1 Petero

5 TE ako atu nei au i te aronga orometua i roto ia kotou na, e taeake orometua katoa oki au, e kite oki i te au mate o te Mesia ra, e e rave katoa i te kakā e akakiteia mai a miri ake:

2 Ka angai i te anana a te Atua i roto ia kotou na, ka rave i te taoonga tiaki auraka ra no te akaueue, no te anoano ra; auraka no te apinga tika kore ra kia rauka, no te tae tikai ra o te ngakau;

3 Auraka ma te akaueue ua ki runga i te tuanga a te Atua ra, ei kaveinga ra kotou no te anana.

4 E kia mama mai te Tiaki maata ra, ka rauka ïa ia kotou te korona kakā ko te kore rava e maemae ra.

5 Ko kotou oki, e te aronga ou ra, ka kauraro kotou i te aronga pakari, e kotou ravarai oki ka kauraro ia kotou uaorai, e kia kakauia kotou i te akaaka; “e patoi te Atua i tei nengonengo, e oronga mai i te meitaki no tei akaaka.”

6 E tenana, ka akamoraro ia kotou uaorai i raro ake i te rima mana o te Atua, kia akateitei aia ia kotou i te tuatau tikai.

7 E uri i to kotou tumatetenga katoa ki runga iaia; koia oki te tiaki mai ia kotou.

8 E akono meitaki, e matakite, te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia:

9 Ko tei patoi atu ïa ma te akarongo turori kore, kua kite oki kotou e, tei to kotou au taeake katoa i te ao nei taua au mate ra.

10 Ko te Atua ra nona te aroa ua katoa nei, ko tei kapiki ia tatou no tona ra kakā mutu kore ia Iesu Mesia nei, kia roa iti ake to kotou mate, kia akameitaki rava aia ia kotou, kia tauturu mai, kia akamaroiroi mai, e kia akatinamou ia kotou.

11 Ei iaia te akameitaki, e te au, e tuatatau ua atu. Amene.

12 I tata poto ua atu na au i te tuatua ia kotou ia Siluano, ko taku ïa e manako nei e, e taeake tuatua-mou, i te ako anga atu, e te tuatua ua anga atu e, ko te aroa ua tikai teia o te Atua ta kotou e tāpu ana.

13 Te aroa atu nei to Babulonia i iki katoaia nei ia kotou; e ko taku tamaiti nei oki ko Mareko.

14 E aroa kotou tetai ki tetai i te ongi aroa ra. Ei au to kotou ravarai i roto i te Mesia ra ia Iesu. Amene.