Levitiku

22 KUA tuatua mairā Iehova kia Mose, na ko maira,

2 E karanga atu koe kia Aarona e ki ana puke tamariki, i ta ratou akataka ke anga i te au mea tapu a te tamariki a Iseraela, kia kore ratou e akanoa i toku nei ingoa tapu, i taua au mea ta ratou e akatapu naku ra: ko au ko Iehova. 3 E karanga atu koe kia ratou, Ko te tangata no to kotou uanga katoa e ope ua ake to kotou au uki ra, kia akavaitata atu aia i te au mea tapu, ta te tamariki a Iseraela e akatapu na Iehova ra, ma tona viivii ki rungao iaia ra, ka tipu keia ïa tangata i mua i toku aroaro nei: ko au ko Iehova. 4 E te tangata no te uanga o Aarona kia riro ei lepera, e tei makiia ra, auraka aia e kai i te au mea tapu ra kia mā ra aia. E tei tukia ua atu i tetai mea i viivii i te mea mate ra, e tei rokoia e te maki opî;

5 E tei tukia ua atu i tetai mea e totoro aere ua ra, e viivii ei aia ra, e i te tangata viivii e viivii mai ei aia ra, i tona au mea viivii katoa; 6 Ko te tangata ra i tukia ana i te reira, e viivii ïa aia e aiai ua atu, e auraka aia e kai i te au mea tapu, kia paî ra aia ki te vai.

7 E kia topa te rā ra, kua mā ïa aia i reira, e kai ïa aia i te au mea tapu i muri ake; no te mea ko tana ïa kai. 8 I te mea mate ua ra, e tei etietiia ra, auraka aia e akaviivii iaia uaorai i te keinga i te reira: ko au ko Iehova.

9 E teianei, e akono ratou i taku ra akonoanga, ko te araia aea ratou, e ko te mate aea, kia akanoa ratou i te reira ra; naku oki, na Iehova, i akatapu ia ratou.

10 Auraka roa te tangata ke e kai i te mea tapu ra: ko tei noo i o te taunga ra, e te tavini i ouia ra, auraka e kai i te mea tapu ra.

11 Kia oko ra te taunga i tetai tangata ki te moni, ka kai taua tangata ra, e tei anau i tona ra ngutuare: ka kai ïa ratou i tana kai.

12 Kia akaipoipo te tamaine a te taunga i tetai tangata ke, kare aia e kai i te au mea tapu i apaiia ra.

13 E vaine takaua ra taua tamaine a te taunga ra, e te vaine i kopaeia ra oki, e kare e tamariki, e kua oki mai ki te ngutuare o te metua tane ra, ka kai ïa aia i te kai a tona metua, mei tei tona ou anga ra: kare rava ra te tangata ke e kai.

14 Kia kai kite kore ua te tangata i te mea tapu ra, e kapiti katoa atu aia i tetai tuanga rima ki taua mea tapu ra, ka apai katoa atu ei ki te taunga ra.

15 Auraka oki ratou e akanoa i te au mea tapu a te tamariki a Iseraela, ta ratou e apai kia Iehova ra;

16 Auraka oki ratou e akateiaa ia ratou i te utunga o te ara i te kainga i te au mea tapu ra; naku oki, na Iehova, i akatapu ia ratou.

17 Kua tuatua mairā Iehova kia Mose, na ko maira,

18 Ka karanga atu koe kia Aarona, e ana puke tamariki, e te tamariki katoa a Iseraela, e na ko atu koe kia ratou, Kia inangaro to te ngutuare o Iseraela, e to te tangata ke ke i Iseraela, i te apai mai i tana atinga na te au tia katoa nana, e no te au mea apai ua katoa nana ra, ta ratou e apai ei atinga karakaratio na Iehova;

19 Ei toa kino kore kia marekaia mai ei, no roto i te puakatoro, no roto i te mamoe, e no roto i te puakanio.

20 Kareka te au mea kino ra, auraka kotou e apai i te reira: kare oki te reira e marekaia na kotou. 21 Ko te apai i te atinga au kia Iehova ra, e akaoti i te tia, e ei mea apai ua, no roto i te puakatoro, e no roto i te mamoe, ei mea kino kore kia marekaia mai ei; auraka roa ei kino.

22 Te matapo ra, e tei paruparu, e tei vaevae aati, e tei makiia, e tei pakaia, e tei uneia ra, auraka kotou e apai i te reira kia Iehova ra, auraka oki kia apaiia ki runga i te atarau ei atinga ai na Iehova.

23 E tika ra te puakatoro, e te mamoe, e kata, e e mea ngiti, kia apai ei mea apai ua; kareka ei tia, kare ïa e marekaia mai.

24 Auraka kotou e apai i tei pāii kia Iehova, e tei paruparu, e tei aati, e tei tatāia ra; auraka kotou e akapera i to kotou enua ra.

25 Auraka oki te reira au mea katoa e apaiia ei kai na to kotou Atua, kia apaiia mai e te tangata ke ra; kare te reira e ārikiia mai ia kotou, no te mea tei roto i taua au mea ra te pe, e te kino oki tei roto i te reira. 26 Kua tuatua mairā Iehova kia Mose, na ko maira,

27 Kia anau mai te puakatoro, e te mamoe, e te puakanio, ei te tinana uaorai te punua vaoo uaʼi, e kia po itu; e kia tae ki te po varu ra, e marekaia ïa mei reira mairai kia apai ei atinga ai na Iehova. 28 Auraka ra kotou e ta i te puakatoro tinana, e te mamoe tinana, e tana punua katoa i te rā okotai. 29 E kia apai kotou i te atinga akameitaki kia Iehova ra, e apai i te ka marekaia mai ei ra.

30 Ei taua rā ra kai ei; auraka kotou e vaoo i tetai vaʼi no apopo: ko au ko Iehova.

31 E teianei e akono kotou i taku ra au akauenga, e rave kotou i te reira: ko au ko Iehova.

32 Auraka katoa kotou e akanoa i toku ingoa tapu nei; e akatapuia ra au i roto i te tamariki a Iseraela: ko au ko Iehova, tei akatapu ia kotou,

33 Kua arataki mai oki ia kotou mei te enua maira mei Aiphiti, ei Atua au no kotou: ko au ko Iehova.