E naku e akangaueue i te au enua katoa ra, e e tae mai tei inangaroia e te au enua katoa ra: e akaki oki au i teianei are ki te kakā, te tuatua mairā Iehova Sabaota ra. 8 Naku te ario, e naku rai te auro, te tuatua mairā Iehova Sabaota ra.

9 Te kakā o teianei are openga, e maata ïa i to tei muatangana ra, te tuatua mairā Iehova Sabaota ra: e ei teianei ngai au e oronga atu ei i te au, te tuatua mairā Iehova Sabaota ra.

10 I te rā e rua ngauru ma a, i te marama iva, i te mataiti rua o Dariu, i tae mai ei te tuatua a Iehova i te peroveta ra ia Hagai, na ko maira,

11 Te na ko mairā Iehova Sabaota ra, Ka ui ana i te ture ki te kau taunga, e na ko atu,

12 Kia apai te tangata i te kai tapu ki roto i tona tapa kakau, e kua tukia akera tona tapa kakau i te manga, e te kai tunu, e te wina, e te inu, e tetai kai ke ake, kua tapu ainei ïa? Kua tuatua maira te kau taunga, na ko maira, Kare.

13 E kua karanga aturā Hagai Ko te tangata i viivii i te tangata mate ra, kia tukia i tetai i taua au mea ra, e viivii ainei ïa? Kua tuatua maira te kau taunga, na ko maira, E viivii ïa.

14 Kua tuatua mairai a Hagai, na ko maira, Mei te reira katoa teianei au tangata, mei te reira oki teianei enua, ki mua iaku nei, te tuatua mairā Iehova, e mei te reira rai oki te au angaanga katoa a to ratou rima, e tei apaiia e ratou ki reira, e mea viivii ïa.

15 E teianei, teia taku tuatua ia kotou, E akamaaraara ana, mei teianei rā e i muri atu oki, kare i akamouia tetai toka ki rungao i tetai i te nao o Iehova.

16 Mei te reira au rā mai, ka tae ei te tangata ki te putunga okotai takau aite ra, okotai ngauru ua i kitea; kia aere tetai ki te taomianga wina ra, e akataʼe mai i nga āriki e rima ngauru ra, okotai takau ua i reira.

17 Kua pāpā au ia kotou i te kai kopā, e te pueka, e te ua toka, i te au angaanga katoa a to kotou rima; kare ra kotou i ariu mai kiaku, te tuatua mairā Iehova.

18 Teia taku tuatua, E akamaaraara ana kotou mei teianei rā e i muri atu oki, mei te rā e rua ngauru ma a i te marama iva ra, mei te rā mai i akamouiaʼi te pange i te nao o Iehova, ka akamaaraara ana.

19 Te vai nei rai ainei te ua i roto i te are vairanga? Kare rai oki te vine, e te suke, e te remuna, e te olive, i ua mai: mei teianei rā ra au e akameitaki atu ei ia kotou.

20 Kua tae akaou maira oki te tuatua a Iehova kia Hagai, i te rā e rua ngauru ma a o taua marama ra, na ko maira,

21 Ka tuatua ana ki te tutara o Iuda, kia Zerubabela, e na ko atu, E akangaueue au i te au rangi e te enua;

22 E e uritumu au i te terono o te au basileia, e te ririnui o te au basileia, i te au enua ra, e pou ïa iaku; e e tatipoki au i te au kariota, e te aronga i noo ki roto ra; e te au oroenua ma te au akaoro ra, e inga ïa ki raro, ratou ravarai ki te koke a tona uaorai taeake.

23 Ei taua rā ra, te tuatua mairā Iehova Sabaota ra, e rave ei au ia koe, e taku tavini, e Zerubabela, te tamaiti a Salatiela, te tuatua mairā Iehova, e e akariro au ia koe mei te akairo; ko koe oki tei ikiia e au ra, te tuatua mairā Iehova Sabaota ra.