“Tei Ko na A ia Kotou”

“Kua tuatua iora te karere a Iehova: . . . Tei ko na au ia kotou, te tuatua mairā Iehova.”​—HAGAI 1:13.

1. Ki teea tu aiteite o te totou ta Iesu i tou atu ei no to tatou tuatau?

TE NOO nei tatou i roto i tetai tuatau puapinga maata tikai i roto i te tuatua enua. Tei akapapuia e te akatupuanga o te totou Pipiria, mei te 1914 te noo nei tatou i “te rā o te Atu ra.” (Apokalupo 1:10) Penei kua apii ana koe i teia manako, e no reira kua kite koe e kua akaaite a Iesu i “te tuatau o te Tamaiti a te tangata nei” ma te mana Patireia ki “te tuatau ia Noa ra” e “te tuatau ia Lota ra.” (Luka 17:26, 28) Te akakite maira te Pipiria i reira e e tu aiteite to teia totou. Inara, te vai atura tetai tu aiteite ke mai tei tau i to tatou akamanako anga pakari tikai.

2. Eaa te angaanga ta Iehova i oronga kia Hagai raua ko Zekaria?

² E akamanako ana tatou i tetai turanga tei tupu i te au tuatau ki muri o te au peroveta Epera ko Hagai raua ko Zekaria. Eaa te karere ta te reira nga peroveta tiratiratu i oronga mai e e akonoanga taka meitaki to te reira no to Iehova iti tangata i to tatou tuatau nei? E ‘nga karere no Iehova’ a Hagai raua ko Zekaria ki te ngati Iuda i muri ake i to ratou oki atu anga mei te tuikaa i Babulonia. Kua akaueia raua kia akapapu i te ngati Iseraela i ta te Atua turuanga i te patu akaou anga i te iero. (Hagai 1:13; Zekaria 4:8, 9) Noatu e poto ua te au puka ta Hagai raua ko Zekaria i tata, e tuanga ra te reira no “te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra.”​—2 Timoteo 3:16.

Kia Akamanako Tatou i te Reira

3, 4. No teaa ra te au karere a Hagai raua ko Zekaria ei mea inangaroia kia tatou?

³ E tikai, e puapinga te au karere a Hagai raua ko Zekaria ki te ngati Iuda o to raua tuatau, e kua akatupuia ta raua totouanga i taua taime ra. Inara, eaa, i papu ei ia tatou e ka tau teia nga puka ei akamanakoanga no tatou i teia tuatau? Ka kite mai tatou i tetai akakiteanga ia Ebera 12:26-29. I reira te taiku ra te apotetoro ko Paulo mei ia Hagai 2:6, te tuatua ra i to te Atua ‘akangaueue anga i te au rangi, e te enua.’ I te openga ra ka riro te akangaueue anga i te ‘uritumu i te terono o te au basileia, e te ririnui o te au basileia, i te au enua ra.’​—Hagai 2:22.

⁴ I te taiku anga ia Hagai, kua akakite a Paulo i te ka tupu ki “te au basileia, i te au enua ra” e kua tuatua no runga i te tu teitei o te Patireia ngaueue kore te ka rauka i te au Kerititiano akatainuia. (Ebera 12:28) Ka kite ua koe mei teia e te tou ra te au totou a Hagai raua ko Zekaria ki tetai tuatau roa ki mua i te tataia anga te puka a Ebera i te anere mataiti mua o to tatou Tuatau Noa Nei. Te vai nei rai i runga i te enua tetai toenga o te au Kerititiano akatainuia, e aronga tuangaia ratou no te Patireia o te Mesia ma Iesu. No reira, e puapinga te puka a Hagai raua ko Zekaria ki to tatou tuatau.

5, 6. Eaa te tupuanga tei taki atu ki te angaanga a Hagai raua ko Zekaria?

⁵ Te oronga maira te puka a Ezera i etai tupuanga no te tuatua enua. I muri ake i te oki atu anga te ngati Iuda mei te tuikaa i Babulonia i te 537 M.T.N., kua akaaere te Kavana ko Zerubabela e te Taunga Maata ko Iosua (me kore ko Iesua) i te tukuanga i te tango o te iero ou ki raro i te 536 M.T.N. (Ezera 3:8-13; 5:1) Noatu e kua riro te reira ei tupuanga no te rekareka maata, kare i roaia ana, kua akamata te ngati Iuda i te mataku. Te au enemi, koia ‘te au tangata o taua enua ra,’ i karanga ei a Ezera 4:4, ‘kua akaparuparu maira i te rima o to Iuda, e kua taeko iora ia ratou i te patu anga ra.’ Taua au enemi, te au Samaria tikai, kua akaapa pikikaa i te ngati Iuda. Kua akakeu teia aronga patoi i te ariki o Peresia kia arai i te angaanga patuanga i te iero.​—Ezera 4:10-21.

⁶ Kua kore ua te tu oraora i te akamataanga no te angaanga i te iero. Kua oki akaou te ngati Iuda ki to ratou au inangaro uaorai. Inara, i te 520 M.T.N., e 16 mataiti i muri mai i te tukuia anga te tango no te iero ki raro, kua akatu mai a Iehova ia Hagai raua ko Zekaria kia akakeu i te iti tangata kia akamata akaou i te angaanga i runga i te iero. (Hagai 1:1; Zekaria 1:1) Akakeuia e te nga karere a te Atua e te rauka papu meitaki anga i ta Iehova turuanga, kua akamata akaou te ngati Iuda i te angaanga i runga i te iero e kua akaoti mai i te reira i te 515 M.T.N.​—Ezera 6:14, 15.

7. Eaa te tu aiteite o te turanga i te tuatau o te au peroveta ki te au tuatau i teia nei?

⁷ Kua kite ainei koe i te puapinga maata o teia au apinga katoatoa no tatou? E angaanga ta tatou te piri atura ki te tutu anga i te “evangelia o te basileia nei.” (Mataio 24:14) Kua orongaia te akaketaketa maata ki taua angaanga i muri mai i te Tamaki I o te Ao. Mei te ngati Iuda taito rai i tukunaia mai mei te tuikaa tikai i Babulonia, kua matara mai to Iehova iti tangata i teia tuatau mei te tuikaa kia Babulonia Maata, te patireia akonoanga pikikaa o te ao nei. Kua akono pakari te aronga akatainuia o te Atua ia ratou uaorai ki te angaanga no te tutuanga, te apiianga, e te aratakianga i te au tangata ki te akamori mou. Te aere nei rai taua angaanga i teia tuatau inara ma tetai tu maata rava atu, e penei te piri nei koe ki roto i te reira. Ko teia te taime kia raveia te reira, no te mea te vaitata ua maira te openga o teia akatereanga kino! Kia rave uaia atu rai teia angaanga i akaueia mai e te Atua e tomo ua mai a Iehova ki roto i te au angaanga a te tangata i te “mate maata.” (Mataio 24:21) Na te reira e akaatea i te kino e te akatika atu i te akamori mou kia tupu ruperupe tikai i te enua nei.

8. Eaa i papu ei ia tatou ta te Atua turuanga no runga i ta tatou angaanga?

⁸ Mei ta te au totou a Hagai raua ko Zekaria e akaari maira, kua papu ia tatou ta Iehova turuanga e te akameitakianga ia tatou e piri ngakau katoa ra i roto i tana angaanga. Noatu te au tautaanga a tetai i te tapu i te au tavini o te Atua me kore i te arai i ta ratou angaanga i tukuia, kare i rauka ana i tetai kavamani i te tapu i te tere anga ki mua o te angaanga evangeria. E akamanako ana e akapeea a Iehova i te akameitaki anga i te angaanga Patireia ma te tupuanga i te au ngauru mataiti aru mai i te Tamaki I o te Ao e tae roa mai ki to tatou tuatau. Inara, e maata rai, te vai ra kia raveia.

9. Ki teea turanga taito ka tau tatou i te oronga i te manakoanga, e no teaa ra?

⁹ Akapeea ta tatou i tamou mai mei ia Hagai raua ko Zekaria e akakeu maata rava atu ia tatou kia akono i te akauenga tu-Atua kia tutu aere e kia apii atu? I na, e akamanako ana tatou i tetai au apiianga ka rauka mai ia tatou mei teia nga puka Pipiria e rua. Ei akaraanga, e akamanako ana i etai akakiteanga te piri atura ki te angaanga patuanga i te iero tei rauka i te ngati Iuda akaoraia i te rave. Mei tei akakiteia, kare te ngati Iuda tei oki atu ki Ierusalema mei Babulonia i tamou marie i roto i ta ratou angaanga i runga i te iero. I muri mai i te tukuanga i te tango, kua unui ratou ki muri. Eaa te manakoanga tarevake tei tupu i rotopu ia ratou? E eaa ta tatou ka kite mai mei te reira?

Rauka Anga te Manako Tano

10. Eaa te akamanakoanga tarevake tei tupu ki te ngati Iuda, e eaa tei tupu mai?

¹⁰ Te karanga ra te ngati Iuda akaoraia: “Kare i tae te tuatau.” (Hagai 1:2) I te akamata anga ratou i te angaanga patuanga i te iero, i te tukuanga i te tango ki raro i te 536 M.T.N., kare ratou i karanga ana e “kare i tae te tuatau.” Inara kua viviki ratou i te tuku i te patoianga mei te au pa enua i te pae mai e te araianga mei te kavamani i te akakeu ia ratou. Kua akamata te ngati Iuda i te tuku maata i te akaketaketaanga ki runga i to ratou uaorai au are e to ratou uaorai au inangaro. Te akamanako anga i te tuke i rotopu i to ratou uaorai au are apapaia ma te au rakau meitaki e te iero kare i oti i te maaniia, kua ui atu a Iehova: “E kotou e, ko te tuatau ainei teia kia noo kotou ki roto i to kotou au are apapaia ra, e e vaoo tanea uaia teianei are?”​—Hagai 1:4.

11. No teaa ra a Iehova i ako atu ei i te ngati Iuda i to Hagai tuatau?

¹¹ Ae, kua taui te manako o te ngati Iuda e eaa te mea puapinga maata. Kare i tuku ana na mua i to Iehova akakoroanga kia patu akaouia te iero, kua akamou te iti tangata o te Atua ki runga ia ratou uaorai e to ratou au ngai nooanga. Kua akarukenaia te angaanga i te are akamorianga o te Atua. Ta Iehova tuatua i rekotiia ia Hagai 1:5 kua akamaroiroi i te ngati Iuda kia ‘akamaaraara ana i to ratou au aerenga.’ Te akakite ra a Iehova kia ratou kia tapu ana e kia akamanako oonu no runga i ta ratou e rave ra e kia akamanako e akapeea ratou i te takino angaia no te kore e tuku i te angaanga patuanga i te iero e ko te apinga maata i roto i to ratou oraanga.

12, 13. Akapeea a Hagai 1:6 i te akataka mai anga i te turanga o te ngati Iuda, e eaa te aiteanga o taua irava ra?

¹² Me akamanako ua koe, te manako tarevake anga te ngati Iuda i te au apinga e ko te mea maata kua takino tikai ia ratou uaorai. E akara ana i to te Atua manako tei akakiteia mai ia Hagai 1:6: “E maata ta kotou i ruru, e iti ra tei apaiia mai; kua kai kotou, kare ra i merengo; kua inu kotou, kare ra kotou i ki i tei inumia ra; kua kakau kotou i te kakau, kare ra tetai i maana; e tei rauka iaia te tutaki ra, i rauka ïa no te pute motumotu ra.”

¹³ Tei roto te ngati Iuda i te enua ta te Atua i oronga kia ratou, inara kare te reira e tupu ana mei ta ratou i inangaro ana kia tupu. Te tapu ra a Iehova i tana akameitakianga, mei tana rai i akamatakite i mua atu ana. (Deuteronomi 28:38-48) No tei ngere i tana turuanga, kua tatanu te ngati Iuda i te ua inara e meangiti ua te kokotianga, kare i rava te kai i te akamerengo ia ratou. Te ngereanga i tana akameitakianga, kare i rauka ana ia ratou i te kakau ia ratou uaorai ma te au kakau maana. I te akaraanga katoa mei te mea rai ta ratou moni e rauka maira e kua aere ua ki roto i tetai pute motumotu ra, ma te kore e puapinga ki te aronga angaanga moni. Eaa te aiteanga o te tuatua: “Kua inu kotou, kare ra kotou i ki i tei inumia ra”? Kare e te karanga e kia kona i te kava e te akaari maira i ta te Atua akameitakianga; e akaapa ana aia i te kona kava. (1 Samuela 25:36; Maseli 23:29-35) Mari ra, e aiteanga ke atu to te tuatua te tou ra ki te ngere anga i ta te Atua akameitakianga ki runga i te ngati Iuda. Tetai ua atu uaina ka maani ratou ka kotingaia, kare e rava ana kia akatupu i te kona kava. Te uri ra te Revised Standard Version ia Hagai 1:6: “Ka inu koe, inara kare roa koe e merengoia.”

14, 15. Eaa te apiianga ta tatou i mou mai mei ia Hagai 1:6?

¹⁴ Te apiianga ka tau tatou kia tamou mai mei taua au apinga katoatoa ra koia oki kare no runga i te maani anga me kore te akamanea anga i te are. I mua roa ake i te tuikaaanga, kua ako te peroveta ko Amosa i te aronga moni i Iseraela no to ratou “au are nio elephana” e to ratou ‘moe anga ki runga i te roi nio elephana.’ (Amosa 3:15; 6:4) Te au are manea tikai e te au apinga akamaneaia kare i roa te vai anga. Kua keiaia taua au apinga e te au enemi tei autu. Inara, i te au mataiti i muri roa mai, i muri ake i tetai tuikaaanga e 70 mataiti, kare rai te manganui o te iti tangata o te Atua i tamou mai ana mei teia tupuanga. Ka akapera ainei tatou? E mea tau no tatou tataki tai kia ui: ‘Ko te tika, eaa te maata i te akamanakoanga taku e tuku ra ki runga i toku are e to te reira akamaneaanga? Akapeea te akapapaanga kia maata atu te apiianga te ka akatere atu i tetai angaanga no te oraanga, noatu e te raveanga i te reira ka akapou maata i te tuatau no tetai au mataiti, te opara anga ki vao te au apinga puapinga o toku oraanga pae vaerua?’​—Luka 12:20, 21; 1 Timoteo 6:17-19.

¹⁵ Ta tatou e tatau ra ia Hagai 1:6 ka akakeu ia tatou i te akamanako i to tatou inangaro no ta te Atua akameitakianga i roto i to tatou oraanga. Kua ngere taua au ngati Iuda taito ra i te reira, ki to ratou uaorai kino. Me e maata ta tatou au apinga i te pae kopapa me kare, me kare e rauka ia tatou ta Iehova akameitakianga, ka riro te reira ei kino tikai ki to tatou tu pae vaerua. (Mataio 25:34-40; 2 Korinetia 9:8-12) Inara, akapeea e rauka ai ia tatou taua akameitakianga?

Tauturu a Iehova na Roto i Tona Vaerua Tapu

16-18. I roto i to te reira aerenga tuatua taito, eaa te aiteanga o Zekaria 4:6?

¹⁶ Te taeake peroveta o Hagai, ko Zekaria, kua akakeuia kia akamarama i te ravenga tikai i akakeu ei e i akameitaki ei a Iehova i te aronga tiratiratu i taua tuatau ra. E te akaari maira teia e ka akapeea aia me akameitaki katoa ia koe. Ka tatau tatou: ‘Kare i te ririnui, kare rai i te mana, na taku vaerua ra, te tuatua mairā Iehova Sabaota ra.’ (Zekaria 4:6) Penei kua rongo putuputuia ana teia irava i te taikuia anga, inara eaa to te reira aiteanga no te ngati Iuda i te au tuatau o Hagai raua ko Zekaria, e no reira eaa to te reira puapinga kia koe?

¹⁷ E akamaara e e akakeuanga umere tikai to te au tuatua akauruia a Hagai raua ko Zekaria i taua tuatau ra. Ta te reira nga peroveta i tuatua kua akamaroiroi akaou i te ngati Iuda tiratiratu. Kua akamata a Hagai i te totou i te ono o te marama o te 520 M.T.N. Kua akamata a Zekaria i te totou i te varu o te marama o taua mataiti. (Zekaria 1:1) Mei taau e kite ra mei ia Hagai 2:18, kua akamata akaou te angaanga i runga i te tango ma te ngakau tae tikai i te iva o te marama. E no reira kua akakeuia te ngati Iuda kia angaanga, e kua akarongo ratou ia Iehova ma te irinaki papu i roto i tana turuanga. Te au tuatua ia Zekaria 4:6 te tuatua ra i ta te Atua turuanga.

¹⁸ I te oki atu anga te ngati Iuda ki to ratou enua anau i te 537 M.T.N., kare o ratou pupu vaeau. Kareka ra, kua paruru a Iehova ia ratou e kua arataki ia ratou i to ratou tere mei Babulonia mai. E te akatere ra tona vaerua i te au mea i to ratou akamata anga i te angaanga ki runga i te iero i muri poto ua mai. Me akamata roa ana ratou i te angaanga akaou ma te ngakau tae tikai, ka paruru aia ia ratou na roto i tona vaerua tapu.

19. Eaa te akakeuanga pakari ta te vaerua o te Atua i autu?

¹⁹ Na roto i tetai au putunga orama e varu, kua akapapuia kia Zekaria e ka noo a Iehova ki tona iti tangata, e ka akono tiratiratu ratou i te angaanga i te iero e oti ua atu. Te a o te orama, tei rekotiia i roto i te pene 3, te akaari maira e te maroiroi ra a Satani i te patoi anga i te au tautaanga a te ngati Iuda kia akaoti i te patuanga o te iero. (Zekaria 3:1) Kare roa a Satani e rekareka i te kite anga i te Taunga Maata ko Iosua i te rave anga i te au angaanga no tona iti tangata i te iero ou. Noatu e kua maroiroi te Tiaporo i te tapu anga i te ngati Iuda mei te patu anga i te iero, e tuanga maata ta te vaerua o Iehova i roto i te akaatea anga i te au arai e te akamaroiroi anga i te ngati Iuda kia tere ki mua e oti roa atu te iero.

20. Akapeea te vaerua tapu i te tauturu anga i te ngati Iuda kia akono i to te Atua anoano?

²⁰ Te akara anga mei te mea e e aka araianga maata tikai te patoianga, e aere maira mei te au opita maata o te kavamani tei rauka i te tuku i tetai araianga ki runga i te angaanga. Inara, kua taputou a Iehova e ko teia “maunga” i te akaraanga ka akaateaia e ka riro mai ei “ngai marena ua.” (Zekaria 4:7) E kua tupu rai te reira! Kua rave te Ariki ko Dariu I i tetai kimikimianga e kua kite mai i tetai akakiteanga a Kuro te akatika ra i te ngati Iuda kia patu akaou i te iero. E no reira kua akakore a Dariu i te araianga e kua akaue e kia orongaia te moni mei te pia moni a te ariki ki te ngati Iuda i te tauturu i te tutaki i te au moni ka pou no te angaanga. Ma teaa atura te tauianga maata rava! E tuanga angaanga ainei ta te vaerua o te Atua i roto i teia? Papu ia tatou e ko te reira ia. Kua oti mai te iero i te 515 M.T.N., te ono marama o te tutaraanga a Dariu I.​—Ezera 6:1, 15.

21. (a) I te au tuatau taito, akapeea te Atua i te ‘akangaueue anga i te au enua ravarai,’ e akapeea “tei inangaroia e te au enua katoa ra” i te aere anga mai ki vao? (e) Eaa te akatupuanga i teia tuatau nei?

²¹ Ia Hagai 2:5, kua akamaara te peroveta i te ngati Iuda i te koreromotu ta te Atua i akanoo kia ratou i te Maunga i Sinai e “kua ngaueue roa atura taua maunga katoa ra.” (Exodo 19:18) I te au tuatau o Hagai raua ko Zekaria, te aere ra a Iehova i te akatupu akaou i tetai tauianga maata, mei tei akatakaia i roto i te reo akatutu i te irava 6 e te 7. Ka akangaueueia te au angaanga pa enua i roto i te Patireia o Peresia, inara ka tere ua atu te angaanga i te iero ki to reira akaotianga. Taopenga mai te au aronga kare i te ngati Iuda, “te au mea inangaroia o te au pa enua ravarai,” ka akakaka kapiti i te Atua ma te ngati Iuda i roto i taua ngai akamorianga. Na roto i tetai tu maata i to tatou tuatau, kua ‘akangaueue te Atua i te au pa enua ravarai,’ na ta tatou tutu anga Kerititiano, e kua aere mai “tei inangaroia e te au enua katoa ra” ki roto i te akamori anga i te Atua i te pae mai i te toenga o te au aronga akatainuia. E tika tikai, te akaki kapiti nei te aronga akatainuia e te mamoe ke i to Iehova are ki te kaka. Te tiaki nei taua aronga akamori mou ra ma te akarongo i te tuatau e ‘akangaueue ei a Iehova i te au rangi e te enua’ na roto i tetai atu tu ke. E rauka ai i reira i te uritumu e te akapou i te ririnui o te au patireia o te au enua.​—Hagai 2:22.

22. Akapeea te au enua ravarai i te ‘akangaueueia anga’ e ma teea te tupuanga, e eaa te ka tupu mai?

²² Te akamaaraia maira tatou i te manamanata tei tupu i roto i te au apinga tuke aere i akatutuia e “te au rangi, e te enua, e te moana, e te one marō.” Ko tetai tuanga, kua uriia mai a Satani te Tiaporo e tana au temoni ki runga i te enua nei. (Apokalupo 12:7-12) Kapiti katoa, te tutu anga rave maataia e te aronga akatainuia o te Atua kua akangaueue tikai i te au apinga o te enua o teia akatereanga o te au mea nei. (Apokalupo 11:18) Noatu te reira, kua piri mai te “aronga maata rava” tei inangaroia e te au enua katoa ra ki te Iseraela pae vaerua i te tavini anga ia Iehova. (Apokalupo 7:9, 10) E angaanga ana te aronga maata rava i te pae mai i te au Kerititiano akatainuia i te tutu anga i te tuatua meitaki e kare e roaia ka akangaueue te Atua i te au pa enua ravarai i Aramakito. Ka akatuera taua tupuanga i te mataara no te akamori mou kia apainaia mai ki to te reira akaotianga meitaki i te enua katoa.

Maara Ainei ia Koe?

• I naea e i raro i teea au turanga i tavini ei a Hagai raua ko Zekaria?

• Akapeea koe i te akono anga i te karere ta Hagai raua ko Zekaria i akakite mai?

• Eaa te mea akamaroiroi taau i kite mai ia Zekaria 4:6?

[Au Tutu i te kapi 20]

Te akapapu maira te au tataanga a Hagai raua ko Zekaria kia tatou i ta te Atua turuanga

[Tutu i te kapi 23]

“E kotou e, ko te tuatau ainei teia kia noo kotou ki roto i to kotou au are apapaia ra, e e vaoo tanea uaia teianei are?”

[Tutu i te kapi 24]

Te piri atura te iti tangata o Iehova i te itae anga i ‘tei inangaroia e te au enua ra’