Isaia

60 KA TU ki runga, kia mārama koe, kua tae mai oki toou mārama, e kua iti mai te kakā o Iehova ki runga ia koe.

2 I na oki, e tapokiia oki te enua nei e te poiri, e te au tangata i te poiri tangotango ra: e iti mairā Iehova ki runga ia koe, e kitea ua ïa mai oki tona kakā ki runga ia koe ra.

3 E aere mai oki te pa enua ki toou ra mārama, e te au ariki oki ki te kakā o toou ra kake anga ki runga.

4 Ka nānā ana i to mata ki runga e akara e pini ua ake; kua putuputu katoatoa mai ratou, e aere mai ratou kia koe ra: e tae mai to au tamariki tamaroa mei te ngai mamao mai, e to au tamaine e apai taokupuia mai ïa.

5 Ei reira koe e kite ei, e e rekareka oki, e ruketekete oki to ngakau, e ka akamaataia; ka akaariuia mai oki te maata o te moana kia koe ra; ka tae mai te au apinga no te au enua kia koe ra.

6 E kapi koe i te rainga o te kamela, te au kamela ou no Midiana e no Epha; ko ratou katoa to Seba i te aere anga mai: e apai mai ratou i te auro e te atinga kakara; e ka akakite ratou i te akameitaki ia Iehova.

7 E akaputuputu anakeia mai te au anana i Kedara ia koe; e riro oki te au mamoe toa i Nebaiota ia koe: e tae ratou ki runga i taku atarau ma te marekaia mai, e toku are manea, naku rai e akamanea.

8 Koai ra teia e tere nei mei te tumurangi? e mei te aronga kukupa e rere i to ratou au vaarua?

9 E tapapa mai te au enua taatai iaku, e te au pai o Taresisa i te apai anga mai i to au tamariki mei te ngai mamao mai; ta ratou ario, e ta ratou auro katoa ra; no te ingoa o toou Atua ra, ko Iehova, e no Tei Tapu i Iseraela, kua akamanea oki aia ia koe.

10 E na te au tamariki a te au tangata ke ra e patu i taau au patu, e e raveraveia mai koe e to ratou au ariki ra: i pāpā oki au ia koe i toku riri nei, i toku takinga-meitaki ra e aroa atu ei au ia koe.

11 E amama ua to au ngutupa kare e tukumoe; i te po e te ao katoa kare e topiriia: kia apai mai ratou i te apinga o te pa enua kia koe, e kia aratakiia mai to ratou au ariki.

12 Ko te enua ra, e te basileia ra, kare e kauraro ia koe ra, e mate ïa; koia ïa, e akatanea ravaia ïa au enua.

13 Te kakā o Lebanona, te ka tae mai ïa kia koe, te berusi, te paina, e te tasura katoa; ei akamanea i toku ngai-tapu ra; e e akakakā au i toku takainga vaevae.

14 E te au tamariki a te aronga i takinga-kino mai ia koe ra, te ka aere mai ma te tupou ki raro ki mua ia koe ra; e te aronga katoa i akaviivii mai ia koe ra, ko te ka tipapa mai ïa ki raro i to tapuae: e tapa oki ratou ia koe, Ko te oire no Iehova; ko te Ziona o Tei Tapu i Iseraela nei.

15 Ko koe i akarukeia ra, e i ririia oki, kare akera e tangata i aere na rotopu ia koe ra, e akariro au ia koe ei akateitei anga mutu kore, e ei rekareka anga, i tera uki, i tera uki.

16 E ngote rai koe i te u o te pa enua ra, e ngote koe i te u o te au ariki ra; e kite oki koe e ko au nei toou Ora, ko Iehova; e ko tei Akaora ia koe ra, ko Tei Mana ïa ki o Iakoba nei.

17 E kauonoia mai e au te veo ki te auro; e kauonoia mai e au te auri ki te ario; e kauonoia mai te rakau ki te veo; e kauonoia mai te toka ki te auri: e akariro au i toou au akara ei au; e taau au rangatira ei tuatua-tika.

18 Kare te takinga-kino e kitea akaouia i toou ra enua, te pou, e te mate, i roto i toou ra kotinga; e tapa ra koe i taau ra au patu, Ko te ora ïa; e toou ra au ngutupa, Ko te akameitaki ïa.

19 Kare te rā e riro akaou ei mārama noou i te ao; e kare rai te marama e akamārama mai ia koe ki te mārama: e riro rā Iehova ei mārama mutu kore noou, e toou Atua ra, ko toou ïa manea.

20 Kare toou rā e opu akaou; e kare oki toou marama e mate akaou: e riro oki a Iehova ei mārama mutu kore noou, e toou au rā aue ra, e ope rava ïa.

21 E riro oki toou ra au tangata ei aronga tuatua-tika anake: e noo oki ratou i te enua e tuatau ua atu: ko te uri ïa i tanumia e au ra, e angaanga ïa na taku rima, kia akakakāia au ra.

22 E riro te mea ngiti okotai ei tausani; e ko tei mea ngiti poepoe ra, e riro ïa ei enua maroiroi: naku, na Iehova, e akarapurapu i te reira i tona tuatau.